A moro prenspari broko ede foe mi na foe plisi Jehovah
SOLEKI FA THEODOROS NEROS BEN FROETERI
A doro foe a doengroe-oso kamra ben frei opo èn wan ofsiri ben bari taki: „Soema na Neros?” Di mi ben taki dati na mi, a ben gi a komando: „Opo. Wi e go soetoe joe kiri.” A sani dati ben pasa na ini wan sroedati kampoe na Korente, Grikikondre, na ini 1952. Foe san ede mi libi ben didon na ini na anoe foe tra sma ala di mi no ben de seiker san ben o pasa? Bifo mi e froeklari dati, meki mi froeteri oenoe pikinso wan sani foe misrefi.
WAN ten foe 1925, mi papa ben kisi fisiti foe den Bijbel Ondrosoekoeman (soleki fa den ben sabi Jehovah Kotoigi na a ten dati). Heri esi a ben tron wan foe den èn ben prati en bribi nanga den aiti brada nanga sisa foe en, di alamala ben teki a bijbel waarheid. En papa nanga mama srefi toe. Baka ten a ben trow èn mi ben gebore na ini 1929 na Agrinio, Grikikondre.
Fa den jari dati ben takroe srefisrefi gi Grikikondre! Na a fosi presi joe ben abi drape a tiri foe na ogri-ati tiriman, Generaal Metaxas. Baka dati, na ini 1939, a di foe Toe Grontapoefeti ben broko èn heri esi den Nasi ben teki a kondre abra. Siki nanga angri ben panja na ala sei. Den ben tjari den dedeskin di ben sweri gowe, na tapoe kroiwagi. Na a srefi fasi fa na ogri na ini grontapoe ben de krin foe si srefisrefi, na so a ben de krin foe si toe taki Gado Kownoekondre ben de fanowdoe.
Wan libi di ben sori taki mi ben gi misrefi na ini a diniwroko
A dei foe 20 augustus 1942, di wan groepoe foe wi ben kon na wan konmakandra na dorosei foe Tesalonika, a fesiman opziener foe wi ben sori go na den Ingrisi opolani di ben e iti bom na tapoe a foto èn a ben tjari kon na fesi fa wi ben kisi kibri foe di wi ben gi jesi na a froemane „foe no libi a kon di wi e kon makandra” (Hebrewsma 10:25). Na a okasi dati, wi ben kon miti na sekanti èn mi ben de na mindri den sma di ben gi den nen foe teki dopoe. Di wi ben komoto na ini a watra, wi ben tanapoe na ini wan lin èn den kresten brada nanga sisa foe wi ben singi wan singi pe den ben prèise wi foe a bosroiti di wi ben teki. Fa dati ben de wan dei di wi no ben o frigiti!
Sjatoe baka dati, di mi nanga wan tra boi ben e fisiti sma na wi oso-foe-oso diniwroko, skowtoe ben kon graboe wi èn den ben tjari wi go na skowtoe-oso. Foe poti krakti na tapoe taki den ben e si wi leki Communist èn taki a wroko foe wi ben de kontra ban, den ben wipi wi èn ben taigi wi: „Jehovah na a srefi leki Stalin, oen lawman!”
Borgoe orlokoe ben e doe foeroe ogri na Grikikondre a ten dati, èn a firi di sma ben abi teige a Communisme ben kon span srefisrefi. A dei na baka den ben meki wi waka ini groepoe pasa wi oso ala di den ben boei wi anoe, leki wi ben de ogriman. Ma dati no ben de a wan enkri tesi di mi ben kisi.
Tesi tapoe bribi na skoro
Froekoe na ini 1944, mi ben de wan skoroboi ete, èn Tesalonika ben tan ini na anoe foe den Nasi. Wan dei na skoro, dan wan Griki Orthodox priester, a leriman di ben leri wi relisi tori, ben taigi mi taki a ben o poti aksi gi mi foe a lès foe a dei dati. „En a no wan Orthodox kresten”, na so den tra pikin ben taki.
„San na en?” a leriman ben aksi.
„Mi na wan Jehovah Kotoigi”, mi ben piki.
„Wan wolfoe na mindri den skapoe”, a ben bari, ala di a ben graboe mi èn klap mi leti na ini mi fesi.
’Fa dati kan’, mi ben prakseri na misrefi, ’taki wan skapoe e beti wan wolfoe?’
