Tan tranga a Kresten howpu fu yu

1. Sortu howpu Yehovah gi wi?

YEHOVAH gi wi a kefalek moi howpu fu libi fu têgo. Son sma abi a howpu fu libi fu têgo na hemel leki yeye di no man dede noiti moro (1 Kor. 15:50, 53). Ma furu sma abi a howpu fu libi fu têgo na grontapu pe den o de gosontu dorodoro èn den o de koloku trutru (Openb. 21:3, 4). Awinsi wi abi a howpu fu libi fu têgo na hemel noso na grontapu, a howpu di wi abi warti srefisrefi gi wi.

2. Fu pe a howpu fu wi e kon èn fu san ede wi kan taki dati?

² Na ini Bijbel, a wortu „howpu” wani taki dati „sma e fruwakti taki bun sani o pasa”. Wi e bribi a howpu di wi abi gi a ten di e kon, fu di na Yehovah gi wi a howpu dati (Rom. 15:13). Wi sabi san a pramisi wi èn wi sabi taki ala ten a e du san a pramisi (Num. 23:19). Wi de seiker taki Yehovah e angri fu du ala san a taki dati a o du èn a abi a makti fu du dati tu. Sobun a howpu fu wi a no den sani di wi srefi e prakseri noso san wi wani taki musu pasa. Ma a howpu fu wi e kon fu sani di wi sabi taki den tru.

3. San wi o luku na ini na artikel disi? (Psalm 71:5)

³ Wi hemel Papa lobi wi èn a wani taki wi e frutrow na en tapu. (Leisi Psalm 71:5.) Te a howpu di wi abi na ini Yehovah tranga, dan wi o man horidoro te wi e kisi tesi. Wan tranga howpu o meki taki wi abi deki-ati èn wi o tan de nanga prisiri. Meki wi go luku fa a howpu fu wi e kibri wi. Wi o luku fosi fa howpu de leki wan ankra èn leki wan helm. Baka dati, wi o luku fa wi kan tranga a howpu fu wi.

A HOWPU FU WI DE LEKI WAN ANKRA

4. Fa a howpu fu wi de leki wan ankra? (Hebrewsma 6:19)

⁴ Na ini a brifi di na apostel Paulus ben skrifi gi den Hebrewsma, a agersi a howpu fu wi nanga wan ankra. (Leisi Hebrewsma 6:19.) Fu di Paulus ben gwenti teki sipi fu go na tra kondre, meki a ben sabi taki sma ben e gebroiki ankra fu sorgu taki a sipi no drifi gowe. Wan leisi, a ben de na ini wan sipi di wan bigi winti bigin wai. Di a winti ben e wai, dan a si fa den botoman fringi den ankra go na ini a watra so taki a sipi no ben e go naki panya na tapu den bigi ston (Tori 27:29, 39-41). A howpu fu wi de leki wan ankra fu di a e yepi wi fu no drifi gowe fu Yehovah na ini muilek ten. A tranga howpu di wi abi e yepi wi fu no bruya na ini muilek ten, fu di wi sabi taki sani o go moro bun. Memre taki Yesus ben warskow wi taki sma ben o frufolgu wi (Yoh. 15:20). Sobun, te wi e denki dipi fu den blesi di Yehovah o gi wi na ini a ten di o kon, dan dati o yepi wi fu tan dini en.

5. Fa a howpu fu Yesus yepi en aladi a ben sabi taki a ben o dede?

⁵ Luku fa a howpu fu Yesus yepi en fu tan gi yesi na Yehovah aladi a ben sabi taki a ben o dede na wan ogri-ati fasi. Na a dei fu a Pinksterfesa fu a yari 33, na apostel Petrus taki fu wan profeititori na ini a buku Psalm di e sori taki Yesus no ben bruya srefisrefi. A profeititori disi e taki: „Mi o abi howpu. Yu no o libi mi na ini Grebi èn yu no o meki a skin fu a sma di e tai hori na yu, kon pori. . . . Mi o prisiri fu di yu feni mi bun” (Tori 2:25-28; Ps. 16:8-11). Aladi Yesus ben sabi taki a ben o dede, toku a ben abi a tranga howpu taki Gado ben o gi en wan opobaka èn taki a ben o prisiri fu de makandra baka nanga en Papa na hemel.​—Hebr. 12:2, 3.

6. San wan brada ben taki fu a howpu di wi abi?

⁶ A Kresten howpu fu wi yepi furu fu wi brada nanga sisa fu horidoro. Luku na eksempre fu Leonard Chinn, wan brada fu Ingrisikondre. Na a ten fu a Fosi Grontapufeti, den ben poti en na strafu-oso fu di a ben weigri fu go na ini a legre. Tu mun langa den poti en wawan na ini wan strafu-oso kamra èn baka dati a ben musu du tranga wroko. Bakaten a brada disi skrifi: „Den sani di mi ondrofeni meki mi kon frustan o prenspari a de fu abi howpu so taki wi man horidoro. Wi abi den eksempre fu Yesus, den apostel, den profeiti, èn wi abi den moi pramisi na ini Bijbel. Ala den sani disi e tranga a howpu di wi abi gi a ten di e kon èn den e gi wi deki-ati fu horidoro.” Neleki fa a howpu fu Leonard ben de leki wan ankra gi en, na so a howpu fu wi kan de leki wan ankra gi wi tu.

