Wi Abi na Organisâsi fu Yehovah Fanowdu

¿OITI yu yere wan sma taki: „Mi e bribi na ini Gado, ma mi no e bribi na ini wan relisi di orga”? Den srefi sortu sani disi sma e taki, di wan ten ben de sma di ben go na kerki fayafaya, ma di ben brokosaka fu di a relisi fu den no ben man gi den san den abi fanowdu na yeye fasi. Ala di relisi organisâsi e meki sma brokosaka, toku furu sma wani nomonomo fu anbegi Gado. Ma den e bribi taki a moro betre fu anbegi en tapu den eigi fasi, na presi fu moksi densrefi nanga wan kerki noso wan tra organisâsi.

San Bijbel e taki? ¿Gado wani taki Kresten musu moksi densrefi nanga wan organisâsi?

Den Fosi Kresten Ben Kisi Wini fu di Den Ben Orga

Na a Pinksterfesa fu 33 G.T., dan Yehovah ben kanti en santa yeye, no na tapu wan tu bribiman nomo, ma na tapu wan grupu fu man nanga uma di ben kon makandra „na a srefi presi”, namku, na ini wan tapusei kamra na ini a foto Yerusalem (Tori fu den Apostel 2:1). Na a ten dati, a Kresten gemeente, di ben kon tron wan internationaal organisâsi, ben seti. Disi ben de wan trutru blesi gi den fosi disipel. Fu san ede? Fu di den ben kisi wan prenspari wroko fu du — den ben musu preiki a bun nyunsu fu a Kownukondre fu Gado, te fu kaba „na heri grontapu pe sma e libi” (Mateus 24:14). Na ini a gemeente nyun sma di kenki a bribi fu den ben kan leri fu kompe-bribiman di abi ondrofeni, fa fu du a preikiwroko.

Heri esi a Kownukondre boskopu ben panya moro fara leki den skotu fu Yerusalem. Na mindri 62 te nanga 64 G.T., na apostel Petrus ben skrifi en fosi brifi na den Kresten di ben „panya na Pontus, Galasia, Kapadosia, Asia, nanga Bitania”, den alamala de na ini san de Torkukondre now (1 Petrus 1:1). Bribiman ben de tu na ini Palestina, Libanon, Siria, Siprus, Grikikondre, Kreta, nanga Italiakondre. Di Paulus ben skrifi gi den Kolosesma na ini 60-61 G.T., dan a bun nyunsu „ben preiki na ala sani di Gado kria na ondro hemel.”—Kolosesma 1:23.

Wan di fu tu wini di ben kon fu na abi di sma ben abi demakandra nanga wan organisâsi, na taki den Kresten ben kan gi makandra deki-ati. Te den ben abi demakandra nanga a gemeente, dan Kresten ben kan yere publikitaki di kan gi den deki-ati, den ben kan studeri den Santa Buku fu Bijbel makandra, den ben kan fruteri makandra ondrofenitori di ben tranga a bribi fu den, èn den ben kan begi makandra nanga kompe-bribiman (1 Korentesma, kapitel 14). Èn mansma di ben de lepi ben kan „wei na ipi fu Gado”.—1 Petrus 5:2.

Leki memre fu a gemeente, dan Kresten ben kon sabi makandra tu èn den ben kon lobi makandra. Na presi taki den ben feni taki a ben de wan hebi fu kon makandra nanga a gemeente, a gemeente ben bow den fosi Kresten èn a ben gi den tranga.—Tori fu den Apostel 2:42; 14:27; 1 Korentesma 14:26; Kolosesma 4:15, 16.

Wan tra sani di e sori fu san ede a gemeente di de wán èn di de na heri grontapu, noso na organisâsi, ben de fanowdu, ben de fu horibaka gi wánfasi. Kresten ben leri fu „taki na ini wánfasi nanga makandra” (1 Korentesma 1:10). Disi ben de wan prenspari sani. Memre fu a gemeente ben kisi difrenti skoroleri èn den ben abi difrenti kulturu. Den ben taki difrenti tongo, èn a ben de krin fu si taki den ben abi difrenti eigifasi (Tori fu den Apostel 2:1-11). Sontron, den no ben agri srefisrefi nanga makandra. Ma den Kresten ben kisi yepi fu lusu den sortu problema disi na ini a gemeente.—Tori fu den Apostel 15:1, 2; Filipisma 4:2, 3.

