Opo taki gi a bribi foe wi
„Santa Krestes leki Masra na ini oen ati, èn de klariklari ala ten foe opo taki gi oensrefi na fesi ibriwan sma di e aksi oenoe wan reide foe a howpoe di de na ini oenoe.” — 1 PETRUS 3:15.
1, 2. Foe san ede gens no e froewondroe Jehovah Kotoigi, ma san na a sani di den wani?
NA INI foeroe kondre, foeroetron sma e si Jehovah Kotoigi leki sma di de eerlijk èn di e libi wan krin libi na a sei foe boen gwenti nanga wet. Foeroe sma e si den kotoigi leki sma di de boen birtisma èn di no e soekoe trobi nanga trawan. Ma a de so, taki joisti den kresten disi di lobi vrede, njan pina foe froefolgoe di no reti — na ini ten foe feti èn na ini ten foe vrede. Den sortoe gens disi no e froewondroe den. Foe taki en leti, den Kotoigi e froewakti dati. Te joe loekoe en boen, den sabi taki den getrow kresten foe a fosi jarihondro ben de ’sani di sma no ben wani si na ai’, so boen, foe san ede den wan di e doe moeiti foe de troetroe bakaman foe Krestes na ini a ten disi no moesoe froewakti a srefi sani toe? (Mateus 10:22) Boiti dati, bijbel e taki: „Ala den sma di winsi foe libi ini a gi di den e gi densrefi na ini a dini foe Gado ini wánfasi nanga Krestes Jesus, sa kisi froefolgoe toe.” — 2 Timoteus 3:12.
2 Jehovah Kotoigi no e soekoe foe sma froefolgoe den, èn den no e prisiri nanga problema — foe pai boetoe, foe sma poti den na ini doengroe-oso, noso ogrifasi fa sma e handri nanga den — di kan kon nanga a froefolgoe. Den wani ’libi wan tiri libi sondro broeja’ so taki den kan preiki a boen njoensoe foe Gado Kownoekondre sondro problema (1 Timoteus 2:1, 2). Den e warderi a fri di den abi na relisi sei na foeroe kondre so taki den kan go doro nanga na anbegi foe den, èn na wan opregti fasi den e doe san den man foe „abi vrede nanga sma”, so srefi nanga den tiriman foe libisma (Romesma 12:18; 13:1-7). Dan foe san ede den Kotoigi na ’sani di sma no wani si na ai’?
3. San na wán sani di meki taki tra sma sondro reti no wani si Jehovah Kotoigi na ai?
3 Te joe loekoe en boen, dan sma no ben wani si Jehovah Kotoigi na ai foe den srefi sani ede di ben meki taki trawan ben froefolgoe den fosi jarihondro kresten. Na a fosi presi, Jehovah Kotoigi e doe san den e bribi èn dati e meki taki den no de pôpi sma gi trawan. Foe eksempre, den e preiki a boen njoensoe foe Gado Kownoekondre fajafaja, ma foeroetron sma no e froestan a faja disi di den abi, èn den e feni taki nanga a preikiwroko foe den Kotoigi, den e „proeberi foe overtoigi tra sma foe teki a relisi foe den nanga tranga”. (Teki gersi Tori foe den Apostel 4:19, 20.) So srefi den Kotoigi de neutraal na ini den politiek afersi foe den nâsi nanga den feti foe den nâsi, èn dati meki son tron trawan kisi a fowtoe denki taki den Kotoigi na borgoe di no de loyaal. — Mika 4:3, 4.
4, 5. (a) Fa Jehovah Kotoigi tron sma di trawan e kragi na wan falsi fasi? (b) Soema foeroetron ben de den moro prenspari sma di soetoe faja gi trawan foe froefolgoe den foetoeboi foe Jehovah?
