Yehovah Na Mi Klipston

SOLEKI FA EMMANUEL LIONOUDAKIS BEN FRUTERI

Mi mama ben span en fesi èn ben taigi mi: „Efu yu e tan na yu bosroiti, dan yu sa abi fu gowe fu na oso disi.” Mi ben teki a bosroiti fu preiki fu Gado Kownukondre leki wan furuten preikiman. Ma mi famiri no ben man tyari a syen di den ben kisi fu di skowtu ben aresteri mi ibritron baka.

MI PAPA NANGA MAMA ben de sma di ben abi sakafasi èn den ben abi frede gi Gado. Den ben libi na ini a dorpu fu Douliana, na a westsei fu a Griki èilanti Kreta, pe mi ben gebore na ini a yari 1908. Fu sensi mi yongu yari den ben leri mi fu frede èn fu lespeki Gado. Mi ben lobi a Wortu fu Gado, ala di noiti mi ben si wan Bijbel na ini den anu fu den skoromeester noso den priester fu a Griki Ortodox Kerki.

Baka di wan birman ben leisi den siksi pisi fu Studies in the Scriptures, di C. T. Russell ben skrifi, èn a buku The Harp of God, dan nanga faya a ben fruteri mi den Bijbel tori di ben de na ini èn di ben opo mi ai. Den Bijbel Ondrosukuman, soleki fa den ben kari Yehovah Kotoigi na a ten dati, ben tyari den buku dati kon na doro. Nanga prisiri mi ben teki wan Bijbel èn wan tu buku fu a Waktitoren Genootschap kantoro na ini Athene. Mi man memre ete taki mi ben tan wiki bun lati na neti nanga a birman dati, e begi Yehovah èn nanga kandrafaya wi ben e studeri den Buku fu Bijbel finifini nanga yepi fu den publikâsi dati.

Mi ben abi 20 yari èn mi ben e wroko leki wan skoromeester na ini wan krosibei dorpu, di mi ben bigin fruteri tra sma den nyun sani di mi ben leri fu Bijbel. Syatu na baka, fo fu wi ben hori konmakandra doronomo fu studeri Bijbel na ini Douliana. Wi ben prati so srefi traktaat, brochure, buku, nanga Bijbel fu yepi tra sma fu leri sabi a wan-enkri howpu gi a libisma famiri, a Kownukondre fu Gado.

Na ini 1931 wi ben de na mindri den dusundusun sma na heri grontapu di ben teki a Bijbel nen Yehovah Kotoigi (Yesaya 43:10). Na ini a yari na baka, wi ben abi wan prati na ini a propaganda fu gi sma bodoi, pe wi ben taigi den tiriman san na a nyun nen fu wi èn san a wani taki. Disi ben wani taki dati wi ben prati wan brochure di e taki fu a prenspari tori disi, gi ibri priester, krutubakra, skowtu, nanga bisnisman na ini wi kontren.

Soleki fa wi ben fruwakti, den kerki fesiman ben sutu faya fu frufolgu wi. A fosi leisi di den ben aresteri mi, den ben seni mi 20 dei go na ini strafu-oso. Syatu baka di den ben lusu mi, den ben aresteri mi baka èn ben seni mi wán mun na ini strafu-oso. Di wan krutubakra ben komanderi wi fu no preiki moro, dan wi ben piki nanga den wortu fu Tori fu den Apostel 5:29: „Wi musu gi yesi na Gado leki tiriman moro leki na libisma.” Baka dati, na ini 1932, wan sma di ben e teki presi gi a Waktitoren Genootschap ben fisiti a pikin grupu fu wi na ini Douliana, èn wi ala fo ben dopu.

Feni wan Famiri na Yeye Fasi

Fu di mi ben abi na angri fu du moro na ini a preikiwroko, meki mi ben gowe libi mi wroko leki skoromeester. Mi mama no ben man frudrage dati. A ben komanderi mi fu gowe libi na oso. Nanga a primisi fu a Waktitoren bijkantoro na ini Athene, wan bun Kresten brada na ini a foto Iráklion, Kreta, ben teki mi nanga prisiri na ini en oso. Fu dati ede, na ini augustus 1933, den brada fu a dorpu fu mi, makandra nanga wan tu sma di ben abi belangstelling, ben kon na a bushalte fu taigi mi adyosi. Disi ben de wan kefalek sari momenti, èn wi alamala ben krei, bika wi no ben sabi seiker o ten wi ben o si makandra baka.

