Santa dienst leki wan osofamiri
„Mi e begi oenoe tranga . . . foe pristeri oen skin leki wan srakti-ofrandi di de na libi, santa, switi na Gado, wan santa dienst nanga oen powa foe oen froestan.” — Romeini 12:1.
1, 2. (a) Sortoe marki wan kristen osofamiri moe doro foe doe „santa dienst” di Gado e feni boen? (b) Kari wantoe sani di ben sa kan trobi na „santa dienst” foe wan kristen osofamiri?
INI na kristen gemeente den e èrkèn na osofamiri leki na fundamenteel wanfasi. Efoe lobi, vréde nanga wanfasi de ini na oso-famiri-groepoe èn den sma foe na osofamiri e froestan na prenspari fasi foe doe „santa dienst” gi Jehovah, dan na osofamiri kan de wan moi positief krakti gi na kristen gemeente (Rom. 12:1). A de wan tjalansi foe bow èn hori tanapoe so wan osofamiri-groepoe.
2 Ini disi ten foeroe sani de di de kontra na boen waka foe na kristen osofamiri. Foe eksempre, man nanpa oema e feni en foeroetron fanowdoe foe abi wan wroko, sodati den abi nofo moni foe sorgoe na osofamiri. Ini na situwasi disi wan drifi komoto foe makandra ini na osofamiri kan kon. Sontron wan osofamiri, leki wan bakapisi foe na ongelijk soigri-krakti foe na seti foe sani, kan komoto a skroefoe leki wan bakapisi foe na lostoe foe den sma foe na osofamiri foe libi moro hé leki na stand foe den, na presi foe den poti prakseri tapoe na rai foe na bijbel foe de tevréde nanga „sorgoe nanga ondro wan dak” (1 Tim. 6:8, NBG) Na geest foe srefidensi nanga na lostoe foe ala sma foe doe san ensrefi e firi foe doe, na presi dati wan sma e wroko makandra, de ooktoe sani di e tjari prati fasi kon na mindri sma foe wan osofamiri na presi dati den e tranga na wanfasi nanga makandra. Ma wansi sortoe sani kan sori ensrefi, wan fasi foe doe de, di, te wi waka na en baka, kan de wan bigi jepi gi kristen osofamiri.
3. Wi e kisi rai foe waka baka sortoe libifasi?
3 Na libifasi disi e tjari kon na krin ini wortoe di taki ini na bergi-préki. Masra Jezus ben taki: „Tan soekoe dan fosi na kownoekondre nanga en regtvaardiki fasi, èn ala den tra sani disi joe sa kisi na tapoe” (Matt. 6:33). Ini na takimakandra disi wi sa loekoe moro fini san de ini na libifasi disi. Wi no sa loekoe den oso tori foe a osolibi, ma wi sa loekoe den positief stap di wan osofamiri kan doe foe soekoe na kownoekondre fosi èn foe meki go na fesi den sani di abi leki bakapisi wan kolokoe, lobifasi kristen osofamiri, wan osofamiri di e doe „santa dienst” gi Gado tapoe wan toemsi boen fasi.
’SOEKOE FOSI NA KOWNOEKONDRE’
4. Leki wan bakapisi foe sortoe toestand di wi ben kisi, meki wi abi leri fanowdoe foe sabi fa wi kan prisiri Jehovah? (Jer. 10:23)
4 Efoe wan sma meki wan sani kon na na fosi presi ini en libi, dan disi wani taki, dati a de gi en a fosi ofoe na moro prenspari sani ofoe nomroe wán. Jezus ben taki: „Efoe wan sma wani kon na mi baka, dan a no moe ke foe ensrefi, a moe teki en pina-oedoe dé na dé na en tapoe èn waka alaten na mi baka” (Luk. 9:23). Foe wan sma di de wan troe foetoeboi foe Jezus èn di no ke foe ensrefi, den e aksi dati a „soekoe na kownoekondre fosi”. Foe na onvolmaakti firi foe wi froestan èn foe wi ati ede, di wi ben kisi leki wan bakapisi foe sondoe foe sensi wi gebortoe, meki wi alamala moe kisi leri foe den sani di den e aksi foe wi, foe kan prisiri Gado (Gen. 8:21; Rom. 5:21). Wi moe kisi leri ’foe soekoe na kownoekondre fosi, foedi, efoe den libi wi na wisrefi abra, alaten wi sa soekoe fosi wi égi persoonlek lostoe nanga winsi. Foe datede meki Jehovah gi leri di e kon na wi nanga en Wortoe èn di e gi wi joisti tiri.
