Warderi den „Presenti ini Libisma”
Abi lespeki gi den wan di e wroko tranga na unu mindri èn . . . sori den moro furu lespeki na ini lobi na wan tumusi aparti fasi, fu a wroko di den e du.”—1 TESALONIKASMA 5:12, 13.
1. ¿Soleki fa Tori fu den Apostel 20:35 e sori, san a gi di wan sma e gi sani, man du? Gi wan eksempre.
„MORO koloku de ini a gi fu sani, leki ini a kisi fu sani” (Tori fu den Apostel 20:35). ¿Yu kan memre a lasti leisi di yu ben ondrofeni taki den wortu dati fu Yesus de tru? Kande a ben de wan kado di yu ben gi wan sma di yu lobi srefisrefi. Yu ben luku heri bun sortu wan yu ben o gi en, bika yu ben wani taki a sma di yu lobi sa warderi en. ¡A ben waran yu ati srefisrefi! — fu si a prisiri na tapu a fesi fu a sma di yu lobi. Te a du nanga bun reide, dan a gi di wan sma e gi sani, na wan fasi fu sori lobi, èn fu sori lobi na wan sani di kan gi wi koloku.
2, 3. (a) Fu san ede wi kan taki dati no wan sma koloku moro Yehovah, èn fa a gi di a gi „presenti ini libisma” e meki en ati prisiri? (b) San wi no ben sa wani du nanga wan presenti di wi kisi fu Gado?
2 Fu dati ede, suma kan de moro koloku leki Yehovah, a Sma di e gi „ibri bun presenti”? (Yakobus 1:17; 1 Timoteus 1:11) Ibri presenti di a e gi a e du fu lobi ede (1 Yohanes 4:8). Dati de seiker so nanga a presenti di Gado gi a gemeente nanga yepi fu Krestes — den „presenti ini libisma” (Efeisesma 4:8). A gi di Gado gi den owruman fu sorgu gi na ipi, na wan fasi fa Gado e sori en dipi lobi gi en pipel. Den man disi ben teki nanga koni — den musu doro den markitiki fu Bijbel (1 Timoteus 3:1-7; Titus 1:5-9). Den sabi taki den musu „handri na ipi na wan safufasi”, bika na a fasi dati den skapu sa abi reide fu de nanga tangi taki den abi den sortu herder disi di e sori lobi (Tori fu den Apostel 20:29; Psalm 100:3). ¡Te Yehovah e si taki na ati fu den skapu fu en furu nanga sowan tangi, dan seiker en eigi ati musu prisiri!—Odo 27:11.
3 Seiker wi no ben sa wani fu lagi a waarde fu wan presenti di wi kisi fu Gado; èn wi no ben sa wani de sondro tangi tu gi den presenti fu en. So bun, tu aksi e opo: Fa den owruman musu si a rol di den abi na ini a gemeente? Èn fa na ipi kan sori taki den e warderi den „presenti ini libisma”?
’Wi Na Kompe-wrokoman fu Unu’
4, 5. (a) Nanga san Paulus e gersi a gemeente, èn fu san ede na agersitori disi e fiti? (b) San na agersitori fu Paulus e sori fu a fasi fa wi musu prakseri fu makandra èn handri nanga makandra?
4 Yehovah gi den „presenti ini libisma” pikinso makti na ini a gemeente. A no de fu taki dati den owruman no wani gebroiki a makti fu den na wan fowtu fasi, ma den sabi taki a makriki srefisrefi gi onvolmaakti libisma fu du dati. ¿Fu dati ede, fa den musu prakseri fu densrefi na ini a fasi fa den de nanga na ipi? Prakseri na agersitori di na apostel Paulus ben gebroiki. Baka di a ben taki fu san ede Gado gi den „presenti ini libisma”, dan Paulus ben skrifi: „Meki wi gro nanga lobi ini ala sani, na ini en di de na edeman, Krestes. Komoto na en dan a heri skin, e meki a skin gro so taki a e bow ensrefi na ini lobi, fu di a de na ini wánfasi èn a meki na so wan fasi taki a e wroko makandra nanga yepi fu ibri skrufu fu a skin di e gi san de fanowdu, akruderi a fasi fa ibri memre man wroko na a yoisti fasi” (Efeisesma 4:15, 16). So bun, Paulus e agersi a gemeente, so srefi den owruman nanga den tra memre fu a gemeente, nanga wan libisma skin. Fu san ede na agersitori disi e fiti?
