Trawan no wani si den na ai foe den bribi ede

„Oenoe sa de sani di no wan sma sa wani si na ai, foe mi nen ede.” — MATEUS 10:22.

1, 2. Joe kan froeteri wan toe ondrofenitori di pasa troetroe na ini a libi foe Jehovah Kotoigi foe di den ben doe san den ben bribi?

DEN tjari wan eerlijk wenkriman foe na èilanti Kreta, gowe go sroto foeroetron èn den tjari en go na kroetoebangi foe Grikikondre ibritron baka. A tan moro leki siksi jari na ini doengroe-oso, farawe foe en wefi nanga den feifi pikin foe en. Na Japan den jagi wan studenti di abi 17 jari, foe skoro, ala di a studenti ben tjari ensrefi na wan boen fasi èn ben de a moro boen wan foe a klas foe en foe 42 studenti. Na Fransikondre wan lo sma lasi a wroko foe den esi-esi sondro taki trawan froeteri den foe san ede, ala di den abi wan boen nen di den kisi foe di den na fajafaja èn opregti wrokoman. San de a srefi na ini den ondrofenitori disi di pasa troetroe ini a libi?

² Ala den sma disi na Jehovah Kotoigi. San ben de na „ogri” di den ben doe? Te joe loekoe en boen, dati ben de a doe di den ben doe san den ben bribi. Foe di a wenkri-man ben gi jesi na den sani di Jesus Krestes ben leri sma, meki a ben e prati a bribi foe en nanga trawan (Mateus 28:19, 20). A ben kisi kroetoe tapoe gron foe wan owroe Griki wet di e sori taki a de wan ogri sani te joe e proeberi foe overtoigi sma foe teki a bribi foe joe. Den ben jagi a studenti foe skoro foe di a konsensi foe en di ben kisi leri foe bijbel, no ben gi en pasi foe teki prati na kendo (a fasi foe feti nanga feti-owroe, foe Japan) oefening di ben de froeplekti na skoro (Jesaja 2:4). Èn den wan di ben lasi a wroko foe den na Fransikondre ben kisi foe jere taki a wan-enkri reide foe san ede den ben lasi den wroko, ben de foe di den ben taigi trawan taki den na Jehovah Kotoigi.

3. Foe san ede a pina di Jehovah Kotoigi e pina na ini na anoe foe tra libisma, na wan sani di no e pasa so foeroe?

³ Den sortoe hati ondrofenitori disi e sori krinkrin san miti Jehovah Kotoigi na ini wan toe kondre no so langa pasa. Ma gi moro foeroe foe den Jehovah Kotoigi, a njan di den e njan hebi pina foe na anoe foe tra libisma, na wan sani di no e pasa so foeroe. Na heri grontapoe, sma sabi Jehovah pipel foe a heri boen fasi fa den e tjari densrefi — èn dati meki no wan sma kan abi wan boen reide foe doe den ogri (1 Petrus 2:11, 12). Den no e meki takroe plan noso e tjari densrefi na wan fasi foe hati tra sma (1 Petrus 4:15). Kontrari foe dati, den e proeberi foe libi akroederi bijbel rai foe saka densrefi fosi na Gado ondro, èn baka dati na den grontapoe tirimakti ondro. Den e pai den belasting di lanti e aksi foe den èn den e meki moeiti foe „abi vrede nanga ala sma” (Romesma 12:18; 13:6, 7; 1 Petrus 2:13-17). Na ini a bijbel leriwroko foe den, den e gi sma deki-ati foe abi lespeki gi wet, gi osofamiri banti, èn gi boen gwenti nanga wet. Foeroe tirimakti ben prèise den foe di den ben de borgoe di e hori densrefi na a wet (Romesma 13:3). Ma soleki fa a fosi paragraaf e sori, dan son tron den de den wan di sma e soekoe foe gens — na wan toe kondre, a ben kon so fara srefi taki lanti tapoe a wroko foe den. A sani dati moesoe froewondroe wi?

San a e „kostoe” foe de wan disipel

4. Soleki fa Jesus ben sori, dan san wan sma ben kan froewakti te a ben o tron wan disipel foe en?

⁴ Jesus Krestes no ben e meki sma tweifri na a sani di ben de fanowdoe foe de wan disipel foe en. „Wan srafoe no bigi moro en masra”, a ben taigi den bakaman foe en. „Efoe den froefolgoe mi, dan den sa froefolgoe oenoe toe.” Sma no ben wani si Jesus na ai, ’sondro taki a ben doe den wan sani’ (Johanes 15:18-20, 25; Psalm 69:4; Lukas 23:22). Den disipel foe en ben kan froewakti a srefi sani — gens sondro taki troe retidoe e pasa drape. Na moro leki wán okasi, a ben warskow den: „Oenoe sa de sani di no wan sma sa wani si na ai.” — Mateus 10:22; 24:9.

