Joe e sori taki joe de nanga tangi?

Na wan zendeling-oso na ini west-afrika, wan dagoe ben de di ben nen Teddy. Te wan sma ben trowe wan pisi meti gi Teddy, dan a ben swari en wantewante sondro foe tesi en, sondro foe kaw en. Ala di a ben e bro hebi na ondro a faja son, a ben wakti wan tra pisi njanjan di wan sma ben sa fringi gi en. Te a meti ben kaba, dan a ben drai en baka èn ben waka gowe.

Noiti Teddy ben sori pikinso tangi srefi foe den sani di a ben kisi. No wan sma ben froewakti dati foe en. Boiti dati, a ben de wan dagoe nomo.

NOFOTRON wi e froewakti moro tangi foe libisma leki foe meti. Foeroetron sani no e pasa soleki fa wi ben froewakti. Foeroe sma e graboe san den kan teki foe a libi èn den e soekoe moro. Disi no e froewondroe wi toe. Bijbel ben taki na fesi taki na ini den lasti dei, sma ben sa de sondro tangi. — 2 Timoteus 3:1, 2.

Ma den foetoeboi foe Gado de tra fasi. Den e gi jesi na a rai di na apostel Paulus ben gi di a ben froemane den kompe bribiman: „Sori taki oenoe de nanga tangi.” — Kolosesma 3:15.

Jehovah e sori taki a de nanga tangi

Jehovah Gado e gi a volmaakti eksempre foe wan sma di e sori warderi. Loekoe fa a e prakseri foe den getrow foetoeboi foe en. Nanga jepi foe Gado en santa jeje Paulus ben skrifi den Hebrew Kresten: „Gado no de onregtfardiki, so taki a sa frigiti a wroko foe oenoe èn a lobi di oenoe ben sori gi a nen foe en, foe di oenoe ben dini den santawan èn e tan dini den.” — Hebrewsma 6:10.

Foeroe eksempre de foe a warderi di Jehovah abi gi den getrow foetoeboi foe en. A ben blesi Abraham di A ben meki den bakapikin foe en kon foeroe srefisrefi, so taki den ben tron „leki den stari na hemel èn leki den ai-santi di de na sekanti” (Genesis 22:17). Foe di Jehovah ben warderi a getrowfasi foe Job di a ben de na ondro tesi, meki Jehovah no wawan ben gi Job a goedoe di a ben lasi, ma a ben gi en so srefi „dobroe baka” (Job 42:10). A fasi fa Jehovah ben handri nanga libisma na ini den doesoendoesoen jari, sori taki a froeklari disi de troe: „Foe a sei foe Jehovah, den ai foe en e loekoe a heri grontapoe lontoe foe sori a tranga foe en foe a boen foe den sma di a heri ati foe den de na en.” — 2 Kroniki 16:9.

A warderi di Gado abi gi den wan di e soekoe foe doe a wani foe en èn a gwenti di a gwenti foe pai den, na prenspari pisi foe en eigifasi. A de prenspari gi a Kresten bribi taki wi e erken disi. Paulus ben skrifi: „Sondro bribi wan sma no man plisi en na wan boen fasi, bika a sma di e kon na Gado, moesoe bribi . . . taki a e tron a sma di e pai den wan di e soekoe en serjoesoe.” — Hebrewsma 11:6.

Efoe na presi foe dati, Jehovah ben grofoe èn ben soekoe fowtoe na wi, dan wi alamala ben o kisi wan takroe kroetoe. A psalm singiman ben taki a sani disi langa ten pasa: „Efoe na fowtoe joe ben moesoe loekoe, o Jah, o Jehovah, dan soema ben kan tan tanapoe?” (Psalm 130:3) Jehovah a no wan sma di no abi warderi èn a no de wan sma toe di e soekoe fowtoe na sma. A lobi den sma di e dini en. A e sori taki a de nanga tangi.

Jesus — Wan sma di abi foeroe warderi

Foe di Jesus e sori den eigifasi foe en hemel Tata na wan volmaakti fasi, meki a ben sori taki a ben de nanga tangi gi den sani di tra sma ben doe na ini bribi. Loekoe san ben pasa wan leisi na a tempel na ini Jerusalem: „Now di [Jesus] ben opo loekoe, a ben si den goedoe sma e poti den presenti foe den na ini den monikisi. Ne a ben si wan seiker pôti weduwe, e poti toe pikin pisi moni di no abi foeroe waarde srefisrefi drape na ini, èn a ben taki: ’Foe troe, mi e taigi oenoe: A weduwe disi, ala di a pôti, tokoe a ben poti moro na ini moro leki ala den sma disi. Bika den alamala ben poti presenti na ini foe san ben tan abra, ma na oema disi, foe a pina foe en, ben poti na ini ala san a ben abi fanowdoe foe tan na libi.’” — Lukas 21:1-4.

Te joe loekoe en na moni sei, dan a bijdrage no ben foeroe, spesroetoe te joe ben gersi en nanga di foe den goedoe sma. Kande moro foeroe foe den sma di ben drape no ben si en srefisrefi. Tokoe Jesus ben si a weduwe dati. A ben si a situwâsi pe a weduwe ben de na ini. Jesus ben si en èn ben warderi en.

