Mi Ben Pôti Kefalek, ma Now Mi Abi a Moro Bigi Gudu

SOLEKI FA MANUEL DE JESUS ALMEIDA BEN FRUTERI

Mi gebore na ini oktober 1916, leki a moro yonguwan fu den 17 pikin. Neigi fu den moro owru brada nanga sisa fu mi dede fu siki ede èn fu di den no ben kisi nofo gosontu nyanyan, èn noiti mi ben sabi den. Den aiti tra pikin di ben de na libi ete, ben e libi nanga wi papa nanga mama na ini wan pikin dorpu krosibei fu Porto, Potogisikondre.

A PIKIN oso fu wi ben abi soso wan pikin foroisi nanga wán sribikamra. Wi ben e teki dringi watra na wan peti pikinmoro wan afu kilometer moro fara, èn wi ben abi kefalek owruten kukru.

Di den moro owru brada fu mi ben tranga nofo na skin fasi, dan den ben bigin wroko na ini den karugron. A moni di den ben wroko ben yepi fu sorgu gi pikinso nyanyan fu na osofamiri. Nanga a yepi fu den, mi ben tron a wan-enkri pikin di ben kisi pikinso skoro. Ala di a libi fu wi ben tranga, toku wi ben de getrow na a Katolik Kerki srefisrefi, èn wi ben howpu taki disi ben o yepi wi na ini wi libi.

Na ini a mun mei, a kerki ben abi san den ben kari noveen. Neigi dei baka makandra, wi ben e waka fruku mamanten go na kerki ala di a ben dungru ete. Drape wi ben e begi fu di wi ben e bribi taki disi ben o tyari wan blesi kon fu Gado. Wi ben e bribi tu taki a priester ben de wan santa man, wan man di ben e teki presi gi Gado. Ma baka ten, a fasi disi fa wi ben e si sani ben kenki.

Suku wan Moro Betre Sani

Di wi no ben pai a kerki belasting, dan a priester no ben hori na prakseri taki wi ben de na ini kefalek muilek moni problema. Disi ben meki wi brokosaka. A fasi fa mi ben prakseri fu a kerki ben kenki wantewante, èn fu dati ede di mi ben abi 18 yari, mi ben bosroiti fu libi mi osofamiri fu go luku efu wan moro betre sani ben de na ini a libi, moro leki nomo fu wroko na tapu den gron èn fu abi kesekese nanga a kerki. Na ini 1936, mi ben doro na ini Lisabon, na edefoto fu Potogisikondre.

Drape mi ben miti Edminia. Ala di mi ben feni taki relisi ben bedrigi mi, toku wi ben handri akruderi a gwenti èn ben trow na ini a Katolik Kerki. Baka dati na ini 1939, a di fu Tu Grontapufeti ben bigin, èn Potogisikondre ben feti na a sei fu den Geallieerden (Frubontu patna). Na a ten fu na orloku, mi ben abi a frantiwortu gi 18 maksin, èn na ini wán dei wi ben e seni 125 truck di ben lai nanga fetisani.

Den kefalek ogri-ati sani di ben du na ini na orloku èn a prenspari rol di a Katolik Kerki ben prei na ini na orloku, ben abi krakti tapu mi srefisrefi. Mi ben e aksi misrefi: ¿’Gado e broko en ede trutru nanga libisma? Fa wi musu anbegi en?’ Furu yari na baka, na ini 1954, wan owru bigisma, wan Kotoigi fu Yehovah, ben taki nanga mi fu den aksi di mi ben abi. A takimakandra disi ben kenki mi heri libi.

A Howpu Di Bijbel E Gi Ben Naki Mi Ati

A bun man disi, Yosua, ben fruteri mi taki Gado Kownukondre na a wan-enkri lusu gi den problema fu grontapu èn taki vrede nanga seikerfasi sa kon tru soso nanga yepi fu a tiri fu a Kownukondre (Mateus 6:9, 10; 24:14). Den sani di a ben taki ben prisiri mi, ma mi ben draidrai fu bribi a fruklari fu en bika fu a fositen ondrofeni di mi ben abi nanga relisi. Di a ben aksi mi fu studeri Bijbel nanga mi, dan mi ben agri nanga dati boiti te a ben o aksi moni èn a ben o taki fu politik. A ben agri, èn ben gi mi a dyaranti taki a sani di a ben pristeri mi, ben de fri.—Openbaring 22:17.