5, 6. (a) Foe san ede Jesus ben gi sma di ben o tron bakaman foe en, tranga foe loekoe ’omeni a sa kostoe’? (b) Dan foe san ede a no moesoe froewondroe wi te wi kisi foe doe nanga gens?

⁵ Foe dati ede, Jesus ben gi den sma di ben o wani tron bakaman foe en, tranga foe loekoe „hoemeni a sa kostoe” foe de wan disipel (Lukas 14:28, Njoe Testament nanga dem Psalm. Foe san ede a ben doe dati? No taki den ben moesoe loekoe efoe den ben o tron wan bakaman foe en efoe no, ma so taki den kan abi a fasti bosroiti foe doe san de fanowdoe. Wi moesoe sreka wisrefi foe horidoro na ondro iniwan tesi noso problema di e kon nanga a grani disi (Lukas 14:27). No wan sma e dwengi wi foe dini Jehovah leki wan bakaman foe Krestes. Dati na wan bosroiti di wi e teki nanga friwani; dati de so srefi wan bosroiti di wi e teki tapoe a gron foe sabi. Wi sabi na fesi taki boiti den blesi di wi sa kisi te wi abi wan matifasi nanga Gado leki sma di gi wisrefi abra na en, tokoe wi sa de ’sani di sma no wani si na ai’. So boen, a no e froewondroe wi te wi e kisi foe doe nanga gens. Wi teri ’omeni a sa kostoe’, èn wi de srekasreka foe pai dati. — 1 Petrus 4:12-14.

⁶ Foe san ede wan toe sma, so srefi wan toe spesroetoe lanti tirimakti, wani gens troe kresten? Foe kan piki dati, a de wan jepi foe ondrosoekoe toe relisi groepoe na ini a fosi jarihondro G.T. Ala den toe groepoe ben de groepoe di sma no ben wani si na ai — ma dati ben de foe difrenti reide ede.

Den no wani si trawan na ai èn trawan no wani si den na ai

7, 8. Sortoe leri ben leri sma foe tegoe gi den heiden, èn fa den djoe ben bigin tjari densrefi foe dati ede?

⁷ Na ini a fosi jarihondro G.T., Israèl ben de na ondro a tiri foe Rome, èn ala nanga ala, a Djoe-bribi, a djoe relisi sistema, ben de na ini na ogri-ati anoe foe den sortoe tiriman leki den leriman foe Wet nanga den Fariseiman (Mateus 23:2-4). Den fanatiek fesiman disi ben teki den gronprakseri foe a Wet foe Moses ini a tori foe a de di den ben moesoe de aparti foe den nâsi, èn den fesiman disi ben drai den wet disi so taki den ben aksi den djoe foe tegoe foe sma di no ben de djoe. Na so fasi, den ben meki wan relisi di no ben wani si heiden na ai, èn foe a san dati ede meki den heiden no ben wani si den djoe na ai toe.

⁸ A no ben moeilek gi den djoe fesiman foe preiki taki sma no moesoe abi lespeki gi den heiden, foe di na a ten dati den djoe ben si den heiden leki tegoe kriatoeroe. Den relisi fesiman ben leri taki noiti wan djoe oema ben mag de en wawan nanga wan heiden, bika den „e denki taki den [heiden] no e hori densrefi na boen gwenti nanga wet”. Wan djoe man no ben moesoe „tan en wawan nanga den foe di den e denki taki den [heiden] e trowe broedoe”. Te wan heiden ben o merki wan meti, dan wan djoe no ben mag gebroiki a merki dati efoe a djoe no ben si fa a heiden ben merki a meti. Den fesiman foe den djoe ben meki taki den djoe ben kweki wan strak apartifasi èn no ben abi demakandra nanga sma foe tra nâsi. — Teki gersi Johanes 4:9.