Na ini Iráklion mi ben tron wan memre fu wan lobi-ati famiri na yeye fasi. Dri Kresten brada èn wan sisa ben de nanga suma wi ben miti doronomo fu studeri èn fu anbegi. Nanga mi eigi ai mi ben man si a kontru fu a pramisi fu Yesus: „No wan sma libi oso noso brada noso sisa noso mama noso papa noso pikin noso pranigron fu mi ede èn fu a bun nyunsu ede, di no sa kisi wan hondro tron nownow, na ini a pisi ten disi, oso nanga brada nanga sisa nanga mama” (Markus 10:29, 30). Mi toewijzing ben de fu preiki na ini a foto dati èn na ini den krosibei dorpu. Na baka di mi ben wroko a foto kaba, mi ben go doro fu wroko na ini den departement fu Iráklion nanga Lasithion.

A Wan-enkri Pionier

Mi ben e waka furu yuru fu go fu a wan dorpu na a trawan. Boiti dati, mi ben musu tyari furu kilo buku, fu di den publikâsi no ben kon nanga boto doronomo. Bika mi no ben abi wan presi fu sribi, mi ben e go na ini wan presi pe den ben seri kofi nanga tra sani fu dringi na ini a dorpu, èn ben e wakti te leki a lasti klanti ben gowe — moro furu dati ben de na baka mindrineti — èn mi ben e sribi na tapu wan langa bangi, èn mi ben e opo fruku mamanten a tra dei bifo na eiginari ben bigin seri sani fu dringi. Furu loso ben e didon nanga mi tu na tapu den langa bangi dati.

Ala di sma ben handri moro furu na wan mi-no-kefasi, toku mi ben breiti fu gi Yehovah a krakti fu mi yongu yari. Te mi ben feni wan sma di ben abi belangstelling gi a waarheid fu Bijbel, dan disi ben tranga a bosroiti di mi ben abi fu go doro nanga a diniwroko disi di e frulusu sma. Demakandra nanga den brada fu mi na yeye fasi ben gi mi krakti tu. Mi ben e miti den na baka te mi no ben de gi 20 te go miti 50 dei, èn dati ben anga fu o fara fu a foto Iráklion mi ben e preiki.

Mi man memre krinkrin ete fa mi ben firi misrefi mi wawan wan bakadina, spesrutu te mi ben e prakseri taki mi Kresten brada nanga sisa na ini Iráklion ben o abi den konmakandra soleki fa den gwenti a neti dati. Na angri di mi ben abi fu si den ben tranga so kefalek taki mi ben bosroiti fu waka a pasi fu moro leki 25 kilometer fu doro pe den ben de. Noiti mi waka so esi. ¡A ben gi mi trowstu srefisrefi fu abi a switi demakandra nanga den brada fu mi a neti dati èn fu furu a yeye maksin fu mi baka, fu taki en so!

Na baka wan syatu pisi ten a tranga muiti di mi ben du fu preiki ben bigin tyari froktu. Soleki fa a ben de na ini den dei fu den apostel, ’Yehovah ben tan tyari den wan di kisi frulusu, kon na wi’ (Tori fu den Apostel 2:47). A nomru fu sma di tron anbegiman fu Yehovah ben bigin gro na ini Kreta. Mi no ben firi misrefi mi wawan moro fu di tra sma ben kon fu wroko makandra nanga mi na ini a diniwroko. Wi ben horidoro na ondro problema na skin fasi èn na ondro faya gens. Wi aladei nyanyan ben de brede, makandra nanga eksi, olijf, noso gruntu di wi ben kan kisi na presi fu den buku di wi ben gi sma di wi ben preiki gi èn di ben teki den.

Na ini a foto Ierápetra, na a zuid-owstu pisi fu Kreta, mi ben preiki gi Minos Kokkinakis, wan krosi seriman. Ala di mi ben tan du muiti fu bigin wan bijbelstudie nanga en, a no ben abi furu ten bika a ben abi furu fu du ini a libi. Ma di a ben bosroiti te fu kaba fu de seryusu nanga a studie, dan a ben tyari bigi kenki kon na ini en libi. A ben tron so srefi wan fayafaya preikiman fu a bun nyunsu. Emmanuel Paterakis, wan wrokoman fu Kokkinakis di ben abi 18 yari, ben fruwondru fu den kenki dati, èn heri esi a ben aksi Bijbel publikâsi. ¡Mi ben breiti srefisrefi fu si Emmanuel e tan gro na yeye fasi èn te fu kaba a ben tron wan zendeling!a

Disiten a gemeente na ini mi dorpu ben e tan gro èn ben abi 14 preikiman now. ¡Noiti mi sa frigiti a dei di mi ben leisi wan brifi di mi ben kisi fu mi sisa Despina, di ben e taki dati en nanga mi papa nanga mama ben teki a waarheid èn taki now den ben de dopu anbegiman fu Yehovah!

