Tru Krestendom Abi Moro Krakti!
„Na wan tranga fasi, a wortu fu Yehovah ben panya go na ala sei èn ben abi krakti na tapu moro nanga moro sma.”—TORI FU DEN APOSTEL 19:20.
1. Fruteri fa Krestendom ben panya go na ala sei na ini a fosi yarihondro.
SANTA yeye ben gi den fosi Kresten a krakti fu meki a wortu fu Gado bekènti nanga faya, èn noti ben man kiri a faya dati. Wan historia skrifiman ben skrifi: „Krestendom ben panya kefalek esi, go na ala sei na ini ala den kondre fu a gran Rome tirimakti. Soleki fa a sori, dan na ini a yari 100, Kresten libimakandra ben de fu feni na ini ibri distrikt na a lanki fu a Mindrikondre Se.”
2. Fa Satan ben pruberi fu meki a bun nyunsu lasi a krakti di a ben abi na sma tapu, èn fa Bijbel ben taki na fesi fu disi?
2 Satan Didibri no ben man tapu den fosi Kresten fu panya a wortu. Na presi fu dati, a ben du wan tra sani fu meki a bun nyunsu lasi a krakti di a ben abi na sma tapu; a ben gebroiki sma di fadon komoto na bribi. Na ini na agersitori fu a tarwe nanga a takru wiwiri, Yesus ben fruteri na fesi taki disi ben o pasa (Mateus 13:24-30, 36-43). Na apostel Petrus ben warskow tu taki falsi leriman ben o kon na ini a gemeente èn ben o tyari sekte kon di e pori sma (2 Petrus 2:1-3). Na so tu, na apostel Paulus ben warskow spesrutu taki sma sa de di ben sa fadon komoto na bribi, bifo a dei fu Yehovah ben o kon.—2 Tesalonikasma 2:1-3.
3. San ben pasa baka a dede fu den apostel?
3 Baka a dede fu den apostel, sma ben bigin poti moro furu prakseri na heiden leri nanga filosofia, leki fu poti prakseri na a bun nyunsu. Soleki fa ben taki na fesi, dan falsi leriman ben drai a soifri boskopu fu waarheid èn ben pori a boskopu dati. Safrisafri, sma no ben man si krin moro san na a tru Krestendom, bika a falsi organisâsi di nen Krestenhèit ben puru sma prakseri. Wan grupu fu kerki tiriman ben opo kon, di no ben wani dati gewoon sma e kisi a Bijbel fu leisi. Ala di a grupu fu sma di ben kari densrefi Kresten ben kon moro bigi, toku na anbegi fu den no ben soifri. Krestenhèit ben panya go na moro nanga moro kondre, èn a ben tron wan organisâsi nanga furu makti di ben abi furu krakti na tapu a libi fu den sma na ini Westsei kulturu, ma den no ben kisi a blesi èn a yeye fu Gado.
4. Fu san ede a takru wroko fu Satan fu gens Gado en prakseri, no ben abi bun bakapisi?
4 Ma a takru wroko fu Satan fu gens a prakseri fu Yehovah, no ben o abi bun bakapisi. Srefi na ini den moro takru ten di furu sma ben fadon komoto na bribi, wan tu sma ben de ete na ini a tru Krestendom. Den man di ben du tranga muiti fu meki moro eksemplaar fu a Bijbel, ben musu kakafutu gi furu problema fu man du dati na wan soifri fasi. Na so fasi, a Bijbel srefi ben soifri ete, ma den sma di ben taki dati den ben abi reti fu gi Bijbel leri, ben pori a boskopu nanga den fowtu sani di den ben leri sma. Na ini den hondrohondro yari di pasa, sabiman soleki Hièronimus nanga Tyndale, ben abi deki-ati fu vertaal èn fu prati Gado Wortu. Milyunmilyun sma ben man kisi wan Bijbel, èn den ben kisi fu du nanga wan fasi fu a Krestendom; nomo a Krestendom dati ben falsi.
5. San a profeiti Danièl ben taki na fesi ini a tori fu „tru sabi”?
5 Te fu kaba, ’a tru sabi ben kon de pasa marki’ soleki fa a buku Danièl ben taki na fesi. Disi feni presi na ini „a ten fu a kaba” — a ten pe wi e libi na ini now (Danièl 12:4). Nanga yepi fu santa yeye, sma na heri grontapu di lobi waarheid, kon kisi a soifri sabi fu a tru Gado èn fu a prakseri fu en. Hondrohondro yari langa sma e kisi fu yere den leri fu sma di fadon komoto na bribi, toku a wortu fu Gado abi krakti na tapu moro nanga moro sma! Na ini a ten disi, a bun nyunsu e meki bekènti na ala presi, fu fruteri sma a howpu fu wan prisiri nyun grontapu (Psalm 37:11). Meki wi ondrosuku now fa a wortu fu Gado panya go na ala sei na ini a ten disi.