Opziener di ben e reis èn di ben abi ondrofeni soleki Paulus, ben piki seryusu aksi di den owruman fu wan gemeente no ben man gi piki na tapu. Wan tiri skin di ben de na ini Yerusalem, ben handri afersi di ben abi fu du nanga prenspari relisi leri. Fosi den apostel fu Yesus Krestes nomo ben de na ini a tiri skin, ma baka ten a tiri skin ben kon moro bigi fu di owruman fu a gemeente na ini Yerusalem ben kon na ini tu. Ibri gemeente ben erken a makti di a tiri skin nanga den sma di ben teki presi gi en, ben kisi fu Gado fu orga a diniwroko, fu poti man na wroko na ini a diniwroko, èn fu teki bosroiti di abi fu du nanga prenspari relisi leri. Te a tiri skin ben seti wan afersi, dan den gemeente ben horibaka gi a bosroiti èn den „ben prisiri fu a deki-ati di den ben kisi.”—Tori fu den Apostel 15:1, 2, 28, 30, 31.

Iya, Yehovah ben gebroiki wan organisâsi na ini a fosi yarihondro. Ma fa a de na ini a ten disi?

Wi Abi wan Organisâsi Fanowdu na ini a Ten Disi

Neleki den fosi yarihondro kompe fu den, Yehovah Kotoigi e si en leki wan seryusu sani fu preiki a bun nyunsu fu a Kownukondre. Wán fasi fa den e du a wroko disi na fu di den e prati Bijbel nanga yepisani fu studeri Bijbel, èn disi wani taki dati sani musu orga.

Kresten publikâsi musu sreka heri bun, sma musu luku efu fowtu no de na ini, den musu druk den, èn baka dati den musu tyari den go na den gemeente. Ibri Kresten fu en sei, musu tyari den publikâsi go gi den wan di wani leisi den. Na so fasi a Kownukondre boskopu doro milyunmilyun sma. Preikiman fu a bun nyunsu e pruberi fu du a preikiwroko fu den na wan orde fasi, èn den e luku bun taki a no e pasa dati wán pisi fu a gebied e wroko tumusi furu, ala di tra pisi no e wroko srefisrefi. Ala du ala den sani disi e sori taki sani musu orga bun.

Fu di „Gado no e teki sma partèi”, meki a de fanowdu fu vertaal Bijbel nanga Bijbel publikâsi (Tori fu den Apostel 10:34). Nownowde, a tijdschrift disi de fu kisi na ini 132 tongo, èn en kompe Ontwaakt! e druk na ini 83 tongo. Disi wani taki dati grupu fu vertaler di orga bun musu de na heri grontapu.

Memre fu a gemeente e kisi deki-ati te den e fisiti den Kresten konmakandra èn den bigi konmakandra. Drape den e yere publikitaki di e gi den deki-ati, den e studeri Bijbel makandra, den e fruteri makandra ondrofenitori di e bow den, èn den e begi makandra nanga kompe anbegiman. Èn neleki den brada fu den na ini a fosi yarihondro, den e prisiri fu den fisiti fu lobi-ati opziener di e reis, di e bow a bribi fu den. So bun, Kresten na ini a ten disi de „wán ipi, wán skapuman”.—Yohanes 10:16.

A no de fu taki, dati den Kotoigi fu Yehovah no de volmaakti, neleki fa den kompe anbegiman fu fosi no ben de volmaakti tu. Toku den e wroko makandra na ini wánfasi. A bakapisi de taki a Kownukondre preikiwroko e du na heri grontapu.—Tori fu den Apostel 15:36-40; Efeisesma 4:13.

[Prenspari pisi na tapu bladzijde 31]

Kresten na ini a ten disi de „wán ipi, wán skapuman”