4 Na a di foe toe presi, Jehovah Kotoigi tron sma di trawan e kragi na wan falsi fasi — langalanga leitori èn a drai di trawan e drai den sani di den Kotoigi e bribi. Leki wan bakapisi foe dati, na ini wan toe kondre, sma gens den Kotoigi sondro reide. Moro fara, den Kotoigi e soekoe datra jepi sondro foe teki broedoe èn dati e kroederi nanga a wani di den wani foe gi jesi na a bijbel komando ’tan farawe foe broedoe’; èn foe di den e doe dati, meki trawan gi den takroe nen foe di den e taki foe den, dati den „e kiri pikin” èn den na „wan sekte foe sma di e kiri densrefi” (Tori foe den Apostel 15:29). Ma a troe tori na taki Jehovah Kotoigi e si a warti foe a libi leki wan hei sani, èn den e soekoe a moro boen datra jepi di de foe feni gi densrefi èn gi den pikin foe den. A kragi di sma e kragi taki foeroe pikin foe Jehovah Kotoigi e dede ibri jari foe di den e weigri foe teki broedoe, no troe srefisrefi. Boiti dati, foe di bijbel waarheid no abi a srefi krakti na tapoe ala den memre foe na osofamiri, dati meki sma kragi taki den Kotoigi e broko den osofamiri banti. Ma den wan di sabi Jehovah Kotoigi, sabi taki den Kotoigi e si na osofamiri libi leki wan hei sani èn taki den e proeberi foe waka baka den bijbel komando di e taki dati masra nanga wefi moesoe lobi makandra èn abi lespeki gi makandra èn taki den pikin moesoe gi jesi na den papa nanga mama efoe den papa nanga mama na bribisma efoe no. — Efeisesma 5:21–6:3.
5 Na ini foeroe kefal, den moro prenspari sma di ben soetoe faja gi trawan foe froefolgoe den foetoeboi foe Jehovah, de relisi gensman di ben gebroiki a makti di den abi tapoe politiek tiriman nanga den sma di e prati njoensoe, foe proeberi foe kwinsi a wroko foe den Kotoigi. Fa wi leki Jehovah Kotoigi moesoe handri tapoe so wan sortoe gens — awansi a gens e kon foe den sani di wi e bribi èn e doe, noso a gens e kon foe falsi kragi?
„Meki ala sma kon sabi a reidelekfasi foe oenoe”
6. Foe san ede a de prenspari foe abi wan balansi fasi foe si den sma di de dorosei foe a kresten gemeente?
6 Foe bigin, wi moesoe abi a joisti fasi foe si sani — a fasi fa Jehovah e si sani — gi den wan di no abi a srefi bribi leki di foe wi. Noso, wi kan meki taki trawan e si wi leki feanti noso e kosi wi sondro taki dati de fanowdoe. „Meki ala sma kon sabi a reidelekfasi foe oenoe”, na so na apostel Paulus ben skrifi (Filipisma 4:5). So boen, bijbel e gi wi deki-ati foe abi wan balansi fasi foe si den wan di de dorosei foe a kresten gemeente.
7. San de ini a tori „foe no meki grontapoe flaka” wi?
7 Na a wán sei, den Boekoe foe bijbel e froemane wi krinkrin „foe no meki grontapoe flaka [wi]” (Jakobus 1:27; 4:4). A wortoe „grontapoe” djaso, neleki na foeroe tra presi na ini bijbel, e sori go na a bigi ipi foe libisma di no de troe kresten. Wi e libi na mindri a libimakandra disi foe sma; wi e miti den na wrokope, na skoro, na ini a birti pe wi e tan (Johanes 17:11, 15; 1 Korentesma 5:9, 10). Tokoe wi no e meki grontapoe flaka wi foe di wi e tan farawe foe fasi foe tjari wisrefi èn fasi foe taki di no e kroederi nanga Gado en regtfardiki fasi. A de kefalek prenspari toe taki wi e erken a kefar foe abi krosibei demakandra nanga a grontapoe disi, spesroetoe nanga den wan di no e sori no wan lespeki gi den markitiki foe Gado. — Odo 13:20.
