„Presenti ini Libisma” fu Sorgu gi den Skapu fu Yehovah

„Di a ben opo go na loktu, dan a ben tyari strafuman gowe; a ben gi presenti ini libisma.”—EFEISESMA 4:8.

1. San wan Kresten sisa ben taki fu den owruman na ini en gemeente?

„GRANTANGI taki unu e broko un ede so furu gi wi. Den lafu fu unu, a waran di unu e gi, èn a belangstelling fu unu de so opregti. Unu de drape ala ten fu arki wi èn fu fruteri wortu fu Bijbel di e gi wi deki-ati. Mi e begi taki noiti mi sa si unu leki sma di no de so prenspari.” Na so wan Kresten sisa ben skrifi den owruman na ini en gemeente. A de krin taki a lobi di den Kresten herder di ben e broko den ede ben sori en ben naki en ati.—1 Petrus 5:2, 3.

2, 3. (a) ¿Soleki fa Jesaja 32:1, 2 e sori, fa den owruman di abi sari-ati e sorgu gi den skapu fu Yehovah? (b) O ten wi kan si wan owruman leki wan presenti?

² Na Yehovah sorgu taki den owruman de fu luku den skapu fu en (Lukas 12:32; Johanes 10:16). Yehovah lobi den skapu fu en srefisrefi — fu taki en leti, a lobi den so furu taki a ben bai den nanga a warti brudu fu Yesus. A no de fu fruwondru fu dati ede taki Yehovah e prisiri te den owruman e handri nanga na ipi fu en na wan safu fasi (Tori fu den Apostel 20:28, 29). Luku a profeiti fasi fa A ben taki fu den owruman disi, noso „granman”: „Ibriwan musu buweisi fu de leki wan kibripresi gi a winti èn wan kibripresi gi a sibibusi, leki watra di e lon ini wan kondre sondro watra, leki a kowrupe fu wan bigi stonbergi di tanapu leti-opo ini wan kondre di drei” (Yesaya 32:1, 2). Ija, den owruman de fu kibri den skapu fu En, fu gi den kowru-ati, èn fu trowstu den. So bun, den owruman di na wan safri-ati fasi e wei na ipi, e pruberi fu du san Gado e fruwakti fu den.

³ Bijbel e kari den sortu owruman disi, „presenti ini libisma” (Efeisesma 4:8). Te yu e prakseri fu wan presenti, dan yu e prakseri fu wan sani di wan sma e gi wan tra sma di abi dati fanowdu noso wan sani di e gi a sma di kisi en, koloku. Wan owruman kan de leki wan presenti te a e gebroiki den bekwaamfasi fu en fu gi yepi di de fanowdu èn fu yepi na ipi fu de koloku. Fa a kan du disi? A piki, di de fu feni na Paulus wortu na ini Efeisesma 4:7-16, e prèise a broko di Yehovah e broko en ede na wan lobi-ati fasi nanga den skapu fu en.

„Presenti ini Libisma” — ¿Fu Pe?

4. Na sortu fasi Yehovah ben ’opo go na loktu’, èn suma na den „presenti di de leki man”, leki wan kontru fu Psalm 68:18?

⁴ Di Paulus ben gebroiki den wortu „presenti ini libisma”, dan a ben taki den wortu fu Kownu David baka di ben taki fu Yehovah: „Yu opo go na loktu; yu tyari strafuman gowe; yu teki libisma leki presenti” (Psalm 68:18). Baka di den Israèlsma ben de wan tu yari kaba na ini a Pramisi Kondre, dan na wan agersi fasi Yehovah „ben opo” a Bergi Sion èn a ben meki Yerusalem tron na edefoto fu a kownukondre fu Israèl di ben abi David leki en kownu. Ma suma ben de den „libisma leki presenti”? Den ben de den man di den ben teki leki strafuman di den ben wini a kondre. Baka ten, den ben gebroiki wan tu fu den strafuman disi fu yepi den Leifisma nanga a wroko na a tabernakel.—Esra 8:20.

5. (a) Fa Paulus e sori taki Psalm 68:18 abi wan kontru na ini a Kresten gemeente? (b) Na sortu fasi Yesus ben ’opo go na loktu’?