Horidoro na Ondro Frufolgu èn a Yagi Di Den Ben Yagi Mi

A Griki Ortodox Kerki ben bigin si a preikiwroko fu wi leki wan strafu fu sprenka di ben e tyari pori kon, èn den ben abi a fasti bosroiti fu masi wi. Na ini maart 1938, den ben tyari mi go na fesi a publiki krutuman di ben komanderi taki mi ben musu gowe libi a kontren wantewante. Mi ben piki taki a preikiwroko fu wi ben gi winimarki èn taki wan moro hei tirimakti, wi Kownu Yesus Krestes ben tiri a wroko fu wi.—Mateus 28:19, 20; Tori fu den Apostel 1:8.

A dei na baka, den ben seni kari mi kon na a skowtu-oso fu a birti. Drape mi ben yere taki den ben si mi leki wan kefar gi a publiki èn a strafu di mi ben kisi, ben de taki den ben yagi mi wán yari go na a eilanti Amorgos na ini na Ege-is Se. Baka wan tu dei den ben bui mi anu èn ben tyari mi nanga boto go na a eilanti dati. Na Amorgos no wan tra Kotoigi fu Yehovah ben de. ¡Prakseri fa mi ben fruwondru baka siksi mun, di mi ben yere taki wan tra Kotoigi ben seni go tu na a èilanti! Suma a ben o de? Minos Kokkinakis, mi bijbelstudenti na ini Kreta. ¡Mi ben breiti srefisrefi fu abi wan kompe na yeye fasi! Wan pisi ten na baka, mi ben abi a grani fu dopu en na ini a watra fu Amorgos.b

Syatu baka di mi ben drai go baka na Kreta den ben aresteri mi baka, èn disi tron den ben seni mi gi siksi mun leki strafuman na a pikin foto Neapolis na tapu na èilanti dati. Na baka den siksi mun dati, den ben aresteri mi èn poti mi na strafu-oso gi tin dei, èn dan den ben seni mi gi fo mun go na wan èilanti di de spesrutu gi Komunist sma di den yagi gowe. Mi ben frustan taki den wortu fu na apostel Paulus tru: „Ala den sma di winsi fu libi ini a gi di den e gi densrefi na ini a dini fu Gado ini wánfasi nanga Krestes Yesus, sa kisi frufolgu tu.”—2 Timoteus 3:12.

Gro Ben De, Ala Di Gens Ben De

Pikinmoro a preikiwroko fu wi ben tapu di den Doisri ben teki Grikikondre abra na ini den yari 1940-1944. Ma heri esi a pipel fu Yehovah na ini Grikikondre ben orga densrefi baka, èn wi ben bigin baka nanga wi preikiwroko. Wi ben e pruberi fu wini a ten di wi ben lasi èn fu dati ede wi ben go doro fayafaya nanga a Kownukondre wroko.

Soleki fa wi ben fruwakti, a gens fu relisi ben bigin baka. Nofotron den Griki Ortodox priester ben teki a wet na ini den eigi anu. Na ini wan fu den dorpu wan priester ben sutu faya gi wan ogri grupu sma teige wi. A priester srefi ben bigin fon mi ala di en manpikin ben e du a srefi sani na mi baka. Mi ben lon go na wan krosibei oso fu suku kibri, ala di den ben srepi mi kompe-preikiman go na wan publiki pren na ini a dorpu. Drape na ogri grupu sma ben priti den buku fu en, èn na tapu wan balkon wan uma ben e bari: „¡Kiri en!” Te fu kaba, wan datra nanga wan skowtu di ben e pasa, ben kon yepi wi.