Mi ben kon frutrow Yosua esi-esi. Fu dati ede mi ben aksi en wan sani di mi ben wani srefisrefi fu sensi mi yongu yari. ¿„A ben kan taki mi kan abi mi eigi Bijbel?” Baka di mi ben kisi en, mi ben breiti srefisrefi fu leisi gi a fosi tron na ini na eigi Wortu fu a Kriaman fu wi, den pramisi soleki: „Gado srefi sa de nanga [libisma]. Èn a sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. ¡Den fositen sani pasa kaba!”—Openbaring 21:3, 4.

Spesrutu den Bijbel pramisi taki pôtifasi nanga siki no sa de moro, ben de wan trowstu gi mi. A getrow man Elihu ben taki fu Gado: „A e gi nyanyan pasa marki” (Yob 36:31). Èn Bijbel e taki dati na ondro a regtfardiki tiri fu Gado Kownukondre, „no wan sma di e libi drape sa taki: ’Mi siki’” (Yesaya 33:24). ¡Yehovah Gado abi wan lobi-ati belangstelling gi libisma srefisrefi! ¡A belangstelling fu mi na ini den pramisi fu En ben gro srefisrefi!

Mi ben fisiti mi fosi konmakandra fu Yehovah Kotoigi na tapu 17 april 1954. A ben de wan spesrutu konmakandra — a Memrefesa fu Krestes dede. Fu sensi a ten dati, mi ben go na den konmakandra doronomo. Heri esi mi ben bigin fruteri tra sma den bun sani di mi ben leri. Na ini den dei dati na ini Potogisikondre, ibri mun wi ben abi wan picnic krosibei na a syoro, èn dan sma ben e dopu. Seibi mun baka di Yosua ben taki a fosi leisi nanga mi, dan mi ben gi mi libi abra na Yehovah Gado èn ben simboliseer dati nanga dopu na ini watra, na ini a se.

Na ini a bigin fu a yari 1954, pikinmoro wán hondro Kotoigi ben de nomo na ini heri Potogisikondre. So bun, man ben de fanowdu srefisrefi fu teki fesi na ini a preikiwroko. Mi ben gro esi-esi na yeye fasi, èn heri esi mi ben kisi frantiwortu na ini a gemeente. Na ini 1956, mi ben kisi a grani fu dini leki gemeente dinari, soleki fa den ben kari a fesiman opziener na a ten dati, na ini a di fu tu gemeente fu Yehovah Kotoigi na ini Lisabon. Na ini a ten disi, moro leki wán hondro gemeente de na ini a foto disi èn na ini a birti fu a foto.

Kisi Wini fu di Wi Ben Ontfanga Sma na Oso

Srefi ala di Edminia nanga mi no ben abi furu moni, toku ala ten a doro fu wi oso ben opo gi den Kresten brada fu wi. Na ini 1955 wan pionier, soleki fa den ben kari den furuten dinari fu Yehovah Kotoigi, ben stop na Potogisikondre di a ben de na pasi e go fu en oso na ini Brasyonkondre go na a internationaal „Kownukondre Wini” Kongres na ini Doisrikondre. ¡Bika a ben abi vervoer problema, meki a ben tan wán mun na ini wi oso, èn wi ben abi furu wini na yeye fasi fu a fisiti fu en!

Tra sma di ben fisiti wi oso na a ten dati ben de memre fu na edekantoro fu Yehovah Kotoigi na ini Brooklyn, New York, soleki Hugo Riemer nanga en patna di ben abi a srefi kamra, Charles Eicher. Den ben e nyan nanga wi èn ben e hori lezing gi den Potogisi brada. Leki nyunyun pikin fowru wi ben e wakti nanga opo mofo tapu den switi pisi nyanyan na yeye fasi di den sortu brada disi ben e gi.