9. San ben de a bakapisi foe a leri foe den djoe fesiman ini a tori foe sma di no ben de djoe?

⁹ Den sortoe leri disi ini a tori foe sma di no ben de djoe, no ben jepi foeroe foe horibaka gi boen matifasi na mindri djoe nanga heiden. Den heiden ben kon si den djoe leki sma di no wani si no wan sma foe a libisma famiri na ai. A Rome historia skrifiman Tacitus (di ben gebore na ini a pisi ten foe 56 G.T.) ben taki foe den djoe, dati „den ben si a libisma famiri di tan abra, leki fa trawan e si feanti di den no wani si na ai”. Tacitus ben taki so srefi dati heiden di ben tron djoe proselietsma, ben kisi a leri foe drai baka gi a kondre foe den èn foe no si den osofamiri nanga den mati foe den leki warti sma. Moro foeroe, den Romesma ben froedrage den djoe di ben de nanga ipi-ipi sma. Ma na oproeroe foe den djoe na ini 66 G.T. ben meki taki den Romesma ben pai den nanga ogri baka, èn dati ben meki taki Jerusalem ben kisi pori na ini 70 G.T.

10, 11. (a) Sortoe fasi foe handri nanga doroseisma, a Wet foe Moses ben aksi foe sma? (b) San wi kan leri foe a sani di ben pasa nanga a Djoe-bribi?

¹⁰ Fa a fasi dati fa den ben si sma foe doroseikondre, gersi a fasi foe anbegi soleki fa dati ben skrifi na ini a Wet foe Moses? A Wet ben horibaka troetroe gi a de di a nâsi ben moesoe de aparti foe tra nâsi, ma disi ben de foe kibri den Israèlsma, spesroetoe a soifri anbegi foe den (Josua 23:6-8). Na a srefi fasi, a Wet ben aksi foe den taki den ben moesoe handri nanga doroseisma nanga reti èn na wan boen fasi, èn taki den ben moesoe lobi foe ontfanga den doroseisma — so langa den disi no ben sa tron sma di foe espresi no ben gi jesi na den wet foe Israèl (Lefitikus 24:22). Foe di den djoe relisi fesiman foe den dei foe Jesus no ben hori densrefi na den sani di a wet ben leri sma troetroe foe doroseisma, dati meki den djoe fesiman disi ben meki wan fasi foe anbegi kon di ben meki taki den djoe no ben wani si doroseisma na ai, èn a fasi disi foe anbegi, ben meki taki den doroseisma no ben wani si a fasi foe anbegi disi na ai. Te foe kaba, a fosi jarihondro djoe nâsi ben lasi a boen-ati foe Jehovah. — Mateus 23:38.

¹¹ Wi kan leri wan sani foe disi? Ija, wi kan leri wan sani foe disi! Efoe wi abi wan bigimemre fasi foe tjari wisrefi pe wi e si wisrefi moro hei leki trawan èn e loekoe trawan leki sma di de moro lagi leki wi foe di den no abi a srefi bribi leki wi, dan krinkrin dati no e sori a soifri anbegi foe Jehovah, èn so srefi so wan fasi foe tjari wisrefi no e plisi Jehovah toe. Poti prakseri na tapoe den getrow kresten na ini a fosi jarihondro. A no de so, taki den no ben wani si sma na ai di no ben de kresten, èn a no ben de so toe, taki den ben opo densrefi foe feti nanga Rome. Ma tokoe, den ben de ’sani di sma no ben wani si na ai’. Foe san ede? Èn foe soema dati ben kon?

Den fosi kresten — Soema ben de den sma di no ben wani si den na ai?

12. Fa den Boekoe foe bijbel e sori krinkrin taki Jesus wani dati den bakaman foe en moesoe abi wan balansi fasi foe si sma di no de kresten?

¹² Den leri foe Jesus e sori krin taki Jesus ben wani taki den disipel foe en ben moesoe abi wan balansi fasi foe si sma di no ben de kresten. Na a wán sei, a ben taki dati den bakaman foe en ben sa tan aparti foe grontapoe — dati wani taki foe tan farawe foe den fasi di no ben kroederi nanga den regtfardiki fasi foe Jehovah. Den ben sa tan neutraal ini den afersi soleki feti nanga politiek (Johanes 17:14, 16). Na a tra sei, na presi foe preiki taki den ben moesoe tegoe gi sma di no ben de kresten, Jesus ben taigi den bakaman foe en foe ’lobi den feanti foe den’ (Mateus 5:44). Na apostel Paulus ben gi kresten tranga: „Efoe joe feanti abi angri, gi en foe njan; efoe watra e kiri en, gi en wan sani foe dringi” (Romesma 12:20). A ben taigi kresten toe foe „doe boen gi ala sma”. — Galasiasma 6:10.

