Gi Yehovah San A Musu Kisi
SOLEKI FA TIMOLEON VASILIOU BEN FRUTERI
Den ben sroto mi fu di mi ben leri sma a Bijbel na ini a dorpu Aidhonochori. Den skowtu ben puru mi susu èn den ben bigin naki mi na tapu mi ondrofutu. Fu di den ben fon mi nomonomo, meki mi futu no ben firi moro èn mi no ben man firi a pen moro. Bifo mi e tyari kon na krin san meki den ben meshandri mi so, wan sani di ben e pasa furu na Grikikondre na a ten dati, meki mi fruteri fosi fa mi ben tron wan Bijbel leriman.
SYATU baka di mi ben gebore na ini 1921, a famiri fu wi ben froisi go na a foto Rodholívos, noordsei fu Grikikondre. Na ini den yongu yari fu mi, mi ben libi wan yayo libi. Di mi ben abi 11 yari mi ben bigin smoko. Baka dati mi ben tron wan sopiman èn wan dòbelman, èn pikin moro ibri neti mi ben go na fesa pe sma ben tyari densrefi na wan onborsu fasi. Mi ben abi firi gi poku, èn dati meki mi ben go na ini wan band fu a presi pe mi tan. Baka so wan yari, mi ben man prei na tapu moro furu fu den sani di a band ben gebroiki fu meki poku. Ma mi ben lobi studeri tu èn mi ben lobi retidu.
Na a bigin fu 1940, di a di fu Tu Grontapufeti ben e feti, den ben aksi a band fu wi fu prei na a beri fu wan pikin meisje. Na a grebi, den famiri nanga den mati ben e krei nanga bigi sari. A lasi di den ben lasi-ati so, ben naki mi ati trutru. Mi ben bigin aksi misrefi: ’Fu san ede wi e dede? ¿Moro de na ini a libi leki soso a libi di wi e libi so syatu? Pe mi kan feni den piki?’
Wan tu dei baka dati, mi ben si wan eksemplaar fu a Nyun Testamenti na tapu wan bukuplanga na ini mi oso. Mi ben teki en èn ben bigin leisi. Di mi ben leisi den wortu fu Yesus na Mateus 24:7 di e taki dati den orloku di e feti na heri grontapu ben o de wan pisi fu a marki fu en denoya, dan mi ben kon frustan taki den wortu fu en ben musu de gi a ten fu wi. Den tra wiki na baka, mi ben leisi na eksemplaar disi fu den Kresten Griki Buku fu Bijbel wan tu leisi.
Dan na ini december 1940, mi ben go luku wan osofamiri di ben libi krosibei fu mi — wan weduwe nanga en feifi pikin. Na tapu a sodro fu den, na mindri wan heri ipi pikin buku, mi ben feni wan buku di ben nen Een begeerenswaardige regeering (Wan Tiri Di Sma Ben Sa Wani), di a Watch Tower Bible and Tract Society tyari kon na doro. Mi ben tan na tapu a sodro èn ben leisi a heri buku. Den sani di mi ben leisi ben meki mi kon si krinkrin taki wi e libi trutru na ini san Bijbel e kari „den lasti dei” èn taki Yehovah Gado sa tyari a seti fu sani disi kon na wan kaba dyonsro èn a sa poti wan nyun regtfardiki grontapu ini en presi.—2 Timoteus 3:1-5; 2 Petrus 3:13.
A sani di ben naki mi ati trutru ben de a Bijbel buweisi taki getrow sma sa libi fu têgo na ini wan paradijs na grontapu èn taki pina nanga dede no sa de moro na ini a nyun grontapu dati na ondro a tiri fu Gado Kownukondre (Psalm 37:9-11, 29; Openbaring 21:3, 4). Di mi ben e leisi, dan mi ben begi fu taigi Gado tangi fu den sani disi, èn mi ben aksi en fu sori mi san a e aksi fu sma. Mi ben kon si krin taki mi ben musu gi misrefi fu dini Yehovah Gado nanga mi heri ati.—Mateus 22:37.