Den opziener di e reis, fu Yehovah Kotoigi, ben tan na ini wi oso tu te den ben e fisiti wi. Wan fisitiman di wi e memre spesrutu na ini 1957, ben de Álvaro Berecochea, bijkantoro opziener fu Maroko, di ben kisi a toewijzing fu fisiti Potogisikondre fu gi den brada deki-ati. A ben fisiti a bukustudie na ini wi oso, èn wi ben wani nomonomo meki a tan nanga wi a tra pisi fu a ten te a de na ini Potogisikondre. Wi ben kisi blesi srefisrefi èn ben kon fatu na yeye fasi na ini a mun di a ben fisiti wi, ala di Álvaro ben kon fatu pikinso na skin fasi fu di mi lobi wefi Edminia ben bori bun.

Kefalek pôtifasi leki di mi ben ondrofeni na ini mi pikin-nengreten, kan libi dipi marki na tapu wan sma. Ma mi ben kon frustan taki o moro wi e gi Yehovah èn den getrow futuboi fu en, o moro A e blesi wi. Ibritron baka mi ben kon frustan a trutori disi moro bun te wi ben ontfanga ala den sma di wi ben man ontfanga na oso.

Na tapu a kongres fu wi na ini Porto, na ini 1955, den ben meki bekènti taki wan internationaal kongres fu Yehovah Kotoigi ben o hori na a Yankee Stadion na ini New York City, na ini 1958. Wan bijdrage boksu ben poti na ini ibri Kownukondre zaal na ini a kondre — èn na a ten dati a no furu Kownukondre zaal ben de — fu yepi seni sma fu Potogisikondre go na a kongres. ¿Yu kan prakseri a prisiri fu wi di mi nanga mi wefi ben de na mindri den wan di den ben teki fu go na a kongres? ¡A ben de wan bigi prisiri fu fisiti na edekantoro fu Yehovah Kotoigi fu heri grontapu na ini Brooklyn, di wi ben de na ini Amerkankondre gi a kongres!

Horidoro na Ondro Frufolgu

Na ini 1962 lanti ben tapu a preikiwroko fu Yehovah Kotoigi na ini Potogisikondre, èn den ben seni den zendeling — so srefi Eric Britten, Domenick Piccone, Eric Beveridge, nanga den wefi fu den — gowe fu a kondre. Baka wan pisi ten wi no ben kisi primisi fu hori den konmakandra fu wi na ini den Kownukondre zaal, èn fu dati ede wi ben hori den kibrikibri na ini oso; èn wi no ben man hori bigi kongres moro na ini Potogisikondre. Na so a ben tron mi frantiwortu fu sreka vervoer gi wi Kresten brada nanga sisa fu fisiti den kongres disi na ini tra kondre.

A no ben makriki fu sreka sani gi bigi grupu Kotoigi fu reis go na tra kondre. Ma a ben warti fu du a muiti, te yu prakseri den moi winimarki na yeye fasi di den Potogisi brada ben kisi. ¡A ben gi den deki-ati srefisrefi fu de na den kongres na ini Switserland, Ingrisikondre, Italiakondre, nanga Fransikondre! Den sortu kongres disi ben gi den na okasi tu fu tyari publikâsi kon na ini a kondre. Na ini den yari dati, wi ben aksi kefalek furu leisi fu skrifi wi nen leki wan relisi organisâsi na lanti na ini Potogisikondre, ma ala den leisi disi den ben weigri.

Baka di den ben puru den zendeling na ini a bigin fu 1962, dan den sikrit skowtu ben bigin wroko moro faya fu tapu a preikiwroko fu wi. Den ben hori ipi-ipi brada nanga sisa fu wi èn ben tyari den go na krutu. Verslag di e buweisi furu fu den sani disi di ben feni presi, ben tyari kon na doro na ini a tijdschrift disi èn na ini a kompetijdschrift, Ontwaakt!a

Wan fu den sma di ben de na strafu-oso fu a preikiwroko ede, ben de wan pionier di mi ben leri a bun nyunsu fu Gado Kownukondre. Fu di den skowtu ben feni mi adres na ini den sani fu a pionier, meki den ben seni kari mi kon èn ben poti aksi gi mi.

Baka ten, tu skowtu ben kon na mi oso. Den ben teki den bijbelstudie yepisani fu mi èn so srefi 13 Bijbel. Den ben e tan muilek wi, èn ben kon seibi difrenti tron ala nanga ala fu suku sani na a oso fu wi. Ibri leisi den ben e sutu aksi gi wi.