Wan toe dei baka dati, so wan 350 foe wi ben sidon na den tafra foe wi foe njan. A sma di ben hori ai na tapoe sani ben taki: „Neros sa begi foe taki tangi.” Mi ben taki a so-kari ’Wi Tata’-begi, a begi di Jesus ben leri den bakaman foe en, soleki fa a skrifi na Mateus 6:9-13. A sma di ben hori ai na tapoe sani no ben lobi disi kwetikweti, so boen na wan atibron fasi a aksi mi foe a presi pe a ben sidon na tafra: „Foe san ede joe ben taki a begi na a fasi dati?”
„Foe di mi na wan Jehovah Kotoigi”, mi ben taki. Ne en so srefi graboe mi èn a naki mi na mi seifesi. Moro lati a dei dati wan tra skoromeester ben kari mi kon na ini en kantoro èn a ben taigi mi: „Joe doe heri boen, Neros tan hori steifi na san joe e bribi, èn no gi abra.” A neti dati, mi papa ben gi mi deki-ati nanga den wortoe disi foe na apostel Paulus: „Ala den sma di winsi foe libi na ini a gi di den e gi densrefi na ini a dini foe Gado ini wanfasi nanga Krestes Jesus, sa kisi froefolgoe toe.” — 2 Timoteus 3:12.
Di mi ben komoto na middelbaar skoro, mi ben moesoe loekoe sortoe wroko mi ben o doe. Foe a borgoefeti di ben de na Grikikondre, meki mi ben abi foe doe toe nanga na afersi foe kresten neutraliteit (Jesaja 2:4; Mateus 26:52). Te foe kaba, froekoe na ini 1952, den ben seni mi go koti 20 jari strafoe na doengroe-oso foe di mi ben weigri foe teki fetisani foe go feti na ini a moeilek ten dati na ini Griki historia.
Mi kresten neutraliteit ben kisi tesi
Di ben hori mi na ini sroedati kampoe na Mesolóngion nanga Korente, mi ben abi na okasi foe froeklari gi den sroedati komandanti taki mi konsensi di oefen nanga jepi foe bijbel no ben sa gi mi pasi foe mi kon tron wan sroedati di e horibaka gi politiki afersi. „Mi na wan sroedati foe Jesus kaba”, mi ben froeklari, ala di mi ben sori go na 2 Timoteus 2:3. Di den ben gi mi deki-ati foe go prakseri baka foe a bosroiti foe mi, mi ben taki dati mi no ben teki a bosroiti foe mi esi-esi, ma baka di mi prakseri boen na wan serjoesoe fasi èn mi ben teki a bosroiti foe gi misrefi abra na Gado foe doe a wani foe en.
A bakapisi ben de taki mi ben moesoe doe froeplekti wroko, mi ben moesoe djompo wan dei njanjan 20 dei langa èn mi ben moesoe sribi na tapoe sementi gron foe wan doengroe-oso kamra di no ben bradi wán meter èn langa toe meter ete. Èn mi ben prati a doengroe-oso kamra disi nanga toe tra Kotoigi! A ben de na a ten disi di wi ben de ini a kampoe na Korente, taki den ben kari mi foe komoto na ini a doengroe-oso kamra foe den ben kan soetoe mi kiri.
Di wi ben waka go na a presi pe den ben o soetoe mi kiri, dan na ofsiri ben aksi: „Joe no e go taki noti?”
„Nôno”, mi ben piki.
„Joe no e go skrifi joe famiri?”
„Nôno”, mi ben piki agen. „Den sabi kaba taki a kan, taki den o soetoe mi kiri djaso.”
Wi ben doro a fesidjari èn mi ben kisi a komando foe go tanapoe na a skotoe. Dan, na presi foe gi den sroedati a komando foe soetoe, na ofsiri ben gi den a komando: „Tjari en go na inisei.” A heri sani den ben doe, foe doe leki den ben o soetoe mi kiri, foe di den ben wani tesi mi bosroiti.
Baka ten den ben seni mi go na a èilanti Makrónisos, pe mi no ben mag abi no wan boekoe boiti bijbel. Den ben hori tinadri Kotoigi na ini wan pikin oso aparti foe den pikinmoro 500 strafoeman di ben de ogriman. Tokoe na a wán noso tra fasi, boekoe ben smokkel kon na inisei na wi. Foe eksempre, wan dei den ben seni wan dosoe nanga loukoúmia (wan pôpi soekroesani) kon gi mi. Den man di ben e ondrosoekoe den pakket ben de so ini a span foe tesi a loukoúmia dati den no ben si a Waktitoren di ben kibri na ondrosei. „Den sroedati ben njan a loukoúmia, ma wi ’ben njan’ A Waktitoren!”, wan Kotoigi ben taki.