⁵ Na ini en brifi gi den Efeisesma, Paulus e sori taki den wortu fu a psalm singiman abi wan moro bigi kontru na ini a Kresten gemeente. Nanga tra wortu, Paulus skrifi baka san skrifi na ini Psalm 68:18: „Ibriwan fu wi ben kisi no-frudini bun-ati akruderi a fasi fa Krestes ben prati a fri presenti. Fu dati ede a e taki: ’Di a ben opo go na loktu, dan a ben tyari strafuman gowe; a ben gi presenti ini libisma’” (Efeisesma 4:7, 8). Dyaso Paulus e taki dati a psalm disi abi fu du nanga Yesus, leki a sma di e teki presi gi Gado. Yesus „wini grontapu” nanga a getrow fasi fa a ben tyari ensrefi (Johanes 16:33). A ben wini dede èn Satan so srefi, di Gado ben gi en wan opobaka na dede (Tori fu den Apostel 2:24; Hebrewsma 2:14). Na ini 33 G.T. Yesus, di ben opo baka, ben opo go „hei moro ala den hemel” — moro hei leki ala den tra kriaturu na hemel (Efeisesma 4:9, 10; Filipisma 2:9-11). Leki wan winiman, Yesus ben teki „strafuman” fu a feanti. Fa so?

6. ¿Bigin na a Pinksterfesa fu 33 G.T., fa Yesus di ben opo go na hemel ben bigin leigi na oso fu Satan, èn san a ben du nanga den „strafuman”?

⁶ Di Yesus ben de na grontapu, dan a ben sori taki a tranga moro Satan di a ben fri den wan di ben de na ini katibo na den ogri yeye. A ben de leki Yesus ben broko go na ini na oso fu Satan, ben tai en, èn ben teki den gudu fu en (Mateus 12:22-29). Prakseri fu dati pikinso, baka di Yesus ben kisi wan opobaka èn ben kisi „ala makti na ini hemel èn na grontapu” ¡a ben kan teki furu sani! (Mateus 28:18) Bigin na a Pinksterfesa fu 33 G.T., dan Yesus di ben opo baka, leki a sma di ben teki presi gi Gado, ben bigin leigi na oso fu Satan di ’a ben e tyari strafuman gowe’ — man di ben de langa ten na ini katibo na sondu nanga dede èn di ben de na ondro a makti fu Satan. Den „strafuman” disi ben de klariklari fu tron „srafu fu Krestes, fu du a wani fu Gado nanga den heri sili” (Efeisesma 6:6). Fu taki en leti, Yesus ben fri den fu a makti fu Satan èn, fu Yehovah ede, a ben gi den na a gemeente leki „presenti ini libisma”. ¡Prakseri fa Satan ben musu atibron srefisrefi sondro fu man du wan sani, di Yesus ben teki den puru leti na ondro en noso!

7. (a) Sortu wroko den „presenti ini libisma” e du na ini den gemeente? (b) Sortu okasi Yehovah gi iniwan man di e dini leki wan owruman?

⁷ ¿Wi e feni den sortu „presenti [disi] ini libisma” na ini a gemeente na ini a ten disi? ¡Ija, fu tru! Wi e si den e dini leki owruman, di e wroko tranga leki ’evangelie preikiman, herder, nanga leriman na ini den moro leki 87.000 gemeente fu Gado pipel na heri grontapu (Efeisesma 4:11). Satan ben sa wani srefisrefi taki den owruman no e handri bun nanga na ipi. Ma a no fu dati ede meki Gado, nanga yepi fu Krestes gi den na a gemeente. Na presi fu dati, Yehovah gi den man disi gi a bun fu a gemeente, èn den musu gi frantiwortu na en gi den skapu di a ben poti na ondro den frantiwortu (Hebrewsma 13:17). Efu yu e dini leki wan owruman, dan Yehovah gi yu wan kefalek moi okasi fu buweisi taki yu de wan presenti, noso wan blesi, gi den brada fu yu. Yu kan du dati te yu e du fo prenspari frantiwortu.

Te A De Fanowdu fu „Meki [Sma] Kon Bun Baka”

8. Na sortu afersi wi alamala musu meki kon bun baka sontron?

⁸ Na a fosi presi, Paulus e taki dati den „presenti ini libisma” gi „fu meki den santawan kon bun baka” (Efeisesma 4:12). A Griki zelfstandig naamwortu di vertaal leki „meki kon bun baka” e taki fu wan sani di e poti baka „na en yoisti presi”. Leki onvolmaakti libisma, wi alamala musu meki kon bun baka wanwan leisi — fu meki a denki fu wi, wi maniri, noso a fasi fa wi e tyari wisrefi, kon baka „na en yoisti presi” akruderi a denki èn a wani fu Gado. Nanga lobi Yehovah gi „presenti ini libisma” fu yepi wi tyari kenki kon pe a de fanowdu. Fa den e du disi?