A Panya Di a Wortu Panya na ini a Ten Disi
6. Sortu waarheid den Bijbel Ondrosukuman ben kon frustan na ini 1914?
6 Na a kaba fu a di fu 19 yarihondro, wan pikin grupu fu Bijbel Ondrosukuman ben kisi deki-ati di den ben leri a Bijbel waarheid. Nownowde, sma sabi den leki Yehovah Kotoigi. Na ini 1914, den ben kon frustan furu fu den sani di skrifi na ini Bijbel. Den ben frustan den kefalek moi waarheid di abi fu du nanga a prakseri fu Gado. A ben naki na ati fu den srefisrefi taki Yehovah lobi libisma sote, taki a ben seni en Manpikin kon na grontapu, fu opo a pasi gi den fu den kan kisi têgo libi. Den ben kon sabi èn kon warderi a nen fu Gado, èn so srefi a fasi fa Gado de. Moro fara, den ben frustan taki „da tem foe dem heiden soema” ben kaba, èn taki fu dati ede a ten ben de krosibei taki a Kownukondre fu Gado sa blesi a libisma famiri (Lukas 21:24, Da Bijbel na ini Sranantongo). Dati na tumusi moi nyunsu fu tru! Den ben musu prati den kefalek prenspari waarheid disi nanga ala sma, na ala presi. Libisma libi ben de ini a tori!
7. Fa Bijbel waarheid abi krakti na sma tapu na ini a ten disi?
7 Yehovah ben blesi a pikin grupu dati fu salfu Kresten. Na ini a ten disi, moro leki siksi milyun sma teki a tru Krestendom nanga den heri ati. A wortu fu Gado panya go so srefi na furu kondre, bika Yehovah Kotoigi de fu feni na ini 235 kondre. Boiti dati, Bijbel waarheid abi krakti na sma tapu èn dati meki den ben man kakafutu gi ala problema, awinsi a de na a sei fu bribi noso tra sani di miti den. A preikiwroko disi di e du na heri grontapu, na ete wan tranga buweisi taki Yesus de noya na ini Kownukondre makti.—Mateus 24:3, 14.
8. San wan tu sma taki fu a kon di Yehovah Kotoigi kon moro furu?
8 Soleki fa historia skrifiman ben taki fu a panya di Krestendom ben panya srefisrefi go na ala sei na ini a fosi yarihondro, na so furu sabiman gi komentaar fu a kon di a pipel fu Yehovah kon moro furu na ini a ten disi. Na Amerkankondre, tu sabiman ben skrifi na ini wan srefi artikel: „Na ini den lasti 75 yari, den Yehovah Kotoigi gro kefalek esi doronomo . . . èn dati de so na heri grontapu.” Wan tijdschrift fu Owstu-Afrika e taki dati den Kotoigi na „wán fu den kerki na grontapu di sma e lespeki trutru èn di esi-esi e kisi moro nanga moro memre. Sma na heri grontapu sabi den leki sma di e hori densrefi krinkrin na Bijbel leri.” Wan Katolik tijdschrift, di tyari kon na doro na Europa, e taki fu „a kon di Yehovah Kotoigi kon moro furu na wan tumusi aparti fasi”. San yepi fu meki den Kotoigi kon moro furu?
Santa Yeye E Wroko na ini a Ten Disi
9. (a) San na wan prenspari reide fu san ede a wortu fu Gado abi krakti na sma tapu na ini a ten disi? (b) Fa Yehovah e hari sma kon na en?
9 Wan prenspari reide fu san ede a wortu fu Gado abi krakti na tapu moro nanga moro sma na ini a ten disi, na fu di Yehovah en yeye e wroko fayafaya, neleki a ben pasa na ini a fosi yarihondro. Yesus ben taki: „No wan sma kan kon na mi, boiti efu a Tata, di ben seni mi kon, e hari en kon” (Yohanes 6:44). Den wortu disi e sori taki Gado e hari sma kon na en na wan lobi-ati fasi, a e buweigi na ati fu den sma di abi a yoisti yeye, fu bribi na ini en. Nanga yepi fu a preikiwroko fu den Kotoigi fu en, Yehovah e teki „den warti sani” puru „fu ala den nâsi” fu dini en, namku den safri-ati sma fu grontapu di de leki skapu.—Hagai 2:6, 7.
