Libi Nanga Yepi fu a Bribi Di Wi E Bribi na ini den Pramisi fu Gado
„Mi na a Sma di de Gado, èn no wan tra Gado no de, noso wan sma di de leki mi; a Sma di na a bigin, e fruteri san a kaba sa de, èn fu langa ten pasa kaba, den sani di no du.”—YESAYA 46:9, 10.
1, 2. San na wan tu difrenti sani di sma e prakseri fu a bumui di Gado e bumui nanga den afersi fu grontapu?
TE O fara Gado e go fu bumui ensrefi nanga den afersi fu grontapu? Sma abi difrenti prakseri fu disi. Wan prakseri na taki a no e bumui kwetikweti. A prakseri disi e taki dati now di Gado kria libisma kaba, dan a no wani noso a no man du wan sani fu a bun fu wi ede. Te yu e luku a tori na a fasi disi, dan Gado de leki wan papa di e poti en manpikin na tapu wan nyun baisigri, a e meki a baisigri tanapu sondro fu degedege, èn a e pusu en gowe so taki a manpikin fu en e bigin rèi. Baka dati, a papa e waka gowe. A boi de sondro yepi; kande a sa fadon noso kande a no sa fadon. Awansi fa a no fa, a papa no abi noti fu du nanga a tori moro.
2 Wan tra prakseri na taki Gado e tiri ibri pisi fu wi libi èn taki a abi langalanga fu du nanga ibri sani di pasa sensi di a ben kria sani. Ma efu dati de so, dan son sma ben o taki dati Gado e meki bun sani pasa, ma a e meki ogri sani nanga sari sani pasa tu di e kwinsi libisma. Efu wi sabi a waarheid fu a fasi fa Gado e wroko, dan dati sa yepi wi fu sabi san wi kan fruwakti fu en. A sa tranga a bribi fu wi taki den pramisi fu en sa kon tru seiker.—Hebrewsma 11:1.
3. (a) Fa wi du sabi taki Yehovah na wan Gado di abi prakseri? (b) Fu san ede den e taki dati Yehovah e ’meki’ èn ’e seti’ den prakseri fu en?
3 Wan prenspari sani fu na aksi efu Gado e bumui nanga den afersi fu libisma, na taki Yehovah na wan Gado di abi prakseri. Disi e kon na krin na ini en eigi nen. „Yehovah” wani taki „A E Meki Sani Du kon”. Safrisafri Yehovah e meki ensrefi kon de a Sma di e meki ala den pramisi fu en kon tru. Dati meki den e taki dati Yehovah ’e meki’, noso e seti a prakseri fu en di abi fu du nanga den sani o pasa noso den sani a o du (2 Kownu 19:25; Yesaya 46:11). Den wortu disi komoto na a Hebrew wortu ya·tsarʹ di abi fu du nanga a wortu di wani taki „patu-bakriman” (Yeremia 18:4). Neleki fa wan koni patu-bakriman kan meki wan pisi tokotoko kon tron wan moi prapi, na so Yehovah kan meki sani pasa soleki fa en wani.—Efeisesma 1:11.
4. Fa Gado ben sreka grontapu fu meki libisma libi na tapu?
4 Fu eksempre, Gado ben abi na prakseri taki grontapu ben o de wan kefalek moi presi pe volmaakti sma di ben e gi yesi, ben musu libi na tapu (Yesaya 45:18). Langaten bifo Yehovah ben kria a fosi man nanga uma, a ben sreka sani gi den fu di a ben lobi den. Den fosi kapitel fu a buku Genesis e taki fa Yehovah ben poti dei nanga neti, a doti nanga se. Baka dati a ben kria bon, bromki nanga den sortu sani dati èn meti. A ben teki furu dusun yari fu sreka grontapu fu meki libisma libi na tapu. A ben kaba a wroko disi bun. A fosi man nanga uma ben bigin a libi fu den na ini Eden, wan moi paradijs di ben abi ala sani, so taki den ben kan prisiri fu a libi (Genesis 1:31). Na so Yehovah ben bumui ensrefi langalanga nanga den afersi na grontapu, èn safrisafri a ben seti den wroko fu en akruderi a moi prakseri fu en. ¿A no ben bumui nanga grontapu moro di a libisma famiri ben kon moro bigi?