5 Wan libisma skin meki fu difrenti memre, ma a abi wán ede nomo. Ma noti na ini a skin — no wan spier, no wan senwetetei, no wan brudutetei — na wan sani di no abi waarde. Ibri memre abi waarde èn de wan yepi gi a gosontu nanga a moifasi fu a heri skin. Na a srefi fasi, a gemeente meki fu furu difrenti memre, ma ibri memre — awansi yonguwan noso owruwan, trangawan noso swakiwan — kan de wan yepi gi a heri gosontu nanga a moifasi fu a gemeente na yeye fasi (1 Korentesma 12:14-26). No wan sma musu firi taki a no prenspari srefisrefi fu de warti. Na a tra sei, no wan sma musu firi taki a hei moro trawan, bika wi alamala — herder nanga skapu tu — de wan pisi fu a skin, èn wán ede de nomo, Krestes. So bun, Paulus e sori a waran lobi, broko-ede, nanga lespeki di wi musu abi gi makandra. Te den owruman e frustan disi, dan a e yepi den fu si a rol fu den na ini a gemeente nanga sakafasi èn na wan balansi fasi.
6. Fa Paulus ben sori sakafasi ala di a ben abi makti leki apostel?
6 Den „presenti [disi] ini libisma” no e suku fu basi a libi noso a bribi fu den kompe-anbegiman fu den. Ala di Paulus ben abi makti leki wan apostel, toku a ben taigi den Korentesma na wan sakafasi: „No taki wi na basi fu un bribi, ma wi na kompe-wrokoman fu un prisiri ede, bika na fu un bribi ede meki unu e tanapu” (2 Korentesma 1:24). Paulus no ben wani fu basi a bribi èn a libi fu den brada fu en. Fu tru, a no de fanowdu gi en fu du dati, bika a ben taki dati a ben frutrow taki den ben de getrow man nanga uma kaba di ben de na ini Yehovah organisâsi, bika den ben wani du san yoisti. Fu dati ede, di Paulus ben taki fu ensrefi nanga fu en kompe di ben reis nanga en, Timoteus, dan a ben taki trutru: ’A de a plekti fu wi fu wroko nanga unu fu dini Gado nanga prisiri’ (2 Korentesma 1:1). ¡Dati e sori sakafasi srefisrefi!
7. San den owruman di abi sakafasi e frustan fu a rol di den abi na ini a gemeente, èn sortu frutrow den abi na ini den kompe-wrokoman fu den?
7 Den „presenti ini libisma” na ini a ten disi abi a srefi wroko. Den na ’kompe-wrokoman gi a prisiri fu wi’. Den owruman di abi sakafasi e frustan taki a no e didon na den fu bosroiti o furu tra sma kan du na ini a diniwroko fu Gado. Den sabi taki ala di den kan gi tra sma deki-ati fu du moro na ini a diniwroko noso fu du en moro bun, toku a dini di sma e dini Gado musu kon fu wan ati di wani. (Teki gersi 2 Korentesma 9:7.) Den abi a frutrow taki te den kompe-wrokoman abi prisiri, dan den sa du ala san den man. So bun, a de a tranga angri fu den fu yepi den brada fu „dini Yehovah nanga prisiri”.—Psalm 100:2.
