A wan-enkri pasi di e go na têgo libi
„Mi na a pasi nanga a waarheid nanga a libi.” — JOHANES 14:6.
1, 2. Nanga san Jesus ben gersi a pasi di e go na têgo libi, èn san na agersitori foe en wani taki?
NA INI en barinen Bergitaki, Jesus ben gersi a pasi foe têgo libi nanga wan pasi pe wan sma kan go te a pasa na ini wan doro. Loekoe taki Jesus e poti krakti na tapoe taki a pasi disi di e go na libi, no de wan makriki wan, te a e taki: „Pasa go na ini a smara doro; bika bradi èn bigi a pasi de di e tjari sma go na pori, èn foeroe sma de di e pasa go na ini; ma smara a doro de èn smara a pasi de di e tjari sma go na [têgo] libi, èn pikinso sma de di e feni en.” — Mateus 7:13, 14.
2 Joe froestan san na agersitori disi wani taki? A no e tjari kon na krin taki wán pasi nomo de di e go na libi èn taki wi moesoe loekoe boen taki wi no komoto na tapoe a pasi di e go na libi? Ma san na a wan-enkri pasi di e go na têgo libi?
A ròl di Jesus Krestes abi
3, 4. (a) Fa Bijbel e sori a toemoesi prenspari ròl di Jesus abi foe froeloesoe wi? (b) O ten ben de a fosi leisi di Gado ben sori taki a libisma famiri ben kan kisi têgo libi?
3 A de krin, taki Jesus abi wan prenspari ròl di abi foe doe nanga a pasi dati, soleki fa na apostel Petrus ben meki bekènti: „Froeloesoe no de ini no wan tra sma, bika no wan tra nen de [boiti di foe Jesus] na ondro hemel di gi na mindri libisma di nanga jepi foe dati wi moesoe kisi froeloesoe” (Tori foe den Apostel 4:12). Na apostel Paulus ben froeklari toe: „A presenti di Gado e gi, na têgo libi nanga jepi foe Krestes Jesus, wi Masra” (Romesma 6:23). Jesus srefi ben sori taki a wan-enkri pasi di e go na têgo libi de nanga jepi foe en, bika a ben froeklari: „Mi na a pasi nanga a waarheid nanga a libi.” — Johanes 14:6.
4 So boen, a de toemoesi prenspari taki wi e erken a ròl di Jesus abi foe meki sma kisi têgo libi. Foe dati ede, meki wi ondrosoekoe a ròl di a abi moro fini. Joe sabi o ten, baka di Adam ben sondoe, Jehovah Gado ben sori taki libisma ben kan libi foe têgo? A ben de leti baka di Adam ben sondoe. Meki wi go ondrosoekoe now fa profeititori ben taki foe a seti foe Jesus Krestes leki a Froeloesoeman foe libisma.
A pramisi Siri
5. Fa wi kan doe sabi soema na a sneki di kori Eva?
5 Jehovah God ben sori na agersifasi, soema ben de a Froeloesoeman di a pramisi. A ben doe disi di a ben leisi strafoe gi „a sneki” di ben taki nanga Eva èn ben kori en foe tranga jesi Gado di Eva ben njan a froktoe di a no ben mag njan (Genesis 3:1-5). A no de foe taki, a sneki dati no ben de wan troetroe sneki. A ben de wan makti jeje kriatoeroe di Bijbel e kari „a fosi sneki, a wan di den e kari Didibri nanga Satan” (Openbaring 12:9). Satan ben gebroiki a lagi meti disi foe taki nanga Eva èn foe kori en. Foe dati ede, di Gado ben leisi strafoe gi Satan, Gado ben taigi en: „Mi sa poti feantifasi na mindri joe nanga na oema èn na mindri joe siri nanga en siri. A [a siri foe na oema] sa masi joe na a ede èn joe sa masi en na a bakafoetoe.” — Genesis 3:15.
