Fa a Tron Di Tu Uma Tron Weduwe Ben Abi Krakti na Den Tapu

SANDRA na wan weduwe di e libi na Australia. Di Sandra en masra dede wan tu yari na fesi, dan a ben bruya, a no ben sabi kwetikweti san a ben musu du. „Wantronso mi kon lasi mi trowpatna, a moro bun mati fu mi. A prakseri dati moro mi sote taki mi no ben abi ati moro fu du sani. Fu tru, mi no sabi fa mi ben gowe libi na ati-oso go baka na oso, noso san mi ben du a tra pisi fu a dei. Na ini den wan tu wiki baka dati, a banawtu di mi ben firi ben meki taki ala ten mi skin ben hati mi.”

Sandra abi wan mati Elaine di owru moro en. A de wan weduwe so wan siksi yari kaba. Elaine ben sorgu en masra, David, siksi mun langa bifo a dede fu kanker. A ben sari sote taki no langa baka a dede fu en masra, a ben kon breni fu wan syatu pisi ten. Tu yari baka dati, a fadon flaw na fesi furu sma na wan publiki presi. A datra fu en no ben feni no wan mankeri na en na skin sei. Ma a ben kon si taki Elaine ben hori a pen na tapu en ati. So bun, a datra ben gi en a rai fu go na oso èn fu du muiti fu krei. „Baka wan heri pisi ten nomo mi ben man basi a firi di mi ben firi sari”, na so Elaine e erken. Te a ben firi taki a de en wawan sondro mati, dan soleki fa a e taki moro fara, „mi ben gwenti fu go na ini mi sribikamra srefi, dan mi ben domru mi ede na ini den krosi fu David”.

Iya, te wan sma lasi en lobi trowpatna na ini dede, dan na difrenti fasi a ben kan abi krakti na en tapu. Dati de so bika a libi leki weduwe, wani taki moro leki a libi di wan uma musu libi sondro wan masra nomo. Fu eksempre, wan pisi ten Sandra ben firi leki a ben de wan tra sma. Neleki furu weduwe di lasi a masra fu den no so langa ete, a ben firi swaki tu, a no ben firi taki a man teki bosroiti ensrefi. Sandra e memre: „Wi ben abi a gwenti taki mi masra ben teki bosroiti te dati ben de fanowdu, ma wantronso misrefi ben musu teki den bosroiti dati. Mi no ben man sribi bun moro. Mi ben weri, èn mi ben firi taki mi no ben abi krakti moro. Nomo fu kon sabi san fu du, ben de wan muilek sani gi mi.”

Ibri dei, sma na heri grontapu e ondrofeni den srefi sortu sani di Sandra nanga Elaine ben ondrofeni. Siki, ongoloku, orloku, so srefi feti pe sma wani kiri tra sma fu wan spesrutu grupu noso ras, èn ogri di sma e du nanga tranga, na sani di e meki tu taki moro nanga moro uma e tron weduwe.a Furu fu den uma disi e sari ma den no e taki fu dati nanga tra sma èn den no sabi san den musu du. San mati nanga famiri kan du fu yepi den uma di e pruberi fu tyari den libi leki weduwe? Na artikel di e kon now e gi wan tu rai di kan yepi den.

[Futuwortu]