A Kresten gemeente — Wan presi pe jepi de di e tranga sma

POPI, wan oema di abi pikinso moro leki 20 jari, ben broeja foe di wan sari situwâsi ben de na ini en osofamiri bika a no ben abi wan eerlijk komunikâsi nanga en papa nanga mama.a Baka di a ben froeteri wan Kresten owroeman nanga en wefi san ben de na tapoe en ati, dan a ben skrifi den: „Tangi srefisrefi taki oenoe teki a ten foe taki nanga mi. Oenoe no sabi o prenspari a de gi mi taki oenoe ben firi nanga mi. Mi e taigi Jehovah tangi taki a gi mi sma di mi man froetrow èn nanga soema mi man taki.”

Toula, wan oema di tron weduwe no so langa pasa èn di abi toe tini pikin, ben fadon na ini wan lo emotioneel problema nanga moni problema. Doronomo en nanga den pikin foe en ben kisi fisiti di ben gi den krakti, foe wan Kresten trowpaar foe a gemeente. Baka di a ben man kakafoetoe boen gi a situwâsi foe en, a ben seni wan karta gi den, di e taki: „Ala ten mi e prakseri oenoe na ini den begi foe mi. Mi e memre den foeroe leisi di oenoe ben jepi mi èn ben horibaka gi mi.”

Joe e firi sontron taki den sani foe a grontapoe disi di e druk sma moro nanga moro de wan „hebi” gi joe? (Mateus 11:28) A de so, taki „ten nanga sani di e pasa èn di sma no sabi na fesi”, pori joe libi nanga ondrofeni di e gi sari? (Preikiman 9:11) Dan a no de so nanga joe wawan. Ma neleki den doesoendoesoen sma di kisi kwinsi ondrofeni kaba, na so joe toe kan feni boen jepi na ini a Kresten gemeente foe Jehovah Kotoigi. Na ini a fosi jarihondro G.T, na apostel Paulus ben ondrofeni taki wan toe kompebribiman ben de wan spesroetoe „jepi gi [en] di e tranga” en (Kolosesma 4:10, 11). Joe kan ondrofeni dati toe.

Jepi nanga asisteri

Na ini den Kresten Griki Boekoe foe Bijbel, a wortoe „gemeente” vertaal foe a Griki wortoe ek·kle·siʹa, di wani taki wan groepoe sma di kari kon na makandra. A wortoe dati abi den idea foe wánfasi èn a jepi di sma e jepi makandra.

A Kresten gemeente e horibaka gi a waarheid foe Gado Wortoe èn e meki a boen njoensoe foe en Kownoekondre bekènti (1 Timoteus 3:15; 1 Petrus 2:9). Ma a gemeente e gi den wan di abi demakandra nanga a gemeente so srefi jepi nanga asisteri na jeje fasi. Drape wan sma kan feni wan groepoe mati di abi lobi, di e broko den ede nanga en, di de klariklari èn di wani jepi èn trowstoe trawan di de na ondro druk. — 2 Korentesma 7:5-7.

Ala ten den anbegiman foe Jehovah feni kibri nanga seikerfasi na ini en gemeente. A psalm singiman ben sori taki a ben ondrofeni prisiri nanga wan firi foe seikerfasi na mindri a pipel foe Gado di ben kon na makandra (Psalm 27:4, 5; 55:14; 122:1). A de a srefi na ini a ten disi, a Kresten gemeente na wan demakandra foe kompebribiman di e gi makandra tranga èn deki-ati. — Odo 13:20; Romesma 1:11, 12.

Den memre foe a gemeente e leri foe „doe boen gi ala sma, ma spesroetoe gi den wan di de na ini a srefi bribi leki [den]” (Galasiasma 6:10). A leri foe Bijbel di den e kisi, e boeweigi den foe sori lobi gi makandra leki brada èn safoe firi foe lobi gi makandra (Romesma 12:10; 1 Petrus 3:8). Den brada nanga sisa na jeje fasi na ini a gemeente e kisi a firi foe doe boen, foe lobi vrede, èn foe abi safoe sari-atifasi (Efeisesma 4:3). Na presi foe de anbegiman di e anbegi leki wan plekti nomo, den e sori taki na ini lobi den e broko den ede nanga tra sma. — Jakobus 1:27.

