Fa Yesus Kan Kenki Yu Libi?

YESUS KRESTES ben de wan Bigi Leriman di ben libi na ini Palestina pikinmoro 2000 yari pasa. Wi no sabi furu fu a pikin-nengre ten fu en. Ma buweisi de di e sori krinkrin taki di a ben abi pikinmoro 30 yari, a ben bigin en diniwroko fu „gi kotoigi fu a waarheid” (Yohanes 18:37; Lukas 3:21-23). Den fo disipel di ben skrifi den tori fu en libi e poti prakseri na den dri nanga afu yari baka dati.

Na ini en diniwroko Yesus Krestes ben gi den disipel fu en wan komando di ben kan de wan dresi gi furu fu den siki fu grontapu. San ben de dati? Yesus ben taki: „Mi e gi unu wan nyun komando, fu unu lobi makandra; neleki fa mi ben lobi unu, fu unu lobi makandra tu” (Yohanes 13:34). Iya, a lusu fu furu fu den problema fu a libisma famiri, na lobi. Di na wan tra okasi den ben aksi Yesus sortu komando ben de a moro bigiwan, dan a ben piki: „’Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan.’ Disi na a moro bigi èn fosi komando. A di fu tu, di de a srefi leki en, na disi: ’Yu musu lobi a sma na yu sei leki yusrefi.’”—Mateus 22:37-40.

Yesus ben sori wi nanga den wortu fu en èn nanga den sani di a ben du fa wi musu lobi Gado nanga wi kompelibisma. Meki wi go ondrosuku wan tu eksempre èn si san wi kan leri fu en.

Den Sani Di A Ben Leri Sma

Na ini wan fu den moro pôpi taki na ini a historia, Yesus Krestes ben taigi den bakaman fu en: „No wan sma kan dini tu masra leki srafu, bika efu a no sa wani si a wan na ai, dan a sa lobi a trawan, efu a sa tai hori na a wan, dan a sa broko-ai gi a trawan. Unu no kan dini Gado nanga Gudu na a srefi ten leki srafu” (Mateus 6:24). ¿A leri fu Yesus taki wi musu poti Gado na a fosi presi na ini wi libi, de wan sani di e wroko ete na ini a ten disi, te so furu sma e bribi taki moni e lusu ala problema? A tru, wi abi moni fanowdu fu tan na libi (Preikiman 7:12). Ma efu wi e meki „Gudu” de wi basi, dan „a lobi gi moni” sa basi wi èn sa tiri wi heri libi (1 Timoteus 6:9, 10). Furu sma di fadon na ini a trapu disi, ben abi leki bakapisi taki den ben lasi den osofamiri, den gosontu, nanga srefi a libi fu den.

Na a tra sei, te wi e suku yepi na Gado leki wi Basi, dan dati kan meki wi libi abi waarde. Leki a Kriaman, en na a Sma di Gi a libi, èn fu dati ede en wawan de warti fu kisi na anbegi fu wi (Psalm 36:9; Openbaring 4:11). Den sma di e leri den eigifasi fu en èn di kon lobi en, e kisi a firi fu hori ala den komando fu en (Preikiman 12:13; 1 Yohanes 5:3). Te wi e du dati, dan wi e gi wisrefi wini.—Yesaya 48:17.

Na ini a Bergitaki, Yesus ben leri den disipel fu en tu fa fu sori lobi gi den kompelibisma. A ben taki: „Ala sani, fu dati ede, di unu wani fu sma du gi unu, unu musu du gi den so srefi” (Mateus 7:12). A wortu „sma” di Yesus ben gebroiki dyaso, wani taki so srefi den feanti fu wan sma. Na ini a srefi taki, a ben taki: „Tan lobi den feanti fu unu èn tan begi gi den wan di e frufolgu unu” (Mateus 5:43, 44). ¿A no de so taki a lobi disi ben o lusu furu problema di wi e miti na ini a ten disi? A Hindu fesiman Mohandas Gandhi ben e bribi dati. Soleki fa sma taki, a ben taki: „Te [wi] sa kon makandra tapu gron fu den leri di Krestes ben gi na ini en Bergitaki, dan wi sa lusu den problema . . . fu heri grontapu.” Te wi e gebroiki den leri fu Yesus di abi fu du nanga lobi, dan wi kan lusu furu siki fu a libisma famiri.