Yepi Ala Sma fu Dini Nanga Prisiri
8. San na wan tu fasi fa owruman kan yepi den brada fu den fu dini Yehovah nanga prisiri?
8 ¿Owruman, fa unu kan yepi den brada fu unu fu dini nanga prisiri? Yu kan gi den deki-ati nanga yu eksempre (1 Petrus 5:3). Meki a faya fu yu èn a prisiri fu yu na ini a diniwroko sori, èn tra sma kan kisi a deki-ati fu waka na baka na eksempre fu yu. Prèise trawan gi den muiti di den e du nanga den heri ati (Efeisesma 4:29). Waran èn opregti prèise e yepi trawan fu firi taki den warti èn taki den de fanowdu. A e gi den skapu deki-ati fu wani fu du san den man fu dini Gado. No agersi den nanga tra sma fu sori taki den fowtu (Galasiasma 6:4). Te yu agersi den na so wan fasi nanga tra sma, dan dati sa meki den e lasi-ati na presi taki yu e gi den tranga fu du en moro bun. Boiti dati, ibriwan fu den skapu fu Yehovah de tra fasi — di abi difrenti situwâsi nanga difrenti bekwaamfasi. Leki Paulus, sori taki yu e frutrow yu brada. Lobi „e bribi ala sani”, èn fu dati ede a bun te wi e bribi taki den brada fu wi lobi Gado èn taki den wani plisi en (1 Korentesma 13:7). Te yu ’e gi trawan grani’, dan yu e yepi den fu du ala san den man (Romesma 12:10). De seiker taki te den skapu e kisi deki-ati, noso e kisi kowru-ati, dan moro furu fu den sa du ala san den man fu dini Gado, èn den sa feni prisiri na ini a diniwroko dati.—Mateus 11:28-30.
9. Sortu prakseri di ibri owruman musu abi fu en kompe-owruman sa yepi en fu dini nanga prisiri?
9 Te yu e si yusrefi nanga sakafasi leki wan „kompe-wrokoman”, dan dati sa yepi yu fu dini nanga prisiri èn fu warderi den aparti presenti fu yu kompe-owruman. Ibri owruman abi en eigi talenti nanga bekwaamfasi di a kan gebroiki gi a bun fu a gemeente (1 Petrus 4:10). Wan owruman kan abi a presenti fu gi leri. Wan trawan kan de wan bun orgaman. Èn a kan taki a moro makriki srefisrefi fu go taki nanga wan trawan bika a abi waran èn sari-ati. A penti na taki no wan owruman abi wan presenti na a srefi fasi leki wan trawan. ¿A de so taki a wan owruman hei moro a trawan, bika, fu eksempre, a abi a presenti fu gi leri? ¡Kwetikweti! (1 Korentesma 4:7) Na a tra sei, a no de fanowdu fu abi bigi-ai na tapu a presenti di wan tra owruman abi noso fu firi taki yu no de bekwaam nofo te a bekwaamfasi fu wan tra owruman e meki taki a e kisi prèise fu tra sma. Prakseri, yusrefi abi presenti di Yehovah e si na ini yu. Èn a kan yepi yu fu kweki den presenti dati èn fu gebroiki den gi a bun fu den brada fu yu.—Filipisma 4:13.
’Gi Yesi èn Saka Yusrefi na Den Ondro’
10. Fu san ede a e fiti taki wi e sori warderi gi den „presenti ini libisma”?
10 Te wi kisi wan kado, dan a e fiti trutru fu taki tangi. „Sori taki unu de nanga tangi”, na so Kolosesma 3:15 e taki. Fa a de dan nanga den „presenti ini libisma”, a warti kado di Yehovah gi wi? A no de fu taki dati wi musu taki spesrutu Yehovah tangi, a Sma di lobi fu Gi Kado. Ma fa a de nanga den „presenti ini libisma” srefi? Fa wi kan sori taki wi e warderi den?
11. (a) Fa wi kan sori wi warderi gi den „presenti ini libisma”? (b) San den wortu „gi yesi” èn ’saka na ondro’ wani taki?
