Meki Howpu De wan Ankra gi Wi, èn Meki Lobi Pusu Wi

„Den dri disi, bribi, howpu, lobi, tan abra; ma a moro bigiwan fu den na lobi.”—1 KORENTESMA 13:13.

1. Sortu warskow na apostel Paulus e gi wi?

NA APOSTEL Paulus e warskow wi taki a bribi fu wi kan sungu, neleki wan sipi. A e taki dati wi musu „tan bribi èn tan abi wan bun konsensi, di son sma pusu go na wan sei, èn den lasi a bribi fu den leki wan sipi di sungu” (1 Timoteus 1:19). Na ini a fosi yarihondro G.T., sipi di ben waka na se ben meki fu udu. A bun di den ben bun fu waka na se ben anga fu na udu èn fu a fasi fa den ben bow.

2. Fu san ede a sipi fu wi bribi musu bow bun, èn san disi e aksi fu wi?

² A sani di wi ben sa kan kari a sipi fu a bribi fu wi, no musu sungu na mindri fu den krasi se fu libisma (Yesaya 57:20; Openbaring 17:15). Dati meki a musu bow bun, èn disi e anga fu wi. Di den „se” fu a libimakandra fu den Dyu nanga den Romesma ben kon krasi srefisrefi gi den Kresten fu fositen, dan Yudas ben skrifi: „Unu lobiwan musu bow unsrefi na tapu a moro santa bribi fu unu èn unu musu begi nanga santa yeye, èn sorgu na so wan fasi taki unu e tan na ini a lobi fu Gado, ala di unu e wakti a sari-ati fu wi Masra Yesus Krestes nanga têgo libi na prakseri” (Yudas 20, 21). Fu di Yudas ben taki tu dati wan sma musu feti gi „a bribi di den santa wan ben kisi’, dan a kan taki den wortu „a moro santa bribi” e taki fu ala den Kresten leri, so srefi a bun nyunsu fu frulusu (Yudas 3). Krestes na a fondamenti fu a bribi dati. Tranga bribi de fanowdu efu wi wani tan na a tru Kresten bribi.

Kakafutu gi a Bigi Winti fu „a Frede Di Sma Frede Sekte”

3. Fa son sma e gebroiki „a frede di sma frede sekte”?

³ Na ini den yari di no pasa so langa ete, wan tu leisi kaba sma du a kefalek ogri sani fu kiri densrefi na ipi-ipi èn fu kiri tra sma na ipi-ipi, èn terrorist ben kiri sma fu horibaka gi wan pikin sikrit sekte. Wi kan frustan taki furu sma, so srefi opregti politiek tiriman, broko den ede fa fu kibri sma, èn spesrutu den yonguwan di no sabi notinoti fu den sani disi, gi den sortu ogri sekte disi. Wi kan de seiker taki „a gado fu a seti fu sani disi” na a sma di e meki den bigi ogri disi pasa, èn na so fasi a meki taki sma kon frede sekte èn a e gebroiki dati teige a pipel fu Yehovah (2 Korentesma 4:4; Openbaring 12:12). Son sma gebroiki a situwâsi disi fu gens a wroko fu wi. Na wan tu kondre den bigin nanga sani, fu du neleki den wani kibri sma gi sani di „ogri sekte” kan du nanga sma, ma den e kari den Kotoigi fu Yehovah sondro fu abi leti èn na so fasi den e pori wi nen nanga lei. Disi meki na oso-fu-oso kotoigiwroko kon muilek na son kondre na Europa èn a meki taki son sma di ben studeri Bijbel nanga wi tapu nanga a studie fu den. Disi baka, ben meki taki son brada nanga sisa fu wi lasi-ati.

4. Fu san ede a gens di sma e gens wi no musu meki wi lasi-ati?

⁴ Ma te sma e gens wi, dan dati no musu meki wi lasi-ati, ma a musu tranga na overtoigi di wi abi taki wi abi a tru Kresten bribi (Mateus 5:11, 12). Sma ben taki dati den Kresten fu fositen ben de wan opruru sekte, èn na ala sei sma ben „taki sani teige den” (Tori fu den Apostel 24:5; 28:22). Ma na apostel Petrus ben gi den kompe-bribiman fu en deki-ati, di a ben skrifi: „Lobiwan, no fruwondru fu a faya di e bron na un mindri, di e pasa nanga unu leki wan tesi, neleki wan freimde sani miti unu. Heri tra fasi leki dati, tan abi prisiri, fu di unu abi wan prati na a pina di Krestes ben pina, so taki unu kan prisiri èn unu kan prisiri pasa marki tu na a ten te en glori sa tyari kon na krin” (1 Petrus 4:12, 13). Na so wan memre fu a fosi yarihondro tiri skin ben skrifi: „Si en leki wan trutru prisiri nomo, mi brada, te unu e miti difrenti tesi, fu di unu sabi taki na eigifasi disi fu un bribi di kisi tesi, abi horidoro leki bakapisi. Ma meki a horidoro tyari en wroko kon na wan kaba, so taki unu kan de volmaakti èn bun na ala fasi, no e mankeri noti” (Yakobus 1:2-4). Neleki fa tranga winti sa sori efu wan sipi bun fu waka na se, na so den bigi winti fu a gens di sma e gens wi, sa sori efu swaki presi de na ini a sipi fu wi bribi.