Du San Mi Ben Leri
Sensi a ten dati, mi no ben smoko moro, mi no ben kon drungu moro, èn mi no ben dòbel moro. Mi ben tyari den feifi pikin fu a weduwe nanga wan brada nanga tu sisa fu mi di ben de moro yongu kon na makandra èn mi ben fruteri den san mi ben leri na ini a pikin buku. Syatu baka dati wi alamala ben bigin taki nanga tra sma fu den pikinso sani di wi ben sabi. Sma na ini a libimakandra ben kon sabi wi leki Yehovah Kotoigi, ala di noiti ete wi ben miti wan Kotoigi. Sensi a bigin, mi ben wroko moro leki wan hondro yuru ibri mun fu fruteri trawan den tumusi moi sani di mi ben leri.
Wan Griki Orthodox priester fu a presi drape ben go na a komsarsi fu kragi fu wi. Ma wan tu dei na fesi, sondro taki wi ben sabi, wan yongu Kotoigi ben feni wan asi di ben lasi èn a ben gi en baka na den sma di ben abi na asi. Fu di a ben de so eerlijk meki a komsarsi ben abi lespeki gi den Kotoigi, èn a no ben wani arki a priester.
Wan dei na ini oktober 1941, di mi ben e gi kotoigi na wowoyo, wan sma ben taki fu wan Kotoigi fu Yehovah di ben libi na ini wan foto krosibei. Fosi, a ben de wan skowtu èn a ben nen Christos Triantafillou. Mi ben go na en èn mi ben kon sabi taki a ben de wan Kotoigi sensi 1932. ¡Mi ben breiti trutru di a ben gi mi wan lo owru Waktitoren publikâsi! Den disi ben yepi mi trutru fu gro na yeye fasi.
Na ini 1943, mi ben sori taki mi ben gi misrefi abra na Gado fu di mi ben dopu na ini watra. Na a ten dati mi ben hori bijbelstudie na ini dri dorpu di ben de krosibei — Dhravískos, Palaeokomi, nanga Mavrolofos. Mi ben gebroiki a buku De harp Gods (A Harpu fu Gado) leki a bijbelstudie yepisani fu wi. Te fu kaba mi ben kisi a grani fu si fa fo gemeente fu Yehovah Kotoigi ben opo na ini a kontren disi.
Preiki Ala Di Problema Ben De
Na ini 1944, Grikikondre ben kon fri fu a teki di Doisrikondre ben teki a kondre abra, èn baka wan pisi ten wi ben man meki kontakti baka nanga a bijkantoro fu a Waktitoren Genootschap na Ateine. A bijkantoro ben aksi mi fu go preiki na ini wan kontren pe pikinmoro no wan sma ben yere a Kownukondre boskopu ete. Baka di mi ben froisi go drape, dan mi ben wroko na tapu wan boerderij dri mun èn a tra pisi fu a yari mi ben du a diniwroko.
A yari dati a ben de wan blesi gi mi fu si taki mi mama ben teki dopu, èn a weduwe nanga den pikin fu en, boiti a moro yongu umapikin fu a weduwe, Marianthi, di ben dopu na ini 1943 èn ben tron mi lobi wefi na ini november fu a yari dati. Dritenti yari baka dati na ini 1974, mi papa ben tron wan dopu Kotoigi tu.
Na a bigin fu 1945 a bijkantoro ben seni a fosi stencil fu A Waktitoren kon gi wi. A moro prenspari artikel fu en ben de „Go, Meki Disipel fu Ala Nâsi” (Mateus 28:19, The Emphatic Diaglott). Marianthi nanga mi gowe libi wi oso wantewante fu go wroko na ini farawe kontren na a owstusei fu Strymonliba. Tra Kotoigi ben kon drape tu baka ten.
Nofotron wi ben waka nanga sosofutu fu go na wan dorpu, èn wi ben waka furu kilometer na ini a dipi di de na mindri den bergi èn wi ben waka abra bergi tu. Wi ben du disi fu no broko den susu fu wi bika efu den no ben bun moro fu weri, dan wi no ben abi trawan fu weri. Na ini den yari na mindri 1946 nanga 1949, wan borgufeti ben e pori Grikikondre, èn a ben de tumusi kefalek fu reis. Nofotron wi ben si dedeskin e didon na tapu pasi.