13. Foe san ede den djoe relisi fesiman ben gens den kresten disipel so foeroe?

¹³ Tokoe, heri esi den kresten disipel ben kon feni densrefi leki ’sani di sma no wani si na ai’ èn dati ben kon foe dri fonten. A fosiwan ben de den djoe relisi fesiman. A no de wan sani di e froewondroe sma, taki den kresten ben hari a prakseri foe den fesiman dati esi-esi! Den kresten ben abi hei gronprakseri foe boen gwenti nanga wet èn foe soifri retifasi, èn fajafaja den ben tjari wan boskopoe kon di e gi sma howpoe. Doesoendoesoen sma ben gowe libi a Djoe-bribi èn ben teki krestendom (Tori foe den Apostel 2:41; 4:4; 6:7). Gi den djoe relisi fesiman dati, den djoe disipel foe Jesus ben de noti moro leki sma di fadon komoto na a Djoe-bribi! (Teki gersi Tori foe den Apostel 13:45.) Den fesiman disi di ben ati-bron, ben firi taki krestendom ben meki den relisi gwenti foe den tron notinoti. We, a krestendom disi ben weigri foe teki a srefi fasi fa den ben si heiden! Sensi 36 G.T., heiden ben kan tron kresten, e prati a srefi bribi makandra nanga den djoe kresten èn e njan boen foe den srefi kresten grani leki den djoe kresten. — Tori foe den Apostel 10:34, 35.

14, 15. (a) Foe san ede a ben kon de so taki den heiden anbegiman no ben wani si kresten na ai? Gi wan eksempre. (b) Den fosi kresten ben tron ’sani di sma no wani si na ai’ gi sortoe di foe dri groepoe?

¹⁴ A di foe toe sani na taki heiden anbegiman no ben wani si den kresten na ai. Foe eksempre, na Efeise foe owroeten, a meki di den ben meki solfroe santa presi foe na oema-gado Artemis, ben de wan sani di ben e tjari moni kon na inisei. Ma di Paulus ben preiki drape, wan heri ipi sma foe Efeise ben piki boen na tapoe dati, èn den ben e gowe libi na anbegi foe Artemis. Foe di a bisnis foe den solfroesmeti ben de ini kefar, meki den ben meki oproeroe foe dati (Tori foe den Apostel 19:24-41). Wan srefi sortoe sani ben pasa di krestendom bribi ben panja go na Bitania (now noordwest-sei foe Torkoekondre). A no langa baka di den ben kaba skrifi den kresten Griki Boekoe foe bijbel, dan a granman foe Bitania, Plinius a Jongoewan, ben taki dati den heiden tempel ben lasi sma èn taki a seri foe njanjan gi meti di den ben o ofer, ben go na baka foeroe. Den kresten ben kisi a fowtoe foe dati — èn den ben froefolgoe den — foe di na anbegi foe den kresten no ben gi den pasi foe tjari ofrandi foe meti èn foe anbegi popki (Hebrewsma 10:1-9; 1 Johanes 5:21). A de krin, taki a panja di krestendom ben panja go na ala sei, ben abi krakti na tapoe a groepoe foe sma di ben kisi wini foe sani di ben abi foe doe nanga heiden anbegi, èn den wan di ben lasi bisnis nanga moni ben atibron nanga krestendom.

¹⁵ A di foe dri sani na taki kresten ben tron ’sani di sma no wani si na ai’ gi den Romesma di ben lobi den eigi kondre. Na ini a bigin, den Romesma ben sabi den kresten leki wan pikin èn kande fanatiek relisi groepoe. Ma baka ten, efoe wan sma ben taki nomo dati a ben de wan kresten, dan dati ben tron wan ogri sani di ben kan tjari dedestrafoe kon tapoe a sma. Foe san ede trawan ben sa si den eerlijk borgoe di ben e libi wan kresten libi, leki sma di ben e froedini en foe trawan froefolgoe den èn kiri den?

Den fosi kresten — Foe san ede a Rome libimakandra no ben wani si den na ai?

16. Na sortoe fasi kresten ben tan farawe foe grontapoe, èn foe san ede disi ben meki taki den no ben pôpi na ini a Rome libimakandra?

