De na ai èn de fajafaja!
„Foe dati ede, tan na ai, bika oenoe no sabi a dei èn no a joeroe toe.” — MATEUS 25:13.
1. San na apostel Johanes ben froewakti?
NA INI a lasti takimakandra na ini Bijbel, Jesus ben pramisi: „Mi e kon esi-esi.” En apostel Johanes ben piki: „Amen! Kon, Masra Jesus.” Na apostel no ben tweifri srefisrefi taki Jesus ben o kon. Johanes ben de wan foe den apostel di ben aksi Jesus: „O ten den sani disi sa de, èn san sa de a marki foe joe denoja [Grikitongo, pa·rou·siʹa] èn foe a bosroiti foe a seti foe sani?” Ija, nanga froetrow Johanes ben froewakti a denoja foe Jesus na ini a ten di e kon. — Openbaring 22:20; Mateus 24:3.
2. Fa den kerki e handri nanga a denoja foe Jesus?
2 So wan froetrow no de foeroe na ini a ten disi. Foeroe kerki abi wan troetroe leri di abi foe doe nanga a „kon” di Jesus o kon, ma wan toe memre foe den nomo e froewakti a kon foe Jesus troetroe. Èn den e libi neleki Jesus no e kon. A boekoe The Parousia in the New Testament e taki: „A bribi na ini a Parousia no abi foeroe krakti na tapoe a libi, den prakseri nanga a wroko foe a kerki. . . . A serjoesoefasi nanga san a kerki ben moesoe doe en wroko foe meki sma abi berow èn foe meki den zendeling meki na evangelie bekènti, kon swaki noso no de moro srefisrefi.” Ma a no de so nanga ala sma!
3. (a) Fa troe Kresten e denki foe a pa·rou·siʹa? (b) Sortoe spesroetoe sani wi sa ondrosoekoe now?
3 Den troetroe disipel foe Jesus e froewakti a kaba foe a disiten godelowsoe seti foe sani fajafaja. Ala di wi e doe dati na wan getrow fasi, wi moesoe abi a joisti denki foe ala sani di abi foe doe nanga a denoja foe Jesus èn wi moesoe handri akroederi dati. Dati sa jepi wi foe ’horidoro te na a kaba èn kisi froeloesoe’ (Mateus 24:13). Na ini a profeititori di Jesus ben gi èn di wi e feni na ini Mateus kapitel 24 nanga 25, a ben gi koni rai di wi kan gebroiki so taki wi kan kisi wini foe dati foe têgo. Kapitel 25 abi agersitori di joe sabi kande, so srefi a wan foe den tin njoenwenke (den koni nanga den don njoenwenke) èn na agersitori foe den talenti (Mateus 25:1-30). Fa den agersitori dati kan abi wini gi wi?
De na ai, neleki den feifi njoenwenke!
4. San na a moro prenspari penti foe na agersitori foe den njoenwenke?
4 Kande joe wani leisi na agersitori foe den njoenwenke na ini Mateus 25:1-13 baka. A situwâsi de wan bigi Djoe trow, pe a trowmasra e go na a oso foe a trowmisi papa foe tjari a trowmisi go na a oso foe a trowmasra (noso na a oso foe a papa foe a trowmasra). So wan groepoe sma ben kan abi pokoeman nanga singiman, èn a no de seiker toe o ten a groepoe ben o doro. Na ini na agersitori den tin njoenwenke ben wakti teneti te a trowmasra ben o doro. Feifi njoenwenke ben don foe no tjari nofo oli gi a lampoe èn foe dati ede den ben moesoe gowe foe go bai moro oli. Den feifi tra njoenwenke ben koni foe tjari ekstra oli na ini olibatra so taki den ben kan foeroe den lampoe foe den baka, efoe a ben o de fanowdoe ala di den e wakti. Den feifi njoenwenke disi wawan ben de drape di a trowmasra ben doro. Foe dati ede den wawan ben kisi primisi foe go na a fesa. Di den feifi don njoenwenke ben drai kon baka, dan a ben lati toemoesi gi den foe go na inisei.