Yehovah No E Bumui Someni Moro Nanga Libisma
5, 6. Fu san ede Gado no e bumui dorodoro nanga libisma?
5 Ala di Yehovah abi a makti fu tiri èn fu basi ibri sani di libisma e du, toku a no e du dati. Sani de di meki taki a no e du disi. Wan fu den sani na taki libisma ben kria na a prenki fu Gado, èn den abi wan fri wani, den man teki den eigi bosroiti. Yehovah no e dwengi wi fu du san a e taigi wi fu du; èn wi a no popki tu di a e du nanga den san a wani (Deuteronomium 30:19, 20; Yosua 24:15). Ala di Gado e aksi wi frantwortu fu den sani di wi e du, toku a gi wi furu fri fu bosroiti fa wi wani seti wi libi, fu di a lobi wi.—Romesma 14:12; Hebrewsma 4:13.
6 Wan tra sani fu san ede Gado no e tiri ibri sani di e pasa, abi fu du nanga a streipenti di Satan ben opo na ini Eden. Satan ben tyalensi a soevereiniteit fu Gado. A ben sori Eva wan sani di ben gersi wan okasi fu libi sondro fu abi Gado fanowdu — wan sani di en èn baka ten en masra Adam ben teki (Genesis 3:1-6). Fu dati ede Gado ben meki libisma tiri densrefi wan pisi ten fu buweisi efu Satan ben abi leti nanga a tyalensi di a ben tyalensi en. Fu dati ede sma no kan taki dati na Gado e du den ogri di sma e du na ini a ten disi. Moses ben skrifi fu opruru sma: „Den fu den sei, handri na wan pori fasi; den no de [Gado] pikin, a mankeri didon na densrefi.”—Deuteronomium 32:5.
7. San Yehovah abi na prakseri nanga grontapu èn nanga libisma?
7 Ma ala di Yehovah meki sma bosroiti sani fu densrefi èn a meki den pruberi fu tiri sondro en, toku A no sori taki a no e bumui ensrefi moro nanga den afersi fu grontapu, wan sani di no ben o gi wi furu howpu taki a sa meki den pramisi fu en kon tru. Ala di Adam nanga Eva ben opo densrefi teige a soevereiniteit fu Gado, toku Yehovah no ben kenki a prakseri di a abi gi grontapu èn gi libisma di e sori taki a lobi den. A de seiker taki a sa kenki grontapu kon tron wan paradijs, pe volmaakti sma di e gi yesi na en èn di de koloku sa libi na tapu (Lukas 23:42, 43). A bijbeltori fu Genesis te Openbaring e fruteri fa Yehovah wroko safrisafri fu meki a prakseri dati kon tru.
Gado E Du Sani fu Meki a Wani fu En Kon Tru
8. Sortu sani ben musu du fu tyari den Israèlsma go na a Pramisi Kondre?
8 Na a fasi fa Gado ben wroko nanga a nâsi Israèl a ben sori taki a sa meki en prakseri kon tru. Fu eksempre, Yehovah ben gi Moses a dyaranti taki a ben o fri den Israèlsma fu Egipti èn a ben o tyari den go na ini a Pramisi Kondre, wan kondre di lai merki nanga oni (Exodus 3:8). Dati ben de prenspari fruklari di ben e trowstu den. Disi ben wani taki dati a ben o fri den Israèlsma, di makandra nanga den kompe fu den — di ben e teri so wan dri milyun sma — fu wan bigi nâsi di no ben wani kwetikweti taki den ben musu gowe (Exodus 3:19). Tranga nâsi di ben o du ala sani fu den no kon drape ben libi na ini a kondre pe Gado ben o tyari den go (Deuteronomium 7:1). Den Israèlsma ben musu abra wan gran sabana pe den ben o abi nyanyan nanga watra fanowdu. Disi ben de wan situwâsi di ben o gi Yehovah na okasi fu sori en bigi krakti leki Gado.—Lefitikus 25:38.
9, 10. (a) Fu san ede Yosua ben man taki dati sma kan frutrow den pramisi fu Gado? (b) O prenspari a de taki wi e bribi taki Gado man pai den sma di de getrow na en?
