„Waarheid sa meki oenoe kon fri”
„Oenoe sa sabi waarheid, èn waarheid sa meki oenoe kon fri.” Na so Jesus ben meki bekènti di a ben gi leri na den ipi-ipi sma na ini a tempel na Jerusalem (Johanes 8:32). Den apostel foe Jesus ben kan si wantewante taki den leri foe Jesus ben de waarheid. Den ben si boen foeroe boeweisi taki a leriman foe den ben komoto foe Gado.
MA NA ini a ten disi, wan toe sma kan feni en wan moeilek sani foe kon sabi a waarheid di Jesus ben taki foe en. Neleki na ini a ten foe a profeiti Jesaja, na so joe abi sma na ini a ten disi „di e taki dati boen na ogri en ogri na boen, di e meki doengroe de leti èn leti tron doengroe, di e meki san bita de soekroe èn san soekroe de bita” (Jesaja 5:20). Foe di sma e horibaka gi foeroe sortoe denki, filosofia, nanga fasi foe libi na ini a ten disi, dati meki foeroe trawan e firi taki ala sani abi skotoe èn taki waarheid no de.
Di Jesus ben taigi den arkiman foe en taki waarheid ben sa meki den kon fri, den ben piki en: „Wi na bakapikin foe Abraham èn noiti wi ben de srafoe foe no wan sma. Fa joe kan taki dan: ’Oenoe sa kon fri’?” (Johanes 8:33) Den no ben firi taki den abi wan sma noso sani fanowdoe foe meki den kon fri. Ma dan Jesus ben tjari kon na krin: „Foe troe, foe troe mi e taigi oenoe, ibriwan sma di e doe sondoe, na wan srafoe foe sondoe” (Johanes 8:34). A waarheid di Jesus ben taki foe en, kan opo a pasi foe kon fri foe sondoe. Jesus ben taki: „Efoe a Manpikin e meki oenoe kon fri, dan oenoe sa fri troetroe” (Johanes 8:36). So boen a waarheid di e fri sma, na a waarheid foe Jesus Krestes, a Manpikin foe Gado. Soso nanga jepi foe bribi na ini na òfer foe Jesus volmaakti libi wan sma kan kon fri foe sondoe nanga dede.
Na wan tra okasi Jesus ben taki: „Santa den nanga jepi foe waarheid; joe wortoe na waarheid” (Johanes 17:17). A wortoe foe Gado soleki fa a de foe feni na ini bijbel, na waarheid di kan fri wan sma foe kroektoe bribi nanga falsi anbegi. Bijbel abi waarheid foe Jesus Krestes na ini, èn dati baka e jepi sma foe poti bribi na ini en èn e opo a pasi gi wan moi howpoe gi a tamara. A de wan kefalek moi sani foe kon sabi waarheid foe Gado Wortoe!
O prenspari a de foe kon sabi waarheid? Ala di na ini a ten disi foeroe relisi e taki dati den e gebroiki bijbel, tokoe libisma filosofia nanga libisma gwenti abi krakti na den tapoe. Foeroetron den relisi fesiman e broko den ede moro nanga a wani di den wani taki den ipi sma moesoe teki a boskopoe foe den, dan leki den e broko den ede nanga a de di a boskopoe moesoe de soifri. Son sma e firi taki Gado e feni ala sortoe fasi foe anbegi boen, solanga na anbegi e doe nanga wan opregti ati. Ma Jesus Krestes ben tjari kon na krin: „A joeroe e kon, èn de now, taki den troe anbegiman sa anbegi a Tata nanga jeje èn nanga waarheid, bika foe troe, a Tata e soekoe den sortoe sma disi foe anbegi en.” — Johanes 4:23.
Efoe wi wani taki Gado moesoe feni na anbegi foe wi boen, dan wi moesoe sabi waarheid. Disi na wan prenspari afersi. A têgo kolokoe foe wi e anga foe dati. Foe dati ede, ibriwan foe wi moesoe aksi ensrefi: ’Gado e feni a fasi fa mi e anbegi En boen? Mi wani leri a waarheid troetroe di de na ini Gado Wortoe? Noso mi frede foe san so wan finifini ondrosoekoe sa tjari kon na krin?’