Na presi taki den problema disi ben meki wi lasi-ati, wi ben tan dini fayafaya. Furu leisi mi ben firi leki a psalm singiman di ben skrifi: „Awansi mi e waka na ini a lagi presi pe furu dungru de, toku mi no e frede no wan ogri, bika yu de nanga mi; yu tiki nanga yu tiritiki, na den sani di e trowstu mi” (Psalm 23:4). Nofotron na ini a pisi ten disi, wi no ben de na oso furu wiki langa, èn son leisi mi ben wroko 250 yuru wán mun na ini a diniwroko.
A Diniwroko fu Wi na ini Aidhonochori
Wan fu den dorpu pe wi ben go na ini 1946 ben de Aidhonochori, di ben de te na tapu wan bergi. Drape wi ben miti wan man di ben taigi wi taki tu man ben de na ini a dorpu di ben wani yere a boskopu fu Bijbel. Ma fu di a man ben frede den sma fu en birti, meki a no ben wani tyari wi go na den. Ma toku wi ben feni na oso fu den man èn den ben ontfanga wi nanga switifasi. ¡Fu taki en leti, baka wan tu miniti, a foroisi ben furu nanga sma! Den ben de famiriman noso bun mati. Mi ben fruwondru srefisrefi fu si fa den ben poti prakseri bun èn ben sidon arki wi. Baka wan syatu pisi ten wi ben kon sabi taki den ben wakti fayafaya fu miti den Yehovah Kotoigi, ma di den Doisri ben teki a kondre abra, dan no wan Kotoigi ben de na ini a kontren. San meki den ben abi belangstelling?
Fositen, den tu osofamiri edeman ben de prenspari man na ini Communist partij fu a presi drape, èn den ben leri sma den prakseri fu den Communist. Ma den ben feni a buku Regeering (Tiri), di a Waktitoren Genootschap tyari kon na doro. Di den ben leisi en, dan den ben kon bribi taki a wan-enkri howpu gi wan volmaakti, regtfardiki tiri ben de Gado Kownukondre.
Wi ben tan taki nanga den man disi èn nanga den mati fu den te mindrineti. Den ben prisiri trutru nanga den piki di wi ben gi na tapu den aksi fu den nanga yepi fu Bijbel. Ma syatu baka dati, den Communist fu a dorpu ben sreka sani fu kiri mi fu di den ben feni taki na mi ben meki den man di ben de fesiman fu den fosi, kon drai den libi. A bun fu taki tu, dati wan fu den sma di ben de drape a fosi neti, ben de a man di ben taigi mi taki sma fu a dorpu ben abi belangstelling. Te fu kaba, a ben kisi moro sabi fu Bijbel, a ben teki dopu, èn baka ten a ben tron wan Kresten owruman.
Ogri-ati Frufolgu
No langa baka di mi ben miti den sma disi di ben de Communist fosi, tu skowtu ben broko kon ini na oso pe wi ben hori wan konmakandra. Den ben kisi fo fu wi ala di den ben e hori gon gi wi èn den ben tyari wi go na skowtu-oso. Drape a skowtu ofsiri di ben de wan mati fu den Griki Orthodox kerki fesiman, ben kosi wi. Te fu kaba a ben aksi: „We, san mi o du nanga unu?”
„¡Kon meki wi gi den wan steifi fonfon!” ala den tra skowtu di ben tanapu na wi baka ben bari.
Na a ten dati a ben de latilati neti. Den skowtu ben sroto wi ini a kamra na ondro-oso èn den ben go na wan bar na sei a skowtu-oso. Di den ben drungu srefisrefi, den ben kon baka èn den ben tyari mi go na sodro.
Di mi ben si fa den ben de, mi ben frustan taki den ben sa kan kiri mi wantewante. Dati meki mi ben begi Gado fu gi mi krakti fu frudrage awansi sortu sani mi ben o ondrofeni kande. Den ben teki wan tu udu tiki èn soleki fa mi ben fruteri ini a bigin, den ben bigin naki mi na tapu mi ondrofutu. Baka dati, den ben naki mi na mi heri skin, èn dan den ben trowe mi go baka na ini a kamra na ondro-oso. Baka dati den ben tyari wan fu den trawan kon na doro èn den ben bigin fon en.