Wan eksemplaar foe a boekoe di ben kon na doro no so langa pasa na a ten dati, Wat heeft de religie voor de mensheid gedaan? (San relisi doe gi a libisma famiri?) ben doro na wi, èn wan Kotoigi strafoeman di ben sabi Ingrisitongo ben vertaal en. Wi ben studeri A Waktitoren makandra toe èn ben hori wi konmakandra kibrifasi. Wi ben si doengroe-oso leki wan skoro, leki wan okasi foe kon tranga na jejefasi. Boiti dati, wi ben de kolokoe bika wi ben sabi taki a hori di wi ben hori wi soifri retifasi ben plisi Jehovah.
A lasti doengroe-oso pe den ben sroto mi ben de na Tirinta na owstoesei foe Peloponnesos. Na drape mi ai kon fadon tapoe wan waktiman di ben loekoe mi finifini te mi ben hori wan bijbelstudie nanga wan kompe strafoeman. Fa a ben de wan onfroewakti prisiri gi mi foe miti a waktiman dati baka foeroe jari na Tesalonika! A ten dati a ben de wan Kotoigi. Baka ten, den ben seni wan foe en manpikin go na doengroe-oso, no leki wan waktiman, ma leki strafoeman. Den ben sroto en na doengroe-oso foe a srefi sani di den ben sroto mi na ini doengroe-oso.
Bigin wroko agen, baka di den loesoe mi
Foe den 20 jari di mi ben moesoe tan na doengroe-oso mi tan dri jari nomo. Baka di den loesoe mi, mi teki a bosroiti foe go libi na Athene. Ma heri esi mi ben kon siki na a saka na ini mi borsoe, di e tapoe den fokofoko èn mi ben de froeplekti foe drai go baka na Tesalonika. Toe moen mi ben didon na bedi. Baka ten mi ben miti wan moi jonkoe wenke di ben nen Koula èn wi ben trow december 1959. Na ini 1962 a ben bigin wroko leki wan pionier, soleki fa den ben kari foeroeten preikiman foe Jehovah Kotoigi. Dri jari baka dati mi ben man foe wroko makandra nanga en ini a pionierwroko.
Na ini januari 1965, wi ben kisi a toewijzing foe go doe kringwroko, èn wi ben fisiti gemeente foe tranga den na jejefasi. A zomer dati wi ben abi a grani toe foe fisiti wi fosi bigi distriktkongres na Wenen, Oostenrijk. A ben de tra fasi leki den wan di wi ben abi na Grikikondre, pe wi ben moesoe kon makandra na kibrifasi na boesi, foe di lanti ben tapoe a wroko foe wi. Pikinso go miti a kaba foe 1965, den ben gi wi a kari foe go wroko na a bijkantoro foe Jehovah Kotoigi na Athene. Ma foe a gosontoe foe son wan foe den famiri foe mi, wi ben moesoe drai go baka na Tesalonika na ini 1967.
A ten di wi ben sorgoe foe wi famiri frantiwortoe, wi ben tan abi foeroe foe doe na ini na evangelie preikiwroko. Wan leisi, di mi ben taki nanga mi neef Kostas, mi ben froeteri en o moi Gado en organisâsi de nanga a lobi, a wanfasi nanga a gi di den e gi jesi na Gado drape. A ben taki: „Den sani disi ben sa de heri boen efoe Gado ben de nomo.” A ben teki a kari di mi gi en foe ondrosoekoe efoe Gado de noso efoe a no de. Mi ben taigi en taki wi ben o go na wan internationaal kongres foe Jehovah Kotoigi na Nuremberg, Doisrikondre, augustus 1969. A ben aksi efoe a ben kan kon nanga wi èn en mati Alekos, di ben studeri bijbel toe nanga wi, ben wani kon toe.
A kongres na Nuremberg troetroe ben de wan spesroetoe sani di ben difrenti foe tra sani! A kongres ben hori na ini a bigi stadion pe Hitler ben memre a wini di a ben wini na ini a tori foe sroedati afersi. Den fisitiman di ben drape ben doro wan heimarki foe moro leki 150.000 èn a jeje foe Jehovah ben de foe si na ini ala sani di ben pasa noso ben taki drape. Sjatoe baka dati Kostas nanga Alekos ala toe ben teki dopoe. Den ala toe e wroko now leki kresten owroeman, èn na osofamiri foe den de Kotoigi toe.
