Tra sma e teki rai foe joe?

BOEN rai di gi na wan joisti fasi abi boen bakapisi ala ten. Dati troe? Nôno! Srefi kefalek boen rai di koni raiman e gi, sma no wani teki noso ben poti den na wan sei. — Odo 29:19.

Disi ben pasa di Jehovah ben gi Kain rai, di a no ben wani si en brada Abel na ai (Genesis 4:3-5). Foe di a ben sabi a kefar di a ben tjari kon gi Kain, meki Gado ben taigi en: „Foe san ede joe kisi bigi atibron èn foe san ede joe fesi kon swa? Efoe joe go doe baka san boen, bigi prisiri no sa de dan? Ma efoe joe no go doe baka san boen, dan sondoe e wakti joe na a dromofo èn en tranga lostoe e soekoe joe; èn joe, foe joe sei, sa man basi en?” — Genesis 4:6, 7.

Na so fasi Jehovah ben teki sondoe gersi wan krasi boesimeti di ben e wakti foe djompo na tapoe Kain efoe a ben sa tan kweki wan bita-ati teige en brada. (Teki gersi Jakobus 1:14, 15.) Ten ben de ete gi Kain foe kenki a denki foe en, foe „go doe baka san boen”, na presi foe tan doe sani di kan tjari rampoe kon. A de wan sari sani taki Kain no ben gi jesi. A ben trowe a rai foe Jehovah, nanga kefalek takroe bakapisi.

Wan toe sma e tegoe èn e trowe ibri sortoe rai (Odo 1:22-30). A kan taki a de a fowtoe foe a sma di e gi rai taki wan sma e trowe a rai? (Job 38:2) Joe di e gi rai, joe e meki a moeilek gi tra sma foe teki a rai? Na onvolmaaktifasi foe libisma e meki dati de wan troetroe kefar. Ma joe kan meki a tjans kon moro pikin foe meki dati pasa, te joe e gebroiki den bijbel gronprakseri disi finifini. Meki wi go loekoe wan toe foe den.

’Meki kon boen baka ini wan jeje foe safri-atifasi’

„Brada, srefi efoe wan sma e meki wan fowtoe stap bifo a sabi dati, dan oenoe di abi eigifasi na jejefasi, proeberi ini wan jeje foe safri-atifasi foe meki so wan sma kon boen baka, ala di ibriwan foe oenoe e hori ai na oensrefi tapoe, foe frede ede taki oenoe toe kan kisi tesi” (Galatians 6:1). So boen, na apostel Paulus ben sori taki den wan di abi „eigifasi na jejefasi” moesoe proeberi foe meki wan kresten di „meki wan fowtoe stap bifo a sabi dati”, kon boen baka. Son tron a gersi leki den sma di abi moro mendri bekwaamfasi wani gi rai moro foeroe. Foe dati ede, no de toemoesi gaw foe gi tra sma rai (Odo 10:19; Jakobus 1:19; 3:1). A de spesroetoe den gemeente owroeman di abi den jeje bekwaamfasi foe gi rai. A no de foe taki dati ibri lepi kresten moesoe gi wan warskow efoe a e si taki wan brada e go na ini kefar.

Ma efoe joe e gi rai, loekoe boen taki a sani di joe e taki gron tapoe a koni foe Gado, no tapoe libisma denki nanga filosofia (Kolosesma 2:8). De leki wan boen boriman di e loekoe boen taki iniwan spesrei di a e gebroiki de boen èn no abi noti na ini di ben sa kan de leki vergif. Loekoe boen taki a rai foe joe gron tapoe Gado Wortoe èn no soso tapoe joe eigi denki (2 Timoteus 3:16, 17). Te joe e doe disi, dan joe kan de seiker taki a rai foe joe no sa doe no wan sma ogri.

A marki foe rai na foe meki wan sma di meki fowtoe „kon boen baka”, a no foe dwengi a sma foe kenki ala di a no wani. A Grikiwortoe di vertaal nanga „meki kon boen baka” abi foe doe nanga a poti di sma e poti wan skoifi bonjo kon boen baka, so taki a no kon moro takroe. Soleki fa wan skrifiman foe wortoeboekoe, W. E. Vine, e taki, dan a e sori toe „a de di a de fanowdoe foe abi pasensi èn foe horidoro na ini a sani di e doe”. Prakseri fa safoefasi nanga koni de fanowdoe foe no gi pen na skinfasi sondro taki a de fanowdoe. Na a srefi fasi, a sma di e gi rai moesoe loekoe heri boen taki a no e hati a sma di a e gi rai. Disi moeilek kaba te wan sma e aksi foe kisi rai. Te sma no aksi joe foe gi rai, dan moro koni nanga takt de fanowdoe.

