Hori Misrefi na a Pramisi fu Mi fu Dini Gado

SOLEKI FA FRANZ GUDLIKIES BEN FRUTERI

Soso fo fu den moro leki wan hondro srudati di ben de na ini a srudatigrupu fu mi ben tan na libi. Di mi ben de fu dede dan mi ben fadon na tapu mi kindi èn ben pramisi Gado taki: „Efu mi pasa na orloku libilibi, dan mi sa dini yu ala ten.”

MI BEN pramisi a sani dati 54 yari pasa, na ini april 1945 di mi ben de wan srudati na ini a Doisri legre. A ben de syatu bifo a kaba fu a di fu Tu Grontapufeti, èn a Sovyet legre ben e feti fayafaya fu go na Berlijn. Den man fu wi ben de krosibei fu a foto Seelow na a Oderliba, mendri leki 65 kilometer fu Berlijn. Drape den ben e sutu fayafaya na wi tapu nanga hebi artillerie dei nanga neti èn den ben kiri furu fu a srudatigrupu fu mi.

A ben de na a okasi dati taki gi a fosi leisi na ini mi libi, mi ben krei èn ben begi Gado. Mi ben memre wan bijbeltekst di mi mama di ben abi frede gi Gado, ben e taki furutron: „Kari mi na tapu a dei fu banawtu. Mi sa frulusu yu, èn yu sa gi mi glori” (Psalm 50:15). Drape na ini den gotro èn di mi ben e frede fu lasi libi mi, mi ben du Gado a pramisi di skrifi na tapusei. Fa mi ben man hori a pramisi? Èn fa a ben du kon taki mi ben tron wan memre fu a Doisri legre?

Di Mi Ben E Gro Kon Bigi na ini Litonia

Na ini 1918, na a pisi ten fu a Fosi Grontapufeti, Litonia ben fruklari taki a abi srefidensi èn ben seti wan democratisch sistema fu tiri. Mi ben gebore na ini 1925 na ini a distrikt Memel (Klaipéda) krosibei fu a Baltische Se. Syatu bifo a yari di mi ben gebore, den ben meki a distrikt kon tron wan pisi fu Litonia.

Mi nanga den feifi sisa fu mi ben abi wan switi pikin-nengreten. Papa ben de leki wan krosibei mati fu wi, èn ala ten a ben e du sani nanga den pikin. A papa nanga mama fu wi ben de memre fu na Evangelie Kerki, ma den no ben e go na kerki bika Mama no ben lobi a hoigrifasi fu a domri. Toku a ben lobi Gado nanga en Wortu, Bijbel, èn a ben e leisi en fayafaya.

Na ini 1939, Doisrikondre ben teki a pisi fu Litonia pe wi ben libi. Baka dati, na ini a bigin fu 1943, den ben seni kari mi fu du srudatiwroko na ini a Doisri legre. Na wan fu den feti mi ben kisi mankeri, ma baka di mi ben kon betre baka, mi ben drai go baka na a front na owstusei. Na a pisi ten disi sani ben e waka tra fasi na ini na orloku, èn den Doisri ben e hari gowe gi a legre fu Sovyet-Unie. A ben de na a pisi ten dati taki pikinmoro mi ben dede, soleki fa mi ben fruteri dati na ini a bigin.

Hori Misrefi na a Pramisi fu Mi

Na ini na orloku, a papa nanga mama fu mi ben froisi go na Oschatz, Doisrikondre, leti na a zuid-owstusei fu Leipzig. Leti na baka na orloku, a ben muilek fu feni den. ¡Ma wi ben prisiri srefisrefi taki te fu kaba wi ben miti makandra baka! No langa na baka, na ini april 1947, mi ben go nanga Mama na wan publiki taki di Max Schubert, wan fu den Kotoigi fu Yehovah, ben hori. Mama ben bribi taki a ben feni a tru relisi, èn baka di mi ben go na wan tu konmakandra, mi ben kon bribi a srefi sani tu.

Syatu baka dati, Mama ben fadon fu wan trapu èn ben kisi mankeri di ben meki taki a ben lasi libi wan tu mun na baka. Di a ben de na ati-oso, fosi a dede fu en, a ben gi mi a fayafaya deki-ati: „Furutron mi begi taki awansi wán fu den pikin fu mi ben kan feni a pasi fu Gado. Now mi e si taki Gado ben arki den begi fu mi, èn mi kan dede na ini vrede.” ¡Mi e luku go na a ten te Mama sa opo baka na dede èn sa kon sabi taki a begi fu en kon tru!—Yohanes 5:28.

