Fu San Ede Wi Musu Bribi na ini Yesus Krestes?
„SREFI furu sma di no de Kresten e bribi taki A ben de wan bigi èn koni leriman. A ben de trutru wan fu den moro makti man di oiti ben libi” (The World Book Encyclopedia). Suma na a sma disi? Yesus Krestes, a sma di seti a Krestendom.
Ma awansi san na encyclopedia e taki, gi hondrohondro milyun sma na ini den Owstusei kondre èn na tra presi, Yesus Krestes na wan sma di den no sabi, a de soso wan nen di den e memre kande fu den leribuku fu heiskoro. Srefi na ini den kerki fu Krestenhèit, yu abi sabiman fu Gado tori nanga kerki fesiman di e taki dati wi no sabi Yesus trutru, èn den e tweifri na a trufasi fu den fo verslag fu en libi (den Evangelie) di de ete èn di de fu feni na ini Bijbel.
¿A ben kan taki den fo skrifiman fu den Evangelie ben meki a tori fu Yesus libi? ¡Kwetikweti! A pôpi historia skrifiman Will Durant, ben skrifi baka di a ben ondrosuku den Evangelie tori: „Taki na ini wán geslakti nomo wan tu gewoon man ben sa meki so wan makti èn moi persoonlijkheid, wan persoonlijkheid di abi so bun hei moreel markitiki èn di de so wan moi prenki fu bradafasi na mindri libisma, ben o de wan moro bigi wondru leki iniwan wondru di skrifi na ini den Evangelie. Baka tu hondro yari taki sabiman gi komentaar tapu Bijbel tori, toku den prenspari penti fu a libi, fu den eigifasi, nanga fu den leri fu Krestes de krin fu frustan, èn de a moro span pisi na ini a historia fu sma na den Westsei kondre.”
Toku sma de di ben sa taki dati a no warti fu abi belangstelling gi Yesus Krestes, bika fu den sani di den sma di taki dati den na bakaman fu En, du. ’Den saka wan atoom bom na tapu Nagasaki’, wan tu sma na ini Yapan ben o taki. ’Èn Nagasaki ben abi moro Kresten leki moro furu fu den foto na ini Yapan.’ ¿Ma yu kan gi wan datra a fowtu te wan sma kon siki fu di a no e gebroiki a rai fu a datra? Moro furu sma di e fruklari taki den na Kresten, langa ten kaba no ben gebroiki a dresi di Yesus ben gi fu kon betre fu den siki fu a libisma famiri. Toku, Yesus ben gi a dresi gi den aladei problema fu wi èn so srefi gi den pina fu libisma na heri grontapu. Fu dati ede wi e aksi yu fu leisi na artikel di e kon now èn si gi yusrefi sortu sma a ben de.