8. Foe san ede a rai foe no meki grontapoe flaka wi, no e gi wi wan boen gron foe si trawan leki moro lagi sma?
8 Ma a rai foe tan sondro grontapoe flaka wi, no e gi wi no wan boen gron foe dorodoro si den wan di no de Jehovah Kotoigi leki sma di moro mendri leki wi (Odo 8:13). Memre na eksempre foe den djoe relisi fesiman, di wi ben taki makandra foe den na ini a fosi artikel. A fasi foe relisi di den ben kweki no ben de wan relisi di Jehovah ben feni boen; èn so srefi a relisi foe den no ben meki boen matifasi kon nanga den sma di no ben de djoe (Mateus 21:43, 45). Foe di den ben denki foe densrefi taki den de regtfardiki èn moro hei leki trawan, meki den fanatiek man disi ben si den heiden leki lagi sma. Wi no e handri na a fasi disi foe wisiwasi den sma di no de Kotoigi. Neleki na apostel Paulus wi e winsi taki Gado feni ala sma boen di e jere a bijbel boskopoe foe waarheid. — Tori foe den apostel 26:29; 1 Timoteus 2:3, 4.
9. Wan balansi fasi foe si sani soleki fa bijbel e si dati, moesoe abi sortoe krakti tapoe a fasi fa wi e taki foe trawan di no abi a srefi bribi leki di foe wi?
9 Wan balansi fasi akroederi den Boekoe foe bijbel, moesoe abi krakti na tapoe a fasi fa wi e taki foe sma di no de Kotoigi. Paulus ben leri Titus foe memre den kresten na tapoe na èilanti Kreta, taki „foe no wan sma den moesoe taki wan takroe sani, den no moesoe soekoe trobi, den moesoe de reidelek, den moesoe abi troetroe safoefasi gi ala sma” (Titus 3:2). Loekoe taki kresten no ben moesoe taki takroe sani foe „no wan sma” — so srefi no foe den sma di no ben de kresten na tapoe Kreta, èn di trawan ben sabi boen foe a lei di den ben lei, a njan di den ben njan pasa marki, èn a lesi di den ben lesi (Titus 1:12). So boen a no ben o de akroederi bijbel efoe wi ben sa gebroiki lagi wortoe te wi ben o taki foe den wan di no abi a srefi bribi leki di foe wi. Wan fasi foe tjari wisrefi pe wi e si wisrefi moro hei leki trawan, no sa hari tra sma foe anbegi Jehovah. Na presi foe dati, te wi e si trawan leki fa den gronprakseri foe Jehovah Wortoe e taki, èn wi e handri nanga den sma disi akroederi dati toe, dan wi ’e meki a leri foe Gado kon moi’. — Titus 2:10.
O ten wi moesoe tan tiri, o ten wi moesoe taki
10, 11. Fa Jesus ben sori taki a ben sabi o ten a ben de (a) „wan ten foe tan tiri”? (b) „wan ten foe taki”?
10 „Wan ten foe tan tiri èn wan ten foe taki” de, na so Preikiman 3:7 e taki. Èn disi na a problema di wi abi, o ten wi moesoe libi den gensman gi san den de èn o ten wi moesoe opo taki gi a bribi foe wi. Wi kan leri foeroe foe na eksempre foe wan sma di ala ten ben de volmaakti na ini a koni di a ben abi foe si sani krin — Jesus (1 Petrus 2:21). Jesus ben sabi o ten a ben de „wan ten foe tan tiri”. Foe eksempre, di den granpriester nanga den owroeman ben kragi en na wan falsi fasi bifo Pilatus, dan Jesus „no ben piki den notinoti” (Mateus 27:11-14). A no ben wani taki no wan sani di ben sa hendri a doe di a ben moesoe doe a wani foe Gado. Na presi foe dati Jesus ben froekisi foe meki den sani di a ben doe na poebliki, taki foe densrefi. A ben sabi taki srefi waarheid no ben o kenki a heimemre denki nanga ati foe den. So boen, Jesus no ben poti prakseri na tapoe a kragi foe den, èn a ben sabi heri boen foe san ede a ben tapoe en mofo èn no ben taki notinoti. — Jesaja 53:7.