6, 7. (a) Soema na a oema di e kisi a „siri”? (b) Soema na a Siri di Gado ben pramisi, èn san a e doe?
6 Soema na a „oema” disi di abi Satan leki feanti noso di Satan no wani si na ai? Leki fa Openbaring kapitel 12 e sori soema na „a fosi sneki”, na so a e sori toe soema na a oema disi di Satan no wani si na ai. Loekoe taki vers 1 e taki dati na oema „weri zon vo hem klosi; moen a habi na ondro hem foetoe, èn na hem hede tapo a weri twaalvoe staar leki wan kroon”. Na oema disi e prenki Gado en hemel organisâsi foe getrow engel, èn a „manpikien” di na oema meki, e prenki Gado Kownoekondre èn di abi Jesus Krestes di e tiri leki Kownoe. — Openbaring 12:1-5, Njoe Testament Nanga dem Psalm.
7 So boen, soema na a „siri”, noso pikin, foe na oema, di kari na Genesis 3:15, di sa masi Satan „na a ede”, èn na so fasi e naki en wan lasti leisi foe kiri en? Na a sma di Gado ben seni kon foe hemel foe gebore na wan njoenwenke, ija, a man Jesus (Mateus 1:18-23; Johanes 6:38). Kapitel 12 foe Openbaring e tjari kon na krin taki a Siri disi, Jesus Krestes, leki wan hemel Tiriman di kisi wan opobaka, ben o teki fesi na ini a strei foe wini Satan, èn ben sa seti, soleki fa Openbaring 12:10 e taki, „a kownoekondre foe wi Gado nanga a makti foe en Krestes”.
8. (a) Sortoe njoen sani Gado ben gi di abi foe doe nanga a prakseri di a ben abi na ini a bigin? (b) Soema de na ini a njoen tiri foe Gado?
8 So boen, a Kownoekondre disi na ini na anoe foe Jesus Krestes na wan njoen sani di Gado sreka èn di abi foe doe nanga a prakseri di Gado ben abi gi libisma na ini a bigin foe libi foe têgo na grontapoe. Baka di Satan ben meki oproeroe, dan wantewante Jehovah ben doe wan sani foe poeroe ala den takroe bakapisi foe godelowsoefasi, nanga jepi foe a njoen Kownoekondre disi. Di Jesus ben de na grontapoe, a ben tjari kon na krin taki a no en wawan ben sa de na ini a tiri disi (Lukas 22:28-30). Tra sma ben o teki poeroe foe a libisma famiri, èn den disi ben sa go na en na hemel foe tiri nanga en, èn na a fasi disi den ben sa de wan di foe toe pisi foe a siri foe na oema (Galasiasma 3:16, 29). Bijbel e froeteri wi taki a nomroe foe den kompe tiriman disi foe Jesus — di alamala teki poeroe foe a sondoe libisma famiri na grontapoe — na 144.000 sma. — Openbaring 14:1-3.
9. (a) Foe san ede Jesus ben moesoe kon na grontapoe leki wan libisma? (b) Fa Jesus ben poeroe den wroko foe Didibri?
9 Ma bifo a Kownoekondre dati ben kan bigin tiri, a ben de toemoesi prenspari taki a moro prenspari pisi foe a siri, Jesus Krestes, ben moesoe kon na grontapoe. Foe san ede? Bika Jehovah Gado ben poti en leki a Sma di „moesoe broko [noso, poeroe] den wroko foe Didibri” (1 Johanes 3:8). Wan foe den wroko foe Satan ben de taki a ben meki Adam sondoe, èn dati ben tjari a strafoe foe sondoe nanga dede kon na tapoe ala den bakapikin foe Adam (Romesma 5:12). Jesus ben broko a wroko disi foe Didibri di A ben gi En libi leki wan loesoe-paiman. Na so fasi Jesus ben gi wan fondamenti foe loesoe a libisma famiri foe a strafoe foe sondoe nanga dede èn a ben opo a pasi foe den kan kisi têgo libi. — Mateus 20:28; Romesma 3:24; Efeisesma 1:7.