Banawtu E Meki Wi Horidoro

5. Fa wi kan de seiker taki a bribi fu wi no sa degedege te banawtu de?

⁵ Soso te Kresten kakafutu gi den bigi winti fu tesi, den kan de seiker taki den sa man horidoro èn taki a bribi fu den no sa degedege. A hori di wi e horidoro sa „tyari en wroko kon na wan kaba” na ini den krasi se, soso te wi „de volmaakti èn bun na ala fasi, [èn] no e mankeri noti”, so srefi wan tranga bribi. Paulus ben skrifi: „Na ala fasi wi e rikomanderi wisrefi na Gado leki bedinari: fu di wi ben musu frudrage furu, fu banawtu ede, fu nowtu ede, fu problema ede.”—2 Korentesma 6:4.

6. Fu san ede wi musu „prisiri ala di wi de ini banawtu”, èn fa disi e tranga a howpu fu wi?

⁶ Wi musu si den tranga winti fu tesi di wi kan ondrofeni son leisi leki okasi di wi e kisi fu sori taki a sipi fu wi bribi bun èn taki a no e degedege. Paulus ben skrifi den Kresten na Rome: „Meki wi prisiri ala di wi de ini banawtu, fu di wi sabi taki banawtu e meki horidoro kon, horidoro fu en sei, wan posisi taki den feni wi bun, a posisi taki den feni wi bun fu en sei, howpu, èn a howpu no e meki wi lasi-ati” (Romesma 5:3-5). Te wi e tanapu kánkan gi tesi, dan Yehovah sa feni wi bun. Disi baka, e tranga a bribi fu wi.

Fu San Ede a Sipi fu Son Sma Sungu

7. (a) Fa a sipi fu son sma ben sungu, soleki fa den wortu fu Paulus e sori? (b) Fa son sma na ini a ten disi gowe libi a waarheid?

⁷ Di Paulus ben warskow taki ’sipi ben o sungu’, dan a ben abi son sma na prakseri di ben „pusu” a bun konsensi fu den „go na wan sei” èn di ben lasi a bribi fu den (1 Timoteus 1:19). Wan tu fu den ben de Himeneus nanga Aleksander di ben fadon komoto na bribi èn di ben drai den baka gi a waarheid èn ben taki ogri sani fu sma na wan skempi fasi (1 Timoteus 1:20, futuwortu; 2 Timoteus 2:17, 18). Na ini a ten disi den sma di fadon komoto na bribi èn di drai den baka gi a waarheid e fon „a getrow èn koni srafu” nanga wortu, èn yu kan taki dati den e beti na anu di ben gi den nyanyan na yeye fasi. Son wan fu den gersi a „takru srafu” fu di den e taki krin: „A masra fu mi no e kon ete” (Mateus 24:44-49; 2 Timoteus 4:14, 15). Den e taki dati a kaba fu a godelowsu seti fu sani disi no de krosibei èn den e krutu a srafugrupu di de na ai na yeye fasi, taki den e meki a pipel fu Yehovah hori na ai taki a ten disi de prenspari (Yesaya 1:3). Den sma dati di fadon komoto na bribi e „pori a bribi fu son sma”, èn a bakapisi de taki a sipi fu den sma dati e sungu na yeye fasi.—2 Timoteus 2:18.