11 Ma Jesus ben sabi toe o ten a ben de „wan ten foe taki”. Ten na ten, a ben taki fri èn sondro frede nanga den wan di ben soekoe fowtoe na en, èn a ben sori den taki den ben fowtoe nanga den falsi kragi foe den. Foe eksempe di den leriman foe Wet nanga den Fariseiman ben proeberi foe lagi en na fesi foe wan ipi sma, foe di den ben kragi en taki a ben jagi den ogri jeje poeroe nanga jepi foe Be-èlsebub, dan Jesus no ben wani libi den falsi kragi disi leki fa den ben de. Na wan kefalek logis fasi èn nanga wan krakti eksempre, a ben poeroe a lei na pasi (Markus 3:20-30; loekoe so srefi Mateus 15:1-11; 22:17-21; Johanes 18:37). Na a srefi fasi, baka di den ben tori Jesus èn ben teki en foe tjari go na fesi a Sanhedrin, dan a Granpriester Kajafas ben aksi na wan triki fasi: „Mi e poti joe na ondro sweri na a Gado di e libi, foe froeteri wi efoe joe na a Krestes, a Manpikin foe Gado!” A ten disi ben de „wan ten foe taki” so srefi, bika efoe Jesus ben tan tiri, dan sma ben kan taki dati Jesus no ben de a Krestes. So boen Jesus ben piki: „Na mi.” — Mateus 26:63, 64; Markus 14:61, 62.
12. San ben de den situwâsi di ben boeweigi Paulus nanga Barnabas foe taki sondro frede na Ikonium?
12 Poti prakseri so srefi na tapoe na eksempre foe Paulus nanga Barnabas. Tori foe den Apostel 14:1, 2 e taki: „Na Ikonium . . . den ben go makandra na ini a snoga foe den djoe èn den ben taki na so wan fasi, taki wan bigi ipi djoe nanga Grikisma ben tron bribiman. Ma den djoe di no ben bribi, ben soetoe faja gi den sili foe den sma foe den nâsi èn den ben taki sani foe pori den sma foe den nâsi nanga den brada” (Tori foe den Apostel 14:1, 2). Na ini Njoe Testament nanga den Psalm wi e leisi: „Ma dem Djoe, disi no ben bribi, doe tee dem heidensoema hatti kom bron nanga dem brara.” Den djoe gensman no ben de tevrede nomo foe no teki a boskopoe, ma den ben bigin kragi den kresten na wan falsi fasi, foe proeberi foe meki den heiden go so fara taki den ben o de teige den kresten.a A si di den no ben wani si krestendom na ai, ben dipi troetroe! (Teki gersi Tori foe den Apostel 10:28.) Disi ben de „wan ten foe taki” soleki fa Paulus nanga Barnabas ben feni, bika efoe den no ben o opo taki, dan den njoen disipel ben o lasi-ati foe a fasi fa a poebliki ben kragi den. „Foe dati ede den [Paulus nanga Barnabas] ben tan wan heri pisi ten drape èn den ben taki sondro frede ini a makti foe Jehovah”, di ben sori taki A ben feni den boen foe di a ben gi Paulus nanga Barnabas makti foe doe wondroe sani. Disi ben abi leki bakapisi taki wan toe sma ’ben de gi den djoe ma trawan ben de gi den apostel’. — Tori foe den Apostel 14:3, 4.