11 Wi kan sori a warderi fu wi gi den „presenti ini libisma” te wi e handri esi fu gi yesi na a rai nanga bosroiti fu den di abi gron tapu Bijbel. Bijbel e gi wi a rai: „Gi yesi na den wan di e teki fesi na un mindri èn saka unsrefi na den ondro, fu di den e luku den sili fu unu leki sma di sa gi frantiwortu, so taki den kan du disi nanga prisiri èn no nanga soktu, bika disi ben sa du unu ogri” (Hebrewsma 13:17). Luku taki wi no musu „gi yesi” wawan, ma wi musu ’saka wisrefi na ondro’ den wan di e teki fesi. A Griki wortu di vertaal nanga ’saka na ondro’ wani taki trutru fu „boigi na ondro”. A Bijbel sabiman R. C. H. Lenski e taki leki komentaar na tapu den wortu dati „gi yesi” èn „saka na ondro”: „Wan sma e gi yesi na wan tra sma te a sma dati e agri nanga a sani di a trawan e taigi en fu du, èn a e kon abi na overtoigi taki a yoisti èn bun gi en; wan sma e boigi . . . te a sma abi wan tra denki.” Te wi e frustan èn e agri nanga a tiri fu den wan di e teki fesi, dan a kan makriki fu gi yesi wantewante. Ma fa a de te wi no e frustan fu san ede den teki wan spesrutu bosroiti?
12. Fu san ede wi musu saka wisrefi na ondro den owruman, noso boigi wisrefi, srefi te wi no e frustan krinkrin fu san ede den teki wan bosroiti?
12 Na ini den situwâsi disi wi musu saka wisrefi na den ondro, noso boigi. Fu san ede? Wan reide na taki wi musu frutrow taki den bekwaam man disi na yeye fasi, abi a bun fu wi na prakseri trutru. Te yu luku en bun, dan den sabi heri bun taki den musu gi Yehovah frantiwortu, gi den skapu di A poti na ondro den frantiwortu (Yakobus 3:1). Boiti dati, a bun te wi e prakseri taki kande wi no sabi ala den finifini tori di ben meki den teki wan bosroiti di abi gron tapu den bodoi di den abi.—Odo 18:13.
13. San kan yepi wi fu saka wisrefi na ondro den owruman te a abi fu du nanga den krutu bosroiti di den owruman teki?
13 Fa a de te wi musu saka wisrefi na ondro den bosroiti di wan krutukomte teki? A tru taki kande a no makriki, spesrutu te wan bosroiti teki fu sluit wan sma uit di wi lobi — wan famiri noso wan krosibei mati. Na ini a situwâsi disi tu, a moro bun fu boigi gi a krutu fu den „presenti ini libisma”. Den de na ini a situwâsi fu krutu sani moro bun leki wi, èn kande den sabi moro fu a tori leki wi. Nofotron den brada disi e broko den ede fu teki den bosroiti disi; a de wan seryusu frantiwortu fu ’krutu gi Yehovah’ (2 Kroniki 19:6). Den e du ibri muiti fu abi sari-ati, bika den e hori na prakseri taki Gado de „klariklari fu gi pardon” (Psalm 86:5). Ma den musu hori a gemeente krin tu, èn Bijbel e taki dati den musu sluit wan sma uit di e du ogri sondro fu abi berow (1 Korentesma 5:11-13). Na ini furu fu den kefal, a sma di du na ogri srefi e erken a bosroiti dati. Kande a trangaleri na a yoisti sani di a sma abi fanowdu fu kisi ensrefi baka. Efu wi, den lobiwan fu en, e saka wisrefi na ondro a bosroiti, dan wi kan yepi a sma dati fu feni wini fu a trangaleri dati.—Hebrewsma 12:11.