5. O bigi na programma ben de di Jehovah ben gi den Israëlsma ini owroeten foe leri den pikin leki fa Deuteronomium 6:6-9 taki?
5 Jehovah ben komanderi en pipel, di a ben teki, den Israëlsma foe owroeten, foe leri den pikin foe den en wèt nanga en komando. Den ben moe taki den leri disi ete wan tron te den ben de na oso, te den ben gwe foe oso, te den ben rostoe, èn te den ben wroko na fesi foe den pikin (Deut. 6:6-9). Na srefi komando de joisti gi osofamiri ini disi ten ini a doe foe „santa dienst” gi Gado. Te wi e kisi leri „foe soekoe fosi na kownoekondre”, dan wi e leri foe teki frantwortoe na wi tapoe. Wan foe den frantwortoe disi de foe prati sani nanga trawan.
PRATI SANI NANGA TRAWAN
6. (a) Na sortoe pisi foe wi frantwortoe foe prati sani nanga trawan, wi belangstelling e go moro foeroe? (b) O bigi na frantwortoe foe papa nanga mama de ini na tori disi? (c) Sortoe problema Paulus e kari ini 1 Korinte 2:14-16, èn san disi e tjari kon gi someni sma?
6 Wi no wani taki dja san a wani taki foe prati sani na skin fasi nanga trawan, wan libifasi di de prenspari toe foe troetroe kolokoe (Tori foe den Apostel 20:35). Na belangstelling foe wi e go foe gi trawan na okasi foe abi howpoe ini Gado kownoekondre neleki ala troe kristen. Wan foe den moro moi égifasi di wan papa ofoe mama kan prani ini na ati foe en pikin, de na lostoe foe prati na „boen njoensoe” foe na kownoekondre nanga trawan. Foe sensi jongoe jari kaba, pikinnengre kan kisi leri foe abi wan prati foe taki nanga trawan foe a „boen njoensoe foe na kownoekondre” (Matt. 24:14). Disi e aksi foeroe moeiti foe na sé foe den papa nanga mama, foedi na kownoekondre boskopoe de so, dati na moro bigi pisi foe den sma di den e gi na boskopoe, no e teki ofoe no wani teki en so esi. Dati doe kon foedi Satan, „a gado foe na seti foe sani disi”, ben breni na froestan foe den sma foe na „glori boen njoensoe foe a Kristus” (2 Kor. 4:4). Na apostel Paulus ben taki foe a fasi fa wi e doe wi frantwortoe foe meki na Kownoekondre-boskopoe bekenti èn na krakti di a abi te wi e doe disi: „Gado e gebroiki wi foe panja na sabi foe Kristus alape leki wan switi smeri. Bikasi wi de a wierook di Kristus e bron gi Gado, no wawan ondro den sma di e kisi ferloesoe, ma ooktoe ondro den di e go lasi. Gi den laatste wan, wan tingi smeri, di e tjari dede kon, ma gi den fosi wan, wan switi smeri di e tjari libi kon” (2 Kor. 2:14-16 Nw Testament in de omgangstaal). Na problema de, dati a moro bigi pisi foe a libisma-lo e si a toemsi prenspari boskopoe disi leki wan sani di e tjari dede kon, leki wan sani di den no kan teki. A kan de wan moeilek sani ofoe wan sani di kan gi brokoskin foe abi prati na a panja foe a boskopoe disi ondro den sortoe sma disi.
7. Sortoe dekati pikin abi fanowdoe, sodati den sa go doro foe poti na leri di den e kisi ini na libi foe den?
7 Disi e poti krakti tapoe a wroko foe kristen papa nanga mama foe kweki den pikin foe den foe abi wan prati na a „santa dienst” disi. Nanga a dienst disi a „sabi foe Kristus e panja, wan sabi di de gi wantoe sma wan sani foe bigi prisiri, ma di foeroe sma e trowe krinkrin. Papa nanga mama abi okasi nanga a verprekti foe kweki den pikin foe den foe sensi den jongoe jari, sodati den de srekasreka foe abi wan prati na a „santa dienst” disi èn foe meki bekenti a boskopoe foe Kristus èn a kownoekondre gi trawan. Pikin abi foeroe jepi fanowdoe foe froestan, dati wansi foeroe” sma e si a glori boskopoe foe Gado leki wan sani di e tjari dede, dati den leki jongoe prékima foe a „boen njoensoe” no moe lasi a prisiri nanga a faja foe den. Ooktoe den no moe saka den anoe èn den no moe stop foe tan doe morolanga „santa dienst” gi Jehovah. — 1 Kor. 9:16, 17.