13. Te trawan no e taki boen sani foe wi, dan o ten a de „wan ten foe tan tiri” moro foeroe?
13 Dan fa wi moesoe doe te trawan no e taki boen sani foe wi? Dati e anga foe a situwâsi srefisrefi. Wan toe situwâsi e meki taki wi moesoe gebroiki a gronprakseri taki a de „wan ten foe tan tiri”. Dati de spesroetoe so, te gensman di abi a fasti bosroiti foe gens wi, e proeberi foe kisi wi so fara taki wi e haritaki nanga den sondro taki den nanga wi o man feni makandra. Wi no moesoe frigiti taki wan toe sma no wani sabi waarheid (2 Tesalonikasma 2:9-12). A ben sa de wan soso sani, foe wi meki moeiti foe taki-go-taki-kon nanga den wan di na ati foe den abi heimemre sondro bribi. Boiti dati, efoe wi ben sa taki makandra nanga ibri sma di e kragi wi na wan falsi fasi, dan dati ben sa kan poeroe wi prakseri foe wan moro prenspari wroko di e gi pai — dati na a wroko foe jepi opregti-ati sma di troetroe wani leri bijbel waarheid. So boen te wi e kisi foe doe nanga feanti di abi a fasti bosroiti foe prati lei foe wi, dan a rai foe Gado na: „Tan farawe foe den.” — Romesma 16:17, 18; Mateus 7:6.
14. Na sortoe fasi wi kan opo taki gi a bribi foe wi na fesi foe trawan?
14 A no de foe taki, dati disi no wani taki dati wi no e opo taki gi a bribi foe wi. Te foe kaba, „wan ten foe taki” de toe. Na wan joisti fasi wi e broko wi ede nanga sma di kisi foe jere ogri-ati lei foe wi. Wi wani tjari kon na krin gi trawan na overtoigi di wi abi èn di e waran na ati; foe troe wi e prisiri te wi e kisi na okasi. Petrus ben skrifi: „Santa Krestes leki Masra na ini oen ati, èn de klariklari ala ten foe opo taki gi oensrefi na fesi ibriwan sma di e aksi oenoe wan reide foe a howpoe di de na ini oenoe, ma doe dati makandra nanga wan safrifasi èn nanga dipi lespeki” (1 Petrus 3:15). Te opregti sma di abi belangstelling e aksi boeweisi foe den sani di wi e bribi èn di wi e boboi, te den e aksi fa a de nanga den falsi kragi di gensman e taki foe wi, dan wi abi a frantiwortoe foe opo taki gi wi bribi èn gi den sma dati boen piki di komoto foe bijbel. Boiti dati, a moi fasi fa wi e tjari wisrefi kan de wan bigi kotoigi toe. Te sma di no e teki sma partèi, e si taki troetroe wi e proeberi foe libi akroederi den regtfardiki markitiki foe Gado, dan den kan si wantewante taki den kragi di trawan e kragi wi, na falsi kragi. — 1 Petrus 2:12-15.
Fa a de nanga ogri-ati lei di e tjari kon na doro?
15. San na wán eksempre fa njoensoe drai den tori foe Jehovah Kotoigi?
15 Son tron, njoensoe drai den tori foe Jehovah Kotoigi. Foe eksempre na tapoe 1 augustus 1997, wan koranti foe Rosiakondre ben tjari artikel nanga ogri-ati lei kon na doro pe den ben skrifi taki na mindri tra sani, den Kotoigi e aksi foe den memre foe den taki dorodoro den moesoe ’weigri foe teki den wefi foe den, den masra foe den, nanga den papa nanga mama foe den, efoe den sma disi no e froestan a bribi foe den, noso no abi a srefi bribi leki den’. Iniwan sma di sabi Jehovah Kotoigi troetroe, sabi taki disi na wan falsi kragi. Bijbel e sori taki kresten moesoe handri nanga osofamiri memre di no de na bribi na wan lobi-ati fasi èn nanga lespeki, èn den Kotoigi e meki moeiti foe waka baka a rai dati (1 Korentesma 7:12-16; 1 Petrus 3:1-4). Tokoe den wortoe foe na artikel ben poti tapoe papira, èn foeroe leisiman ben kisi bodoi di no joisti. Fa wi kan opo taki gi a bribi foe wi te trawan e kragi wi na wan falsi fasi?
16, 17. nanga a boksoe tapoe bladzijde 16. (a) San A Waktitoren ben taki wan leisi foe a gi di wi e gi piki na tapoe njoensoe di e tjari falsi bodoi? (b) Na ondro sortoe situwâsi Jehovah Kotoigi ben kan gi piki na tapoe fowtoe sani di njoensoe e taki?