9. Fa wan owruman kan yepi fu meki wan skapu kon bun baka te a skapu meki wan fowtu?

⁹ Sontron, wan owruman kan kisi a toewijzing fu yepi wan skapu di meki wan fowtu, wan skapu di kande „meki wan fowtu stap bifo a sabi dati”. Fa wan owruman kan yepi? Galasiasma 6:1 e taki: „Pruberi ini wan yeye fu safri-atifasi fu meki so wan sma kon bun baka.” So bun, te wan owruman e gi rai, dan a no sa kosi a sma di meki wan fowtu, noso gebroiki grofu wortu. A rai musu gi deki-ati, a no musu meki wan sma „frede”. (2 Korentesma 10:9; teki gersi Yob 33:7.) Kande a sma e firi syen kaba, èn fu dati ede wan lobi-ati herder no sa wani fu broko a yeye fu a sma dati. Te a de krin taki a rai èn srefi a seryusu frumane e gi na ini lobi èn nanga lobi, dan a sa poti a denki noso a fasi fa a sma di meki a fowtu e tyari ensrefi, na en yoisti presi baka, èn na so fasi a e meki kon bun baka.—2 Timoteus 4:2.

10. San a wani taki fu tyari tra sma kon bun baka?

¹⁰ Di Yehovah ben gi „presenti ini libisma” fu meki wi kon bun baka, dan A ben wani taki den owruman musu gi kowru-ati na yeye fasi èn en pipel ben musu man waka na baka na eksempre fu den (1 Korentesma 16:17, 18; Filipisma 3:17). Fu tyari trawan kon bun baka, no wani taki soso fu yepi den wan di teki wan fowtu pasi, ma so srefi fu yepi den getrow wan fu tan na tapu a yoisti pasi.a Na ini a ten disi nanga so furu problema di e meki sma e lasi ati, furu sma abi deki-ati fanowdu fu hori doro. Son wan kan abi yepi na wan switi fasi fanowdu fu meki den denki kon kruderi nanga di fu Gado. Fu eksempre, wan tu getrow Kresten e feti nanga dipi firi taki den no de bekwaam noso taki den no warti noti. Den sortu „sili di broko-saka” kan firi taki Yehovah noiti no kan lobi den èn taki srefi ala muiti di den e du fu dini Gado noiti kan bun gi en (1 Tesalonikasma 5:14). Ma a denki disi no de akruderi a fasi fa Gado e firi trutru gi den anbegiman fu en.

11. San den owruman kan du fu yepi den wan di e feti nanga den firi di den abi taki den no warti noti?

¹¹ Owruman, san unu kan du fu yepi den sortu sma disi? Gi en Bijbel buweisi na wan switi fasi, taki Yehovah e broko en ede gi ibriwan fu den futuboi fu en èn gi den a dyaranti taki den Bijbel tekst disi abi fu du nanga den persoonlijk (Lukas 12:6, 7, 24). Yepi den fu si taki Yehovah „hari” den fu dini en, èn fu dati ede a musu de so taki a e si taki den de warti (Yohanes 6:44). Gi den a dyaranti taki den no de den wawan — furu getrow futuboi fu Yehovah ben abi densrefi sortu firi dati. Wan leisi a profeiti Elia ben broko-saka so kefalek, taki a ben wani dede (1 Kownu 19:1-4). Wan tu salfu Kresten na ini a fosi yarihondro ben firi taki den eigi ati ben „krutu” den (1 Yohanes 3:20). A e gi trowstu fu sabi taki den getrow wan na ini Bijbel ten ben abi „den srefi firi leki di fu wi” (Yakobus 5:17). Makandra nanga a sma di brokosaka yu kan luku so srefi wan tu artikel di e gi deki-ati, na ini A Waktitoren nanga Ontwaakt! Den muiti di yu e du nanga lobi, fu tranga a frutrow fu den sortu sma disi, no sa de wan sani di Gado di gi yu leki „presenti ini libisma”, no sa si.—Hebrewsma 6:10.

„Bow” na Ipi

12. San den wortu „fu bow a skin fu a Krestes” wani taki, èn san na a sroto fu bow na ipi?

¹² A di fu tu, den „presenti ini libisma” gi fu „bow a skin fu a Krestes” (Efeisesma 4:12). Dyaso Paulus e taki sani na wan agersifasi „Bow” e meki wi prakseri wan bow-wroko, èn „a skin fu a Krestes” abi fu du nanga sma — den memre fu a salfu Kresten gemeente (1 Korentesma 12:27; Efeisesma 5:23, 29, 30). Den owruman musu yepi den brada fu den fu kon tranga na yeye fasi. A marki fu den na ’fu bow èn no fu broko’ na ipi (2 Korentesma 10:8). A sroto fu bow na ipi, na lobi, bika „lobi e bow sma”.—1 Korentesma 8:1.