7. Fa tesi e tranga a howpu fu wi? (Romesma 5:3-5; Yakobus 1:12)

⁷ Te wi e horidoro te tesi miti wi, dan a howpu fu wi e kon moro tranga fu di wi si fa Yehovah yepi wi èn wi sabi taki a feni wi bun. (Leisi Romesma 5:3-5; Yakobus 1:12.) Te yu luku en bun, dan a howpu fu wi tranga moro leki di wi bigin poti bribi na ini a bun nyunsu. Satan wani taki den tesi fu wi e bruya wi, ma Yehovah kan yepi wi fu pasa ibriwan fu den tesi dati.

A HOWPU FU WI DE LEKI WAN HELM

8. Fa howpu de leki wan helm? (1 Tesalonikasma 5:8)

⁸ Bijbel e agersi a howpu fu wi tu nanga wan helm. (Leisi 1 Tesalonikasma 5:8.) Wan srudati e weri wan helm fu kibri en ede so taki den feanti no man gi en mankeri. Fu di wi e feti nanga Satan, meki wi musu kibri wi frustan so taki a no man pori en. A e gebroiki difrenti sani fu tesi wi èn fu pori a denki fu wi. Neleki fa a helm e kibri na ede fu wan srudati, na so a howpu fu wi e kibri a denki fu wi so taki wi kan tan krosibei na Yehovah.

9. San e pasa te sma no abi wan howpu?

⁹ A howpu di wi abi fu libi fu têgo o yepi wi fu gebroiki wi frustan èn teki koni bosroiti. Na a tra sei, efu a howpu fu wi no tranga moro èn wi e bigin prakseri sani di a sondu skin wani, dan wi kan frigiti a howpu di wi abi fu libi fu têgo. Luku san ben pasa nanga son Kresten di ben e libi na ini a foto Korente fu owruten. Den lasi bribi na ini wan prenspari sani di Gado ben pramisi èn dati na a howpu fu kisi wan opobaka (1 Kor. 15:12). Paulus ben taki dati sma di no e bribi na ini na opobaka e libi soso fu plisi den lostu fu den (1 Kor. 15:32). Na ini a ten disi, furu sma di no abi a howpu fu kisi den pramisi fu Gado e du ala san den man fu kan abi wan koloku libi nownow kaba. Ma wi de tra fasi fu di wi e poti wi frutrow tapu den sani di Gado pramisi wi gi a ten di e kon. A howpu fu wi de leki wan helm di e kibri a denki fu wi èn di e yepi wi fu no denki wi srefi nomo. Den sani disi ben o man pori a matifasi di wi abi nanga Yehovah.​—1 Kor. 15:33, 34.

10. Fa a howpu fu wi kan kibri wi gi fowtu denki?

¹⁰ A howpu fu wi di de leki wan helm kan kibri wi tu gi a denki taki noiti wi o man plisi Yehovah. Fu eksempre, son sma kan denki: ’Mi no o kisi têgo libi fu di mi no bun nofo. Noiti mi o man hori misrefi na den wet fu Gado.’ Memre taki Elifas di ben e du neleki en na wan mati fu Yob, ben e denki so tu. A ben taki: „Nowan libisma kan de krin.” A ben taki tu fu Gado: „Gado no e frutrow den santawan fu en èn hemel srefi no de krin gi en” (Yob 15:14, 15). Den sani disi na ogri-ati lei! Memre suma wani taki sma denki so. Na Satan. A sabi taki efu yu e tan prakseri den sani dati, dan a howpu fu yu no o tranga moro. Dati meki yu no musu bribi den lei dati èn yu musu tan poti prakseri na den pramisi fu Yehovah. Noiti yu musu tweifri taki a wani gi yu têgo libi èn taki a o yepi yu fu kon abi a libi dati.​—1 Tim. 2:3, 4.

TAN TRANGA A HOWPU FU YU

11. Fu san ede wi musu wakti nanga pasensi teleki a howpu fu wi kon tru?

¹¹ A no makelek ala ten fu tan tranga a howpu fu wi. Kande wi e weri fu tan wakti teleki Gado du san a pramisi. Ma te a gersi leki wan sani e teki langa gi wi, dan a de wan syatu pisi ten gi Yehovah fu di a de fu têgo (2 Petr. 3:8, 9). A o du san a pramisi, ma a no abi fu du dati na wan ten te wi e fruwakti dati. San kan yepi wi fu tan tranga a howpu fu wi aladi wi e wakti nanga pasensi teleki Gado du san a pramisi?​—Yak. 5:7, 8.