5. Sortoe Bijbeltekst e jepi wi foe froestan san na agersitori foe den njoenwenke wani taki na simbôlis fasi?
5 Wi kan froestan foeroe penti foe na agersitori disi na wan simbolisch fasi. Foe eksempre, den Boekoe foe Bijbel e kari Jesus wan trowmasra (Johanes 3:28-30). Jesus ben gersi ensrefi nanga wan kownoe manpikin di sma ben sreka wan trowfesa gi en (Mateus 22:1-14). Èn Bijbel e gersi Krestes nanga wan masra (Efeisesma 5:23). A de prenspari taki, ala di na wan tra presi den e kari salfoe Kresten a „trowmisi” foe Krestes, na agersitori no e taki foe wan trowmisi (Johanes 3:29; Openbaring 19:7; 21:2, 9). Ma a e taki foe den tin njoenwenke, èn na wan tra presi den e gersi den salfoewan nanga wan njoenwenke di pramisi foe trow nanga Krestes. — 2 Korentesma 11:2.a
6. Sortoe froemane Jesus ben gi na a kaba foe na agersitori foe den njoenwenke?
6 Boiti den sortoe finifini tori disi nanga sani di a wani taki na profeiti fasi, seiker wan toe moi gronprakseri de foe leri na ini na agersitori disi. Foe eksempre, Jesus ben tapoe na agersitori nanga den wortoe: „Foe dati ede, tan na ai, bika oenoe no sabi a dei èn a joeroe toe.” So boen, na agersitori e sori taki ibriwan foe wi moesoe de na ai, foe de na ai gi a kaba foe a godelowsoe sistema disi di e kon krosibei. A kaba disi sa kon seiker, srefi ala di wi no kan taki soifri na tapoe sortoe dei. Na ini a tori disi, loekoe a denki foe den toe groepoe njoenwenke disi.
7. Na sortoe fasi den feifi njoenwenke na ini na agersitori ben sori taki den don?
7 Jesus ben taki: „Feifi foe den ben don.” A ben de so foe di den no ben bribi taki a trowmasra ben o kon? Den ben gowe foe go meki prisiri? Noso sma ben kori den? A piki na tapoe ala den aksi disi na nôno. Jesus ben taki dati den feifi disi „ben waka go miti a trowmasra”. Den ben sabi taki a ben o kon, èn den ben wani foe de drape, srefi foe abi wan prati na a „trowfesa”. Ma, den ben sreka boen nofo? Den ben wakti en wan pisi ten, teleki „mindrineti”, ma den no ben srekasreka te a ben o doro, awansi o ten dati ben o de — awansi moro froekoe noso moro lati leki san den ben froewakti na ini a bigin.
8. Fa den feifi njoenwenke na ini na agersitori ben sori taki den koni?
8 Den tra feifi njoenwenke — den wan di Jesus ben kari taki den koni — ben go toe nanga lampoe di ben leti, èn den ben froewakti taki a trowmasra ben o doro. Den ben moesoe wakti toe, ma den ben „koni”. A Griki wortoe di vertaal nanga „koni” kan gi na idea foe „de fersektiki, de nanga krin froestan, èn foe handri nanga koni”. Den feifi njoenwenke disi ben sori taki den ben koni di den ben tjari olibatra nanga ekstra oli foe foeroe den lampoe baka efoe a ben sa de fanowdoe. Foe taki en leti, den ben de so serjoesoe foe de klariklari gi a trowmasra, taki den no ben wani gi trawan na oli foe den. A de di den ben de na ai na so wan fasi no ben fowtoe, bika wi e si taki den ben de drape èn ben srekasreka dorodoro na a ten di a trowmasra ben doro. Den njoenwenke disi di „ben de srekasreka, ben go makandra nanga en na inisei na a trowfesa; èn a doro ben sroto”.
9, 10. San na a moro prenspari penti foe na agersitori foe den njoenwenke, èn sortoe aksi wi moesoe aksi wisrefi?