13. San a wani taki fu firi nanga sma, èn fu san ede a de prenspari taki owruman e firi nanga sma?

¹³ Wan penti di abi fu du nanga lobi èn di e yepi owruman fu bow na ipi, na a poti di den musu poti densrefi na ini a presi fu tra sma. Disi wani taki fu firi gi tra sma — kon sabi den prakseri nanga den firi fu den, ala di den e hori den sani di den no man du na prakseri (1 Petrus 3:8). Fu san ede a de prenspari taki owruman musu firi nanga sma? Na a fosi presi, bika Yehovah — a sma di gi den „presenti ini libisma” — na wan Gado di e firi nanga sma. Te den futuboi fu en e pina noso de na ini pen, dan A e firi nanga den (Exodus 3:7; Yesaya 63:9). A sabi o furu den man tyari (Psalm 103:14). Ma fa den owruman kan sori taki den e firi nanga sma?

14. Na sortu fasi den owruman kan sori taki den e firi nanga sma?

¹⁴ Te wan sma di lasi-ati e kon na den, dan den e arki èn na so wan fasi e sori taki den e frustan den sani di a sma dati e firi. Den e pruberi fu frustan a fasi fa den brada ben kweki, a persoonlijkheid, nanga a situwâsi fu den brada fu den. Dan te den owruman e gi Bijbel rai di e gi sma deki-ati, dan den skapu sa feni en moro makriki fu teki a rai bika a e kon fu den herder di e frustan den trutru èn di e broko den ede nanga den (Odo 16:23). A firi di den e firi nanga sma, e buweigi den owruman tu fu prakseri o furu tra sma man du èn den firi di den sma kan kisi fu dati. Fu eksempre, wan tu opregti Kresten kan firi taki den fowtu bika den no man du moro na ini a diniwroko fu Gado, kande fu di den owru noso den no abi wan bun gosontu. Na a tra sei, wan tu kan abi deki-ati fanowdu fu go na fesi na ini a diniwroko fu den (Hebrewsma 5:12; 6:1). A firi di den owruman e firi nanga sma sa yepi den fu feni „switi wortu” di e gi trawan deki-ati (Preikiman 12:10). ¡Te den skapu fu Yehovah e kisi deki-ati èn e kisi bun reide fu du sani, dan a lobi fu den gi Gado sa buweigi den fu du ala san den man fu dini en!

Libisma Di E Meki Wánfasi De

15. San den wortu „wánfasi na ini bribi” wani taki?

¹⁵ A di fu dri, den „presenti ini libisma” ben gi so taki „wi alamala doro a wánfasi na ini bribi èn doro a soifri sabi fu a Manpikin fu Gado” (Efeisesma 4:13). Den wortu „wánfasi na ini bribi” abi fu du nanga wánfasi, no wawan na ini bribi, ma so srefi na mindri den bribiman. Fu dati ede disi na wan tra reide fu san ede Gado gi wi „presenti ini libisma” — fu yepi meki wánfasi de na mindri en pipel. Fa den e du disi?

16. Fu san ede a prenspari taki owruman e hori wánfasi na den mindri?

¹⁶ Na a fosi presi, den musu tan abi wánfasi na den mindri. Efu den herder prati, dan a kan taki den sa fruwarlowsu den skapu. Prenspari ten di den ben kan gebroiki fu du herderwoko na a ipi, ben sa kan lasi sondro taki a de fanowdu na ini langa takimakandra èn haritaki di abi fu du nanga pikinpikin sani (1 Timoteus 2:8). A no abi fu de so taki den owruman musu agri fu ibri tori di den e taki fu en, bika den na man di abi eigifasi di kan difrenti srefisrefi fu makandra. Wánfasi no wani taki dati den no mag abi difrenti prakseri, noso taki den no mag taki fu den na wan balansi fasi te den abi wan takimakandra pe ala sma kan taki fa a e denki. Den owruman e hori wánfasi na den mindri te den e arki makandra nanga lespeki sondro fu krutu a trawan na fesi kaba. Èn efu a no de so taki den e pasa wan Bijbel gronprakseri, dan ibriwan musu de klariklari fu boigi èn fu horibaka gi a lasti bosroiti fu a skin fu owruman. Wan yeye di wani boigi e sori taki a „koni fu tapusei” e tiri den, di „lobi vrede, [èn] de reidelek”.—Yakobus 3:17, 18.