Seiker joe no sa man „meki” no wan sma „kon boen baka” te joe abi feantifasi nanga en. Foe no doe disi, hori na prakseri taki a de fanowdoe foe sori „den safoe firi foe lobi foe sari-ati, boen-ati, sakafasi foe jeje, safri-atifasi nanga langa pasensi” (Kolosesma 3:12). Te wan datra no abi pasensi èn a grofoe sondro taki a de fanowdoe, dan a sikisma kan trowe en rai èn noiti go baka na en foe kisi a datrajepi di a abi fanowdoe.

Disi no wani taki dati a rai no moesoe serjoesoe. Jesus Krestes ben serjoesoe di a ben gi den seibi gemeente na ini a distrikt Asia rai (Openbaring 1:4; 3:1-22). A ben gi den wan toe langalanga rai di den ben moesoe jere èn gebroiki. Ma a serjoesoefasi foe Jesus ben de na ini balansi ala ten nanga den eigifasi soleki sari-ati nanga boen-ati, èn na so fasi a ben sori a lobi-ati jeje foe en hemel Tata. — Psalm 23:1-6; Johanes 10:7-15.

Gi rai na wan switi fasi

„Meki a taki foe oenoe de switi ala ten, a moesoe abi sowtoe leki spesrei, so taki oenoe sabi fa oenoe moesoe gi ibriwan sma wan piki” (Kolosesma 4:6). Sowtoe kan meki a tesi foe njanjan kon moro boen, moro switi. Efoe a rai foe joe moesoe switi, dan joe moesoe gi en ’na wan switi fasi, èn a moesoe abi sowtoe leki spesrei’. Ma srefi nanga den moro boen spesrei, tokoe sma kan meki a njanjan takroe, noso no poti en na tapoe wan preti na wan moi fasi. Dati no sa meki a sma e kisi moro lostoe foe njan. Foe taki en leti, a kan moeilek foe swari srefi wán spoen foe a sani di no switi.

Te wi e gi rai, dan a de prenspari foe teki den joisti wortoe. A koniman Salomo ben taki: „Leki gowtoe apra ini solfroe kerfoe wroko wan wortoe de, di taki na a joisti ten” (Odo 25:11). Kande a ben prakseri wan heri moi solfroe baki di abi kefalek moi kerfoe gowtoe apra na ini. Dati ben sa de wan heri moi sani foe si, èn joe ben sa breiti srefisrefi foe kisi en leki wan kado! Na a srefi fasi, switi wortoe di teki boen kan hari a sma srefisrefi di joe e proeberi foe jepi. — Preikiman 12:9, 10.

Kontrari foe dati, „wan wortoe di e gi sari e meki atibron kon” (Odo 15:1). Wortoe di joe no teki boen, kan tjari pen nanga atibron kon makriki, na presi foe tjari tangi kon. Foe taki en leti, a no soso takroe wortoe, ma so srefi a fasi fa wi sten de kan meki wan sma trowe a boen rai. Te joe e gi rai sondro takt èn na wan fasi sondro firi, dan dati kan doe a srefi ogri leki te joe e doe wan sma ogri nanga wan fetisani. „Wan sma de di e taki sondro foe denki, neleki nanga den djoekoe foe wan feti-owroe”, Odo 12:18 e taki. Foe san ede wi ben sa taki sondro foe denki, foe meki a moeilek gi wan sma foe arki a rai? — Odo 12:15.

Soleki fa Salomo ben taki, wan rai moesoe gi „na a joisti ten”. A ten te a rai e gi de toemoesi prenspari efoe a rai moesoe abi boen bakapisi! A de krin taki wan sma di no abi lostoe moro foe njan, no sa warderi a njanjan. Kande no so langa pasa a ben njan wan bigi njanjan kaba, noso kande a siki. A no de wan koni sani èn a no boen toe foe dwengi wan sma foe njan efoe a no wani njan.

Gi rai nanga sakafasi foe jeje

„Meki mi prisiri kon foeroe foe di oenoe . . . no doe noti foe di oenoe lobi foe meki trobi noso prakseri oensrefi nomo, ma nanga sakafasi foe jeje, foe di oenoe e si den tra sma moro hei leki oensrefi, e hori ai, no soso foe persoonlijk belangstelling ede na tapoe oen eigi afersi, ma so srefi foe persoonlijk belangstelling ede na tapoe di foe den trawan” (Filipisma 2:2-4). Efoe joe e gi rai na wan boen fasi, dan a „persoonlijk belangstelling” di joe abi gi a boen foe tra sma sa boeweigi joe. Joe sa moesoe sori srefi „sakafasi foe jeje” te joe e handri nanga den brada nanga sisa na jejefasi, ala di joe e si tra sma moro hei leki joesrefi. San dati wani taki?