9 Gado ben du wan heri ipi bigi sani fu puru den Israèlsma na ini Egipti. Fosi, a ben tyari tin hebi plaag kon na tapu a nâsi Egipti. Dan a ben prati a Redi Se na tu, so taki den Israèlsma ben man lowe ala di den legre fu Egipti dede, di den ben hari go na baka den Israèlsma (Psalm 78:12, 13, 43-51). Baka dati, a ben sorgu fu den Israèlsma na ini den 40 yari di den ben de na ini a gran sabana, fu di a ben gi den mana fu nyan, a ben gi den watra, èn a ben sorgu srefi taki den dyakti fu den no ben priti èn taki den futu no ben kon sweri (Deuteronomium 8:3, 4). Baka di den Israèlsma ben go na ini a Pramisi Kondre, dan Yehovah ben meki den wini den feanti fu den. Yosua di ben bribi tranga na ini den pramisi fu Yehovah, ben si ala den sani disi. Dati meki a ben kan taigi den owru man fu en ten nanga ala frutrow: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu.”—Yosua 23:14.
10 Neleki Yosua fu owruten, na so Kresten na ini a ten disi e frutrow dorodoro taki Gado wani du èn man du sani fu a bun fu den sma di e dini en. Na overtoigi disi na wan prenspari pisi fu a bribi fu wi. Na apostel Paulus ben skrifi: „Sondro bribi wan sma no man plisi en na wan bun fasi, bika a sma di e kon na Gado, musu bribi taki . . . a e tron a sma di e pai den wan di e suku en seryusu.”—Hebrewsma 11:6.
Gado Man Si a Tamara na Fesi
11. San meki Gado man meki den pramisi fu en kon tru?
11 Te so fara wi si kaba taki ala di Gado e gi sma na okasi fu gebroiki a fri wani fu den èn fu tiri sondro en, toku a abi a makti èn a abi a wani fu du sani fu meki a prakseri fu en kon tru. Ma wan tra sani de di meki taki wi kan de seiker taki den pramisi fu Gado sa kon tru. Yehovah man si a tamara na fesi (Yesaya 42:9). Gado ben gebroiki en profeiti fu taki: „Memre den fosi sani fu langa ten pasa kaba, taki mi na a Sma di de Gado, èn no wan tra Gado no de, noso wan sma di de leki mi; a Sma di na a bigin, e fruteri san a kaba sa de, èn fu langa ten pasa kaba, den sani di no du; a Sma di e taki: ’Mi eigi rai sa tan, èn ala san na mi prisiri, mi sa du’” (Yesaya 46:9, 10). Wan gronman di abi ondrofeni sabi o ten èn o pe a musu sai siri, ma toku a no sabi seiker fa sani sa waka. Ma „a Kownu fu têgo ten” abi a yoisti sabi fu si soifri na fesi o ten èn o pe a musu du wan sani fu meki a prakseri fu en kon tru.—1 Timoteus 1:17.
12. Fa Yehovah ben gebroiki a makti di a abi fu sabi sani na fesi, na ini a ten fu Noa?
12 Luku fa Gado ben gebroiki a makti di a abi fu sabi sani na fesi na ini a ten fu Noa. Fu di someni ogri ben pasa na grontapu, meki Gado ben bosroiti fu tyari wan kaba kon na a trangayesi libisma famiri. A ben poti wan ten te a ben o du disi, na baka 120 yari (Genesis 6:3). Di Yehovah ben poti a spesrutu ten dati, dan a ben hori moro sani na prakseri leki soso a kiri di a ben o kiri den godelowsu sma nomo, wan sani di a ben man du o ten a ben wani. A ten di Yehovah ben poti ben gi den regtfardikisma na okasi tu fu tan na libi. (Teki gersi Genesis 5:29.) Fu di Gado koni, meki a ben sabi na fesi o ten a ben musu gi sma a wroko di ben o frulusu den. A ben fruteri Noa nofo sani finifini. èn Noa ben musu bow wan ark „fu kibri na osofamiri fu en” èn wan frudu di ben o kon na heri grontapu ben o kiri den godelowsu sma.—Hebrewsma 11:7; Genesis 6:13, 14, 18, 19.
Wan Bun Bigi Bow-wroko
13, 14. Fu san ede a ben de wan tyalensi fu bow na ark?