16 Agen djaso „wan ten foe tan tiri èn wan ten foe taki” de. A Waktitoren ben taki en na so wan fasi, wan leisi: „Efoe wi no e poti prakseri na tapoe a falsi bodoi na ini njoensoe, noso efoe wi e opo taki gi waarheid nanga jepi foe sani di fiti, e anga foe a situwâsi, a sma di e taki dati wi fowtoe, èn san a sma dati wani taki nanga den falsi bodoi di a e tjari.” Na ini wan toe kefal a ben sa moro boen foe libi den takroe njoensoe disi gi san den de, èn na so wan fasi wi e meki taki den lei disi no e panja go moro fara.
17 Na ini tra kefal a kan de „wan ten foe taki”. Wan njoensoeman di de foe froetrow kande ben kisi foe jere sani foe Jehovah Kotoigi di no de joisti èn kande a ben sa wani kisi bodoi di de troe foe wi. (Loekoe a boksoe „Meki wan fowtoe denki kon boen baka.”) Efoe takroe sani di e taki na ini njoensoe, e meki taki sma e bigin abi wan fowtoe denki foe wi fosi den jere troe tori foe wi, èn efoe dati e hendri wi preikiwroko, dan sma di e teki presi gi a bijkantoro foe a Waktitoren Genootschap kan soekoe foe opo taki gi waarheid na wan fasi di fiti.b Foe eksempre, bekwaam owroeman ben kan kisi a toewijzing foe froeteri fa a tori sidon troetroe, soleki na ini wan programa na telefisi, bika a kan taki te den no e doe dati, dan sma kan prakseri taki Jehovah Kotoigi no sabi san den moesoe taki. Aparti Kotoigi nanga koni e waka baka a tiri foe a Waktitoren Genootschap nanga den sma di e teki presi gi a Genootschap na ini den sortoe afersi disi. — Hebrewsma 13:17.
Opo taki gi a boen njoensoe nanga jepi foe a wet
18. (a) Foe san ede wi no abi a primisi foe libisma tirimakti fanowdoe foe preiki? (b) Sortoe sani wi e doe te wi no e kisi primisi foe preiki?
18 A primisi di wi abi foe preiki a boen njoensoe foe Gado Kownoekondre, e kon foe hemel. Jesus, di ben gi wi a komando foe doe a wroko disi, ben kisi ’ala makti na ini hemel èn na grontapoe’ (Mateus 28:18-20; Filipisma 2:9-11). Foe dati ede, wi no abi a primisi foe libisma tirimakti fanowdoe foe preiki. Tokoe wi e erken taki foe de fri na relisi sei, na wan jepi foe panja a Kownoekondre boskopoe. Na ini den kondre pe wi abi a fri foe go doro nanga wi anbegi, wi sa gebroiki a sistema foe lanti wet foe kibri na anbegi foe wi. Pe wi no e kisi primisi foe abi so wan fri, wi sa wroko nanga a wet sistema foe meki moeiti foe kisi so wan sortoe fri. A marki foe wi no de foe tjari kenki kon gi a libisma libimakandra, ma foe „opo taki gi a boen njoensoe” èn foe „poti en steifi akroederi a wet”.c — Filipisma 1:7.
19. (a) San kan de a bakapisi te wi ’e pai Gado baka den sani di de foe Gado’? (b) San wi teki leki fasti bosroiti foe doe?
19 Leki Jehovah Kotoigi, wi e erken Jehovah leki na Universeel Soeverein. A wet foe en na a moro hei wet. Na wan opregti fasi wi e gi jesi na libisma tirimakti, èn na so fasi wi ’e pai Ceasar baka den sani di de foe Ceasar’. Ma wi no sa meki noti kon na mindri wan foe den moro prenspari frantiwortoe di wi abi — ’foe pai Gado baka den sani di de foe Gado’ (Mateus 22:21). Wi e froestan srefisrefi taki te wi e doe dati, dan dati sa meki wi tron ’sani di den nâsi no wani si na ai’, ma wi e teki disi leki san a e kostoe foe de wan disipel. Den tori di wet skrifi foe Jehovah Kotoigi na ini a di foe 20 jarihondro na wan boeweisi foe a fasti bosroiti foe wi foe opo taki gi a bribi foe wi. Nanga jepi foe Jehovah èn nanga jepi foe a hori di A e horibaka gi wi, wi sa go doro „sondro foe stòp foe gi leri èn foe meki a boen njoensoe . . . bekènti”. — Tori foe den Apostel 5:42.