8. (a) O prenspari na eksempre foe papa nanga mama de ini na doe foe „santa dienst”? (b) Foe sanede a boen te papa nanga mama abi wantronwantron foe doe nanga na kweki disi?
8 A de krin wantewante, dati papa nanga mama abi a hebi frantwortoe, di e tan, foe sori ini den libi a faja di den abi foedi den e teki prati alaten na a meki bekenti foe a kownoekondre. Den moe meki a tron leki wan pisi foe a égi gwenti foe den ini a libi foe teki makandra nanga den pikin foe den prati na a Kownoekondredienst èn no seni den alaten baka foe wroko ondro na sorgoe foe trawan. No wan tra sma kan teki na frantwortoe disi foe den papa nanga mama na den tapoe. Foe poti wan boen eksempre, de na moro boen fasi foe prani joisti marki nanga bewégi foe ati ini na ati foe pikin. Hori na komando foe na bijbel na prakseri: „Kweki wan pikin akroederi na pasi foe en; srefi te a kon owroe, a no sa drifi komoto foe en” (Odo 22:6). Foe kan gi wan joisti kweki, dan na papa ofoe mama — ofoe ala toe pe disi kan — moe de na den pikin foe den. Makandra leki osofamiri den moe doe „santa dienst”.
9. Kari 2 boen bakapisi foe teki prati na santa kownoekondredienst?
9 Na prati foe na „boen njoensoe” nanga trawan, no e gi wan sma wawan na satisfaksi foe sabi dati a de doe san Jehovah ben komanderi, ma a abi moro boen bakapisi ete. Papa èn mama e poti joisti marki gi den pikin foe den na den fesi, di den moe feti a den baka ini na libi. Dati na moro bigi pisi foe den jongoe wan e feti baka soso marki, no e gi den troetroe kolokoe, di e tan. Na feti baka wan marki di de switi ini na ai foe Jehovah, e tjari gado-libi nanga tevréde fasi, na moro warti sani di de. Aladi na grontapoe ini algemeen e doe bigi moeiti foe kisi tevréde fasi, dan osofamiri nang wan gadolibi ini na kristen gemeente e si dati a no de toemsi moeilek, efoe den wani teki na okasi. Foeroe mogelijkheid foe gi satisfaksi de. — Ef. 5:15, 16.
PIONIERDIENST
10. Fa ini na kristen osofamiri dekati kan gi foe go ini na pionierdienst, èn sortoe winimarki disi e tjari kon?
10 Ini na dienstjari 1980, dan moro leki 137.000 kotoigi foe Jehovah ini na heri grontapoe ben teki prati na wan ofoe tra vorm foe na foeroe-ten-diniwroko, na pionierdienst. A ben gi den sma disi satisfaksi foe abi so wan dorodoro prati na a meki bekenti foe na kownoekondre. Na vorm disi foe „santa dienst” ben gi den foeroe blesi foe Jehovah. Sontron a de so dati sma foe a osofamiri kan seti sani dati wan foe den go ini na foeroeten pionierwroko. Foe kan doro na marki disi, dan ibriwan sma ini na osofamiri sa moe offer wan sani kande, ma den paiman e meki disi de wan warti sani. Joe ben wegi go èn wegi kon na mogelijkheid ofoe wan foe den sma foe joe osofamiri ben kan teki prati na disi vorm foe „santa dienst”? Foeroe sma di no trow nanga man nanga oema di ben teki na pionierdienst na den tapoe, fosi leki jepipionier èn bakaten leki gewone ofoe speciale pionier, e si dati den de srefi ini na positie foe bradi na diniwroko foe den go na tra kontren foe „santa dienst”.
ZENDINGSDIENST
11. (a) Sortoe tra kontren foe „santadienst” foeroe sma ben go na ini? (b) O warti disi ben de ini a doe foe „santa dienst”?