Den Sani Di A Du

Yesus no ben leri sma dipi waarheid wawan fu a fasi fa den musu sori lobi, ma a ben du tu san a ben leri sma. Fu eksempre, a ben poti den afersi fu tra sma na fesi fu den eigi afersi fu en. Wan dei Yesus nanga den disipel fu en ben e yepi sma so furu, taki den no ben abi ten fu nyan srefi. Yesus ben si taki den disipel fu en ben musu rostu pikinso, èn a ben tyari den go na wan presi pe den kan de den wawan. Ma di den doro drape, dan den ben o si wan ipi sma e wakti den. Fa yu ben o handri te yu ben o si wan ipi sma di ben e fruwakti taki yu musu wroko, ala di yu e firi taki yu musu rostu pikinso? We, Yesus „ben kisi sari nanga den” èn „ben bigin leri den furu sani” (Markus 6:34). A broko di Yesus ben e broko en ede nanga tra sma ben buweigi en ala ten fu yepi den.

Yesus ben du moro gi sma leki nomo fu gi den leri wawan. A ben du sani srefi fu yepi den. Fu eksempre, wan leisi a ben gi moro leki 5000 sma nyanyan di ben e arki en te lati bakadina. Syatu baka dati, a ben gi wan tra bigi grupu sma nyanyan — disi leisi a ben de moro leki 4000 sma — di ben arki en dri dei langa èn di no ben abi noti moro fu nyan. Na a fosi leisi, a ben gebroiki feifi brede nanga tu fisi, èn na a lasti leisi, a ben gebroiki seibi brede nanga wan tu pikin fisi (Mateus 14:14-22; 15:32-38). ¿Den ben de wondru? Iya, a ben de wan sma di ben e du wondru.

Yesus ben dresi so srefi furu sma di ben siki. A ben dresi den breniwan, den lanwan, den gwasiman, nanga den dofuwan. ¡Iya, a ben gi den dedewan wan opobaka srefi! (Lukas 7:22; Yohanes 11:30-45) Wan leisi wan gwasiman ben begi en tangitangi: „Efu yu wani nomo, yu kan meki mi kon krin.” Fa Yesus ben piki? „Fu di a ben kisi sari, meki a ben langa en anu èn ben fasi en, èn ben taigi en: ’Mi wani. Kon krin’” (Markus 1:40, 41). Nanga den sortu wondru disi Yesus ben sori a lobi di a abi gi den wan di e pina.

¿Yu feni en muilek fu bribi na ini den wondru fu Yesus? Wan tu sma feni en muilek. Ma prakseri taki Yesus ben du den wondru fu en na publiki. Srefi den gensman fu en di ben pruberi na ibri okasi fu feni fowtu na en, no ben kan taki dati en a no wan man di e du wondru (Yohanes 9:1-34). Boiti dati, den wondru fu en ben abi wan marki. Den ben yepi sma fu kon sabi en leki a Sma di Gado ben seni kon.—Yohanes 6:14.

Te Yesus ben du den wondru a no ben e pruberi fu poti prakseri na tapu ensrefi. Na presi fu dati, a ben e gi Gado glori, a Sma di ben Gi en a krakti. Wan leisi na ini Kapernaum a ben de na ini wan oso di ben furu nanga sma. Wan lanman ben wani kon betre, ma a no ben man kon na inisei. Fu dati ede den mati fu en ben saka en fu a daki na tapu wan pikin bedi. Di Yesus ben si a bribi fu den, dan Yesus ben dresi a lanman. Leki wan bakapisi fu dati, a pipel „ben gi Gado glori” èn ben taki: „Noiti ete wi ben si so wan sani” (Markus 2:1-4, 11, 12). Den wondru fu Yesus ben tyari prèise gi Yehovah, en Gado, èn ben yepi den wan di ben de na ini nowtu.

Ma a moro prenspari marki na ini a diniwroko fu Yesus no ben de fu dresi den sikiwan na wan wondrufasi. Wan fu den man di ben skrifi wan verslag fu Yesus en libi, ben fruklari: „Den sani disi ben skrifi so taki unu kan bribi taki Yesus na a Krestes, a Manpikin fu Gado, èn taki fu di unu e bribi, unu kan kisi libi nanga yepi fu en nen” (Yohanes 20:31). Iya, Yesus ben kon na grontapu so taki den sma di e bribi, ben sa kan kisi libi.

Na Srakti-ofrandi fu En

Kande yu e aksi yusrefi: ¿’Yesus ben kon na grontapu?’ ¿Fu pe a ben kon? Yesus ensrefi ben taki: „Mi komoto na hemel no fu du mi wani, ma fu du a wani fu a sma di ben seni mi” (Yohanes 6:38). A ben libi kaba bifo a ben de wan libisma, leki a wan-enkri gebore Manpikin fu Gado. Ma san ben de a wani fu a Sma di ben seni en kon na grontapu? „Gado ben lobi grontapu sote, taki a ben gi en wan-enkri gebore Manpikin”, Yohanes e taki, wan fu den skrifiman fu na Evangelie, „so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Fa dati ben kan?