¹⁶ Na a fosi presi, a Rome libimakandra no ben wani si kresten na ai foe di den kresten ben doe san den ben bribi. Foe eksempre, den ben tan farawe foe grontapoe (Johanes 15:19). So boen den no ben go doe politiekwroko, èn den ben weigri foe doe sroedatiwroko. Leki wan bakapisi foe dati, den „ben si den leki sma di ben dede ini grontapoe, èn di trawan no ben kan gebroiki gi no wan afersi foe a libi”, na so a historia skrifiman Augustus Neander e taki. Foe no de wan pisi foe grontapoe ben wani taki so srefi foe wai pasi gi den ogri fasi foe a kroeka Rome libimakandra. „A heiden libimakandra di ben lobi meki prisiri, ben kon broeja nanga a pikin kresten libimakandra nanga a fromsoe fasi èn a krinfasi foe den”, na so a historia skrifiman Will Durant e tjari kon na krin (1 Petrus 4:3, 4). Foe di den Romesma ben e froefolgoe èn ben kiri den kresten, meki na so fasi den ben soekoe foe tapoe den kresten di ben broeja den.

17. San e sori taki a preikiwroko foe den fosi jarihondro kresten ben abi boen bakapisi?

¹⁷ Den fosi jarihondro kresten ben preiki a boen njoensoe foe Gado Kownoekondre fajafaja sondro foe meki wan skeki (Mateus 24:14). Na ini a pisi ten foe 60 G.T., Paulus ben kan taki dati a boen njoensoe „ben preiki na ala kriatoeroe di de na ondro hemel” (Kolosesma 1:23). Na a kaba foe a fosi jarihondro, den bakaman foe Jesus ben meki disipel na ini a heri Gran Tirimakti foe Rome — na Asia, Europa, nanga Afrika! Srefi wan toe memre foe „na osofamiri foe Caesar” ben tron kresten (Filipisma 4:22).a A fajafaja preikiwroko disi, ben meki tra sma atibron. Neander e taki: „Safrisafri krestendom ben go na fesi na mindri ala sortoe sma, èn a ben tron wan kefar di ben kan trowe a relisi foe a kondre.”

18. Fa a gi di den kresten ben gi densrefi na Jehovah wawan ben meki taki a lanti tirimakti foe Rome no ben lobi a tori foe den srefisrefi?

¹⁸ Den bakaman foe Jesus ben gi densrefi na ini a dini foe Jehovah wawan (Mateus 4:8-10). Kande a sani disi foe na anbegi foe den kresten, moro leki den tra sani, ben meki taki Rome no ben lobi a tori srefisrefi. Den Romesma ben froedrage tra relisi, so langa den bakaman foe den relisi dati ben abi wan prati na ini na anbegi foe a keiser. Den fosi kresten no ben kan teki prati na ini so wan sortoe fasi foe anbegi. Den ben si densrefi leki sma di abi foe gi frantiwortoe na wan moro hei makti leki di foe a Rome Kondre, namkoe na Jehovah Gado (Tori foe den Apostel 5:29). Leki wan bakapisi foe dati, awansi o boen wan kresten ben tjari ensrefi na iniwan tra fasi, tokoe den ben si en leki wan feanti foe a Kondre.

19, 20. (a) Soema ben de den sma di ben abi a frantiwortoe foe prati ogri-ati lei foe den getrow kresten moro foeroe? (b) Sortoe falsi kragi, sma ben tjari teige den kresten?

¹⁹ Ma wan tra sani de foe san ede getrow kresten ben tron ’sani di sma no wani si na ai’ ini a Rome libimakandra: Sma ben bigin bribi foeroe foe den ogri-ati lei di trawan ben prati foe den kresten, èn den djoe relisi fesiman ben abi foeroe frantiwortoe na ini a panja di den ogri-ati lei disi ben panja (Tori foe den Apostel 17:5-8). Na ini a pisi ten foe 60 noso 61 G.T., di Paulus ben de na ini Rome foe wakti taki Keiser Nero ben o kroetoe en, dan djoe fesiman ben taki foe den kresten: „Foe troe, foe a sekte disi wi kon sabi taki na ala presi sma e taki sani teige den” (Tori foe den Apostel 28:22). A moesoe foe ben de so, taki Nero ben jere den ogri-ati lei di sma ben taki foe den kresten. Na ini 64 G.T., di Nero ben kisi fowtoe foe a faja di ben bron Rome, dan a ben teki den kresten di ben abi wan takroe nen kaba leki sondoe-bokoboko. A gersi leki a sani disi ben meki wan ogri winti foe froefolgoe wai na tapoe den kresten nanga a fasti bosroiti foe kiri den alamala.