Na tapu 8 augustus 1947, fo mun nomo baka di mi ben yere a lezing fu Brada Schubert, mi ben dopu na tapu wan konmakandra na ini Leipzig, leki simbôl fu a gi di mi ben gi misrefi abra na Yehovah Gado. Now fosi mi ben e du sani fu hori misrefi na a sani di mi ben pramisi Gado. Syatu baka dati, mi ben tron wan pionier, soleki fa den ben e kari den furuten dinari fu Yehovah Kotoigi. Na a ten dati pikinmoro 400 pionier ben e libi na ini san ben tron a Doisri Democratisch Republiek, noso Owstu Doisri kondre baka ten.

Den Fosi Tesi na Tapu a Bribi

Wan birtiman na ini Oschatz ben pruberi fu wiki a belangstelling fu mi gi a Marxisme, èn ben pristeri mi fu go na wan universiteit pe Lanti ben e pai den kostu fu a skoro. Disi ben kan soso efu mi ben sa horibaka gi a Socialistische Eenheidspartij fu Doisrikondre (SED). Mi ben weigri fu teki a sani di a ben pristeri mi, neleki fa Yesus ben weigri fu du wan srefi sortu sani di Satan ben pristeri en.—Mateus 4:8-10.

Wan dei na ini april 1949, tu skowtu ben kon na mi wrokopresi èn ben taki dati mi ben musu go nanga den. Den ben tyari mi go na wan kantoro fu na Inlichtingendienst fu Sovyet-Unie, pe den ben kragi mi taki mi ben e wroko gi den kapitalistsma fu den Westsei kondre. Den ben taki dati mi ben kan buweisi taki mi no ben fowtu te mi ben sa go doro nanga na oso-fu-oso wroko, ma mi ben sa musu fruteri den fu iniwan sma di ben taki takru sani fu Sovyet-Unie noso fu a SED noso iniwan sma di ben e go na den konmakandra fu den Kotoigi fu Yehovah. Di mi ben weigri fu wroko makandra nanga den, den ben sroto mi na ini wan cel. Baka ten, den ben tyari mi go na fesi wan sani di ben sori fu de wan srudati krutubangi. A krutustrafu fu mi ben de: ¡15 yari tranga wroko na ini Siberia!

Mi no ben bruya èn dati ben naki na ati fu den ofsiri. Den ben taigi mi taki a krutustrafu fu mi ben sa tan, ma taki a ben sa boen kaba efu mi ben sa go wan leisi wan wiki na den teleki mi ben wani fu wroko makandra nanga den. Fu di mi ben wani a rai fu moro lepi Kotoigi, meki mi ben reis go na Magdeburg, pe a bijkantoro fu a Waktitoren Genootschap ben de na a ten dati. A reis no ben makriki fu di den skowtu ben e luru mi. Ernst Wauer di ben e wroko na tapu a Juridische Afdeling na ini Magdeburg, ben taigi mi: „Feti èn yu sa wini. Skeki èn den sa wini yu. Dati na san wi ben leri na ini a strafuman kampu.”a A rai dati ben yepi mi fu hori misrefi na a pramisi fu mi fu dini Gado.

Den Ben Tapu a Wroko èn Ben Hori Mi Baka

Na ini yuli 1950, den brada ben rikomanderi mi fu dini leki wan opziener di e reis. Ma tapu 30 augustus, skowtu ben broko kon onfruwakti na ini den gebow fu wi na ini Magdeburg, èn den ben tapu a preikiwroko fu wi. Na so a toewijzing fu mi ben kenki. Paul Hirschberger nanga mi ben musu wroko nanga so wan 50 gemeente, èn wi ben e tan tu noso dri dei nanga ibri wan fu den gemeente, èn wi ben e yepi den brada fu orga èn fu go doro nanga a diniwroko fu den di lanti ben tapu. ¡Na ini den mun na baka, siksi tron skowtu ben misi fu hori mi!

Wan sma ben boro kon na ini wan fu den gemeente èn ben tori wi na den Stasi, a Geheime Dienst fu Lanti. Na so fasi, na ini yuli 1951, feifi man di ben hori gon ben hori Paul nanga mi na strati. Te wi e prakseri a tori baka, dan wi ben kan si taki wi no ben poti frutrow tapu na organisâsi fu Yehovah soleki fa wi ben musu du dati. Den owru brada fu wi ben gi wi a rai fu no rèis noiti nanga makandra. ¡Fu di wi ben e frutrow tumusi tapu wisrefi, meki wi ben lasi a fri fu wi! Boiti dati, wi no ben taki na fesi san wi ben o taki efu den ben sa hori wi.