10. Sortu sma piki tapu a wortu fu Gado?
10 Santa yeye no wawan ben gi a pipel fu Gado a krakti fu tyari a wortu fu en go te na a moro farawe presi fu grontapu; a buweigi ala sortu sma so srefi fu piki tapu a bun nyunsu. Fu tru, den wan di teki a wortu fu Gado, komopo fu „ibri lo nanga tongo nanga pipel nanga nâsi” (Openbaring 5:9; 7:9, 10). Son wan fu den sma disi gudu, trawan pôti, son wan kisi furu skoroleri, ala di trawan no sabi leisi noso skrifi. Son wan teki a wortu fu Gado na ini orloku situwâsi pe den ben kisi hebi frufolgu, ala di trawan teki en na ini ten fu vrede pe sani ben waka bun. Na ondro ala sortu tirimakti, na ini ala sortu kulturu, na ini strafuman kampu èn srefi te na ini paleisi, mansma nanga umasma piki bun tapu a bun nyunsu.
11. Fa santa yeye e wroko na ini a libi fu Gado en pipel, èn sortu difrenti de krin fu si?
11 Ala di someni sortu sma de na mindri Gado en pipel, toku den e libi na ini wánfasi nanga makandra (Psalm 133:1-3). Disi na ete wan buweisi taki santa yeye e wroko na ini a libi fu den wan di e dini Gado. A yeye fu Gado na wan tranga krakti di e pusu den futuboi fu en fu du san bun, dati meki taki den man sori lobi, prisiri, vrede, switifasi, nanga tra moi eigifasi (Galasiasma 5:22, 23). Na ini a ten disi, wi kan frustan san a profeiti Maleaki ben taki na fesi langa ten kaba: „Unu sa si a difrenti . . . na mindri wan regtfardiki sma nanga wan godelowsu sma, na mindri wan sma di e dini Gado nanga wan sma di no dini en.”—Maleaki 3:18.
Gado Wortu Abi Krakti na Tapu den Sma Di E Wroko Fayafaya
12. Fa Yehovah Kotoigi e denki fu a preiki di den e preiki a bun nyunsu, èn fa den e fruwakti taki sma sa piki tapu a preikiwroko di den e du?
12 Yehovah Kotoigi a no kerkisma di e sidon arki nomo. Den e teki prati fayafaya na a preikiwroko. Neleki den fosi Kresten, den de klariklari fu gi densrefi fu du Gado wani; den e suku fu leri tra sma fu den Kownukondre pramisi fu Yehovah. Den de sma di e wroko makandra nanga Gado, èn di ondro a tiri fu a santa yeye fu en, e tyari tra sma kon makandra fu dini Yehovah. Fu di den e du dati, meki neleki Yehovah den e sori sari-ati nanga lobi na a libisma famiri di no de na bribi. Èn den e du dati awinsi sma abi mi-no-ke-fasi, awinsi sma e spotu den èn e frufolgu den. Yesus ben warskow den bakaman fu en na fesi taki sma ben o piki na difrenti fasi tapu a bun nyunsu. A ben taki: „Wan srafu no bigi moro en masra. Efu den frufolgu mi, dan den sa frufolgu unu tu; efu den ben ondrow mi wortu, dan den sa ondrow di fu unu tu.”—Yohanes 15:20.
13. Sortu sani di Krestenhèit no e du kwetikweti, Yehovah Kotoigi e du fayafaya?
13 A e naki wi ati trutru fu si taki den Kotoigi fu Yehovah na ini a ten disi, gersi den sma di ben teki tru Krestendom nanga den heri ati na ini a fosi yarihondro. Wan tra sani di de krin fu si, na a difrenti na mindri Yehovah Kotoigi èn a Krestenhèit na ini a ten disi. Wan sabiman di ben skrifi fu a fasi fa den fosi Kresten ben du a preikiwroko fayafaya, ben kragi: „So langa a kerki no e kenki a fasi fa a e du sani now, so taki den bakaman fu en e frustan baka taki ibri dopu Kresten abi a frantwortu fu preiki na evangelie, èn taki den musu tyari densrefi na wan fasi di de krinkrin moro bun leki den sma di no abi wan bribi, dan wi no ben sa go na fesi srefi.” Den srefi sani disi di Krestenhèit no e du kwetikweti, na sani di Yehovah Kotoigi e du fayafaya! A de krin fu si taki den de fayafaya na ini a bribi èn taki a bribi fu den na wan tru bribi. A bribi fu den abi en fondamenti tu tapu Bijbel waarheid èn den e si en leki a frantwortu fu den fu prati a waarheid dati nanga ala sma di wani arki.—1 Timoteus 2:3, 4.