13 Luku a wroko disi fa Noa ben si en. Fu di Noa ben de wan man fu Gado, meki a ben sabi taki Yehovah ben kan kiri den godelowsu sma. Ma bifo dati ben o pasa, wroko ben de fu du — wan wroko pe bribi ben de fanowdu. A bow fu na ark ben o de wan bun bigi wroko. Gado ben taki o bigi a ben musu de. Na ark ben o langa moro son sportveld na ini a ten disi èn a ben o hei leki wan oso di abi feifi sodro (Genesis 6:15). Den bowman no ben o abi ondrofeni èn den no ben o de nanga furu. Den no ben o abi den kefalek koni wrokosani nanga masyin di wi abi na ini a ten disi. Boiti dati, fu di Noa no ben man sabi a tamara na fesi soleki fa Gado man, meki no wan fasi ben de fa a ben man sabi fa a situwâsi ben o de baka wan tu yari, di ben kan yepi noso gens a bow-wroko. A kan taki Noa ben prakseri dipi fu furu aksi. Fa a ben sa feni den sani fu bow? Fa a ben o tyari den meti kon na wán? Sortu nyan ben o de fanowdu èn omeni? San na a yoisti ten o ten a Frudu di Gado ben taki na fesi, ben o kon?
14 Dan yu ben abi a fasi fa a libimakandra ben de. Bun furu ogri ben e du. Den tranga Nefilim — den basrapikin fu den godelowsu engel nanga umasma — ben meki grontapu kon furu nanga ogri di ben du nanga tranga (Genesis 6:1-4, 13). Boiti dati, den no ben o man bow wan ark sondro fu sma sabi. Sma ben o aksi densrefi san Noa ben e du, èn a ben sa abi fu taigi den (2 Petrus 2:5). ¿A ben kan fruwakti taki den ben o feni disi bun? ¡Kwetikweti! Wan tu yari na fesi, a getrow Heinòk ben meki bekènti taki den godelowsu sma ben o dede. Sma no ben lobi a boskopu fu en, na so fasi taki Gado „ben teki en”, noso ben syatu en libi, kande fu no meki den feanti fu En kiri Heinòk (Genesis 5:24; Hebrewsma 11:5; Yudas 14, 15). Noa no ben musu meki so wan boskopu di sma no ben lobi bekènti nomo, ma a ben musu bow wan ark tu. ¡Te na ark dati ben e bow, a ben o de leki wan krakti marki di ben o memre sma na a getrowfasi fu Noa, ala di a ben kisi fu du nanga den den godelowsu sma fu en ten!
15. Fu san ede Noa ben abi na overtoigi taki a ben kan du a wroko di a ben kisi fu du?
15 Noa ben sabi taki na Almakti Gado ben e horibaka gi a bow-wroko èn taki a ben e blesi en. ¿A no Yehovah srefi ben gi en a wroko? Yehovah ben gi Noa a dyaranti taki en nanga en osofamiri ben o go na ini wan ark te a ben kaba èn den ben o tan na libi te a Frudu ben o kon na heri grontapu. Gado ben sori nanga wan seryusu frubontu srefi taki a tori dati ben de seiker (Genesis 6:18, 19). Soleki fa a sori, dan Noa ben sabi taki Yehovah ben fruwakti èn ben ondrosuku ala sani di ben abi fu du nanga na afersi bifo a ben gi Noa a wroko. Boiti dati, Noa ben sabi taki Yehovah ben abi a makti fu yepi en te dati ben de fanowdu. Dati meki a bribi fu Noa ben meki en du san a ben musu du. Neleki en bakapikin Abraham, na so Noa ben „abi na overtoigi dorodoro taki san [Gado] ben pramisi, a ben sa man du tu”.—Romesma 4:21.
16. Fa a bribi fu Noa ben kon tranga, ala di a wroko fu na ark ben e du?
16 Ala di den yari ben e pasa èn na ark ben kon de fu si, a bribi fu Noa ben kon moro tranga. Den ben lusu den problema di ben abi fu du nanga a bow-wroko èn tra finifini tori. Den ben man kakafutu gi tesi. No wan gens ben man tapu a wroko. Na osofamiri fu Noa ben firi taki Yehovah ben horibaka gi den èn taki a ben gi den kibri. Ala di Noa ben go doro, ’na eigifasi fu en bribi di kisi tesi, ben abi horidoro leki bakapisi’ (Yakobus 1:2-4). Te fu kaba, na ark ben kaba, a Frudu ben kon, èn Noa nanga en osofamiri ben tan na libi. Noa ben si taki den pramisi fu Gado ben kon tru, neleki fa a ben de nanga Yosua baka ten. A bribi fu Noa ben kisi pai.