8. San meki a sipi fu a bribi fu son sma sungu?

⁸ Tra Kresten di gi densrefi abra na Gado, meki a sipi fu a bribi fu den sungu fu di den ben pusu a konsensi fu den go na wan sei èn den ben gi densrefi abra na a fasi fa a grontapu disi e suku soso prisiri èn e du seks hurudu sondro fu dwengi densrefi (2 Petrus 2:20-22). Trawan e meki a sipi fu a bribi fu den sungu fu di den e prakseri taki a lanpresi fu a nyun seti fu sani no de fu si ete. Fu di den no man taki soifri na sortu dei son wan fu den profeititori sa kon tru, èn fu di den e skoifi „a dei fu Yehovah” na wan tra ten na ini a prakseri fu den, meki den gowe libi a tru anbegi (2 Petrus 3:10-13; 1 Petrus 1:9). Fosi yu denki, den de baka na ini den trubu èn krasi watra fu a seti fu sani disi (Yesaya 17:12, 13; 57:20). Son sma di no e kon moro na a Kresten gemeente e bribi ete taki a gemeente abi a tru relisi. Ma soleki fa a sori, dan den no abi a pasensi èn a krakti fu horidoro di de fanowdu fu wakti a nyun grontapu di Yehovah Gado pramisi. A libi na ini a Paradijs no ben kon esi nofo gi den.

9. San wan tu Kresten di gi densrefi abra na Gado e du, èn san den tru tori disi musu meki wi go luku?

⁹ A sori leki na wan tu presi na grontapu, taki son Kresten di gi densrefi abra na Gado, saka den seiri fu a sipi fu a bribi fu den pikinso. A sipi no sungu, ma na presi taki den e waka esi-esi nanga ala den krakti na ini a bribi, den e waka safrisafri sondro fu hasti densrefi. Fu di son sma ben howpu taki a ’Paradijs ben o kon esi-esi’, meki den ben de klariklari fu du ala san den man fu kisi en — den ben de fayafaya na ini a preikiwroko èn den ben go na ala den konmakandra, den bigi konmakandra, nanga den kongres doronomo. Fu di den e denki now taki a ten di a howpu fu den sa kon tru de moro fara leki san den ben fruwakti, meki den no e du so furu muiti moro. Disi e kon na krin fu di den no e du someni moro na ini a preikiwroko, den e misi konmakandra, èn den e gi pasi fu misi pisi fu a programma fu den bigi konmakandra noso den kongres. Trawan e gi moro ten na prisiri èn na a bai di den e bai materia sani. Den tru tori disi musu meki wi go luku sortu krakti musu pusu wi fu kan libi akruderi a gi di wi gi wisrefi abra na Yehovah. ¿A de so, taki a faya di wi abi gi a diniwroko fu en musu anga fu a howpu taki a „Paradijs sa kon esi-esi”?

Teki Howpu Gersi wan Ankra

10, 11. Nanga sortu sani Paulus ben agersi a howpu fu wi, èn fu san ede na agersitori disi bun?

¹⁰ Paulus ben sori taki Yehovah ben pramisi fu blesi sma nanga yepi fu Abraham. Dan na apostel ben fruklari: „Gado . . . kon na mindri nanga wan sweri, so taki nanga yepi fu den tu sani di no kan kenki [a wortu fu en nanga a sweri di a sweri], èn di Gado no man lei kwetikweti, wi di lon go na a kibripresi kan kisi wan tranga deki-ati fu grabu a howpu di poti na wi fesi. A howpu disi wi abi leki wan ankra gi a sili, di e tanapu kánkan èn di no e degedege” (Hebrewsma 6:17-19; Genesis 22:16-18). A howpu di salfu Kresten abi na taki den sa libi na hemel sondro fu man dede. A moro bigi pisi fu Yehovah en futuboi na ini a ten disi, abi a moi howpu taki den sa libi fu têgo na ini wan paradijs na grontapu (Lukas 23:43). Sondro a howpu dati, wan sma no kan abi bribi.

¹¹ Wan ankra na wan tranga wrokosani di e gi kibri, èn a de trutru fanowdu fu meki wan sipi tan na en presi so taki a no e drifi gowe. No wan sipiman ben o go na se sondro wan ankra. Fu di den sipi pe Paulus ben de na tapu ben sungu wan tu leisi kaba, meki ondrofeni ben leri en taki nofotron a libi fu sma di de na se ben e anga fu den ankra fu a sipi fu den (Tori fu den Apostel 27:29, 39, 40; 2 Korentesma 11:25). Na ini a fosi yarihondro wan sipi no ben abi wan masyin di ben yepi a kapten fu stiri a sipi go pe a ben wani. Boiti den fetisipi di ben waka nanga yepi fu pari, den sipi ben abi soso a winti di ben man meki den go na fesi. Efu a sipi fu wan kapten ben de fu naki den klipston, dan a wan-enkri sani di a ben kan du ben de fu saka na ankra èn wakti te a bigi winti ben wai, ala di a ben frutrow taki na ankra no ben o lusu komoto na a gron fu se. Fu dati ede Paulus ben teki a howpu fu wan Kresten gersi „wan ankra gi a sili, di de kánkan èn di no e degedege” (Hebrewsma 6:19). Te gens noso tra tesi e miti wi neleki bigi winti, dan a moi howpu di wi abi de leki wan ankra di e meki wi leki libilibi sili tanapu kánkan, so taki a sipi fu wi bribi no sa suku fu go naki den ogri santibangi fu tweifri noso den kefalek klipston fu sma di fadon komoto na bribi.—Hebrewsma 2:1; Yudas 8-13.