Den sani di a loesoe-paiman doe
10. San Jesus nanga Adam ben abi a srefi?
10 Foe di a libi foe Jesus ben teki poeroe na hemel poti na ini a bere foe wan oema, meki a ben gebore leki wan volmaakti libisma, èn sondro flaka foe a sondoe foe Adam. A ben abi a krakti foe man libi foe têgo na grontapoe. Na a srefi fasi Gado ben kria Adam leki wan volmaakti libisma nanga a howpoe foe libi foe têgo na grontapoe. Na apostel Paulus ben prakseri den sani di den toe man disi ben abi a srefi, di a ben skrifi: „’A fosi libisma, Adam, ben tron wan libi sili.’ A lasti Adam [Jesus Krestes] ben tron wan jeje di e gi libi. A fosi libisma kon foe grontapoe èn a meki foe doti; a di foe toe libisma kon foe hemel.” — 1 Korentesma 15:45, 47.
11. (a) Sortoe bakapisi Adam nanga Jesus ben abi na tapoe a libisma famiri? (b) Fa wi moesoe si na ofrandi foe Jesus?
11 A froeklari foe Bijbel, taki Jesus „ben gi ensrefi leki wan srefi sortoe loesoe-paiman gi ala sma” e poti krakti na tapoe a sani di den toe man disi ben abi a srefi — den wan-enkri toe volmaakti man di ben waka na grontapoe (1 Timoteus 2:6). Jesus ben de a srefi leki soema? Ija, leki Adam, di a ben de wan volmaakti man ete! A sondoe foe a fosi Adam ben abi leki bakapisi taki a heri libisma famiri ben kisi a strafoe foe dede. A srakti-ofrandi foe „a lasti Adam” e gi a fondamenti foe froeloesoe wi foe sondoe nanga foe dede, so taki wi kan libi foe têgo. A srakti-ofrandi foe Jesus warti srefisrefi! Na apostel Petrus ben taki: „A no nanga sani di e pori gowe, nanga solfroe noso gowtoe, taki oenoe ben kon fri.” Na presi foe dati, Petrus ben froeklari: „A ben de nanga diri broedoe, leki di foe wan pikin skapoe di no doti èn di no abi flaka, ija foe Krestes.” — 1 Petrus 1:18, 19.
12. Fa Bijbel e taki dati a strafoe di wi kisi foe dede, sa poeroe na pasi?
12 Bijbel e froeteri na wan moi fasi fa a strafoe di a libisma famiri kisi foe dede, sa poeroe na pasi, taki: „Nanga wán fowtoe [di foe Adam], kroetoe kon gi ala sortoe sma, na so toe, nanga wán regtfardiki doe [a fasi fa Jesus ben tjari ensrefi na wan soifri retifasi, te leki a dede], a froeklari di den e froeklari sma regtfardiki foe kisi libi kon gi ala sortoe sma. Bika neleki fa a trangajesi foe a wán sma [Adam] ben meki foeroe sma kon tron sondari, na so a gi di a wán sma [Jesus] gi jesi, sa meki foeroe sma kon tron regtfardiki.” — Romesma 5:18, 19.
Wan toemoesi boen howpoe
13. Foe san ede foeroe sma e prakseri na a fasi disi foe têgo libi?
13 A sani disi di Gado sreka moesoe prisiri wi srefisrefi! A no e naki joe ati taki a gi wan Froeloesoeman? Di na aksi ben poti „Joe ben sa wani a howpoe foe libi foe têgo?” na ini wan ondrosoekoe di wan prenspari Amerkan koranti ben doe, dan a ben de wan froewondroe sani taki 67,4 procent foe den sma ben piki: „Nôno”. Foe san ede den ben taki dati den no wani libi foe têgo? A de krin foe si, taki a de foe di a libi na grontapoe abi foe doe nanga so foeroe problema na ini a ten disi. Wan sma ben taki: „Mi no e prisiri srefisrefi foe prakseri fa mi sa de te mi abi 200 jari.”