[Foetoewortoe]
a Matthew Henry’s Commentary on the Whole Bible e tjari kon na krin taki den djoe gensman „ben teki en leki wan wroko foe go na den [heiden] disi efoe den ben sabi den, èn den ben taigi den ala sani di den ben kan prakseri èn foe meki den tegoe gi den kresten, foe meki den heiden kisi wan takroe prakseri foe krestendom.”
b Baka di na artikel nanga ogri-ati lei ben kon na doro na ini a koranti foe Rosiakondre (soleki fa dati ben kari na ini paragraaf 15), dan Jehovah Kotoigi ben kroetoe a tori na a Presidentiële Rechtskamer voor Mediageschillen van de Russische Federatie (Moro Hei Kroetoebangi gi Haritaki foe Bodoi foe Rosiakondre) èn den Kotoigi ben aksi a kroetoebangi foe loekoe den falsi kragi baka di ben skrifi na ini na artikel. No so langa pasa, a kroetoebangi ben kroetoe a tori pe den ben strafoe a koranti foe druk so wan artikel nanga ogri-ati lei. — Loekoe Ontwaakt!, 22 november 1998, bladzijde 26, 27.
c Loekoe na artikel „Kibri a boen njoensoe nanga jepi foe a wet” tapoe bladzijde 19-22.
Joe e memre disi ete?
◻ Foe san ede Jehovah Kotoigi na ’sani di sma no wani si na ai’?
◻ Fa wi moesoe si den sma di no abi a srefi bribi leki di foe wi?
◻ Sortoe eksempre Jesus ben poti na wan balansi fasi gi trawan te a ben kisi foe doe nanga gensman?
◻ Te trawan no e taki boen sani foe wi, dan fa wi kan gebroiki a gronprakseri taki „wan ten foe tan tiri èn wan ten foe taki” de?
[Faki na tapoe bladzijde 16]
Meki wan fowtoe denki kon boen baka
„Na Jakwiba, Bolifia, wan groepoe evangelie sma foe drape ben seti sani foe sori wan kino na tapoe a telefisistation di, soleki fa a sori, ben kon foe sma di fadon komoto na bribi. Den owroeman ben hori na prakseri taki a programa dati ben sa abi takroe bakapisi, èn dati meki den ben teki a bosroiti foe fisiti toe telefisistation èn den ben wani pai den foe sori a poebliki den video Jehovah’s Getuigen — De organisatie achter de naam (Jehovah Kotoigi — Na organisâsi baka a nen) èn De bijbel — Een boek met feiten en profetieën (Bijbel — Wan boekoe nanga troetori èn profeititori). Baka di wan basi foe wan radiostation ben si den video foe a Genootschap, dan en ati ben bron nanga den fowtoe sani di ben sori na ini a programa foe den sma di fadon komoto na bribi, èn a basi disi ben pristeri den Jehovah Kotoigi foe meki a distriktkongres foe den di den ben o hori, bekènti sondro taki den Kotoigi ben sa abi foe pai en gi dati. A nomroe foe fisitiman ben hei srefisrefi moro a nomroe di gwenti foe fisiti a kongres, èn foeroe opregti-atiwan ben bigin poti opregti aksi di den Kotoigi ben fisiti den na ini a diniwroko.” — Jaarboek van Jehovah’s Getuigen 1997, bladzijde 61, 62.
[Prenki na tapoe bladzijde 17]
Ten na ten, Jesus ben sori sma krinkrin taki den falsi kragi foe den sma di ben soekoe fowtoe na en, no ben de troe