12. San bribi abi fu du nanga howpu, soleki fa Hebrewsma 11:1, 6 e sori?

¹² Wi o tan abi wan tranga howpu te wi e tan krosibei na Yehovah, fu di na en o meki a howpu fu wi kon tru. Fu taki en leti, Bijbel e sori taki efu wi wani abi howpu, dan wi musu bribi taki Yehovah de trutru èn taki „a e pai den wan di e suku en fayafaya”. (Leisi Hebrewsma 11:1, 6.) O moro wi e bribi taki Yehovah na wan trutru Gado, o moro wi o bribi taki a o du ala san a pramisi. Meki wi luku wan tu fasi fa wi kan tron moro bun mati fu Yehovah fu di disi o yepi wi fu tan tranga a howpu fu wi.

13. Fa wi kan kon moro krosibei na Gado?

¹³ Begi Yehovah èn leisi a Wortu fu en. Aladi wi no man si Yehovah, toku wi kan kon moro krosibei na en. Wi kan taki nanga en na ini begi èn wi no abi fu tweifri taki a o arki wi (Yer. 29:11, 12). Wi kan arki Gado te wi e leisi a Wortu fu en èn te wi e denki dipi fu en. Te wi e leisi fa Yehovah sorgu gi den wan di tai hori na en na ini a ten di pasa, dan a howpu fu wi o kon tranga moro nanga moro. Ala sani di skrifi na ini Gado Wortu ben „skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu.”​—Rom. 15:4.

14. Fu san ede wi musu denki dipi fu den sani di Yehovah du gi trawan?

¹⁴ Denki dipi fu a fasi fa Yehovah du san a pramisi. Luku san Gado ben du gi Abraham nanga Sara. Den ben doro a yari kaba taki den no ben o man meki pikin moro. Toku Gado ben pramisi den taki den ben o kisi wan pikin (Gen. 18:10). San Abraham du? Bijbel e taki: „Abraham ben bribi èn a ben abi a howpu taki a ben o tron a tata fu furu pipel” (Rom. 4:18). Aladi Abraham no ben sabi fa Yehovah ben o meki a sani disi kon tru, toku a ben de seiker taki Yehovah ben o du san a pramisi. Èn na dati pasa tu (Rom. 4:19-21). Den tori disi e leri wi taki wi kan abi a frutrow taki ala ten Yehovah o du san a pramisi, awinsi a gersi leki dati no o pasa noiti.

15. Fu san ede wi musu prakseri san Gado du gi wi?

¹⁵ Prakseri san Yehovah du gi yu. Prakseri den pramisi na ini Gado Wortu di yu srefi si taki den kon tru. Fu eksempre, Yesus pramisi taki en Papa o gi yu den sani di yu abi fanowdu fu man tan na libi (Mat. 6:32, 33). Yesus pramisi yu tu taki Yehovah o gi yu en santa yeye te yu e aksi en dati (Luk. 11:13). Yehovah ben du den sani dati di a pramisi. Kande yu kan prakseri tra sani di a pramisi èn di kon tru. Fu eksempre, a pramisi taki a o gi yu pardon, taki a o trowstu yu, èn taki a o gi yu san yu abi fanowdu fu man tan wan mati fu en (Mat. 6:14; 24:45; 2 Kor. 1:3). Te yu e denki dipi fu den sani di Yehovah du kaba gi yu, dan yu o abi moro frutrow na ini den sani di a o du gi yu na ini a ten di e kon.

PRISIRI NANGA A HOWPU DI WI ABI

16. Fu san ede a howpu fu wi de so wan warti kado?

¹⁶ A howpu di wi abi fu libi fu têgo na wan warti kado di Gado gi wi. Wi no man wakti teleki a switi ten dati doro èn wi de seiker taki a o kon. A howpu fu wi de leki wan ankra, fu di a e yepi wi fu horidoro te tesi e miti wi, te wi e kisi frufolgu, èn srefi te wi kan lasi wi libi. A howpu fu wi de leki wan helm, fu di a e kibri wi denki so taki wi e tan du san bun èn wi e weigri fu du san ogri. A howpu fu wi di komoto fu Bijbel e tyari wi kon moro krosibei na Gado èn a e sori wi o furu a lobi wi. Wi e kisi furu wini te wi e tan tranga a howpu fu wi.

17. Fu san ede a howpu fu wi e meki wi prisiri?

¹⁷ Na ini a brifi di Paulus ben skrifi gi den Romesma, a gi den deki-ati fu „prisiri nanga a howpu di [den] abi” (Rom. 12:12). Paulus ben kan prisiri fu di a ben de seiker taki efu a ben o tan gi yesi na Gado, dan a ben o kisi têgo libi na ini hemel. Wi kan prisiri tu nanga a howpu fu wi fu di wi de seiker taki Yehovah o du san a pramisi. A psalm skrifiman ben skrifi: „Koloku fu a sma . . . di e frutrow na tapu en Gado Yehovah. . . . En na a sma di de fu frutrow ala ten.”​—Ps. 146:5, 6.