9 Jesus no ben e leri sma fa foe tjari densrefi na wan joisti fasi na wan trowfesa, èn a no ben e gi rai toe foe prati sani nanga makandra. A penti di a ben wani tjari kon na krin ben de: „Foe dati ede, tan na ai, bika oenoe no sabi a dei èn a joeroe toe.” Aksi joesrefi: ’Mi de na ai troetroe gi a denoja foe Jesus’? Wi e bribi taki Jesus e tiri now na ini hemel, ma o serjoesoe wi e si a troetori taki ’a Manpikin foe libisma sa kon heri esi na tapoe den wolkoe foe hemel nanga krakti èn bigi glori’? (Mateus 24:30) Na „mindrineti”, a doro di a trowmasra ben o doro ben de moro krosibei leki di den njoenwenke ben go na ini a bigin foe miti en. Na a srefi fasi, a kon di a Manpikin foe libisma sa kon foe pori a disiten godelowsoe sistema de moro krosibei leki a ten di wi ben bigin froewakti o ten a ben o kon (Romesma 13:11-14). Wi tan de na ai, kande taki wi de moro na ai srefi foe di a ten dati e kon moro krosibei?
10 Foe gi jesi na a komando „tan na ai doronomo”, dan a de fanowdoe foe de na ai dorodoro. Feifi njoenwenke ben meki na oli foe den kaba èn den ben gowe foe bai moro oli. Na a srefi fasi wan Kresten na ini a ten disi ben sa kan meki tra sani poeroe en prakseri so taki a no de srekasreka dorodoro te Jesus e doro heri esi. Dati ben pasa nanga wan toe Kresten na ini a fosi jarihondro. A kan pasa nanga wan toe sma na ini a ten disi. Foe dati ede, meki wi aksi wisrefi: ’dati e pasa nanga mi’? — 1 Tesalonikasma 5:6-8; Hebrewsma 2:1; 3:12; 12:3; Openbaring 16:15.
De fajafaja foe di a kaba e kon moro krosibei
11. Sortoe agersitori Jesus ben gi baka dati, èn nanga san a ben de a srefi?
11 Na ini en tra agersitori, Jesus ben doe moro leki nomo foe gi den bakaman foe en a deki-ati foe de na ai. Baka di a ben taki foe den koni njoenwenke nanga den don njoenwenke, dan a ben froeteri na agersitori foe den talenti. (Leisi Mateus 25:14-30.) Na foeroe fasi na agersitori disi ben gersi na agersitori foe den mina di a ben taki na fesi, di Jesus ben gi foe di foeroe foe den bakaman foe en „ben prakseri taki a kownoekondre foe Gado ben o sori ensrefi wantewante”. — Lukas 19:11-27.
12. San na a moro prenspari penti foe na agersitori foe den talenti?
12 Na ini na agersitori foe den talenti, Jesus ben taki foe wan man di, bifo a ben e rèis go na dorosei kondre, ben seni kari dri srafoe kon. Na a wan a ben gi feifi talenti, a trawan a ben gi toe talenti, èn a lastiwan a ben gi wán talenti — „ibriwan akroederi en eigi bekwaamfasi”. Soleki fa a sori, disi ben de wan solfroe talenti, wan fasti moni di na a ten dati ben abi a waarde foe a moni di wan wrokoman ben o wroko na ini 14 jari — dati ben de foeroe moni! Di a man ben drai kon baka, a ben meki den srafoe gi frantiwortoe foe den sani di den ben doe na ini a „langa pisi ten” di a no ben de. Den toe fosi srafoe ben meki a waarde foe a moni di den ben kisi, kon toe tron moro foeroe. A man ben taki „joe doe heri boen”, èn a ben pramisi ibriwan foe den foe gi den moro frantiwortoe, èn dan a ben taki: „Go na ini a prisiri foe joe masra.” Foe di a srafoe di ben kisi wán talenti ben froeklari taki a masra ben de wan sma di ben e aksi toemoesi foeroe foe tra sma, meki a srafoe no ben gebroiki a talenti na no wan fasi foe meki moni nanga dati. A ben kibri a moni, èn a no ben poti a moni na bangi srefi foe meki a lon rente. A masra ben kari en wan „ogri èn loboso” srafoe, bika a ben doe sani di no ben tjari wini gi en masra. Foe dati ede den ben teki en talenti poeroe na en èn den ben poti en na dorosei pe a ben „sa krei èn kaw tifi”.
