Den Skin Pikin, ma Den Lobi fu Gi Densrefi

FA A ben o de te yu ben o taki fu a Kownukondre fu Gado nanga sma di yu no sabi, efu yu ben langa 76 centimeter nomo? Laura kan taigi yu. A abi 33 yari, ma a langa 76 centimeter nomo. En nanga María, a sisa fu en, di abi 24 yari èn di langa 86 centimeter, e libi na ini Quito, Ekwador. Meki den tyari kon na krin san na den problema di e miti den na ini a Kresten diniwroko fu den.

„Fu kan go na a kontren pe wi musu preiki èn na den Kresten konmakandra, wi e waka so wan afu kilometer fu teki wan bus. Fu pe a e saka wi, wi e waka ete wan afu kilometer fu teki wan tra bus. A sari, taki na ini a pasi disi feifi krasi dagu e libi. Wi frede srefisrefi, bika den kan luku so bigi leki asi. Fu no meki den du wi ogri, dan wi e teki wan tiki na wi efu a de fanowdu, di wi e kibri na wan presi bifo wi e teki a bus, so taki wi abi disi na wi te wi e waka go na oso.

A de wan bigi stap trutru gi wi fu go na ini a bus. Wi e tanapu na tapu wan ipi doti na a presi pe a bus musu stop fu kan go na ini a bus moro makriki. Wan tu man di e rèi a bus e stop sei na ipi, ma trawan no e du disi. Te dati de so, dan a moro langawan fu wi e yepi a syatuwan fu go na ini a bus. Efu wi wani teki a tra bus, dan wi musu abra wan bigi pasi pe furu oto e rèi — wi musu meki bun furu muiti nanga den syatu futu fu wi. Fu di a skin fu wi pikin, meki wan bigi tas nanga buku na ete wan tyalensi. Fu meki a tas kon moro lekti, dan wi e gebroiki wan pikin Bijbel èn wi no e tyari someni lektuur nanga wi tu.

Sensi di wi ben de pikin-nengre, wi ala tu ben fruleigi trutru. Den birtisma fu wi sabi taki ala ten wi ben frede fu taki nanga sma di wi no sabi. Dati meki den e fruwondru èn a e naki den ati te den e si taki wi e naki na tapu den doro fu den, èn nofotron den e arki. Ma pe sma no sabi wi so bun, sma e si wi moro furu nomo leki sma di syatu kefalek; dati meki den no e arki wi seryusu ala ten, soleki fa sma ben sa musu arki a boskopu fu wi. Ma fu di wi e firi a lobi fu Yehovah, meki wi e kisi a krakti fu go doro nanga na evangeliewroko. A prakseri di wi e prakseri dipi fu Odo 3:5, 6 e gi wi deki-ati tu.”

Soleki fa Laura nanga María sori, dan sma kan gi Gado glori te den e horidoro, ala di a skin e gi den problema. Na apostel Paulus ben begi taki efu Gado ben kan puru a „maka [di a ben abi] na ini a skin”, kande wan sani di ben hati a skin doronomo. Ma Gado ben taigi en: „A no-frudini bun-ati fu mi nofo gi yu, bika a krakti fu mi e kon volmaakti na ini swakifasi.” Iya, a no de fanowdu fu puru a problema di e meki wi kon de malengri na skin sei, so taki wi kan dini Gado. Te wi e frutrow tapu Gado dorodoro, dan dati kan yepi wi fu du ala san wi man na ini a situwâsi fu wi. Fu di Paulus ben si a „maka [di a ben abi] na ini a skin” na a fasi disi, meki a ben kan taki: „Te mi swaki, dan mi tranga” (2 Korentesma 12:7, 9, 10). Wan tu yari baka dati Paulus ben skrifi: „Gi ala sani mi abi a tranga fu en di e gi mi krakti.”​—Filipisma 4:13.

Na ini a ten disi, Gado e du wan bigi wroko fu di a e gebroiki man, uma nanga pikin di e gi densrefi na en dorodoro. Wan lo fu den malengri na difrenti fasi. Ala di den alamala e howpu taki Gado o meki den kon betre baka na ondro a Kownukondre fu en, toku den no e wakti meki Gado puru den problema fu den fosi, bifo den e pruberi du wan sani na ini a wroko fu en.

¿Yu e pina fu di yu abi wan swaki na skin sei? ¡Teki deki-ati! A bribi fu yu, kan meki yu de na mindri den wan leki Paulus, Laura nanga María. Fu den wan disi wi kan taki, neleki fa a ben de nanga man èn nanga uma fu fositen di ben abi bribi: „Fu a swakifasi fu den, [den] ben kisi deki-ati.”​—Hebrewsma 11:34.

[Prenki na tapu bladzijde 8]

María

Laura

[Prenki na tapu bladzijde 9]

María e yepi Laura fu go na ini a bus

[Prenki na tapu bladzijde 9]

„Wi frede dagu srefisrefi bika den kan luku so bigi leki asi”

Na ondrosei: Laura nanga María nanga den wan di ben studeri a Bijbel nanga den