Di mi ben de mi wawan na ini mi cel, mi ben begi Yehovah nanga watra-ai fu yepi taki mi no ben sa tori den brada fu mi noso skeki nanga a bribi fu mi. Baka di mi ben fadon na sribi, dan wantronso a sten fu mi mati Paul ben wiki mi. Leti na tapusei fu a cel fu mi, a kamra ben de pe den Stasi ben e poti aksi gi Paul. Fu di a ben de wan waran neti èn ben banawtu, meki a balkon doro ben opo èn mi ben kan yere ala sani safrisafri. Baka ten di den ben poti aksi gi mi, mi ben gi den srefi piki, èn dati ben meki den skowtu fruwondru. A bijbeltekst di Mama ben lobi, „kari mi na tapu a dei fu banawtu. Mi sa frulusu yu”, ben e tan kon baka na ini mi prakseri èn mi ben kisi furu deki-ati.—Psalm 50:15.

Baka di den ben poti aksi, dan Paul nanga mi ben tan feifi mun na a presi fu den Stasi pe den e hori sma fosi den go na krutu, na ini a strafu-oso na ini Halle èn baka ten na ini Magdeburg. Di mi ben de na ini Magdeburg, dan son tron mi ben e si den gebow fu a bijkantoro fu wi di ben sroto na a pisi ten dati. ¡Mi ben e winsi taki mi ben e wroko drape na presi taki mi ben de na ini strafu-oso! Na ini februari 1952 den ben meki a krutustrafu fu wi bekènti: „10 yari na ini strafu-oso èn 20 yari wi ben lasi den reti di wi ben abi leki borgu.”

Tan Hori Bribi na ini Strafu-oso

Den Kotoigi fu Yehovah di ben kisi krutustrafu gi seiker tin yari, ben e weri wan spesrutu marki wan pisi ten te den ben de na ini strafu-oso. Den ben e nai wan redi pisi krosi na wan fu wi bruku peipi èn na wan anu fu a dyakti fu wi. So srefi, wan smara lontu pisi redi karton ben fasi na dorosei fu a cel fu wi, fu warskow den waktiman taki wi ben de kefalek ogriman.

Den tiriman ben e si wi trutru leki den moro takru sortu ogriman. Wi no ben mag abi wan Bijbel bika soleki fa wan waktiman ben fruklari: „Wan Kotoigi fu Yehovah nanga wan Bijbel na ini en anu de leki wan ogriman nanga wan gon na ini en anu.” Fu ben man tyari pisi fu Bijbel kon na wàn, dan wi ben e leisi den buku fu a Rosia skrifiman Leo Tolstoy, di furutron ben e gebroiki bijbeltekst na ini den buku fu en. Wi ben e leri den bijbeltekst disi na ede.

Bifo den ben hori mi na ini 1951, mi ben meki mofo nanga Elsa Riemer fu trow. A ben e fisiti mi so furu leki a kan na ini strafu-oso èn ben e seni wan paki nanga nyanyan sani gi mi, wán leisi wan mun. A ben e kibri nyanyan na yeye fasi tu na ini den paki fu en. Wan leisi a ben lai wan tu artikel fu wan Waktitoren na ini wan tu worst. Furutron den waktiman ben e koti den worst opo fu si efu sani ben kibri na ini sei, ma a leisi disi a paki ben doro syatu bifo a kaba fu a wrokodei, èn den no ben ondrosuku en.

Na a ten dati, Karl Heinz Kleber nanga mi ben de na ini wan pikin cel makandra nanga dri kompe-strafuman di no ben de Kotoigi. Fa wi ben sa leisi A Waktitoren sondro taki sma si wi? We, wi ben e du neleki wi ben e leisi wan buku, ma wi ben kibri den Waktitoren artikel na ini. Wi ben gi a warti nyanyan na yeye fasi disi tu na kompe-kotoigi na ini a strafu-oso.

Di wi ben de na ini strafu-oso, wi ben meki gebroiki fu den okasi fu fruteri trawan fu a Kownukondre fu Gado. Mi ben prisiri srefisrefi fu si taki wan fu den kompe-strafuman fu mi ben kon tron wan bribiman leki wan bakapisi fu dati.—Mateus 24:14.