12. Fa wi kan sorgu taki wi no e hari wisrefi puru fu Yehovah?

¹² Paulus ben warskow den Hebrew Kresten: „Luku bun, brada, taki no wan godelowsu ati di no abi bribi, e gro na ini wan fu unu, fu di yu e hari yusrefi puru fu a libilibi Gado” (Hebrewsma 3:12). Na ini a Griki tekst, ’hari puru’ wani taki trutru „fu tan farawe fu wan sani”, dati wani taki fu fadon komoto na bribi. Ma wi kan sorgu taki a sipi fu wi no e sungu kwetikweti. Bribi nanga howpu sa yepi wi fu tan na Yehovah, srefi te den moro bigi winti fu tesi e miti wi (Deuteronomium 4:4; 30:19, 20). A bribi fu wi no sa de leki wan sipi di den winti fu a leri fu sma di fadon komoto na bribi, e wai go-kon na ala sei (Efeisesma 4:13, 14). Èn efu wi abi howpu leki na ankra fu wi, dan wi sa man kakafutu gi den bigi winti na ini a libi leki futuboi fu Yehovah.

Lobi Nanga Santa Yeye E Pusu Wi

13, 14. (a) Fu san ede na ankra fu wi howpu wawan no nofo? (b) Sortu krakti musu pusu wi fu du santa diniwroko gi Yehovah, èn fu san ede?

¹³ Wan Kresten no sa man doro a nyun sistema efu a e dini Yehovah soso fu di a e howpu fu libi fu têgo na ini wan paradijs na grontapu. Ala di a e meki na ankra fu howpu de wan sani di e meki a tanapu kánkan ini a libi, a musu poti a bigi krakti fu lobi na dati tu èn na a bribi fu en. Paulus ben tyari disi kon na krin di a ben skrifi: „Den dri disi, bribi, howpu, lobi, tan abra; ma a moro bigiwan fu den na lobi.”—1 Korentesma 13:13.

¹⁴ A krakti di e pusu wi fu du santa diniwroko musu de trutru lobi gi Yehovah, leki wan fasi fu handri na tapu a tumusi bigi lobi di a abi gi wi. Na apostel Yohanes ben skrifi: „A sma di no abi lobi, no kon sabi Gado, bika Gado na lobi. Nanga disi, a lobi fu Gado ben kon na krin na ini wi kefal, taki Gado ben seni en wan-enkri gebore Manpikin kon na grontapu, so taki nanga yepi fu en wi ben sa kan kisi libi. Wi fu wi sei, wi lobi, fu di a ben lobi wi fosi” (1 Yohanes 4:8, 9, 19). Efu wi e warderi san Yehovah e du, dan a frulusu di wi wani kisi no musu de a moro prenspari sani di wi musu broko wi ede nanga dati, ma a fruteri di wi musu fruteri sma taki en santa nen musu kon santa èn taki en regtfardiki soevereiniteit musu kon regtfardiki.

15. San a lobi di wi lobi Yehovah abi fu du nanga a soevereiniteit fu en?

¹⁵ Yehovah wani taki wi musu dini en fu di wi lobi en, èn no soso a Paradijs. A Bijbel encyclopaedie Inzicht in de Schrifta e taki: „Yehovah e kisi glori fu di a soevereiniteit fu en èn a hori di den kriaturu fu en e horibaka gi dati, na moro furu fu di den lobi en. A wani soso den sma di lobi a soevereiniteit fu en fu di a abi tumusi bun eigifasi èn fu di a de regtfardiki, sma di wani no wan enkri tra soevereiniteit leki a wan disi (1Kor 2:9). Den no e pruberi fu libi sondro a soevereiniteit fu en, ma den bosroiti fu dini na ondro en — fu di den sabi en èn den sabi a lobi, a regtfardikifasi, nanga a koni fu en, di den e si leki sani di betre moro di fu den (Ps 84:10, 11)”—Pisi 2, bladzijde 201.

