Den Ben Du a Wani fu Yehovah

Maria E Teki „a Bun Pisi”

NA INI den dei fu Yesus, den gwenti fu den rabi ben skotu Dyu uma. Fu dati ede den ben lasi-ati fu studeri a Wet. Iya, wan denki di sma skrifi na ini a Misyna ben taki: „Efu wan man e gi en umapikin sabi fu a Wet, dan a de neleki a ben leri en wan yayolibi.”—Sotah 3:4.

Leki wan bakapisi fu dati, furu uma no ben kisi bun skoro na Yudea na ini a fosi yarihondro. „Buweisi no de taki bifo Yesus en diniwroko, Dyu uma ben kisi primisi fu de disipel fu wan bigi leriman, èn lastan fu kisi primisi fu reis nanga so wan leriman, noso fu gi leri na tra sma boiti pikin-nengre”, na so The Anchor Bible Dictionary e taki. ¡Fu lagi den umasma moro fara, dan son relisi fesiman ben seti srefi wan tirilin di ben taki dati wan man no musu taki nanga wan uma na publiki!

Yesus no ben poti prakseri na den sortu godelowsu denki disi. A ben gi leri na uma nanga man, èn umasma nanga mansma ben de bakaman fu en (Lukas 8:1-3). Na wan okasi, Marta nanga Maria ben gi Yesus wan kari fu fisiti den (Lukas 10:38). Den tu uma disi ben de den sisa fu Lasarus, èn den ala dri ben de disipel èn bun mati fu Yesus (Yohanes 11:5). Kande a famiri disi ben de wan prenspari famiri, te yu luku den bun furu sma di ben kon trowstu Marta nanga Maria di Lasarus dede. Awansi san ben pasa na ini den oso di Yesus ben fisiti den, a de wan warti les no wawan gi den, ma so srefi gi wi.

Kisi Leri na Yesus en Futu

A no de fu taki, Marta nanga Maria ben angri fu meki wan fesa nyanyan nanga furu switisani gi Yesus, èn kande den ben man du disi nanga den materia sani di den ben abi. (Teki gersi Yohanes 12:1-3.) Ma, di a fisitiman fu den ben doro, Maria „ben go sidon na den futu fu Masra èn ben tan arki a wortu fu en” (Lukas 10:39). ¡No wan gwenti fu libisma ben sa tapu Yesus fu leri wan opregti uma di ben angri fu leri sani! Wi kan prakseri fa Maria ben e sidon na fesi Yesus, e poti ensrefi leki wan studenti di e anga na den mofobuba fu en Meester èn e arki san a e leri.—Teki gersi Deuteronomium 33:3; Tori fu den Apostel 22:3.

Tra fasi leki Maria, dan Marta „no ben man poti prakseri bun na sani, fu di a ben du furu wroko”. Fu di a ben e sreka wan nyanyan nanga furu switisani, meki a ben abi furu fu du èn dati ben aksi furu fu en. ¡Heri esi, Marta no ben lobi en srefisrefi taki en sisa ben libi en e du ala den wroko, ala di en sisa ben e sidon na den futu fu Yesus! Fu dati ede Marta ben koti Yesus en mofo di a ben taki nanga Maria, kande wantronso, di a ben taki: „¿Masra, yu no abi trobi taki mi sisa libi mi wawan fu sorgu gi ala sani? Taigi en, fu dati ede, fu kon yepi mi.”—Lukas 10:40.

Te yu luku en bun, dan no wan fowtu ben de na a sani di Martha ben aksi. Fu taki en leti, fu sreka nyanyan gi wan grupu na tranga wroko, èn ala a wroko no musu kon na tapu wan sma nomo. Ma Yesus ben si wan okasi ini san Marta ben taki fu leri en wan warti sani. „Marta, Marta,” a ben taki „yu e broko yu ede èn e bruya fu furu sani ede. Ma wan tu sani nomo de fanowdu, noso soso wán. Maria fu en sei, ben teki a bun pisi, èn sma no sa teki dati puru na en anu.”—Lukas 10:41, 42.

Yesus no ben e taki dati Marta no ben abi belangstelling gi sani na yeye fasi. Kontrari fu dati, a ben sabi en leki wan uma di ben gi ensrefi krinkrin fu dini Gado.a Sondro tweifri, na dati ben de a sani di ben pusu en fu kari Yesus kon na en oso. Ma di Yesus ben gi piri-ai na wan safri fasi, a ben sori taki, fu di Marta ben poti ala en prakseri na a nyanyan, a ben misi wan spesrutu okasi fu ensrefi kisi leri fu a Manpikin fu Gado.

A tru taki, kulturu na ini a ten dati kande ben horibaka gi a fasi fa sma ben si sani, taki wan uma kan sori taki a warti srefisrefi te a man du en osowroko bun. ¡Ma den wortu fu Yesus ben sori dati uma, neleki man, ben sa kan sidon na den futu fu a Manpikin fu Gado èn kisi den wortu fu libi! (Yohanes 4:7-15; Tori fu den Apostel 5:14) Te wi e hori disi na prakseri, dan a ben sa moro bun gi Marta fu sreka soso wan tu sani fu nyan — noso srefi wán sani nomo — efu dati ben sa gi en na okasi fu sidon na den futu fu Masra èn kisi leri fu en.—Teki gersi Mateus 6:25.

Wan Les gi Wi

Na ini a ten disi, man nanga uma e teki a kari fu Yesus fu „teki a watra fu libi fu soso” (Openbaring 22:17). Sonwan — di lobi e pusu den neleki Marta — e du ala muiti fu sorgu gi den sani di den kompe-bribiman fu den abi fanowdu. Den e hori na prakseri san den kan du gi tra sma èn den de esi-esi fu du wan sani, èn Yehovah e pramisi fu pai den wroko fu den di den e du nanga lobi (Hebrewsma 6:10; 13:16). Tra sma kande e gersi Maria moro. Den abi safrifasi èn den e poti ala den prakseri na sani na yeye fasi. A faya fu den fu prakseri dipi fu Gado Wortu e yepi den fu tan steifi na ini a bribi.—Efeisesma 3:17-19.

Den sortu sma disi e sorgu gi sani di de tranga fanowdu na ini a Kresten gemeente. Ma te fu kaba, alamala musu „teki a bun pisi” fu di den e poti sani na yeye fasi na a fosi presi. Efu wi sabi san na den moro prenspari sani, dan Yehovah sa feni wi bun èn a sa blesi wi.—Filipisma 1:9-11.

[Futuwortu]