14. Foe san ede têgo libi sa de wan troetroe prisiri?
14 Ma Bijbel no e taki foe têgo libi na ini wan grontapoe pe sma e pina foe siki, foe di den e kon owroe, èn foe tra rampoe. Nôno, bika te Jesus de Tiriman foe Gado Kownoekondre, dan a sa poeroe ala den sortoe problema disi di Satan ben tjari kon. Soleki fa Bijbel e taki, Gado Kownoekondre ’sa broko ala den tirimakti foe a grontapoe disi di e kwinsi sma, na pisipisi èn tjari wan kaba kon na den’ (Danièl 2:44). Na a ten dati, leki piki tapoe a begi di Jesus ben leri den bakaman foe en, a „wani” foe Gado sa „pasa na grontapoe soleki na hemel” (Mateus 6:9, 10, Today’s English Version). Na ini a njoen grontapoe foe Gado, baka te grontapoe kon krin foe ala takroedoe, dan den winimarki foe Jesus en loesoe-paiman sa gebroiki dorodoro. Ija, ala sma di doro den markitiki, sa kisi volmaakti gosontoe baka!
15, 16. Sortoe situwâsi sa de na ini a njoen grontapoe foe Gado?
15 A pisi disi foe Bijbel sa de gi den sma di e libi na ini a njoen grontapoe foe Gado: „Meki a skin foe en kon moro moi leki na ini a jongoe jari; meki a drai go baka na den dei foe en jongoe krakti” (Job 33:25). Wan tra pramisi di Bijbel e gi sa kon troe toe: „Den ai foe den breniwan sa kon opo, èn srefi den jesi foe den dofoewan sa kon opo. Na a ten dati a malengriwan sa kren neleki wan dia, èn a tongo foe a babaw-wan sa bari foe prisiri ede.” — Jesaja 35:5, 6.
16 Prakseri nomo: Awansi o owroe wi sa de na a ten dati, awansi wi abi 80 jari, 800 jari, noso moro owroe srefi, tokoe wi skin sa tan gosontoe krinkrin. A sa de soleki fa Bijbel e pramisi: „No wan sma di e libi drape sa taki: ’Mi siki.’” Na a ten dati, a pramisi disi sa kon troe toe: „[Gado] sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” — Jesaja 33:24; Openbaring 21:3, 4.
17. Sortoe sani wi kan froewakti taki den sma na ini a njoen grontapoe foe Gado sa man doe?
17 Na ini a njoen grontapoe dati wi sa man gebroiki a kefalek boen ede-tonton foe wi na a fasi di wi Kriaman ben wani di a ben meki en foe kan leri sani sondro wan kaba. Ija, prakseri den kefalek moi sani di wi ben sa kan doe! Srefi onvolmaakti sma meki ala sani di de na wi lontoe nanga jepi foe sani di de na ini a gron — cellulair telefon, mikrofon, oloisi, pieper, computer, opolani, ija, kari kon. No wan foe den sani disi ben meki foe materiaal di den tjari kon foe wan farawe presi na ini na universum. Nanga têgo libi di e wakti wi, den sani di wi man doe èn sa man meki na ini a Paradijs na grontapoe, no sa abi wan kaba! — Jesaja 65:21-25.
