Foe san ede den e go doe ogri nanga tranga

WAN beibi, di ben owroe 27 wiki èn di ben gebore toemoesi froekoe, ben gebore na Denver, Colorado, Amerkankondre. A boi ben tan na libi, èn baka di a ben tan dri moen na ati-oso, a ben go na oso baka na en papa nanga mama. Dri wiki na baka, a boi ben de baka na ati-oso. Foe san ede? A boi ben kisi kefalek bigi mankeri na en edetonton, foe di en papa ben seki en ede na wan ogri-ati fasi. A papa no ben man nanga a krei di a beibi ben e krei. A pikin boi ben kon breni èn malengri. Disiten dresi ben man jepi a boi foe a gebore di a ben gebore toemoesi froekoe, ma disiten dresi no ben man jepi a boi nanga na ogri di en papa ben doe en nanga tranga.

Sma e naki, e gi hebi fonfon, noso e kiri kefalek foeroe pikin-nengre na wan foe den moro ogri presi na grontapoe — na oso! Son wan e teri taki, na Amerkankondre wawan, so foeroe leki 5000 pikin e dede ibri jari na anoe foe den papa nanga mama foe den! Èn pikin-nengre a no den wan-enkri wan di e kisi foe doe nanga na ogri disi. Soleki fa a World Health tijdschrift e taki, dan na Amerkankondre „a naki di den e naki a wefi na wan foe den moro foeroe mankeri di oemasma e kisi te den abi a jari ete foe meki pikin”. Fa a de nanga tra kondre? „Wán di foe dri pisi foe den oemasma te leki moro leki afoe foe den oemasma di den ben ondrosoekoe [na den pôti kondre] e taki dati den patna e naki den.” Ija, ogri di e doe nanga tranga e teki en paiman, spesroetoe na ini oso.

Foeroe trowmasra nanga trow-oema e proeberi foe loesoe a kesekese foe den na wan ogri-ati fasi. Na ini son kondre, papa nanga mama nanga leriman e gebroiki ogri di e doe nanga tranga foe poeroe na atibron foe den na tapoe den pikin foe den. Trangawan e trobi den wan di moro swaki, soso foe prisiri ede, èn den e doe ogri nanga den nanga tranga. Foe san ede libisma e kon ogri so?

Foe san ede sma e kon ogri

Son sma e taki dati libisma e doe ogri nanga tranga, foe di na so den tan kaba. Ala di ogri di e doe nanga tranga moro foeroe ben kon moro mendri na Amerkankondre, tokoe a kon moro foeroe na mindri jongoewan. Èn sma kon abi moro belangstelling gi ogri di e doe nanga tranga. Den dri moro bigi telefisi station ben sori toe tron moro foeroe tori foe ogri di e doe nanga tranga, èn den meki tori foe kiri sma kon dri tron moro foeroe. Ija, ogridoe e seri! „No wawan wi no e span nanga ogri di e doe nanga tranga,” na so lawman-datra Karl Menninger e taki, „ma wi e poti en leki a moro prenspari njoensoe na ini wi koranti. Wan di foe dri pisi noso wan di foe fo pisi foe den telefisi programa foe wi e gebroiki ogri di doe nanga tranga leki wan prisiriten gi den pikin foe wi. Wi no e gi pardon wawan na ogri di e doe nanga tranga! Mi lobi mati, wi e prisiri nanga en toe.”

Ondrosoekoe foe den sabidensiman no so langa pasa, e taki dati na edetonton biologie nanga a presi pe wi e libi abi foeroe foe doe nanga a feti di libisma lobi feti. „A sani di wi alamala e kon froestan, na taki den ogri presi di moro nanga moro pikin e kisi foe doe nanga dati, foe troe, e meki ogri di e doe nanga tranga, panja ensrefi”, Dr. Markus J. Kruesi foe na Universiteit foe Juvenile Research foe Illinois e taki. „Sani di e pasa na den presi pe sma e libi, e tjari pikinpikin kenki kon na ini na edetonton, èn dati e meki sma e handri wantewante tapoe sani.” „Na osofamiri stroektoeroe di e lasi gowe, a gro di osofamiri nanga wán papa noso wán mama e gro nomonomo, pôtifasi di e tan nomonomo, èn wan doronomo fowtoe gebroiki foe drug, te joe loekoe en boen, dan den sortoe sani dati kan kenki a balansifasi inisei foe na edetonton, meki a sma kon tron wan sma di lobi feti — wan sani di fosi den ben denki taki a no kan srefisrefi”, na so a boekoe Inside the Brain (Inisei na edetonton) e taki.

Sma e taki dati den kenki di e feni presi na ini na edetonton abi so srefi na ini toe a lagi di a serotonine — wan sani na ini na ede tonton — e kon moro lagi; èn sma e denki taki a serotonine disi e meki taki wan sma kan dwengi ensrefi te a wani feti. Ondrosoekoe e tjari kon na krin taki sopi kan meki a serotonine na ini na edetonton kon moro lagi, èn so a e gi sabidensi pikinso gron foe froestan foe san ede sma di e gebroiki toemoesi foeroe sopi, foeroetron na sma toe di e doe ogri nanga tranga soleki fa sma sabi langaten kaba.

Ete wan tra sani de ini a tori foe a gro di ogri di e doe nanga tranga e gro nownow. „Memre”, na so bijbel, wan profeiti boekoe di sma kan froetrow, e taki, dati „moeilek ten sa de na ini den lasti dei. Sma sa denki densrefi nomo, sa gridi, sa djaf, èn sa meki densrefi bigi; . . . den no sa de nanga switifasi, no sa sari sma, sa de ogri-ati leiman, sa doe ogri na wan ogri-ati fasi, èn sa abi wan krasi fasi foe doe sani; den no sa wani si boen sani na ai; den sa tori trawan, no sa ke foe noti èn sa abi bigimemre foe densrefi . . . Tan fara foe den sortoe sma dati” (2 Timoteus 3:1-5, Today’s English Version). Ija, na ogridoe di wi e si ini a ten disi, na wan kontroe foe bijbel profeititori di abi foe doe nanga „den lasti dei”.

Wan tra sani e meki a ten disi de wan spesroetoe ten foe tranga ogridoe. „Heloe foe grontapoe nanga se,” na so bijbel e taki, „bika Didibri saka kon na oenoe, èn a abi bigi atibron, foe di a sabi taki a abi wan sjatoe pisi ten nomo” (Openbaring 12:12). Den ben trowe Didibri nanga na ogri jeje legre foe en komoto na hemel èn now Didibri nanga na ogri jeje legre foe en e poti ala den prakseri foe doe a libisma famiri kefalek takroe ogri. Leki „a tiriman foe a makti foe a loktoe”, Didibri abi krakti na tapoe „a jeje di e wroko now na ini den manpikin foe trangajesi” èn na so wan fasi, a e meki grontapoe tron wan presi pe moro nanga moro ogri e doe nanga tranga. — Efeisesma 2:2.

Dan fa wi kan kakafoetoe gi na ogri „loktoe” foe grontapoe nojaso? Èn fa wi kan loesoe kesekese sondro foe doe ogri nanga tranga?

[Prenki na tapoe bladzijde 3]

Sma e naki, e gi hebi fonfon, noso e kiri kefalek foeroe pikin-nengre na wan foe den moro ogri presi na grontapoe — na oso!