Foe dati ede, na ini a gemeente den wan di e ondrofeni serjoesoe kwinsi e feni a waran firi neleki na ini wan osofamiri (Markus 10:29, 30). A firi di den abi taki den de na ini wan lobi-ati groepoe sma di abi wan tranga banti nanga makandra, e tranga den (Psalm 133:1-3). Nanga jepi foe a gemeente „a getrow èn koni srafoe” e gi gosontoe „njanjan [na jeje fasi] na a reti ten”. — Mateus 24:45.

Jepi foe lobi-ati opziener

Den memre foe a Kresten gemeente kan froewakti foe feni drape opziener di abi lobi, di e froestan den, èn di de bekwaam herder di e gi jepi nanga deki-ati na jeje fasi. Den herder di abi den bekwaamfasi disi de leki „wan kibripresi gi a winti èn wan kibripresi gi a sibiboesi” (Jesaja 32:1, 2). Den owroeman noso opziener di Gado poti nanga en santa jeje, e sorgoe gi a pipel foe Gado di wi kan teki gersi nanga skapoe, èn den e gi den sikiwan nanga den wan di depressief deki-ati, èn den e proeberi foe jepi den wan di sondoe. — Psalm 100:3; 1 Petrus 5:2, 3.

A no de foe taki, dati a skin foe owroeman na ini a gemeente a no therapist noso datra di man dresi problema di sma abi nanga a gosontoe na skin sei noso na froestan sei èn di den kompebribiman e ondrofeni. Na ini a sistema disi den sikiwan „abi wan datra fanowdoe” ete (Lukas 5:31). Ma tokoe den herder disi kan jepi den wan di abi jepi fanowdoe na jeje fasi (Jakobus 5:14, 15). Te a kan, dan den owroeman kan sreka sani foe asisteri sma na tra fasi toe. — Jakobus 2:15, 16.

Soema na a sma di seti a lobi-ati seti disi? Jehovah Gado srefi! A profeiti Esekièl e taki dati Jehovah e froeklari: „Mi sa soekoe den skapoe foe mi èn mi sa sorgoe gi den. . . . Mi sa froeloesoe den komoto na ala den presi pe den panja go . . . Misrefi sa gi den skapoe foe mi njanjan, èn misrefi sa meki den didon.” Gado e broko en ede toe nanga den skapoe di no abi krakti èn di swaki. — Esekièl 34:11, 12, 15, 16.

Troetroe jepi na a joisti ten

Troetroe jepi de foe kisi na ini a Kresten gemeente troetroe? Ija, èn den eksempre disi e sori den difrenti situwâsi pe a gemeente e gi jepi.

◆ Lasi wan lobiwan na ini dede. A masra foe Anna dede baka di a ben siki wan langa pisi ten. „Foe sensi a ten dati, mi kisi a waran lobi foe a Kresten bradafasi”, a e taki. „Den doronomo switi wortoe foe mi kompebribiman foe horibaka gi mi èn foe gi mi deki-ati èn so srefi den opregti brasa foe den, ben gi mi deki-ati na presi foe meki mi brokosaka, èn mi e taigi Jehovah tangi. A lobi di den abi gi mi meki mi firi taki mi feni jepi troetroe, taki mi firi misrefi boen srefisrefi, èn taki den broko den ede nanga mi na ini lobi.” Kande joesrefi ben abi a kefalek sari ondrofeni foe lasi wan lobiwan na ini dede. Na den sortoe momenti disi, den memre foe a gemeente kan gi trowstoe nanga jepi na emotioneel sei di wi abi tranga fanowdoe.