Baka ten, na ini 1952, den ben aresteri mi baka èn ben seni mi gi fo mun leki strafuman go na Kastelli Kissamos, Kreta. Wantewante na baka dati, mi ben kisi leri fu fisiti den gemeente èn fu tranga den na yeye fasi. Na baka di mi ben du a wroko disi fu fisiti den gemeente tu yari langa, mi ben trow nanga wan getrow Kresten sisa, di nen Despina, a srefi nen di mi sisa abi, èn a ben buweisi taki a de wan loyaal anbegiman fu Yehovah fu sensi a ten dati. Na baka a trow, mi ben kisi a toewijzing leki spesrutu pionier na ini a foto Hania, Kreta, pe mi e dini ete.

Na ini den pikinmoro 70 yari na ini a furuten diniwroko, mi wroko a moro bigi pisi fu Kreta, wan èilanti di bigi 8300 fokanti kilometer èn di langa pikinmoro 250 kilometer. A moro bigi prisiri fu mi na fu si den weiniki Kotoigi na tapu na èilanti disi na ini den yari na baka 1930, gro kon moro leki 1100 fayafaya preikiman fu Gado Kownukondre na ini a ten disi. Mi e taigi Yehovah tangi taki a gi mi na okasi fu yepi furu fu den sma disi fu kisi a soifri sabi fu Bijbel èn wan kefalek moi howpu gi a ten di e kon.

Yehovah, „a Sma Di E Sorgu Taki Mi Feni Kibri”

Ondrofeni leri mi taki horidoro nanga pasensi de fanowdu fu yepi sma fu kon sabi a tru Gado. Yehovah e gi den eigifasi disi di de tranga fanowdu, bogobogo. Na ini den 67 yari taki mi de na ini a furuten diniwroko, nofotron mi prakseri den wortu fu na apostel Paulus: „Na ala fasi wi e rikomanderi wisrefi na Gado leki bedinari: fu di wi ben musu frudrage furu, fu banawtu ede, fu nowtu ede, fu problema ede, fu fonfon ede, fu strafu-oso ede, fu dyugudyugu ede, fu tranga wroko ede, fu di wi ben lasi sribi na neti, fu di wi no ben abi nyanyan son tron” (2 Korentesma 6:4, 5). Spesrutu na ini den fosi yari na ini a diniwroko, mi ben de na ini wan kefalek takru situwâsi na moni sei. Ma Yehovah noiti ben gowe libi mi nanga mi famiri. A sori taki a de wan Yepiman di abi makti èn di e tan gi yepi (Hebrewsma 13:5, 6). Ala ten wi ben si en lobi-ati anu te wi ben e tyari den skapu fu en kon na inisei èn te a ben sorgu gi den sani di wi ben abi fanowdu.

Te mi e prakseri fositen baka èn mi e si taki, na yeye fasi, a woestijn ben e gi bromki, dan mi de seiker taki mi wroko no ben de fu soso. Mi ben gebroiki a krakti fu mi yongu yari na a moro bun fasi. A wroko fu mi na ini a furuten diniwroko warti moro leki iniwan tra sani di sma e feti na baka. Now di mi owru, mi kan gi den yonguwan deki-ati nanga mi heri ati fu ’memre a Bigi Kriaman fu den na ini den dei fu den yongu yari’.—Preikiman 12:1.

Ala di mi abi 91 yari, toku ibri mun mi man gebroiki moro leki 120 yuru na ini a preikiwroko. Ibri dei mi e wiki 7.30 mamanten èn mi e gi kotoigi na sma na tapu strati, na ini wenkri, èn na ini den park. Ibri mun mi e prati gemiddeld 150 tijdschrift. Now mi abi problema fu yere èn fu hori sani na ede èn dati e meki a libi muilek gi mi, ma mi lobi-ati brada nanga sisa na yeye fasi — mi bigi famiri na yeye fasi — èn so srefi den famiri fu den tu umapikin fu mi, de wan trutru yepi gi mi.

Na tapu fu dati, mi leri fu frutrow tapu Yehovah. Someni langa kaba a sori fu de „mi klipston di e tanapu leti-opo èn mi fortresi èn a Sma di e sorgu taki mi feni kibri”.—Psalm 18:2.

[Futuwortu]

[Prenki na tapu bladzijde 26, 27]

Ondrosei: Nanga mi wefi; kruktu-anusei: na ini 1927; a tra bladzijde: nanga Minos Kokkinakis (kruktu-anusei) èn wan tra Kotoigi na a Acropolis, na ini 1939, syatu na baka di mi ben komoto na strafu