Wan tra kefal ben abi foe doe nanga wan goedoe oema, Maria. Di Jesus ben e didon na wan tafra e njan, Maria ben kanti boen diri switismeri oli na tapoe Jesus foetoe èn na tapoe en ede. Wan toe sma ben kroetoe a sani di Maria ben doe, foe di den ben prakseri taki na oli ben kan seri èn a moni ben kan gebroiki foe jepi den pôti sma. San Jesus ben piki? A ben taki: „Libi en. Foe san ede oenoe e soekoe foe trobi en? Na wan boen sani a ben doe mi. Foe troe, mi e taigi oenoe: Na ala presi pe den e preiki a boen njoensoe na heri grontapoe, den sa froeteri toe san na oema disi ben doe èn den sa memre en.” — Markus 14:3-6, 9; Johanes 12:3.

Jesus no ben kragi èn kroetoe taki a diri oli no ben gebroiki na wan tra fasi. A ben warderi a kefalek moi fasi fa Maria ben sori en lobi èn en bribi. A tori disi skrifi na ini Bijbel foe memre a moi sani di a doe. Den tori disi nanga tra tori e sori taki Jesus ben de wan man di ben abi foeroe warderi.

Efoe joe na wan foetoeboi foe Gado, dan joe kan de seiker taki Jehovah Gado nanga so srefi Jesus Krestes troetroe e warderi den moeiti di joe e doe foe horibaka gi a soifri anbegi. Te wi sabi disi, dan dati e hari wi go moro krosibei na Jehovah nanga Jesus èn e gi wi deki-ati foe teki na eksempre foe den foe di wi e sori taki wi de nanga tangi.

A soekoe di Satan e soekoe fowtoe na sma

Meki wi go loekoe wan eksempre now foe wan sma di de sondro tangi — Satan Didibri. Foe di Satan no abi warderi, meki a ben de a fesiman foe wan oproeroe teige Gado èn di ben abi takroe bakapisi.

Baka di Satan ben kweki wan gwenti foe kroetoe sma èn foe di a no de tevrede nanga sani, meki a ben bigin gi tra sma deki-ati foe denki so toe. Loekoe san ben pasa na ini a djari foe Eden. Jehovah ben kria a fosi man nanga oema, èn ben poti den na ini wan djari di gersi wan paradijs, èn a ben taigi den: „Foe ibri bon foe a djari joe mag njan te joe bere foeroe.” Wán sani nomo den no ben mag doe. Gado ben taki: „Foe a bon foe sabi boen nanga ogri, foe dati joe no moesoe njan, bika na a dei di joe sa njan foe dati, joe sa dede nomonomo.” — Genesis 2:16, 17.

Ma sjatoe baka dati, Satan ben taki dati a sani di Jehovah ben taki no ben troe. Wan foe den sani di a ben wani, na foe meki Eva kon de sondro tangi gi Jehovah na so wan fasi taki dati ben sa gi Eva deki-ati foe meki oproeroe teige Jehovah, neleki fa Satan srefi ben meki oproeroe teige En. „A de troetroe so, taki Gado ben taki dati oenoe no moesoe njan foe ibri bon foe a djari?”, Satan ben aksi (Genesis 3:1). A de krin taki Satan ben wani taki, dati Gado ben kibri wan prenspari sani gi Eva, wan sani di ben sa opo en ai èn ben sa meki a tron leki Gado srefi. Na presi taki Eva sori taki a ben de nanga tangi gi den foeroe blesi di Jehovah ben gi en, Eva ben bigin lostoe a sani di a no ben mag abi. — Genesis 3:5, 6.

Wi sabi den takroe bakapisi heri boen. Ala di a ben kisi a nen Eva „bika a ben moesoe tron a mama foe ala sma di e libi”, na wan tra fasi a ben tron a mama foe ala sma di e dede. Adam gi ala sma a sondoe di abi dede leki bakapisi. — Genesis 3:20; Romesma 5:12.

Teki na eksempre foe Gado nanga Krestes

Loekoe a difrenti na mindri Satan nanga Jesus. Den e kari Satan „a sma di e kragi den brada foe wi . . . , di e kragi den dei nanga neti bifo wi Gado” (Openbaring 12:10). Jesus „man so srefi foe froeloesoe dorodoro den wan di e go na Gado nanga jepi foe en, bika ala ten a de na libi foe taki gi den”. — Hebrewsma 7:25.

Satan e kragi den foetoeboi foe Gado. Jesus e warderi den èn e opo taki gi den. Kresten di de sma di e waka na baka na eksempre foe Krestes, moesoe doe moeiti foe si a boen na ini makandra, èn warderi makandra. Te den e doe dati, dan den e sori taki den e taki Jehovah Gado tangi, a sma di poti a moro boen eksempre fa foe abi warderi. — 1 Korentesma 11:1.

[Prenki na tapoe bladzijde 17]

Jesus ben sori warderi gi a moi sani di Maria ben doe