◆ Siki. Arthur, wan opziener foe Polen di e rèis, ben fisiti den gemeente na ini Centraal Asia doronomo foe tranga den na jeje fasi. Na wan foe den fisiti disi, Arthur ben kon siki serjoesoe èn a ben kisi tra serjoesoe problema di a ben e kon betre baka. „Mi wani taigi joe fa den brada nanga sisa na ini [wan foto na ini Kasakstan] ben sorgoe gi mi”, Arthur e memre nanga foeroe warderi. „Brada nanga sisa, èn foeroe foe den mi no sabi, — èn srefi sma di abi belangstelling — ben tjari moni, njanjan sani, nanga dresi kon. . . . Èn den ben doe dati nanga foeroe prisiri.

Prakseri fa mi ben firi di mi ben kisi wan envelop nanga moni na ini èn a brifi disi: ’Lobi Brada, mi e seni joe waran odi. Mama ben gi mi moni foe bai ice cream, ma mi bosroiti foe gi joe en foe bai dresi. Grantangi, kon betre esi. Jehovah abi wi fanowdoe gi wan langa ten. Tan boen. Èn froeteri wi moro foe den boen tori di e leri wi wan sani. Vova.’” Ija, soleki fa a sori na ini a kefal disi, jongoewan nanga owroeman na ini a gemeente kan gi jepi di e tranga sma na ini ten foe siki. — Filipisma 2:25-29.

◆ Depressie. Tèri ben abi a tranga angri foe dini leki wan pionier, noso foeroeten preikiman foe a Kownoekondre. Ma foe problema ede, meki a ben moesoe tapoe nanga a pionierwroko. „Mi ben firi misrefi fowtoe srefisrefi taki mi ben proeberi foe dini leki pionier èn taki mi no ben man doe dati wán jari langa srefi”, a e taki. Tèri ben abi a fowtoe denki taki foe kisi a boen-ati foe Jehovah ben anga soso foe o foeroe a ben e doe na ini a diniwroko gi En. (Teki gersi Markus 12:41-44.) Foe di a ben de depressief srefisrefi, meki a ben hari ensrefi poeroe foe sma. Ma dan a ben kisi jepi foe a gemeente di ben meki taki a ben firi boen baka.

Tèri e memre: „Wantewante wan moro owroe pionier sisa ben kon jepi mi èn ben arki mi ala di mi ben froeteri en san ben de na tapoe mi ati. Di mi ben gowe foe en oso, mi ben firi leki wan hebi ben poeroe gowe foe mi. Foe sensi a momenti dati, a pionier sisa disi nanga en masra, wan owroeman na ini a gemeente, ben gi mi boen jepi. Ibri dei den ben bèl mi èn ben aksi mi fa mi tan. . . . Den meki mi de toe sontron na a osofamiri studie foe den èn dati meki mi froestan o prenspari a de taki den sma na ini wan osofamiri moesoe tan krosibei foe makandra.”

A de wan gewoon sani taki foeroe sma — srefi Kresten di gi densrefi abra na Gado — kon de depressief, e lasi-ati, èn e firi densrefi den wawan. Wi kan de nanga tangi srefisrefi taki jepi de na ini a gemeente foe Gado di e gi nanga lobi èn sondro taki sma e prakseri densrefi wawan! — 1 Tesalonikasma 5:14.

◆ Rampoe nanga onkolokoe. Poti joesrefi na ini a presi foe wan osofamiri foe fo sma, di ben lasi ala den goedoe foe den di na oso foe den ben bron te na gron. Sjatoe na baka, den ben taki dati den ben abi „wan moi ondrofeni di foe ala ten sa naki den ati èn di ben meki den froestan a troe lobi na mindri a pipel foe Jehovah.” Den e froeklari: „Pikinmoro wantewante kefalek foeroe brada nanga sisa foe wi na jeje fasi ben bèl foe di na wan opregti fasi den ben wani gi jepi èn foe sori taki den e firi nanga wi. Doronomo sma ben e bèl. A troetroe broko-ede nanga lobi di sma ben sori wi, ben naki wi ati taki wi ben krei foe tangi.”