Yehovah E Horibaka gi a Wroko
17. Fa a ten fu wi gersi a ten fu Noa?
17 Yesus ben taki na fesi dati a ten fu wi ben o gersi a ten fu Noa. Agen Gado bosroiti fu kiri den godelowsu sma èn a poti wan ten fu disi pasa (Mateus 24:36-39). A sreka sani tu fu meki den regtfardiki sma tan na libi. Ala di Noa ben musu bow wan ark, den futuboi fu Gado na ini a ten disi musu meki den prakseri fu Yehovah bekènti, den musu leri sma a Wortu fu en, èn den musu meki disipel.—Mateus 28:19.
18, 19. Fa wi sabi taki Yehovah e horibaka gi a wroko fu preiki a bun nyunsu?
18 Efu Yehovah no ben de nanga Noa fu horibaka gi en èn fu yepi en, dan na ark no ben o bow. (Teki gersi Psalm 127:1.) Na so a de tu taki sondro a yepi fu Yehovah, a tru Kresten bribi no ben man tan kande, èn a no ben o go bun nanga en kwetikweti. Gamalièl, wan lespeki Fariseiman nanga leriman fu a Wet, ben erken disi na ini a fosi yarihondro. Di a Dyu Sanhedrin ben wani puru den apostel na pasi, dan a ben warskow a krutubangi dati: „No bumui nanga den sma disi, ma libi den; (bika, efu a prakseri disi noso a wroko disi na fu libisma, dan unu sa man tapu den; ma efu a de fu Gado, dan unu no sa man tapu den).”—Tori fu den Apostel 5:38, 39.
19 Den bun bakapisi di den ben abi nanga a preikiwroko na ini a fosi yarihondro èn na ini a ten disi, sori taki disi a no a wroko fu libisma, ma fu Gado. Na artikel di e kon sa taki fu wan tu moi situwâsi nanga sani di ben pasa fu meki a wroko waka so kefalek bun.
¡No Lasi-ati Noiti!
20. Suma e horibaka gi wi te wi e preiki a bun nyunsu?
20 Ala di wi e libi na ini „muilek ten di tranga fu pasa”, toku wi kan de seiker taki Yehovah sabi soifri san a e du. A e horibaka gi en pipel èn e yepi den ala di den e du a wroko fu preiki a bun nyunsu bifo a ten doro di Gado poti fu tyari wan kaba kon na a godelowsu seti fu sani disi (2 Timoteus 3:1; Mateus 24:14). Yehovah e gi wi a kari fu de „kompe-wrokoman” fu en (1 Korentesma 3:9). Wi abi a dyaranti tu taki Krestes Yesus de nanga wi ini a wroko disi èn taki wi kan frutrow na tapu taki den engel e horibaka gi wi èn e tiri wi.—Mateus 28:20; Openbaring 14:6.
21. Sortu overtoigi wi no musu lasi-ati noiti?
21 Fu di Noa nanga en osofamiri ben bribi na ini den pramisi fu Yehovah, meki den no dede na ini a watra fu a frudu. Den sma di e sori a srefi bribi na ini a ten disi no sa dede na ini a „bigi banawtu” di e kon (Openbaring 7:14). Wi e libi na ini ten di span srefisrefi. ¡Prenspari sani musu pasa ete! Dyonsro Gado sa tyari kefalek moi nyun hemel nanga wan nyun grontapu pe regtfardikisma sa tan (2 Petrus 3:13). Noiti, noiti no lasi na overtoigi di yu abi taki ala sani di Gado e taki, a sa man du tu.—Romesma 4:21.
Penti fu Hori na Prakseri
◻ Fu san ede Yehovah no e tiri ala sani di libisma e du?
◻ Fa a ben kon na krin ini a fasi fa Yehovah ben handri nanga Israèl, taki a abi a makti fu du san a abi na prakseri?
◻ Fa a ben de fu si na ini a ten fu Noa, taki Yehovah abi a makti fu si a tamara na fesi?
◻ Sortu bribi wi kan abi na ini den pramisi fu Gado?