18. Foe san ede a libi noiti sa de wan froeferi sani na ini a njoen grontapoe foe Gado?
18 Èn wi no sa froeferi foe a libi. Srefi now wi e froewakti foe njan wan tra njanjan, ala di kande wi njan foeroe tin doesoendoesoen leisi kaba. Te wi de volmaakti leki libisma, dan wi sa njan boen moro ete foe den switi sani di a Paradijs grontapoe sa meki (Jesaja 25:6). Èn wi sa abi a têgo prisiri foe sorgoe gi den bogobogo meti na grontapoe èn wi sa man prisiri foe den kefalek moi sondongo, den bergi, den liba, nanga den lagipresi. Foe troe, noiti a libi na ini Gado njoen grontapoe sa soi! — Psalm 145:16.
Doe san Gado e aksi foe wi
19. Foe san ede a de wan joisti sani foe bribi taki Gado e aksi wan toe sani foe wi efoe wi wani taki a e gi wi a presenti foe libi?
19 Joe ben sa froewakti foe kisi a bigi presenti disi foe têgo libi na ini Paradijs di Gado e gi wi, sondro foe joe doe moeiti srefi? A no de joisti taki Gado ben sa aksi wan sani foe wi? Dati na wan joisti sani foe troe. Foe taki en leti fa a de, Gado no e iti a presenti gi wi nomo. A e langa en gi wi, ma wi moesoe langa wi anoe èn teki en. Ija, wi moesoe doe moeiti. Joe kan poti a srefi aksi di a jongoe goedoe tiriman ben aksi Jesus: „Sortoe boen mi moesoe doe foe kisi têgo libi?” Noso joe kan poti na aksi na a fasi fa wan strafoe-oso waktiman foe Filipi ben aksi na apostel Paulus: „San mi moesoe doe foe kisi froeloesoe?” — Mateus 19:16; Tori foe den Apostel 16:30.
20. San na wan prenspari sani di Gado e aksi foe wi foe kisi têgo libi?
20 A neti bifo Jesus dede, a ben sori san na wan prenspari sani di Gado e aksi foe wi, di a ben taigi en hemel Tata na ini begi: „Disi wani taki têgo libi, foe den e teki sabi na ini den foe joe, a wan-enkri troe Gado èn foe en di joe seni kon, Jesus Krestes” (Johanes 17:3). A no de wan joisti sani di a e aksi foe wi taki wi moesoe teki sabi foe Jehovah, a sma di meki wi kan libi foe têgo, èn so srefi foe a sma di dede gi wi, Jesus Krestes? Ma moro de fanowdoe leki nomo foe teki a sabi disi.
21. Fa wi e sori taki wi abi bribi, soleki fa Gado e aksi dati foe wi?
21 Bijbel e taki toe: „A sma di e sori bribi na ini a Manpikin, abi têgo libi.” Dan a e taki moro fara: „A sma di no e gi jesi na a Manpikin, no sa si a libi, ma na atibron foe Gado e tan na en tapoe” (Johanes 3:36). Joe kan sori taki joe e bribi na ini a Manpikin te joe e kenki joe libi èn e go libi akroederi a wani foe Gado. Joe moesoe weigri foe waka iniwan takroe pasi di joe ben waka na tapoe kande èn joe moesoe doe sani di e plisi Gado. Joe moesoe doe san na apostel Petrus ben komanderi: „Abi berow foe dati ede èn drai baka, so taki den sondoe foe oenoe kan figi poeroe, so taki ten di e gi kowroe-ati kan kon foe Jehovah.” — Tori foe den Apostel 3:19.