11 Tapoe na Wachttoren-Bijbelskoro Gilead, di owroe kaba 38 jari, sma e kisi leri nanga sreka foe go na dorosé kondre, pe moi okasi de foe „soekoe fosi na Kownoekondre”. Foeroe kristen papa nanga mama ben de klari foe libi na prisiri foe abi den pikin foe den krosibé ini na birti foe den, ma den ben gi den tranga foe meki na diniwroko foe den kon moro bigi foe jepi tra sma ini tra kondre. Doesoen-doesoen brada nanga sisa di no trow, èn sosrefi toe man nanga oema di trow ben blesi nanga na grani foe doe zendingsdienst ini tra kondre. Den ben kon goedoe nanga foeroe blesi ini na vorm dati foe „santa dienst” èn den ben kan jepi foe panja na „boen njoensoe” go na den moro farawe pisi foe a grontapoe. Te nanga na dé foe tide, a de so dati sma di ben studeri komoto foe den fosi klas foe a Gileadskoro e doe dienst ini vreemde kondre èn ini foeroe geval den de na faste fondamenti foe na wroko di ben bigin someni tintron jari pasa kaba. Te joe e doe joe „santa dienst” leki osofamiri, joe de dan ini na positie foe gi dekati na wan ofoe moro foe joe pikin foe wegi na kontren disi foe wroko? — Mal. 3:10.
BETHELDIENST
12. Sortoe pisi Bethel kan pré ini na „santa dienst” foe son oso-famiri?
12 Tapoe na heri grontapoe, joe abi bijkantoro nanga Bethel-oso foe na Wachttorengenootschap, pe jongoe man nanga oema di gi densrefi krinkrin abra kan dini ini den jongoe jari na Mekiman foe den (Prékiman 12:1). Na vorm disi foe „santa dienst” e gi ooktoe foeroe prisiri na den sma di abi na koni foe dati, foedi den kan doe wan dienst foe na boen foe den brada nanga sisa foe den di e doe na préki- nanga leriwroko. Foeroe osofamiri ben blesi nanga na grani foe abi pikin ofoe famirman di e doe dienst ini wan Betheloso. Aladi wan sma di e wroko tapoe a kontren disi foe foeroe-ten-dienst, no kan teki prati na a srefi fasi na a publiki diniwroko leki pionier ofoe zendeling, tog den sma di e doe dienst na Bethel, e teki prati ooktoe na a préki foe oso foe oso èn na panja foe na Kownoekondre-boskopoe (Tori foe den Apostel 20:20). Boiti dati, den e doe toemsi prenspari dienst di e meki na grontapoe prékiwroko kan feni presi.
SAN JOE SA DOE?
13. Sortoe okasi e tan opo gi kristen osofamiri?
13 Paulus ben skrifi ini en brifi gi a gemeente foe Korinte dati a ben tan wan pisi ten ete ini Efese, foedi „wan bigi doro di e go na wroko ben opo gi en” (1 Kor. 16:9). Gi na pipel foe Jehovah ini disi ten wan bigi doro foe wroko, „santadienst” e tan opo-opo. Wi e libi ini na ten foe a laatste kontroe foe foeroe bijbel profétitori foe na „ten foe na kaba”, na ten pe a „boen njoensoe foe a Kownoekondre moe préki ini na heri grontapoe leki wan kotoigi (Dan. 12:4; Matt. 24:14). San den kristen osofamiri foe Jehovah Kotoigi sa doe? Na fanowdoe de toemsi tranga, foedi na ten de sjatoe. Mankeri no de foe sani di seti, bikasi Jehovah ben sorgoe foe en Wortoe na Bijbel nanga boekoe di na „getrow nanga koni srafoe” ben meki foe na boen foe sma di e frede Gado (Matt. 24:45-47). Sosrefi toe foeroe osofamiri de foe doe na wroko, èn Jehovah ben go doro foe poti doesoen-doesoen moro na a groepoe foe den sma di e teki prati na a meki bekenti foe na Kownoekondre. — Teki gersi Jesaja 60:22.
14. (a) Sortoe aksi di fiti, oso-famiri kan aksi densrefi? (b) Fa a doe kon dati wi kan firi wisrefi bekwaam (koni nofo) foe abi wan prati na a „santa dienst”?