Go Baka na ini a Furuten Diniwroko

Na tapu 1 april 1957, baka di mi ben de pikinmoro siksi yari na baka trarki, den ben lusu mi. Moro mendri leki tu wiki baka dati, mi ben trow nanga Elsa. Di den Stasi ben yere taki mi ben lusu, dan den ben e suku wan sani fu meki mi go baka na ini strafu-oso. Fu meki taki dati no pasa, meki Elsa nanga mi ben abra a grens fu go libi na West Berlijn.

Di wi ben doro na West Berlijn, a Genootschap ben wani sabi san ben de den plan fu wi. Wi ben taigi den taki wán fu wi ben o pionier èn a trawan ben o teki wan grontapu wroko.

„Fa unu ben o feni efu un ala tu ben o tron pionier?”, den ben aksi wi.

„Efu dati kan”, wi ben piki, „dan wi sa begin wantewante.”

Na so den ben gi wi pikinso moni ibri mun fu yepi wi fu sorgu gi wisrefi, èn wi ben bigin dini leki spesrutu pionier na ini 1958. ¡A ben de wan prisiri fu luku fa sma nanga suma wi ben studeri Bijbel ben kenki den libi èn ben kon tron dinari fu Yehovah! Den tin yari na baka, na ini a spesrutu pionierwroko, ben leri wi fu wroko krosibei nanga makandra leki man nanga wefi. Elsa ben de ala ten na mi sei, srefi te mi ben e meki a wagi. Wi ben e leisi, ben e stuka èn ben e begi makandra tu.

Na ini 1969 wi ben kisi a toewijzing fu du a kringwroko, fu fisiti difrenti gemeente ibri wiki fu sorgu gi den fanowdu di den memre fu a gemeente abi. Yosef Barth, wan man di ben abi ondrofeni na ini a kringwroko, ben gi mi a rai disi: „Efu yu wani abi bun bakapisi na ini a toewijzing fu yu, dan de nomo leki wan brada gi den brada.” Mi ben pruberi fu gebroiki a rai dati. Leki wan bakapisi fu dati, wi ben abi wan tumusi waran èn krosibei matifasi nanga kompe-kotoigi, èn dati ben meki en makriki fu gi rai te dati ben de fanowdu.

Na ini 1972, datra ben si taki Elsa ben abi kanker èn a ben musu du wan operâsi. Baka ten a ben kisi reuma. Ala di a ben abi furu pen, toku a ben e go nanga mi ibri wiki, fu dini den gemeente èn fu wroko nanga den sisa na ini a diniwroko so furu leki a kan.

Fiti Wisrefi na den Fanowdu Di De

Na ini 1984 a papa nanga mama fu mi wefi ben abi doronomo sorgu fanowdu, èn dati meki wi ben kon libi a kringwroko fu yepi sorgu gi den teleki den dede fo yari baka dati (1 Timoteus 5:8). Ne na ini 1989, Elsa ben kon siki tranga. Koloku taki a ben kon betre pikinso, ma a de fanowdu taki mi e du ala den osowroko. Mi e leri ete fa fu handri nanga wan sma di abi doronomo pen. Toku, ala di mi e kisi a banawtu disi na frustan sei èn na emotioneel sei toku wi tan abi lobi gi sani na yeye fasi.

Wi de tangi taki tide wi de pionier ete. Ma wi kon frustan taki san moro prenspari, a no a posisi di wi abi noso omeni wi man du, ma taki wi e tan getrow. Wi wani dini wi Gado, Yehovah, no gi wan tu yari nomo, ma gi ala têgo ten. Na ondrofeni fu wi de wan tumusi moi leri gi a ten di e kon. Èn Yehovah gi wi a krakti fu prèise en srefi na ondro den moro takru sortu situwâsi.—Filipisma 4:13.

[Futuwortu]

[Prenki na tapu bladzijde 23]

Dyaso na ini Magdeburg den ben poti mi na dungru-oso

[Sma di abi a reti fu a prenki]

Gedenkstätte Moritzplatz Magdeburg für die Opfer politischer Gewalt; Fowtow: Fredi Fröschki, Magdeburg

[Prenki na tapu bladzijde 23]

Di wi ben trow na ini 1957

[Prenki na tapu bladzijde 23]

Nanga Elsa now