A no ben teki langa di den owroeman foe a gemeente ben orga wan bigi groepoe brada, èn na ini wan toe dei den ben bow wan njoen oso gi na osofamiri disi. Wan birfrow ben froeklari: „Joe ben moesoe si en! Ala sortoe sma ben e wroko drape — mansma, oemasma, blaka sma, èn sma foe Latino-Amerika!” Disi ben de wan krinkrin boeweisi foe brada lobi. — Johanes 13:35.

Kompekresten ben gi na osofamiri krosi, njanjan, nanga moni toe. A papa e taki: „Disi ben de na ini a Kresneti ten te ala sma e gi kado, ma wi kan taki troetroe taki no wan tra sma ben kisi so foeroe sani na a opregti fasi disi leki wi.” Èn den e taki toe: „A prakseri di wi ben e prakseri foe a faja, e gowe safrisafri èn na presi foe dati wi e kisi moi prakseri foe boen sani di sma ben doe gi wi èn foe boen mati. Wi de wi lobi-ati hemel Tata, Jehovah, tangi taki wi abi so wan moi famiri foe brada di abi wánfasi na grontapoe, èn wi de nanga tangi srefisrefi taki wi de wan pisi foe en!”

A no de foe taki, dati so wan jepi no man gi na ini ibri rampoe, èn wi no e froewakti dati toe. Ma na eksempre disi troetroe e sori a jepi di a gemeente kan gi.

Koni foe tapoesei

Foeroe sma feni wan tra presi pe den kan feni jepi nanga krakti na ini a Kresten gemeente. San na dati? Poeblikâsi di „a getrow èn koni srafoe” e sreka. Den prenspari wan na den tijdschrift A Waktitoren nanga Ontwaakt! Foe gi koni rai nanga praktisch leri, den poeblikâsi disi e froetrow moro foeroe tapoe a koni foe Gado di de foe feni na ini Bijbel (Psalm 119:105). Boiti den Bijbel bodoi, serjoesoe èn finifini ondrosoekoe e doe foe tori di abi foe doe nanga depressie na froestan sei, a kon di wan sma e kon betre na baka te trawan mesbroiki en, difrenti sociaal nanga ekonomia problema, tjalensi di jongoe sma e miti, èn problema di abi spesroetoe foe doe nanga den pôti kondre. Na tapoe foe dati, den poeblikâsi disi e hei Gado pasi leki a moro boen pasi foe libi. — Jesaja 30:20, 21.

Ibri jari a Waktitoren Genootschap e kisi doesoendoesoen brifi foe sma di e sori warderi. Foe eksempre, wan jonkoeman na ini Rosiakondre ben skrifi foe wan Ontwaakt! di ben e taki foe a kiri di sma e kiri densrefi: „Bika foeroetron mi de depressief, . . . meki foeroe leisi mi ben prakseri foe kiri misrefi. Na artikel disi ben tranga mi bribi taki Gado sa jepi mi foe wini den problema foe mi. A wani taki mi moesoe tan na libi. Mi e taigi en tangi foe a jepi di a gi mi nanga jepi foe na artikel disi.”

Efoe den bigi skwala foe problema na ini a grontapoe disi ogri toemoesi foe man wini den, dan joe kan de seiker taki wan kibripresi de na ini a Kresten gemeente. Ija, efoe a kefalek drei sabana foe a sistema disi di no abi lobi, e soigi joe krakti, dan joe kan feni wan watrapresi di e gi krakti baka na ini Jehovah en organisâsi. Baka te joe ondrofeni a jepi disi, dan joe toe kan taki baka foe a fasi fa wan Kresten oema ben firi, di na wan boen fasi ben man handri nanga a serjoesoe siki foe en masra èn di ben skrifi: „Bika foe a lobi èn a sorgoe di wi ben kisi, mi e firi neleki na Jehovah ben tjari wi na ini en anoe foe pasa a problema disi. Mi de tangi srefisrefi foe de wan pisi foe a kefalek moi organisâsi foe Jehovah!”

[Foetoewortoe]

[Prenki na tapoe bladzijde 26]

Wi kan gi jepi di e tranga den sikiwan, den wan di lasi wan sma na ini dede, èn tra sma