17. Fa den owruman kan yepi fu hori wánfasi na ini a gemeente?

¹⁷ Den owruman de na ai tu fu yepi meki wánfasi de na ini a gemeente. Te sani de di kan tyari pratifasi kon — soleki ogri-ati gongosa, a gwenti di sma abi fu prakseri takru fu tra sma, noso a lobi di sma lobi fu strei — èn di de wan kefar gi vrede, dan wantewante den e gi rai fu yepi (Filipisma 2:2, 3). Fu eksempre, owruman kan sabi sma di e krutu trawan tumusi noso di abi a gwenti fu bumui na ini den afersi fu tra sma, èn na so fasi e tron wan sma di e bumui (1 Timoteus 5:13; 1 Petrus 4:15). Den owruman sa pruberi fu yepi den sma disi fu frustan taki a gwenti disi de kontrari san Gado leri wi èn taki ibriwan sma musu „tyari en eigi lai” (Galasiasma 6:5, 7; 1 Tesalonikasma 4:9-12). Ala di den e gebroiki Bijbel, dan den owruman sa fruklari taki Yehovah e libi furu sani na a konsensi fu wan sma, èn no wan fu wi musu krutu tra sma na ini den sortu afersi disi (Mateus 7:1, 2; Yakobus 4:10-12). Fu dini nanga makandra na ini wánfasi, dan frutrow nanga lespeki musu de na ini a gemeente. Te den „presenti ini libisma” e gi Bijbel rai te a de fanowdu, dan den e yepi wi fu hori vrede nanga wánfasi.—Romesma 14:19.

Den E Kibri na Ipi

18, 19. (a) Teige san den „presenti ini libisma” e kibri wi? (b) Teige sortu tra kefar den skapu musu kisi kibri, èn san den owruman e du fu gi den skapu kibri?

¹⁸ A di fu fo, Yehovah gi den „presenti ini libisma” fu kibri wi teige „ibri winti fu leri nanga yepi fu a bedrigifasi fu libisma, nanga a triki fasi di den abi fu meki takru plan” (Efeisesma 4:14). A fosi Griki wortu gi „bedrigifasi” wani taki „fufuru nanga dòbelston” noso „koni fu fufuru nanga dòbelston”. ¿Dati e memre wi o koni den sma di fadon komoto na bribi e wroko? Ala di den e gebroiki triki buweisi, den e kenki Bijbel fu kori den tru Kresten fu komoto na a bribi fu den. ¡Den owruman musu de na ai gi den sortu „wolfu disi di e kwinsi sma”!—Tori fu den Apostel 20:29, 30.

¹⁹ Den skapu fu Yehovah musu kisi kibri teige tra kefar tu. Nanga deki-ati na owruten herder David ben kibri na ipi fu en papa teige den onti meti (1 Samuèl 17:34-36). Na ini a ten disi tu, a kan pasa taki den Kresten herder musu abi deki-ati fu kibri na ipi teige iniwan sma di ben sa kan meshandri noso kwinsi na ipi fu Yehovah, spesrutu den moro swakiwan. Den owruman no sa draidrai fu puru ogri sma na a gemeente, di fu espresi e gebroiki bedrigifasi, noso trikifasi, nanga takru plan fu tyari godelowsufasi kon na ini a gemeente.b—1 Korentesma 5:9-13; teki gersi Psalm 101:7.

20. Fu san ede wi kan firi seikerfasi te den „presenti ini libisma” e sorgu gi wi?

²⁰ ¡Wi de nanga tangi srefisrefi gi den „presenti ini libisma”! Fu di den e sorgu wi nanga lobi, wi kan firi seikerfasi, bika na wan safu fasi den e meki wi kon bun baka, e bow wi nanga lobi, èn den de klariklari fu hori a wánfasi fu wi, èn nanga deki-ati den e gi wi kibri. Ma fa den „presenti ini libisma” musu denki fu a rol di den abi na ini a gemeente? Èn fa wi kan sori taki wi e warderi den? Wi sa taki fu den aksi disi na ini a tra artikel.

[Futuwortu]

Yu E Memre Disi Ete?

◻ Suma na den „presenti ini libisma”, èn fu san ede Gado, nanga yepi fu Krestes, ben gi den na a gemeente?

◻ Fa den owruman e du den frantiwortu fu meki na ipi kon bun baka?

◻ San den owruman kan du fu bow den kompe-bribiman?

◻ Fa owruman kan hori a wánfasi fu a gemeente?

[Prenki na tapu bladzijde 10]

A firi di owruman e firi nanga sma e yepi den fu gi den wan di brokosaka deki-ati

[Prenki na tapu bladzijde 10]

Wánfasi na mindri den owruman e yepi meki wánfasi de na ini a gemeente