„Sori Den Moro Furu Lespeki . . . na wan Tumusi Aparti Fasi”
14, 15. (a) ¿Soleki fa 1 Tesalonikasma 5:12, 13 e sori, fu san ede den owruman e frudini a lespeki fu wi? (b) Fu san ede wi kan taki dati den owruman e ’wroko tranga na wi mindri’?
14 Wi kan sori wi warderi tu gi den „presenti ini libisma” te wi e sori lespeki gi den. Di Paulus ben skrifi go na a gemeente na ini Tesalonika, dan a ben frumane den memre fu a gemeente: „Abi lespeki gi den wan di e wroko tranga na unu mindri èn di e teki fesi gi unu na ini Masra èn di e frumane unu; èn . . . sori den moro furu lespeki na ini lobi na wan tumusi aparti fasi, fu a wroko di den e du” (1 Tesalonikasma 5:12, 13). ¿„Wroko tranga” — dati no e taki fu den owruman di e gi densrefi sondro fu prakseri densrefi gi a bun fu wi? Prakseri pikinso a hebi lai di den lobi brada disi e tyari.
15 Na ini furu kefal den na man di abi osofamiri èn di musu du grontapu wroko fu sorgu gi den osofamiri fu den (1 Timoteus 5:8). Efu na owruman abi pikin, dan den yonguwan disi abi ten nanga belangstelling fu den papa fanowdu. Kande a papa musu yepi den nanga den skorowroko, èn kande a musu meki ten gi den fu meki den gebroiki den yongu krakti na ini bun ontspanning (Preikiman 3:1, 4). Ma moro prenspari, a e sorgu gi den sani di en osofamiri abi fanowdu na yeye fasi, e hori wan doronomo osofamiri bijbelstudie nanga den, e wroko nanga den na ini a velddienst, èn e tyari den go na den Kresten konmakandra (Deuteronomium 6:4-7; Efeisesma 6:4). No meki wi frigiti taki, boiti den frantiwortu disi di furu fu wi abi tu, den owruman abi tra wroko tu: den musu sreka den toewijzing fu den konmakandra, du herder fisiti, sorgu gi a gosontu na yeye fasi fu a gemeente èn, te a de fanowdu, dan den musu du krutu afersi. Son wan abi moro frantiwortu di abi fu du nanga kring konmakandra, distrikt kongres, a bow fu Kownukondre zaal, èn Ati-oso Kontakti Komte. ¡Fu tru, den brada disi e „wroko tranga”!
16. Kari den fasi fa wi kan sori lespeki gi den owruman.
16 Fa wi kan sori lespeki gi den? Wan Bijbel odo e taki: „wan wortu di taki na a yoisti ten — ¡o bun a de!” (Odo 15:23; 25:11) So bun, wortu fu opregti warderi èn di e gi deki-ati, kan sori den taki wi no e si a tranga wroko fu den leki wan soso sani. So srefi, wi musu de reidelek na ini den sani di wi e fruwakti fu den. Na a tra sei, wi musu de fri fu go na den fu aksi yepi. A kan son tron taki ’wi ati de na ini seryusu pen’ èn taki wi abi deki-ati fu Bijbel fanowdu, tiri, noso rai fu den wan di „abi a koni fu gi leri” fu a Wortu fu Gado (Psalm 55:4; 1 Timoteus 3:2). Na a srefi ten, wi musu hori na prakseri taki wan owruman kan gi wi so furu ten nomo leki san a abi, bika a no kan frigiti den sani di en eigi osofamiri noso trawan na ini a gemeente abi fanowdu. Te wi e „firi” gi den brada disi di e wroko tranga, dan wi no ben sa wani fu aksi tumusi furu sani fu den (1 Petrus 3:8). Na presi fu dati, meki wi warderi a ten nanga a belangstelling di den kan gi wi na wan reidelek fasi.—Filipisma 4:5.
17, 18. Sortu òfer furu wefi di masra na owruman, e tyari èn fa wi kan sori taki wi no e si den sani di den getrow sisa disi e du leki soso sani?