Mi ben bigin studeri nanga wan oema di ben abi belangstelling. A masra foe en ben meki bekènti taki a ben wani ondrosoekoe san wi e bribi, èn sjatoe baka dati a ben taigi mi taki a ben kari wan sma, Meneer Sakkos, wan Griki Orthodox theologiaman, foe abi wan takimakandra. A masra ben wani poti wan toe aksi gi wi ala toe. Meneer Sakkos ben kon nanga wan priester. A man di wi ben go fisiti ben bigin taki: „Fosi mi ben sa wani taki Meneer Sakkos piki dri aksi.”
Ala di a ben hori a bijbel vertaling di wi ben gebroiki na ini den takimakandra di wi ben abi nanga den, na loktoe, a man ben aksi: „Aksi nomroe wan: A bijbel disi na wan soifri bijbel noso a de wan Kotoigi bijbel?” Meneer Sakkos ben piki taki a ben de wan officieel vertaling, èn a ben taki toe foe Jehovah Kotoigi leki „sma di lobi bijbel”.
Ala di a ben go doro, a man ben aksi: „Aksi nomroe toe: Jehovah Kotoigi na sma di e libi akroederi boen gwenti nanga wet?” Foe taki en leti, a ben wani foe kon sabi nanga sortoe sma a wefi foe en ben bigin abi demakandra. A theologiaman ben piki taki den de sma di e libi akroederi boen gwenti nanga wet troetroe.
„A di foe dri aksi”, a man ben go doro: „Jehovah Kotoigi e kisi pai?” „Nôno”, a theologiaman ben piki.
„Mi kisi a piki tapoe den aksi foe mi, èn mi teki mi bosroiti”, na so a man ben tapoe a takimakandra. Baka dati a ben go doro nanga en bijbelstudie èn heri esi a ben teki dopoe leki wan Jehovah Kotoigi.
Wan libi di foeroe nanga blesi
Mi ben bigin wroko baka leki wan kringopziener januari 1976. So wan siksi jari baka dati, mi ben abi a grani foe jepi teki fesi na ini wan njoen sortoe foe preikiwroko na Grikikondre — strati-wroko. Baka dati, oktober 1991, dan mi nanga mi wefi ben bigin wroko leki spesroetoe pionier. Wan toe moen baka dati, den ben moesoe doe wan oparâsi na mi ati, wan sani di mi breiti taki a waka boen. Now a gosontoe foe mi de heri boen èn mi ben man bigin baka nanga a foeroeten preikiwroko. Mi e wroko toe leki wan owroeman na ini wan foe den gemeente na Tesalonika èn so srefi nanga na Ati-oso Kontakti Komte foe asisteri den wan di abi datra jepi fanowdoe.
Te mi e prakseri foe mi libi na ini a ten di pasa, dan mi e kon si o prisiri a de foe doe san e plisi wi hemel Tata. Mi prisiri taki langa ten bifo mi ben teki a kari foe en di e gi satisfaksi: „Sori taki joe koni, mi manpikin, èn prisiri mi ati, so taki mi kan gi wan piki na a sma di e spotoe mi” (Odo 27:11). Foe troe a e prisiri mi ati foe si taki a nomroe foe serjoesoe sma di e kon na ini na organisâsi foe Jehovah e gro na heri grontapoe. Foe abi wan prati na a wroko foe meki sma kon fri nanga jepi foe bijbel waarheid èn so boen foe opo gi den a froewakti foe têgo libi na ini wan regtfardiki njoen grontapoe, na troetroe wan grani! — Johanes 8:32; 2 Petrus 3:13.
Ala ten wi e proeberi foe gi jongoe foetoeboi foe Jehovah deki-ati foe poti a foeroeten diniwroko leki wan marki foe doro na ini den libi, foe gi den ten nanga krakti na En. Foe troe, foe froetrow tapoe Jehovah èn foe prisiri srefisrefi foe meki na ati foe en firi boen na wan fasi foe libi di e gi satisferi moro iniwan tra sani di wan sma ben sa kan ondrofeni! — Odo 3:5; Preikiman 12:1.
[Prenki na tapoe bladzijde 21]
(Foe kroektoe-anoesei go na leti-anoesei)
Mi e wroko na ini a koekroe foe Bethel na ini 1965
Mi e hori wan lezing na ini 1970 di a preikiwroko foe wi ben tapoe
Nanga mi wefi na ini 1959
[Prenki na tapoe bladzijde 23]
Nanga mi wefi Koula