14. Fa Yesus ben si en diniwroko, èn sortu fasi fu denki èn handri den disipel fu en e sori na ini a ten disi?
14 Yesus ben si en diniwroko leki wan tumusi seryusu sani. Dati meki taki a diniwroko ben abi ala en prakseri. A ben taigi Pilatus: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid” (Yohanes 18:37). Gado en pipel e firi leki fa Yesus ben firi. A Bijbel waarheid de na ini na ati fu den, èn den e meki muiti fu feni okasi fu prati en nanga someni sma leki den kan. Son leisi den sani di den e du fu prati a waarheid, e sori taki den abi koni trutru.
15. Fa son sma ben sori taki den abi koni, nanga a fasi fa den ben preiki a bun nyunsu?
15 Na ini wan kondre fu Zuid-Amerika, den Kotoigi ben go nanga boto na bilosei fu wan kriki fu na Amasoneliba, so taki den ben kan prati a waarheid nanga den sma drape. Ma di wan borgrufeti broko na ini 1995, dan den sma drape no ben mag go na tapu a liba moro. Den Kotoigi ben wani srefisrefi fu go doro nanga a seni di den ben seni Bijbel publikâsi gi den sma di ben wani sabi moro. So bun, den ben bosroiti fu drifi a boskopu go na bilosei. Den ben skrifi brifi, dan den ben poti den makandra nanga eksemplaar fu A Waktitoren nanga Ontwaakt! na ini leigi plastik batra. Baka dati, den ben trowe den batra go na ini a liba. Den ben du disi fo nanga afu yari langa te leki sma ben kisi primisi baka fu go nanga boto na tapu a liba. Na a heri liba pasi, sma ben de di ben taigi den Kotoigi tangi gi a lektuur. Wan uma di ben studeri Bijbel, en ai bigin lon watra di a brasa den, èn a taki: „Mi prakseri taki mi no ben o si unu noiti moro. Ma di mi ben bigin kisi a lektuur na ini den batra, mi ben sabi taki unu no frigiti mi!” Tra sma di ben libi na a libasei, ben taki dati den ben leisi den tijdschrift ibritron baka. Furu dorpu ben abi wan so-kari „postkantoro”. Wan draiwatra ben hari den sani di ben drifi na tapu a watra, kon makandra fu wan pisi ten. Dan den sma di ben wani sabi moro, ben go drape fu luku efu den ben kisi „post” fu tapusei.
16. Fa okasi fu meki disipel e opo son leisi, efu wi de klariklari fu gi wisrefi?
16 Yehovah Gado nanga den makti engel fu en, e tiri èn e horibaka gi a preiki di wi e preiki a bun nyunsu (Openbaring 14:6). Wi musu de klariklari nomo fu gi wisrefi fu di son leisi, sondro taki wi e fruwakti dati, okasi e opo fu meki disipel. Na ini Nairobi, wan foto na Kenia, tu Kresten uma ben du preikiwroko. Baka di den ben kaba preiki na den oso pe den ben musu go, dan wantronso wan yongu uma kon na den. A ben breiti srefisrefi fu si den, èn a taigi den: „Mi ben e begi fu miti sma leki unu.” A ben begi den Kotoigi fu kon na en oso wantewante fu di a ben wani taki nanga den. Na srefi dei dati, den bigin studeri Bijbel nanga en. Fu san ede na uma ben wani taki den tu Kresten ben musu kon na en wantronso? So wan tu wiki na fesi, a beibi fu en dede. Fu dati ede, di a ben si wan pikin boi e hori wan traktaat di ben abi leki nen „Welke hoop is er voor gestorven geliefden?” (Sortu Howpu De gi den Lobiwan Di Dede?), dan a ben wani en srefisrefi. A aksi a boi fu gi en a traktaat. A boi no ben wani, ma a ben sori go na den Kotoigi di ben gi en a traktaat. Heri esi, na uma ben go na fesi na yeye fasi èn a ben man tyari a pen di a ben firi, fu di a lasi en pikin na ini dede.
A Lobi fu Gado Sa Tan Abi Krakti na Tapu Sma
17-19. Fa Yehovah sori nanga yepi fu a lusu-paiman taki a lobi a libisma famiri?
17 A panya di a wortu fu Gado e panya na heri grontapu, abi langalanga fu du nanga a frulusu-ofrandi fu Krestes Yesus. Neleki a lusu-paiman, a preikiwroko na wan sani tu di e sori taki Yehovah lobi sma fu ala presi. Na apostel Yohanes ben skrifi ondro a krakti fu santa yeye: „Gado ben lobi . . . [a libisma famiri] sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.”—Yohanes 3:16.
