Den ben doe a wani foe Jehovah
A moro bigi man e doe wan lagi wroko
JESUS ben sabi taki den lasti joeroe nanga en apostel ben o prenspari. Heri esi, sma ben o hori en èn tesi ben o kon na tapoe a bribi foe en leki noiti bifo. Jesus ben sabi so srefi taki bigi blesi ben e wakti en. Heri esi, a ben o poti na a reti anoe foe Gado èn a ben o kisi „a nen di hei moro ibri tra nen, so taki na ini a nen foe Jesus ibri kindi ben sa boigi foe den wan di de na hemel èn den wan di de na grontapoe èn den wan di de na ondro gron”. — Filipisma 2:9, 10.
Tokoe, a broko di a ben broko en ede nanga a dede foe en di ben kon moro krosibei èn so srefi na angri di a ben angri gi a pai di Gado pramisi en, no ben poeroe a prakseri foe Jesus foe den sani di den apostel foe en ben abi fanowdoe. A „ben lobi den te na a kaba”, Johanes ben skrifi baka ten na ini en Evangelie (Johanes 13:1). Èn na ini den toemoesi moeilek lasti joeroe disi foe en libi leki wan volmaakti libisma, Jesus ben leri den apostel foe en wan prenspari lès.
Wan lès foe abi sakafasi
Den apostel ben de nanga Jesus na ini wan tapoesei kamra na ini Jerusalem foe hori a Paska Fesa. Bifo dati, Jesus ben jere den e haritaki soema foe den ben de a moro bigiwan (Mateus 18:1; Markus 9:33, 34). A ben taki foe a tori disi nanga den èn a ben proeberi foe kenki a denki foe den (Lukas 9:46). Ma now Jesus ben gebroiki wan tra fasi foe poti krakti na tapoe den lès dati. A no ben taki wawan nanga den foe abi sakafasi, ma a ben sori den fa den moesoe abi sakafasi.
Jesus „ben opo foe a neti-njanjan èn ben poti en tapoesei krosi na wan sei”, Johanes e skrifi. „En a ben e teki wan doekoe èn ben tai en mindribere. Baka di a ben poti watra na ini wan komki dan a ben bigin wasi den foetoe foe den disipel èn ben drei den foetoe nanga a doekoe di a ben tai en mindribere nanga dati.” — Johanes 13:4, 5.
Na ini a waran weer foe na owroeten Mindri Owstoesei, sma ben gwenti foe weri sandaal di ben opo te den ben waka na tapoe santi pasi. Te den ben doro na oso foe wan gewoon sma, dan na ososma ben o gi den odi èn a ben sa sorgoe gi prapi nanga watra so taki den ben kan wasi den foetoe. Na ini moro goedoe oso, wan srafoe ben sa doe a wroko foe wasi den foetoe. — Kroetoebakra 19:21; 1 Samuèl 25:40-42.
Na ini a tapoesei kamra, Jesus nanga den apostel foe en no ben de fisitiman foe no wan sma. No wan ososma ben de foe gi prapi, èn no wan srafoe ben de foe wasi den foetoe. Di Jesus ben bigin wasi den foetoe foe den, dan den apostel ben firi sjen. A moro Bigiwan na den mindri ben doe a moro lagi wroko!
Na ini a bigin Petrus no ben wani meki Jesus wasi en foetoe. Ma Jesus ben taigi en: „Efoe mi no wasi joe, dan joe no abi prati nanga mi.” Di Jesus ben kaba wasi den foetoe foe ala den twarfoe apostel, a ben taki: „Oenoe sabi san mi doe gi oenoe? Oenoe e kari mi ’Leriman’ nanga ’Masra’, èn oenoe taki leti, bika na dati mi de. Foe dati ede, efoe mi, ala di mi de Masra nanga Leriman, ben wasi oen foetoe, dan oenoe abi foe wasi den foetoe foe makandra toe. Bika mi gi oenoe na eksempre, so taki oenoe ben sa doe toe neleki fa mi ben doe gi oenoe.” — Johanes 13:6-15.
Jesus no ben e seti wan gwenti foe wasi foetoe. Na presi foe dati, a ben jepi en apostel foe kisi wan njoen denki — wan denki foe sakafasi èn foe de klariklari foe doe a moro lagi wroko gi den brada foe den. A de krin taki den ben leri a lès. Loekoe san ben pasa foeroe jari na baka di na aksi foe a besnijdenis ben opo ede kon. Ala di „foeroe kesekese” ben de, tokoe den sma di ben drape ben sorgoe taki boen orde ben de èn nanga lespeki den ben arki den prakseri foe makandra. Boiti dati, a gersi taki a sma di ben teki fesi na ini a konmakandra dati ben de a disipel Jakobus — a no ben de wan foe den apostel, soleki fa wi ben o froewakti kande, foe di den apostel ben drape. A pisi disi na ini a tori foe Tori foe den Apostel e sori taki den apostel ben gro na ini a sori di den ben moesoe sori sakafasi. — Tori foe den Apostel 15:6-29.
Lès gi wi
Jesus ben gi wan tranga lès foe sori sakafasi di a ben wasi den foetoe foe den disipel foe en. Ija, kresten no moesoe denki taki den de so prenspari taki tra sma moesoe dini den ala ten, èn den no moesoe soekoe den posisi foe kisi grani èn foe meki sma prakseri taki den prenspari. Na presi foe dati, den moesoe waka na baka na eksempre di Jesus ben poti, di „no ben kon foe sma dini en, ma foe dini sma èn foe gi en sili leki wan loesoe-paiman ini a presi foe foeroe sma” (Mateus 20:28). Ija, den bakaman foe Jesus moesoe de klariklari foe doe a moro lagi wroko gi makandra.
Foe dati ede Petrus ben skrifi: „Weri sakafasi foe jeje leki wan banti lontoe oen mindribere, gi makandra, bika Gado e kakafoetoe gi den heimemrewan, ma a e gi no-froedini boen-ati na den sakafasiwan” (1 Petrus 5:5). A Griki wortoe gi „weri” teki foe wan wortoe di wani taki „wan fesikoki foe wan srafoe”, èn na ondro dati den ben tai wan loesoe krosi. A ben kan taki Petrus ben taki foe a sani di Jesus ben doe foe tai wan doekoe lontoe en mindribere èn ben wasi den foetoe foe en apostel? Wi no kan taki seiker dati a ben de so. Ma tokoe a lagi wroko di Jesus ben doe ben naki na ati foe Petrus troetroe, èn a moesoe naki na ati toe foe ala sma di wani de bakaman foe Krestes. — Kolosesma 3:12-14.