13. Fa Jesus ben sori taki a de leki a masra na ini na agersitori?
13 Ete wan leisi, wi kan froestan den finifini tori disi na wan simbôlis fasi. Foe eksempre, Jesus, di a man di ben rèis go na dorosei kondre e prenki, ben o libi den disipel foe en, èn ben o go na hemel, èn a ben o wakti wan langa pisi ten bifo a ben o kisi kownoe maktib (Psalm 110:1-4; Tori foe den Apostel 2:34-36; Romesma 8:34; Hebrewsma 10:12, 13). Ma a de so baka taki wi kan si wan moro bigi lès noso gronprakseri di wi alamala moesoe gebroiki na ini wi libi. San na dati?
14. Na tapoe sortoe sani di de tranga fanowdoe, na agersitori foe den talenti e poti krakti?
14 Awansi wi abi a howpoe foe kisi libi na ini hemel sondro foe man dede, noso têgo libi na ini wan paradijs grontapoe, a de krin foe si na ini na agersitori foe Jesus taki wi moesoe doe tranga moeiti na ini a Kresten diniwroko. Foe taki en leti, a boskopoe foe na agersitori disi kan taki nanga wán wortoe nomo: fajafaja. Den apostel ben gi na eksempre foe sensi a Pinksterfesa na ini 33 G.T. Wi e leisi: „Nanga foeroe tra wortoe moro [Petrus] ben gi kotoigi finifini èn ben tan froemane den, taki: ’Kisi froeloesoe komoto na mindri a kroektoe geslakti disi’” (Tori foe den Apostel 2:40-42). Èn a ben kisi toemoesi moi wini foe den moeiti di a ben doe! Te trawan ben moksi densrefi nanga den apostel na ini a Kresten preikiwroko, dan den toe ben de fajafaja, èn a boen njoensoe ben „e gro na heri grontapoe”. — Kolosesma 1:3-6, 23; 1 Korentesma 3:5-9.
15. Na sortoe spesroetoe fasi wi moesoe gebroiki na ede-penti foe na agersitori foe den talenti?
15 Hori a kontekst foe na agersitori disi na prakseri — wan profeititori di abi foe doe nanga a denoja foe Jesus. Wi abi nofo boeweisi taki Jesus de na ini en pa·rou·siʹa now, èn heri esi a sa doro en heimarki. Memre fa Jesus ben taki dati „a kaba” abi foe doe nanga a wroko di Kresten moesoe doe: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Te wi e prakseri disi, dan leki sortoewan foe den srafoe wi de? Aksi joesrefi: ’Wan reide ben sa de foe taki dati mi de leki a srafoe di ben kibri a sani di a ben kisi, ala di kande a ben sorgoe gi sani di abi foe doe nanga ensrefi nomo? Noso a de krin taki mi de leki den wan di ben boen èn getrow? Mi teki a bosroiti krinkrin taki na ibri okasi mi sa meki den goedoe foe a Masra kon moro foeroe?’
De na ai èn de fajafaja na a denoja foe En
16. Sortoe boskopoe den toe agersitori di wi taki foe den, abi gi joe?
16 Ija, boiti den sani di den wani taki na agersi fasi nanga na profeiti fasi, den toe agersitori disi e gi wi krinkrin deki-ati di e kon foe a mofo foe Jesus srefi. En boskopoe na disi: De na ai; de fajafaja, spesroetoe te wi e si a marki foe Krestes en pa·rou·siʹa. Dati na nownow. So boen, wi de na ai troetroe èn wi de fajafaja troetroe?
17, 18. Sortoe rai a disipel Jakobus ben gi di abi foe doe nanga a denoja foe Jesus?
17 Na afoebrada foe Jesus, Jakobus, no ben de na tapoe na Olijfbergi foe jere a profeititori foe Jesus; ma a ben kon sabi en baka ten, èn a ben froestan krinkrin o prenspari a profeititaki de. A ben skrifi: „Hori pasensi, foe dati ede, brada te leki a denoja foe Masra. Loekoe! A gronman e tan wakti a switi froktoe foe a gron, èn e hori pasensi nanga en te leki a e kisi a froekoe alen nanga a lati alen. Oenoe so srefi, hori pasensi; meki oen ati kon de stanfaste, foe di a denoja foe Masra kon krosibei.” — Jakobus 5:7, 8.