16. Fa a lobi gi Yesus na wan krakti di e pusu wi na ini wi libi?

¹⁶ Wi leki Kresten e sori tu taki wi lobi Yesus fu di Yesus lobi wi. Paulus ben rideneri: „A lobi di Krestes abi, e pusu wi, bika disi na san wi krutu, taki wán man dede gi ala sma; so bun, ala sma dede; èn en dede gi ala sma, so taki den wan di e libi, no musu libi moro langa gi densrefi, ma gi a sma di dede gi den èn di ben kisi wan opobaka” (2 Korentesma 5:14, 15). Na Krestes na a fondamenti pe wi bow wi libi na yeye fasi, wi bribi, èn wi howpu na tapu. A lobi di wi lobi Krestes Yesus e tranga a howpu fu wi èn a meki taki a bribi fu wi no e degedege, spesrutu te wi de na ini ten di de leki krasi winti. —1 Korentesma 3:11; Kolosesma 1:23; 2:6, 7.

17. Sortu krakti di e meki wi go na fesi, Yehovah e gi wi, èn fa Tori fu den Apostel 1:8 nanga Efeisesma 3:16 e sori taki a de prenspari?

¹⁷ Ala di a lobi di wi lobi Gado nanga en Manpikin na a moro prenspari krakti di e pusu wi na ini a Kresten libi fu wi, Yehovah e gi wi ete wan sani di e pusu wi, di e gi wi krakti èn di e tranga wi fu go doro nanga en diniwroko. Dati na en wroko krakti, noso santa yeye. Den Hebrew nanga Griki wortu di vertaal nanga „yeye” wani taki moro furu a buweigi di loktu e buweigi na wan krakti fasi, soleki winti. Seiri sipi leki den wan pe Paulus ben de na tapu, ben abi a krakti fu a winti, di sma no man si, fanowdu fu doro pe den ben musu go. Na so wi abi lobi nanga Gado en wroko krakti, di sma no man si, fanowdu efu a sipi fu wi bribi musu tyari wi na ini a diniwroko fu Yehovah.—Tori fu den Apostel 1:8; Efeisesma 3:16.

¡Tan Go na Fesi fu Doro Pe Wi Musu Go!

18. San sa meki wi kakafutu gi iniwan fasi fa wi bribi sa kisi tesi na ini a ten di e kon?

¹⁸ Fosi wi doro a nyun seti fu sani, a bribi nanga a lobi fu wi kan kisi hebi tesi. Ma Yehovah gi wi wan ankra di „de kánkan èn di no e degedege” — a moi howpu fu wi (Hebrewsma 6:19; Romesma 15:4, 13). Te sma e gens wi noso te tra tesi e miti wi, dan wi kan horidoro efu a howpu fu wi, ankra wi bun. Baka te a wán bigi winti wai, ma bifo wan trawan e bigin baka, meki wi abi a fasti bosroiti fu tranga a howpu èn a bribi fu wi.

19. Fa wi kan meki a sipi fu wi bribi tan na tapu a yoisti pasi so taki a e doro a lanpresi fu Gado en nyun grontapu?

¹⁹ Bifo Paulus ben taki fu na „ankra fu a sili”, a ben taki: „Wi wani taki ibriwan fu unu sori a srefi faya fu wroko [fu „hasti yusrefi”, futuwortu], fu kan de seiker fu a howpu te na a kaba, so taki unu no e kon lesi, ma tron sma di e waka baka den wan di nanga bribi èn nanga pasensi e kisi den pramisi” (Hebrewsma 6:11, 12). Nanga a lobi di wi abi gi Yehovah nanga en Manpikin di e pusu wi èn nanga a santa yeye di e tranga wi, meki wi hori a sipi fu wi bribi na tapu a yoisti pasi te leki wi doro a lanpresi fu a nyun grontapu di Gado pramisi wi.

[Futuwortu]

Fu Luku Sani Syatu Baka

◻ Sortu warskow di abi fu du nanga a bribi fu wi, Paulus ben gi wi?

◻ Fa a du kon taki a sipi fu son sma sungu na yeye fasi, èn fa trawan e du sani moro safrisafri?

◻ Sortu eigifasi fu Gado musu poti tu na a bribi fu wi?

◻ San sa yepi wi fu doro a lanpresi fu a nyun grontapu di Gado pramisi?

[Prenki na tapu bladzijde 16]

A sipi fu wi bribi musu bow bun so taki a kan kakafutu gi den bigi winti na ini a libi

[Prenki na tapu bladzijde 17]

A bribi fu wi ben kan sungu

[Prenki na tapu bladzijde 18]

Howpu na wan ankra gi a libi fu wi leki Kresten