²⁰ Den falsi kragi di den ben tjari teige den kresten, foeroetron ben moksi nanga langalanga lei èn a drai di sma ben drai den sani di den kresten ben bribi. Foe di den kresten ben anbegi wán Gado nomo èn no ben anbegi a keiser, meki trawan ben si den leki sma di no e bribi taki wan Gado de. Foe di wan toe osofamiri di no ben de kresten ben gens den famiriman foe den di ben de kresten, meki trawan ben kragi foe kresten taki den e broko na osofamiri-banti (Mateus 10:21). Tra sma ben si den kresten leki sma di e njan libisma meti, èn wan toe fonten e taki dati a kragi disi ben abi en gron tapoe a fasi fa sma ben froestan den wortoe foe Jesus di a ben taki na a Avondmaal foe Masra. — Mateus 26:26-28.

21. Foe sortoe toe sani ede den kresten ben de ’sani di sma no ben wani si na ai’?

²¹ Èn dati meki den getrow kresten ben de ’sani di den Romesma no ben wani si na ai’ foe toe sani ede: (1) a bribi foe den di ben abi en gron tapoe bijbel èn den sani di den ben doe akroederi bijbel, èn (2) den falsi kragi di sma ben tjari teige den. Awansi san na a sani di ben meki den gensman ben doe so, tokoe den ben abi wán marki nomo — a kwinsi di den ben wani kwinsi krestendom. A no de foe taki dati, den sma di troetroe ben soetoe faja foe froefolgoe den kresten, ben de sma di ben moro hei leki libisma, dati ben de den ogri jeje krakti di libisma ai no kan si. — Efeisesma 6:12.

22. (a) Sortoe eksempre e sori taki Jehovah Kotoigi ben meki moeiti foe „doe boen gi ala sma”? (Loekoe a boksoe tapoe bladzijde 11.) (b) Foe sortoe sani wi sa taki na ini a tra artikel?

²² Neleki den fosi kresten, na ini a ten disi Jehovah Kotoigi tron ’sani di difrenti kondre no wani si na ai’. Ma tokoe a no de so taki Jehovah Kotoigi no wani si sma di no de Kotoigi na ai; èn a no de so toe taki oiti wan ten den na sma di meki oproeroe teige lanti tirimakti. Kontrari foe dati, sma sabi den Kotoigi na heri grontapoe leki sma di abi opregti lobi èn a lobi dati e pasa ala skotoe na sociaal sei, foe ras ede, nanga foe lo ede. Ma dan foe san ede trawan ben froefolgoe Kotoigi? Èn fa Kotoigi e handri te trawan e gens den? Wi sa taki foe den aksi disi na ini a tra artikel.

[Foetoewortoe]

San joe ben sa piki?

◻ Foe san ede Jesus ben gi den sma di ben o tron bakaman foe en a tranga foe loekoe omeni a sa kostoe foe de wan disipel foe en?

◻ Sortoe krakti a fasi fa djoe ben si sma di no ben de djoe, ben abi tapoe a Djoe-bribi, èn san wi e leri foe disi?

◻ Foe sortoe dri fonten den getrow fosi kresten ben kisi gens?

◻ Foe sortoe prenspari sani ede den fosi kresten ben tron ’sani di den Romesma no ben wani si na ai’?

[Faki na tapoe bladzijde 11]

„Doe boen gi ala sma”

Jehovah Kotoigi e meki moeiti foe gi jesi na a bijbel froemane foe „doe boen gi ala sma” (Galasiasma 6:10). Te ten foe nowtoe doro, dan lobi gi den sma na den sei e boeweigi den Kotoigi foe jepi den wan di no abi den srefi relisi prakseri leki di foe den. Foe eksempre, na ini a pisi ten foe a bigi rampoe na Rwanda na ini 1994, Kotoigi foe Europa ben wani go na Afrika foe jepi drape nanga den eigi friwani. Foe kan jepi den sma, den ben orga kampoe boen, èn so srefi den ben bow pisiten ati-oso esi-esi. Boen foeroe njanjan, krosi, nanga bedikrosi frei kon nanga opolangi. Den loweman di ben njan boen foe den jepi disi, ben de dri tron moro foeroe leki den Kotoigi na a presi drape.

[Prenki na tapoe bladzijde 9]

Den fosi jarihondro kresten ben preiki a boen njoensoe fajafaja sondro foe meki wan skeki