22. Sortoe sani wi moesoe doe efoe wi wani waka na ini den foetoestap foe Jesus?
22 Meki wi no frigiti noiti taki a de soso te wi abi bribi na ini Jesus taki wi kan libi foe têgo (Johanes 6:40; 14:6). Wi e sori taki wi abi bribi na ini Jesus te wi e „waka soifri na ini en foetoestap” (1 Petrus 2:21). San dati wani taki? We, di Jesus ben begi Gado, a ben froeklari: „Loekoe! Mi kon . . . foe doe joe wani, o Gado” (Hebrewsma 10:7). A de toemoesi prenspari foe waka na baka na eksempre foe Jesus, te joe e agri foe doe a wani foe Gado èn e gi joe libi abra na Jehovah. Baka dati, joe moesoe simbôliseer dati nanga jepi foe a dopoe na ini watra; Jesus toe ben gi ensrefi foe teki dopoe (Lukas 3:21, 22). A de wan joisti sani foe doe den sani disi. Na apostel Paulus ben taki dati „a lobi di Krestes abi, e poesoe wi” (2 Korentesma 5:14, 15). Na sortoe fasi? We, lobi meki Jesus ben gi en libi foe a boen foe wi. Disi no moesoe gi wi deki-ati foe doe wan sani na tapoe dati, foe abi bribi na ini en? Ija, a moesoe gi wi deki-ati foe teki a lobi eksempre foe en, di a ben gi ensrefi foe jepi tra sma. Krestes ben libi soso foe doe a wani foe Gado; na so wi moesoe doe toe, wi no moesoe libi gi wisrefi moro.
23. (a) Pe den sma di e kisi libi moesoe poti? (b) San Gado e aksi foe den wan na ini a Kresten gemeente?
23 Dati a no ala. Bijbel e taki dati di 3000 sma ben dopoe na tapoe a Pinksterfesa foe 33 G.T., dan den „ben kon moro”. Pe? „Den ben tan gi densrefi na a leri foe den apostel èn na a prati nanga makandra”, Lukas e froeklari (Tori foe den Apostel 2:41, 42). Ija, den ben kon na makandra foe studeri Bijbel èn foe abi demakandra, èn na so fasi den ben kon moro na ini a Kresten gemeente, noso den ben tron wan pisi foe en. Den fosi Kresten ben fisiti den konmakandra doronomo foe kisi jeje leri (Hebrewsma 10:25). Jehovah Kotoigi na ini a ten disi e doe disi toe, èn den wani gi joe a deki-ati foe fisiti den konmakandra disi nanga den.
24. San na „a troetroe libi”, èn fa èn o ten a sa kon troe?
24 Miljoenmiljoen sma na ini a ten disi e waka na tapoe a smara pasi disi di e go na libi. Troetroe moeiti de fanowdoe foe tan na tapoe a smara pasi disi! (Mateus 7:13, 14) Paulus ben sori disi na ini a switi kari di a ben gi: „Feti a toemoesi boen feti foe a bribi, graboe a têgo libi boen steifi, di oenoe ben kisi kari foe en.” Foe „hori a troetroe libi steifi”, a de fanowdoe foe feti a feti disi (1 Timoteus 6:12, 19). A libi dati a no a disiten libi di lai nanga pen èn nanga pina di a sondoe foe Adam ben tjari kon na wi tapoe. Na presi foe dati, a de a libi na ini a njoen grontapoe foe Gado di sa kon troe heri esi te a loesoe-ofrandi foe Krestes sa gebroiki foe a boen foe ala sma di lobi Jehovah Gado èn en Manpikin, na baka te a seti foe sani disi poeroe kaba. Meki wi alamala teki a libi — „a troetroe libi” — têgo libi na ini a toemoesi boen njoen grontapoe foe Gado.
San joe ben sa piki?
◻ Soema na a sneki, na oema, nanga a siri foe Genesis 3:15?
◻ Fa Jesus ben de a srefi leki Adam, èn san a loesoe-paiman sa meki doe kon?
◻ San joe kan froewakti di sa meki a njoen grontapoe foe Gado de so wan prisiri sani gi joe?
◻ San wi moesoe doe foe libi na ini a njoen grontapoe foe Gado?
[Prenki na tapoe bladzijde 10]
Gi jongoewan nanga owroewan, Jesus na a wan-enkri pasi di e go na têgo libi
[Prenki na tapoe bladzijde 11]
Na a ten di Gado poti, den owroe sma sa kisi a krakti baka di den ben abi di den ben jongoe