18 Baka di Jakobus ben gi a djaranti taki Gado sa strafoe den wan di no e gebroiki den goedoe foe den na wan boen fasi, dan Jakobus ben gi Kresten a deki-ati foe no lasi pasensi te den e wakti te Jehovah sa doe wan sani. Wan Kresten di no abi pasensi ben sa kan tron wan sma di wani teki refensi, neleki na ensrefi moesoe poti den ogri di sma doe kon reti baka. Ma dati no moesoe de so, bika a ten foe kroetoe sa doro seiker. Na eksempre foe wan gronman e sori dati, soleki fa Jakobus ben froeklari.
19. Sortoe pasensi wan gronman foe Israèl ben kan abi?
19 Wan gronman na ini Israèl di ben sai siri ben moesoe wakti, foe meki a blad kon fosi, dan foe meki a sani di a ben prani kon bigi, èn te foe kaba foe wakti a ten foe a kotiwroko (Lukas 8:5-8; Johanes 4:35). Na ini den moen dati, a gronman ben abi ten èn kande so srefi reide foe broko en ede. Den froekoe alen ben o kon èn den ben o nofo? Fa a ben o de nanga na alen di ben o kon baka ten? Insekt noso tranga winti ben sa kan kiri den sani di a ben prani? (Teki gersi Joèl 1:4; 2:23-25.) Ma tokoe, moro foeroe gronman na ini Israèl ben kan froetrow tapoe Jehovah èn den sistema na ini natoeroe di a seti (Deuteronomium 11:14; Jeremia 5:24). A pasensi foe a gronman ben kan tron wan tranga bribi srefi. A e bribi taki den sani di a ben wakti na tapoe, ben sa kon. A ben o kon foe troe!
20. Fa wi kan sori pasensi soleki fa Jakobus ben gi a rai?
20 Ala di wan gronman ben sa kan sabi pikinso o ten a kotiwroko moesoe doe, den fosi jarihondro Kresten no ben kan bereken o ten a denoja foe Jesus ben o de. Ma a ben de seiker taki a ben o kon. Jakobus ben skrifi: „A denoja [Grikitongo, pa·rou·siʹa] foe Masra kon krosibei.” Na a ten di Jakobus ben skrifi den wortoe dati, dan a marki foe Krestes en denoja di ben o kon na heri grontapoe, no ben de krin foe si ete. Ma now a de krin foe si! So boen, fa wi moesoe firi na ini a ten disi? A marki de foe si troetroe. Wi e si en. Wi kan taki sondro foe tweifri ’Mi e si a marki e kon troe’. Nanga froetrow wi kan taki: ’A denoja foe Masra de kaba èn en heimarki kon krosibei.’
21. San wi bosroiti foe doe troetroe?
21 Foe di dati de so, meki wi abi spesroetoe tranga reide foe teki èn gebroiki den prenspari lès foe den toe agersitori foe Jesus di wi ben taki foe den. A ben taki: „Foe dati ede, tan na ai, bika oenoe no sabi a dei èn no a joeroe toe” (Mateus 25:13). Now na troetroe a ten foe de fajafaja na ini wi Kresten diniwroko. Meki wi sori ibri dei na ini wi libi taki wi e froestan a penti di Jesus ben wani tjari kon na krin. Meki wi de na ai! Meki wi de fajafaja!
[Foetoewortoe]
a Foe sabi moro foe den simbôlis penti foe na agersitori, loekoe Gods duizendjarige koninkrijk is nabij gekomen, bladzijde 169-183 nanga 184-212, di a Watchtower Bible and Tract Society of New York, Inc., tjari kon na doro.
Joe e memre disi ete?
◻ Sortoe prenspari boskopoe joe teki foe na agersitori foe den koni njoenwenke nanga den don njoenwenke?
◻ Sortoe prenspari rai Jesus gi joe, nanga jepi foe na agersitori foe den talenti?
◻ Na sortoe fasi a pasensi foe joe abi foe doe nanga a pa·rou·siʹa, leki di foe wan gronman na ini Israèl?
◻ Foe san ede a ten pe wi e libi now na ini, de wan spesroetoe span ten èn wan ten pe wi moesoe doe spesroetoe moeiti?
[Prenki na tapoe bladzijde 23]
Sortoe lès joe e leri foe na agersitori foe den njoenwenke nanga di foe den talenti?