17 Fa a de nanga den wefi fu den owruman? ¿Wi no musu sori den lespeki tu? Boiti dati, den e prati den masra fu den nanga a gemeente. Nofotron disi wani taki dati den musu tyari òfer. Wanwan leisi, den owruman musu gebroiki den neti yuru fu sorgu gi gemeente afersi, ala di den ben kan gebroiki a ten dati nanga den osofamiri. Na ini furu gemeente den getrow Kresten uma de klariklari fu tyari den sortu òfer disi so taki den masra fu den kan sorgu gi den skapu fu Yehovah.—Teki gersi 2 Korentesma 12:15.
18 Fa wi kan sori taki wi no e si den sani di den getrow Kresten sisa disi e du, leki soso sani? Trutru, wi e du dati te wi no e aksi tumusi furu fu den masra fu den. Ma no meki wi frigiti tu a krakti fu sempel wortu di e sori warderi. Odo 16:24 e taki: „Switi wortu de wan oni-oso, switi gi a sili èn dresi gi den bonyo.” Luku wan eksempre. Baka wan Kresten konmakandra, wan trowpaar ben go na wan owruman èn ben aksi fu taki nanga en fu a tini manpikin fu den. Ala di na owruman ben e taki nanga a trowpaar, en wefi ben e wakti nanga pasensi. Baka ten, a mama ben go na a wefi fu na owruman èn ben taki: „Mi wani taigi yu tangi gi a ten di yu masra teki fu yepi mi osofamiri.” Den eenvoudig moi wortu dati ben naki na ati fu a wefi fu na owruman srefisrefi.
19. (a) San den owruman leki wan grupu e du na wan getrowfasi? (b) Sortu fasti bosroiti wi alamala musu abi?
19 A gi di Yehovah gi den owruman fu sorgu gi den skapu fu en, na wan fu den ’bun presenti’ fu Yehovah (Yakobus 1:17). Nôno, den man disi no de volmaakti; leki wi alamala, den e meki fowtu (1 Kownu 8:46). Ma leki wan grupu, den owruman na ini den gemeente na heri grontapu e du na wan getrow fasi san Yehovah ben wani den fu du — namku, fu meki na ipi kon bun baka, fu bow den, fu tyari wánfasi kon, èn fu kibri na ipi. Meki ibri owruman abi a bosroiti fu tan sorgu gi den skapu fu Yehovah na wan safu fasi, èn sori na so fasi taki densrefi na wan presenti, noso wan blesi gi den brada fu den. Èn meki wi alamala abi a fasti bosroiti fu sori wi warderi gi den „presenti ini libisma” te wi e gi yesi na den èn e saka wisrefi na den ondro èn te wi e sori warderi gi a tranga wroko fu den. ¡Wi kan taki tangi srefisrefi taki na wan lobi-ati fasi Yehovah ben gi den man di, fu taki en leti, e taigi den skapu fu en: ’A de a wroko fu wi fu yepi unu fu dini Gado nanga prisiri’!
Fa Yu ben sa Piki?
◻ Fu san ede a e fiti fu agersi a gemeente nanga wan libisma skin?
◻ Fa den owruman kan yepi den brada fu den fu dini Yehovah nanga prisiri?
◻ Fu san ede wi no musu gi yesi wawan, ma wi musu saka wisrefi tu na ondro den wan di e teki fesi?
◻ Na sortu fasi wi kan sori lespeki gi den owruman?
[Prenki na tapu bladzijde 16]
Owruman, prèise tra sma gi den muiti di den e du nanga den heri ati
[Prenki na tapu bladzijde 17]
Nanga a fayafaya eksempre fu den owruman na ini a diniwroko, den kan yepi den memre fu na osofamiri nanga tra sma fu dini nanga prisiri
[Prenki na tapu bladzijde 18]
¡Wi e warderi den owruman fu wi di e wroko tranga!