14 Den aksi de foe datede: San joe e doe? Joe e teki na okasi di joe abi now, leki osofamiri èn ooktoe leki aparti sma foe doe „santa dienst” gi na Mekiman? Joe e gi tranga na trawan foe doe disi? Joe osofamiri-groepoe e sori dati a didon tapoe wan boen fundamenti èn dati sma foe na osofamiri wani foe meki den froktoe foe na Kownoekondre? Di Paulus ben taki foe na fanowdoe foe de leki wan switi smeri di no e go wawan na den sma di e kisi ferloesoe, ma di e go ooktoe na den sma di e go lasi, a ben go moro fara: „Soema de dan foe doe na wroko? Wi no de leki someni trawan di e meki a boskopoe foe Gado de wan handel sani; nono, wi e préki en nanga opregti prakseri, ma foedi Gado ben seni wi, ini a denoja foe en, leki dienstknekti foe Kristus.” — 2 Kor. 2:16, 17, TEV.
15, 16. (a) Fa son sma ben sa kan meki na prati foe den na a go na fesi foe den Kownoekondre-afersi kon moro bigi? (b) San de den blesi foe „santa dienst” di kon de moro foeroe?
15 Nanga na meki go na fesi foe lobi, vréde nanga wanfasi ini a osofamiri-groepoe, nanga a „soekoe fosi foe na Kownoekondre” èn foe gi na dati na moro bigi prenspari fasi èn nanga na go sidon foe bereken den kostoe, kristen osofamiri ben sa kan kon na a bosroiti, dati foe troe den kan abi wan moro bigi prati na a go na fesi foe na moro prenspari boskopoe di ben meki bekenti na a grontapoe disi, na „boen njoensoe” foe a kownoekondre di opo. Leki wan bakapisi foe den opregti moeiti ini wanfasi, den sa kisi na blesi foe Jehovah, èn a no e poti pen na tapoe den blesi di a de gi. — Odo 10:22.
16 Foe san-ede joe no e go sidon makandra leki osofamiri èn loekoe san joe e doe èn san joe kan doe? Te wi de opregti, dan na moro bigi pisi foe wi sa moe taki, dati wi leki osofamiri nanga pikinso moro moeiti kan meki na prati foe wi na a „santa dienst” foe Jehovah kon moro bigi. Hori ini prakseri dati Jehovah no e aksi moro foe wi dan de reti. Na lobi foe wi gi en, gi wi osofamiri, gi na libisma-famiri ini algemeen, moe gi wi dekati foe ondrosoekoe wisrefi èn foe si san wi ben sa kan doe. Go prakseri den difrenti pisi foe na „santa dienst” foe joe, joe glori diniwroko leki Kristus discipel (2 Kor. 4:7). Poti a tori ini begi na fesi foe Jehovah èn aksi foe den moeiti di joe e doe foe na tiri nanga jepi foe en. Now kaba joe sa kisi foeroe blesi makandra nanga gadofasi tevrédenfasi, aladi a ten di e kon abi na pramisi foe libi, di de troetroe libi, ini Gado njoen seti foe sani. — Matt. 25:34; 1 Tim. 6:6, 17-19.
PUNT DI KAN TAKI MAKANDRA LEKI WAN OSOFAMIRI
• Boiti na persoonlek gebroiki foe wi foe den wortoe foe Jezus ini Matteus 6:33 ini wi libi, foe sanede osofamiri moe broko den ede foe poti leki osofamiri den wortoe disi ini den libi?
• Fa joe kan abi wan moro bigi pisi na a osofamiri programma foe leri pikin foe prati na kownoekondre-boskopoe nanga trawan?
• Sortoe praktis seti foe sani joe kan denki ini joe osofamiri, di kan gebroiki ini joe osofamiri, sodati pikin kan abi wan dorodoro prati na a wroko disi?
• Sortoe spesroetoe sani foe „santa dienst” ben sa kan de reti marki gi joe ofoe wan tra sma foe na osofamiri?
• Fa den sma foe joe osofamiri ben sa kan wroko makandra, sodati moro pikinso wán foe oenoe ben sa kan doro so wan marki?
[Prenki na tapoe bladzijde 22]
Jongoe sma kan leri fanowdoe leri fa foe prati sani nanga trawan te den e go nanga den papa nanga mama di e prati a kristen boskopoe gi tra sma
[Prenki na tapoe bladzijde 23]
Doe dienst ini wan Bethel oso kan de wan fonten foe dipi satisfaksi. A de wan fanowdoe jepi gi na santa dienst na a heri grontapoe.
[Prenki na tapoe bladzijde 24]
Foeroe jongoe sma di e feni switi ini „santa dienst” nanga den osofamiri foe den, ben prisiri ini doe dienst leki wan foeroeten pionier bedinari