18 Prakseri fa Yehovah sori en lobi fu di a ben gi a lusu-paiman. Milyardmilyard yari langa Gado ben abi wan tranga banti nanga en wan-enkri gebore Manpikin, di a lobi sote èn di de „a bigin fu den sani di Gado meki” (Openbaring 3:14). Yesus lobi a Tata fu en trutru, èn Yehovah lobi en Manpikin „bifo [a] ben seti grontapu” (Yohanes 14:31; 17:24). Yehovah ben gi pasi meki en lobi Manpikin dede so taki libisma ben sa man kisi têgo libi. Wi e kisi lespeki nanga frede trutru gi Gado fu di a sori en lobi na so wan fasi gi a libisma famiri!
19 Yohanes 3:17 e taki: „Gado no ben seni en Manpikin kon na grontapu fu a krutu grontapu, ma fu grontapu ben sa kisi frulusu nanga yepi fu en.” So bun, Yehovah ben seni en Manpikin kon fu frulusu sma na wan lobi-ati fasi, no fu strafu noso krutu den. Disi e kruderi nanga den wortu fu Petrus: „[Yehovah] no wani taki wan sma e kisi pori, ma a wani taki ala sma musu abi berow.”—2 Petrus 3:9.
20. Fa a frulusu fu libisma abi fu du nanga a preiki di wi e preiki a bun nyunsu?
20 Yehovah ben tyari bigi òfer fu kan gi a wan-enkri yoisti sani akruderi en wet, di kan gi sma frulusu. Fu dati ede a wani, taki so furu sma leki a kan musu feni wini fu dati. Na apostel Paulus ben skrifi: „’Ibriwan sma di e kari a nen fu Yehovah, sa kisi frulusu.’ Ma fa den sa kari en efu den no e bribi na ini en? Ma fa den sa bribi na ini en efu den no yere fu en? Ma fa den sa yere sondro fu wan sma e preiki?”—Romesma 10:13, 14.
21. Fa wi musu si na okasi di wi abi fu teki prati na a preikiwroko?
21 A de wan kefalek moi grani trutru fu abi wan prati na a preikiwroko èn a leriwroko disi di e du na heri grontapu! A no wan makriki wroko, ma toku Yehovah e prisiri srefisrefi te a e si fa en pipel e tyari den libi na wan getrow fasi akruderi a waarheid èn fa den e prati a bun nyunsu nanga tra sma! So bun, awansi sortu situwâsi yu de na ini, meki Gado en yeye èn so srefi a lobi di yu e firi na ini yu ati buweigi yu fu teki prati na a wroko disi. Hori na prakseri tu taki a wroko di wi e du na heri grontapu, e buweisi taki dyonsro Yehovah Gado sa meki a pramisi fu en kon tru, namku fu tyari den glori „nyun hemel nanga wan nyun grontapu” kon pe „regtfardikifasi sa de”.—2 Petrus 3:13.
Yu E Memre Disi Ete?
• Fu san ede den sma di fadon komoto na bribi no ben man tapu den preikiman fu preiki a bun nyunsu?
• Fa a wortu fu Gado sori a krakti fu en na ini a ten fu wi?
• Na sortu fasi a yeye fu Gado e wroko na ini a ten disi?
• San a lusu-paiman abi fu du nanga a preiki di wi e preiki a bun nyunsu?
[Schema/Faki na tapu bladzijde 16 di e tyari sani kon na krin]
(Efu yu wani si pe den sani disi skrifi, luku a tijdschrift)
Nomru di e sori fa den Kownukondre preikiman kon moro furu na ini a di fu 20 yarihondro
Gemiddeld Preikiman (den nomru e sori omeni milyun)
6,0
5,5
5,0
4,5
4,0
3,5
3,0
2,5
2,0
1,5
1,0
0,5
1900 1910 1920 1930 1940 1950 1960 1970 1980 1990 2000
[Prenki na tapu bladzijde 15]
HIÈRONIMUS
TYNDALE
GUTENBERG
HUS
[Sma di abi a reti fu a prenki]
Gutenberg nanga Hus: A teki puru fu a buku The Story of Liberty, 1878
[Prenki na tapu bladzijde 15]
Bijbel Ondrosukuman di e preiki a bun nyunsu na ini den yari 1920 te go miti 1930
[Prenki na tapu bladzijde 16, 17]
Na heri grontapu, sma e piki tapu a bun nyunsu
[Prenki na tapu bladzijde 18]
Neleki fa a frulusu-ofrandi fu Yesus Krestes e sori o bigi a lobi fu Gado de, na so a preikiwroko e sori dati tu