Bijbel e fruteri fa dede ben tron na ondrofeni di a libisma famiri no man wai pasi gi. A fosi libisma paar ben kisi libi fu Gado nanga a fruwakti fu libi fu têgo. Ma den ben frukisi fu meki opruru nanga a Mekiman fu den (Genesis 3:1-19). A sani disi di den ben du, a fosi sondu fu libisma, ben abi leki bakapisi taki den bakapikin fu Adam nanga Eva ben kisi na erfenis fu dede, wan sani di no ben prisiri srefisrefi (Romesma 5:12). Fu man gi libisma trutru libi, dan sondu nanga dede ben musu puru na pasi.

No wan sabidensiman kan puru dede nanga yepi fu a wroko di den e wroko na tapu den gen fu sma. Ma a Kriaman fu libisma abi den fasi fu tyari den libisma di e gi yesi na en, kon volmaakti so taki den kan libi fu têgo. Na ini Bijbel den e kari a seti disi, a lusu-paiman. A fosi libisma paar ben seri densrefi nanga den bakapikin fu den go na ini katibo fu sondu nanga dede. Den ben kenki a libi fu den leki volmaakti libisma di musu gi yesi na Gado, gi wan libi pe den no abi fu gi Gado frantiwortu, èn e teki den eigi bosroiti fu san bun èn san ogri. Fu man bai a volmaakti libisma libi baka, dan wan prijs ben musu pai di de a srefi leki a volmaakti libisma libi di wi fosi papa nanga mama ben lasi. Fu di libisma ben kisi onvolmaaktifasi na a geborte fu den, meki den no man pai a prijs dati.—Psalm 49:7.

Fu dati ede Yehovah Gado ben kon ini a tori fu gi yepi. A ben tyari a volmaakti libi fu en wan-enkri gebore Manpikin go na a muru fu wan nyunwenke, di ben meki Yesus. Furu tintenti yari pasa, yu no ben sa bribi taki wan nyunwenke kan meki pikin. Ma na ini a ten disi, sabidensiman kloon meti èn poti den gen fu a wan meti go na ini wan trawan. Suma kan tweifri fu dati ede taki a Kriaman abi a koni fu kan abra a normaal fasi fa sma e meki pikin?

Fu di wan volmaakti libisma libi ben de, meki a prijs fu lusu libisma fu sondu nanga dede ben kan now. Toku a beibi di ben gebore na grontapu leki Yesus ben musu gro kon tron a „datra” di ben musu man gi a „dresi” fu dresi den siki fu a libisma famiri. A ben du disi di a ben libi wan volmaakti libi sondro sondu. Yesus no wawan ben si a pina fu libisma na ini a sondu fu den, ma leki libisma a ben ondrofeni den sani di libisma no man du. Disi ben meki taki a ben de wan datra di ben abi moro sari-ati srefi (Hebrewsma 4:15). A dresi di a ben dresi libisma na wan wondru fasi na ini en libi na grontapu, ben buweisi taki a abi a wani nanga a krakti fu dresi den sikiwan.—Mateus 4:23.

Baka wan diniwroko fu dri nanga afu yari na grontapu, den gensman fu Yesus ben kiri en. A ben sori taki wan volmaakti libisma kan gi yesi na a Kriaman awansi a e kisi den moro bigi tesi (1 Petrus 2:22). Na volmaakti libisma libi fu en di a ben òfer, ben tron a lusu-paiman di ben man frulusu libisma komoto na ondro sondu nanga dede. Yesus Krestes ben taki: „No wan sma abi moro lobi leki a wan disi, taki wan sma musu gi en sili abra gi a bun fu den mati fu en” (Yohanes 15:13). Na tapu a di fu dri dei baka a dede fu en, Yesus ben kisi wan opobaka fu kisi wan yeye libi, èn wan tu wiki na baka, a ben opo go na hemel fu gi Yehovah Gado a lusu-paiman (1 Korentesma 15:3, 4; Hebrewsma 9:11-14). Fu di a ben du dati, meki Yesus ben man gebroiki a waarde fu en lusu-ofrandi gi den wan di e waka na en baka.

¿Yu ben sa wani abi wini fu a fasi disi fu dresi sma, na yeye sei, na emotioneel sei, èn na skin sei? Yu musu bribi na ini Yesus Krestes fu man kisi dati. Fu san ede yu no e go na a Datra yusrefi? Yu kan du dati te yu e leri fu Yesus Krestes èn fu a rol di a abi fu frulusu den libisma di de getrow. Yehovah Kotoigi sa breiti fu yepi yu.

[Prenki na tapu bladzijde 5]

Yesus abi a wani èn so srefi a krakti fu dresi den sikiwan

[Prenki na tapu bladzijde 7]

Fa a dede fu Yesus abi krakti tapu yu?