Sakafasi foe jeje sa tapoe joe foe denki noso foe taki leki joe hei moro wan trawan. No wan foe wi abi wan reide foe firi taki wi hei moro den kompe bribiman foe wi. Ibriwan foe wi e meki fowtoe wanwan leisi. Foe di joe no man sabi san de na ini na ati, meki a de spesroetoe prenspari foe no kroetoe den reide foe a sma di joe e gi rai. Kande a no ben abi no wan takroe prakseri èn no ben sabi taki a ben e denki noso e doe wan fowtoe sani. Srefi te a sabi taki a no ben doe sani akroederi den markitiki foe Gado, tokoe a sa de moro makriki gi en foe teki a rai, efoe a rai e gi nanga sakafasi èn nanga na opregti belangstelling gi a boen foe en na jejefasi.

Prakseri fa joesrefi ben sa firi efoe wan sma ben kari joe kon njan, ma a sma di ben kari joe ben handri joe na wan kowroe fasi èn na wan wisiwasi fasi! Seiker joe no ben sa lobi a njanjan. Ija, „wan skotriki groentoe pe lobi de, boen moro wan mankaw di sma fatoe na a njanjan baki, èn pe bita-atifasi de toe” (Odo 15:17). Na a srefi fasi, srefi a moro boen rai kan de moeilek foe teki efoe a sma di e gi rai e sori taki a no lobi a sma di a e gi rai noso a e wisiwasi en èn e gi en sjen. Ma lobi, lespeki gi makandra, nanga froetrow di wi moesoe froetrow makandra, sa meki a moro makriki foe gi èn foe teki rai. — Kolosesma 3:14.

Rai di wan sma ben teki

A profeiti Natan ben sori sakafasi foe jeje di a ben gi kownoe David rai. Lobi nanga lespeki di a ben abi gi David ben de krinkrin foe si na ini den sani di Natan ben taki èn ben doe. Natan ben bigin nanga wan agersitori di ben hori na prakseri taki a ben o kan de moeilek gi David foe arki a rai (2 Samuèl 12:1-4). A profeiti ben wroko na tapoe a lobi di David ben lobi retidoe nanga regtfardikifasi, ala di den sani di a ben doe nanga Batseiba no ben sori dati (2 Samuèl 11:2-27). Di Natan ben sori san na agersitori ben wani taki, dan David ben handri na wan opregti fasi di a ben taki: „Mi sondoe teige Jehovah” (2 Samuèl 12:7-13). Nanga sakafasi David ben teki a piri-ai, tra fasi leki Kain di no ben arki Jehovah.

Seiker Jehovah ben tiri Natan, èn a ben hori na onvolmaaktifasi foe David na prakseri èn taki kande David no ben o handri boen na tapoe a rai. Natan ben bigin nanga foeroe takt èn a ben si David moro hei leki ensrefi bika foe a posisi di David ben abi leki kownoe di Jehovah poti. Efoe joe de na ini wan posisi pe joe abi pikinso makti, dan joe ben sa kan gi joisti rai, ma a ben kan moeilek foe teki a rai foe joe, te joe no e sori sakafasi foe jeje.

Natan ben meki David kon boen baka ini wan jeje foe safri-atifasi. Den wortoe foe a profeiti ben switi èn ben sreka heri boen so taki David ben kan handri na wan fasi di ben sa boen gi ensrefi. Natan no ben prakseri en eigi boen nomo, èn a no ben proeberi foe sori taki a hei moro David na moreel sei èn na jeje sei. Dati na wan heri moi eksempre foe taki den joisti wortoe na wan fasi di fiti! Efoe joe e sori a srefi jeje, dan a kan de taki tra sma sa teki a rai foe joe moro esi.

[Prenki na tapoe bladzijde 22]

Leki gosontoe njanjan, joe rai moesoe gosontoe toe

[Prenki na tapoe bladzijde 23]

Joe e meki joe rai de so moi leki gowtoe apra na ini solfroe kerfoe wroko?

[Prenki na tapoe bladzijde 24]

Nanga sakafasi a profeiti Natan ben wroko tapoe a lobi di David ben lobi retidoe nanga regtfardikifasi