Disiten, mi ben gebroiki na okasi fu sreka den tu tra yongu Kotoigi gi a tesi di ben e wakti den. Ma na presi fu dati, den skowtu ben bosroiti fu tyari mi go na sodro baka. Den ben puru mi krosi na mi skin, èn feifi fu den ben fon mi wán yuru langa, ala di den ben e trapu mi na tapu mi ede nanga den legresusu fu den. Baka dati den ben trowe mi fu a trapu go na gron, pe mi ben didon flaw so wan 12 yuru.
Di den ben fri wi te fu kaba, wan osofamiri na ini a dorpu ben teki wi na ini oso a neti dati èn den ben sorgu gi wi. A tra dei, wi ben drai go na oso baka. Wi skin ben weri someni fu a fonfon taki wi ben abi aiti yuru fanowdu fu waka, wan sani di na tra ten e teki tu yuru. Mi skin ben sweri someni fu a fonfon taki pikinmoro Marianthi no ben sabi suma na mi.
Ala Di Sma Ben Gens Wi, Toku Gro Ben De
Na ini 1949, di a borgufeti ben e feti ete, wi ben froisi go na Tesalonika. Mi ben kisi a wroko leki yepiman gemeente dinari na ini wan fu den fo gemeente na ini a foto. Baka wan yari a gemeente ben gro someni taki wi ben opo wan trawan, èn mi ben kisi a wroko leki gemeente dinari, noso fesiman opziener. ¡Wan yari baka dati a nyun gemeente ben gro pikinmoro tu tron so bigi, èn ete wan tra gemeente ben opo!
Gensman ben atibron nanga a gro di Yehovah Kotoigi na Tesalonika ben gro. Wan dei na ini 1952 di mi ben komoto na wroko, mi ben si taki den ben bron na oso fu wi te na gron. Pikinmoro Marianthi ben lasi en libi. Na a konmakandra a neti dati, wi ben abi fu fruklari fu san ede wi ben drape na ini doti krosi — wi ben lasi ala sani. Den Kresten brada fu wi ben abi sari-ati trutru èn den ben yepi wi.
Na ini 1961, mi ben kisi a wroko leki opziener di e reis, fu go na wan tra gemeente ibri wiki fu tranga den brada na yeye fasi. Den 27 yari baka dati, Marianthi nanga mi ben fisiti den kring nanga den distrikt na ini Masedonia, Trasia, nanga Tesalia. Ala di a lobi Marianthi fu mi pikinmoro ben breni krinkrin sensi 1948, a ben dini nanga mi nanga deki-ati, èn a ben frudrage furu tesi na tapu a bribi fu wi. En tu den ben teki go sroto, ben tyari en go na fesi krutu, èn ben seni en go na strafu-oso furu leisi. Baka dati a gosontu fu en ben bigin go na baka èn a dede na ini 1988, baka di a feti wan langa feti nanga kanker.
A srefi yari dati, den ben poti mi leki spesrutu pionier na Tesalonika. Now, baka moro leki 56 yari na ini a diniwroko gi Yehovah, mi kan wroko tranga ete èn mi abi wan prati na ala den kontren fu a diniwroko. Son leisi, mi hori so wan 20 bijbelstudie ibri wiki nanga sma di ben abi belangstelling.
Mi kon si taki wi de trutru na a bigin fu wan bigi leri programma di sa go doro na ini Yehovah en nyun grontapu èn a sa tan go doro dusun yari langa. Toku mi abi a firi taki now a no de a ten fu du sani safrisafri, fu skoifi sani go na wan tra ten, noso fu gebroiki a ten fu wi fu kan kowru den lostu fu wi skin. Mi e taigi Gado tangi taki a yepi mi fu du san mi ben pramisi biginbigin bika wi trutru musu gi wisrefi nanga wi heri ati fu dini Yehovah.
[Prenki na tapu bladzijde 24]
Mi ben e gi wan lezing ala di den ben tapu a preikiwroko fu wi
[Prenki na tapu bladzijde 25]
Nanga mi wefi Marianthi