„Sori taki unu de nanga tangi”
1 Di Yesus dresi tin gwasiman, dan wán fu den nomo drai go baka na en fu taki en tangi. Yesus ben aksi: „A no tin sma kon krin? Pe den tra neigi de dan”? (Luk. 17:11-19) A de prenspari trutru taki wi abi warderi èn taki wi de nanga tangi gi ibri bun presenti nanga ibri volmaakti kado di wi e kisi fu wi lobi hemel Tata, Yehovah Gado, di e gi wi bun furu sani.—Kol. 3:15; Yak. 1:17.
2 Gi sortu sani wi musu de nanga tangi? Wi de nanga tangi gi a lusu-paiman, di de a moro bigi presenti di Gado gi libisma (Yoh. 3:16). Wi de nanga tangi tu taki Yehovah e hari wi kon na en (Yoh. 6:44). Wan tra reide fu de nanga tangi, na a wánfasi di wi leki Kresten abi na heri grontapu (Ps. 133:1-3). A no de fu taki, dati yu kan prakseri fu furu tra presenti di Yehovah gi yu. Noiti wi wani tron leki den Israelsma di no ben de nanga tangi èn di ben frigiti den sani di Yehovah du gi den!—Ps. 106:12, 13.
3 Sori taki yu de nanga tangi: A no de fu taki dati ala tin gwasiman ben warderi san Yesus du gi den, ma na wán fu den nomo ben sori taki a de nanga tangi (Luk. 17:15). Na a srefi fasi, wi e sori warderi te wi e teki prati fayafaya na a diniwroko. Efu wi de nanga tangi trutru gi ala sani di wi lobi hemel Tata du gi wi, dan dati o meki taki wi fruteri trawan fu en, fu di wi wani sori a srefi lobi èn a srefi bun-ati fu en (Luk. 6:45). Boiti dati, te wi e fruteri trawan fu Yehovah en ’wondruwroko èn taki a e prakseri wi trutru’, dan wi o kisi moro lobi nanga warderi gi Yehovah.—Ps. 40:5.
4 Gi trawan deki-ati fu sori warderi: Wi musu suku fasi fu yepi den pikin fu wi, èn den bijbelstudenti fu wi fu kon kisi warderi gi Yehovah. Papa nanga mama abi furu okasi fu du disi, te den e taki nanga den pikin fu den moi sani di Yehovah meki (Rom. 1:20). Te wi e studeri Bijbel nanga wan sma, dan wi kan aksi en: „Te wi e luku a sani disi, dan sortu sma Yehovah de?” Te a studenti e kisi moro warderi, dan a sa kisi moro lobi gi Gado tu èn a sa abi a fasti bosroiti fu tan plisi en.
5 Na ini den lasti dei disi, furu sma no abi warderi èn den no de nanga tangi (2 Tim. 3:1, 2). A no de fu taki dati Yehovah e prisiri trutru fu si fa den getrow futuboi fu en e sori taki den de nanga tangi, fu di den e teki prati fayafaya na a diniwroko!—Yak. 1:22-25.