Den ben doe a wani foe Jehovah

Paulus e wini problema

PAULUS de na ini wan kefalek moeilek situwâsi. En nanga ete 275 tra man de na ini wan boto di de na ini kefalek hebi feti nanga Euráquilo — a moro ogri winti na tapoe a Mindrikondre Se. A tranga winti hebi so kefalek taki den no man si a son na deiten, èn den no man si den stari teneti. Wi kan froestan taki den pasasir e frede taki den sa dede. Tokoe Paulus e trowstoe den te a e froeteri den san Gado ben tjari kon na krin gi en na ini wan dren: „No wan sili foe oenoe sa lasi, ma soso a boto.” — Tori foe den Apostel 27:14, 20-22.

Na tapoe a di foe 14 neti foe a tranga winti, den botoman e si wan sani di e frede den — a watra dipi 20 vadem nomo.a Na baka di den go pikinso moro fara, dan den ben marki a dipi foe a watra ete wan leisi. A leisi disi, a watra ben dipi 15 vadem. Sjoro de krosibei! Ma a boen njoensoe disi e meki den e broko den ede. Foe di a watra ben e fringi a sipi go-kon na tapoe lagi watra na neti, meki a ben sa kan naki teige klipston èn broko na pisipisi. Den botoman e handri koni èn den e saka den ankra. Wan toe foe den wani saka a moro pikin boto èn go na ini en, èn den ben wani teki a tjans na tapoe se.b Ma Paulus e tapoe den. A e taigi a legre ofsiri nanga den sroedati: „Efoe den man disi no e tan na ini a boto, dan oenoe no sa man kisi froeloesoe.” Na ofsiri e arki Paulus èn now ala den 276 pasasir e wakti nanga foeroe span te son opo. — Tori foe den Apostel 27:27-32.

A sipi broko

A tra mamanten den pasasir foe a sipi e si wan baai foe wan èilanti di abi wan sjoro. Nanga njoen howpoe den botoman e koti den ankra poeroe èn e opo a fesisei seiri gi a winti. A sipi e bigin go na a sjoro — èn seiker den ben bari foe prisiri. — Tori foe den Apostel 27:39, 40.

Ma wantronso a sipi e fasi na tapoe wan santibangi. Moro takroe srefi, bigi skwala e naki na a botolasi, èn e broko en na pisipisi. Ala den pasasir abi foe gowe libi a sipi! (Tori foe den Apostel 27:41) Ma disi e gi wan problema. Foeroe foe den man na ini a boto — so srefi Paulus — na strafoeman. Èn a wet foe Rome e taki dati wan waktiman di e meki en strafoeman lowe, moesoe kisi a strafoe di a strafoeman ben moesoe kisi. Efoe wan kiriman ben lowe, foe eksempre, dan a waktiman di ben abi mi-no-ke fasi ben sa moesoe pai nanga en eigi libi.

Foe di den sroedati ben frede den sortoe bakapisi disi, meki den ben bosroiti foe kiri ala den strafoeman. Ma a legre ofsiri di ben doe boen gi Paulus, ben kon na ini a tori. A e komanderi ala den sma di man doe dati foe djompo na ini a watra èn swen go na sjoro. Den wan di no man swen moesoe graboe planga noso tra sani foe a boto hori. Wan froe wan, den pasasir foe a sipi di ben o lasi e hari densrefi nanga foeroe moeiti go na sjoro. Soleki fa Paulus ben taki, no wan foe den lasi den libi! — Tori foe den Apostel 27:42-44.

Wan wondroe na tapoe Malta

A groepoe di ben weri srefisrefi feni kibri na tapoe wan èilanti di nen Malta. Den sma di e libi drape na „sma di e taki wan freimde tongo”, troetroe, „barbaar” (Grikitongo, barʹba·ros).c Ma den sma foe Malta a no ogri-ati sma. Kontrari foe dati, Lukas wan kompe di ben rèis nanga Paulus e froeteri taki den Maltasma „ben abi toemoesi aparti switifasi gi wi di wan sma abi, bika den ben meki wan faja èn den ben ontfanga wi alamala bika alen ben fadon èn a ben kowroe”. Paulus srefi ben jepi den sma di e libi na Malta foe soekoe èn poti tiki na tapoe a faja. — Tori foe den Apostel 28:1-3, foetoewortoe.

Wantronso wan kefalek sneki e beti ensrefi hori na Paulus anoe! Den sma foe na èilanti e denki taki Paulus moesoe de wan kiriman. Den e denki kande taki Gado e strafoe sondari te a e doe ogri na a pisi foe den skin di ben doe na ogri. Ma loekoe! Den sma di e libi drape e froewondroe srefisrefi te Paulus e seki a sneki poeroe meki a fadon na ini a faja. Soleki fa Lukas di ben de drape toe e froeteri, „den ben froewakti taki [Paulus] ben o sweri foe a soro ede, noso ben o fadon dede wantronso”. Den sma foe na èilanti e prakseri tra fasi èn ben bigin taki dati Paulus moesoe de wan gado. — Tori foe den Apostel 28:3-6.

Paulus e tan dri moen na tapoe Malta èn na ini a ten dati a e dresi a papa foe Publius, na edeman foe na èilanti di ben ontfanga Paulus nanga switifasi, èn a ben dresi so srefi tra sma di ben siki. Na tapoe foe dati, Paulus ben sai siri foe waarheid èn dati ben tjari foeroe blesi kon gi den sma foe Malta di lobi foe ontfanga sma. — Tori foe den Apostel 28:7-11.

Lès gi wi

Paulus ben miti foeroe tjalensi na ini en diniwroko (2 Korentesma 11:23-27). Na ini a tori di skrifi na tapoesei, a ben de wan strafoeman foe a boen njoensoe ede. Dan a ben miti tesi di a no ben froewakti: wan ogri tranga winti èn wan broko sipi leki bakapisi foe dati. Na ini ala den situwâsi disi noiti Paulus ben degedege na ini a fasti bosroiti foe en foe de wan fajafaja preikiman foe a boen njoensoe. Nanga ondrofeni a ben skrifi: „Na ini ala situwâsi mi leri a kibritori foe ala toe: foe njan te a sari mi èn foe abi angri, foe abi sani pasa marki èn foe mankeri sani. Gi ala sani mi abi a tranga foe en di e gi mi krakti.” — Filipisma 4:12, 13.

Noiti wi no moesoe meki den problema na ini a libi swaki a bosroiti di wi abi foe de fajafaja bedinari foe a troe Gado! Te wan tesi e kon di wi no ben froewakti, dan wi e trowe wi hebi na tapoe Jehovah (Psalm 55:22). Dan wi e wakti nanga pasensi foe si fa En sa meki wi man horidoro na ondro a tesi. Ma ala di wi e wakti, wi e tan dini en getrow, nanga a froetrow taki A e sorgoe gi wi (1 Korentesma 10:13; 1 Petrus 5:7). Te wi e tan kánkan, dan awansi sortoe problema e kon — neleki Paulus — wi kan wini den problema.

[Foetoewortoe]