Difrenti leisi mi ben musu go kotoigi gi den kompekotoigi fu mi na ini krutu-afersi. Ala di mi no ben abi furu grontapu skoro, toku Yehovah ben gi mi ’koni di ala den gensman makandra no ben man kakafutu gi noso no ben man gens’ (Lukas 21:15). Wan leisi a krutubakra ben fruwondru so kefalek fu a kotoigi di mi ben gi, taki a ben aksi mi sortu skoro mi ben kisi. Ala sma na ini a krutukamra ben lafu di mi ben taki dati mi ben go te na a di fu fo klas nomo.

Ala di a frufolgu ben kon moro furu, na so a nomru fu sma di ben handri tapu a Kownukondre boskopu ben e gro tu. ¡Dati meki, den moro mendri leki 1300 Kotoigi na ini Potogisikondre na ini a yari 1962 ben gro kon moro leki 13.000 Kotoigi na ini 1974! Na a pisi ten dati, na ini mei 1967, mi ben kisi a kari fu dini leki wan opziener di e reis. Na ini a wroko disi mi ben fisiti den gemeente fu Yehovah Kotoigi fu tranga den na yeye fasi.

Abi a Moro Bigi Gudu

Na ini december 1974, mi ben abi a grani fu de ini a tori tu fu skrifi wi nen leki relisi na lanti so taki a wroko fu Yehovah Kotoigi na ini Potogisikondre ben kon de akruderi wet. A yari na baka, mi nanga mi wefi ben tron memre fu a Bethel famiri fu Yehovah Kotoigi na ini Estoril. Mi ben kisi a toewijzing tu fu dini leki wan memre fu a Bijkantoro Komte fu Potogisikondre.

¡A ben de wan bigi prisiri fu si a preikiwroko ben e gro na ini Potogisikondre èn na ini den kontren di ben de na ondro a tiri fu wi bijkantoro! Wan tu fu den na Angola, Azoren, Kaap Ferdia, Madeira, nanga São Tomé nanga Príncipe. Na ini den yari di pasa, a ben moi srefisrefi fu si zendeling fu Potogisikondre ben e seni go dini na ini den kondre disi pe kefalek furu belangstelling de gi a Kownukondre boskopu. ¡Prakseri a prisiri di wi abi now fu si moro leki 88.000 Kownukondre preikiman na den presi disi, èn so srefi moro leki 47.000 na ini Potogisikondre! Na ini 1998 wi ben abi wan heimarki fu 245.000 sma di ben fisiti a Memrefesa na ini den kondre disi, te yu teki den gersi den moro mendri leki 200 fisitiman di mi ben tron wan Kotoigi na ini 1954.

Mi nanga Edminia e agri nanga wi heri ati nanga a psalm singiman fu Bijbel di ben taki dati „wán dei na ini [den] fesi dyari [fu Yehovah] moro bun leki dusun dei na wan tra presi” (Psalm 84:10). Te mi e prakseri baka fu a lagi bigin fu mi èn mi e teki en gersi den gudu na yeye fasi di mi ben abi fu sensi a ten dati, dan mi e firi leki a profeiti Yesaya: „O Yehovah, yu na mi Gado. Mi e hei yu, mi e prèise yu nen, bika yu du kefalek moi sani . . . Bika yu tron wan fortresi gi a mofinawan, èn wan fortresi gi a pôtiwan.”—Yesaya 25:1, 4.

[Futuwortu]

[Prenki na tapu bladzijde 24]

Tapusei: Brother Almeida na ini Lisabon e meki a seti bekènti fu seni sma go na a kongres na New York na ini 1958

Mindrisei: Dyaso mi e hori wan model dinari-konmakandra na a „Vrede na Grontapu” Internationaal Kongres na ini Parijs

Ondrosei: Yuru bus di de klariklari fu go na wan Distriktkongres na ini Fransikondre

[Prenki na tapu bladzijde 25]

A mamanten anbegi na a bijkantoro fu Potogisikondre

[Prenki na tapu bladzijde 25]

A bijkantoro fu Potogisikondre, di ben gi abra na Yehovah na ini 1988

[Prenki na tapu bladzijde 26]

Den lezing fu Brada Hugo Riemer ben gi wi deki-ati di a ben kon fu Brooklyn Bethel fu fisiti wi

[Prenki na tapu bladzijde 26]

Mi nanga mi wefi