Yeises libi nanga diniwroko

Sakafasi na a lasti paska

PETRUS nanga Yohanes, di ben yere fu Yeises san den ben musu du, doro kba na ini Yerusalen fu sreka sani gi a Paska. Leki fa a sori dan Yeises nanga den tra tin apostru e doro moro lati na a bakadina. A son e saka na a horizon te Yeises nanga en grupu e saka komoto fu a Olèifbergi, èn e koti a lagi presi fu Kidron abra. Disi na a lasti leisi di Yeises e si a foto na deiten te leki baka en opobaka.

Syatu a baka Yeises nanga en grupu e doro na ini a foto èn e go na a oso pe den o hori na Paska. Den e kren a trapu go na a bigi tapusei kamra, pe ala sani sreka fu den hori a Paska den wawan. Yeises ben wakti na okasi disi, so leki fa a e taki: „Mi ben angri srefisrefi fu nyan a Paska disi nanga unu bifo mi nyanpina.”

A de a gwenti taki den sma di e teki prati na a Paskafesa e dringi fo kan win. Baka di den ben teki leki fa a sori a di fu dri kan, Yeises e taki wan tangibegi èn e taki: „Teki disi èn meki a waka lontu na unu mindri fu a wan go na a trawan; bika mi e taigi unu: „Bigin fu now mi no sa dringi moro fu a froktu fu a droifibon te leki a kownukondre fu Gado kon.”

Na a ten di den e nyan, Yeises e opo, a e puru en tapusei krosi, e teki wan duku èn e furu wan komki nanga watra. Akruderi a gwenti dan a sma di ben ontfanga fisitiman ben musu sorgu taki wan sma ben wasi den futu fu wan fisitiman. Ma fu di na a okasi disi sma no de di e ontfanga fisitiman, meki Yeises srefi e sorgu gi a wroko disi. Ibriwan fu den apostru ben kan kobroiki a okasi fu du dati, ma fu di so leki fa a sori pikinso strei ben de ete na den mindri, meki nowan e du disi. Now den e firi fruleigi te Yeises e bigin fu wasi den futu.

Te Yeises e doro na Petrus, Petrus e protesteer: „Fu tru, noiti yu sa wasi mi futu.”

„Efu mi no wasi yu, yu no abi prati nanga mi”, Yeises e taki.

„Masra”, Petrus e piki, „No mi futu wawan, ma so srefi mi anu nanga mi ede”.

„Na sma di wasi” Yeises e piki, „no abi fu meki den wasi moro leki en futu, ma a krin dorodoro. Èn unu krin, ma no unu alamala.” A e taki disi fu di a sabi taki Yudas Iskariot e meki plan fu tori en.

Te Yeises wasi den futu fu ala den twarfu, makandra nanga den futu fu a sma di o tori en, Yudas, a e weri den tapusei krosi fu en èn e go didon baka na a tafra. Dan a e aksi: „Unu sabi san mi du unu? Unu e kari mi ’Leriman’ nanga ’Masra’, èn unu abi leti, bika dati mi de. Fu dati-ede, efu mi, ala di mi de Masra nanga Leriman, wasi unu futu, dan so srefi unu abi fu wasi den futu fu makandra. Bika mi gi unu na eksenpre, so taki unu ben sa du tu neleki fa mi du gi unu. Fu tru, fu tru, mi taigi unu: Wan srafu no bigi moro en meistri, èn so srefi a sma di den e seni go, no bigi moro a sma di seni en. Efu unu sabi den sani disi, koloku unu de efu unu e du den.”

O fa a de wan tumusi moi les na ini a wroko fu sakafasi! Den apostru no musu suku fu teki a fosi presi, èn abi na prakseri taki den de so prenspari taki ala ten trawan musu dini den. Den musu waka baka na eksenpre di Yeises gi. Disi a no wan fasti gwenti fu wasi futu. Nôno, ma a de wan friwani wroko sondro partèifasi, awasi fa a wroko mag lagi ofu no switi. Mateyus 26:20, 21; Markus 14:17, 18; Lukas 22:14-18; 7:44; Yohanes 13:1-17.

◆ San de aparti na a trowe di Yeises e trowe en ai go tapu Yerusalen te a e go na ini a foto fu hori a Paska?

◆ Sortu kan leki fa a sori, Yeises e meki waka lontu na a paska fesa na den 12 apostru baka di a blesi en?

◆ Sortu wroko den sma srefi ben gwenti fu du gi fisitiman di Yeises ben de na grontapu, èn fu san-ede den no ben du disi na a Paska di Yeises nanga den apostru ben hori?

◆ San ben de a marki fu Yeises di a ben du a sakafasi wroko fu a wasi fu den futu fu den apostru fu en?