Ondrofenitori
Wi E Kisi Krakti èn Wi E Prisiri So Srefi fu di Wi E Go Doro na Tapu a Pasi fu Yehovah
SOLEKI FA LUIGGI D. VALENTINO FRUTERI
„Disi na a pasi. Waka na tapu”, na so Yehovah e gi wi leki rai (Yesaya 30:21). Sensi mi teki dopu 60 yari pasa, mi abi a marki fu libi akruderi a rai disi. Na eksempre di mi papa nanga mi mama ben gi mi, meki taki mi kon abi a marki dati frukufruku kaba na ini mi libi. Na ini 1921 mi papa nanga mi mama ben komopo fu Italiakondre fu go tan na ini a foto Cleveland, na ini a Distrikt Ohio na Amerkankondre. Drape na ini a foto Cleveland den kweki dri pikin — mi, mi bigi brada Mike, nanga mi pikin sisa Lydia.
MI PAPA nanga mi mama ben ondrosuku difrenti bribi, ma te fu kaba den tapu nanga dati bika den ben lasi-ati fu di den no ben man feni san den ben suku. Ma wan dei na ini 1932, mi papa ben e arki wan radio programa di ben de na ini Italiatongo. A ben de wan programa fu Yehovah Kotoigi, èn mi papa ben lobi san a ben yere. A skrifi wan brifi go na a Bethel-oso fu kon sabi moro, èn na edekantoro fu Kotoigi fu Yehovah na ini Brooklyn, New York, seni wan Kotoigi di ben taki Italiatongo, kon na wi oso. Mi papa nanga mi mama ben abi wan moi takimakandra nanga a man disi te leki deibroko, èn baka dati den ben de seiker taki den ben feni a tru anbegi.
Mi papa nanga mi mama bigin go na den Kresten konmakandra, èn nanga ala prisiri den ben gi kringopziener tanpresi na ini den oso. Ala di mi ben pikin ete, mi ben kisi na okasi fu go preiki nanga den man disi èn a sani disi meki taki mi kisi a winsi fu go du furuten diniwroko gi Yehovah. Wan fu den sma dati di ben kon na wi oso ben de Carey W. Barber di de wan memre fu a Tiri Skin fu Yehovah Kotoigi now. A no ben teki langa baka dati, na ini februari 1941, taki mi teki dopu di mi ben abi 14 yari èn na ini a yari 1944 mi bigin dini leki wan pionier na ini a foto Cleveland. Mike nanga Lydia teki Bijbel waarheid tu. Mike dini Yehovah te leki a dede, èn Lydia wroko 28 yari langa makandra nanga en masra Harold Weidner na ini a kringwroko. Na ini a ten disi, den e dini leki spesrutu pionier na ini a furuten diniwroko.
Di Mi Ben De na Strafu-oso, Mi Kisi a Fasti Bosroiti fu Tan Go Doro
Na ini a bigin fu a yari 1945, den seni mi go na a Chillicothe Federal Prison (wan strafu-oso) na ini a distrikt Ohio. Dati pasa fu di a konsensi fu mi pusu mi fu handri akruderi a Bijbel gronprakseri na Yesaya 2:4, pe skrifi taki sma sa musu naki den feti-owru fu den kon tron plugu. Na ini a bigin, a grupu fu wi fu sowan 200 Kotoigi, no ben kisi primisi fu den strafu-oso tiriman fu abi Bijbel publikâsi di Yehovah Kotoigi tyari kon na doro. Ma wi kisi yepi fu Kotoigi di ben de fu wan gemeente krosibei fu a strafu-oso. Na wan sani fu mindrineti, den ben gwenti fu fringi wan tu publikasi na ini den gron di ben de krosibei fu a strafu-oso. A mamanten baka dati di den ben tyari wi go na wi wrokopresi, wi ben suku den publikâsi dati èn wi ben man tyari den go na ini a strafu-oso. Ibri wan fu wi ben hori wan tijdschrift noso wan buku 15 miniti nomo, èn baka dati wi ben gi en na wan tra brada. Na a ten dati mi leri trutru fu warderi a yeye nyanyan di Yehovah e gi. Mi e memre disi ibri leisi te mi e kisi wan nyun Waktitoren noso Ontwaakt!
Baka wan pisi ten, wi ben kisi primisi fu hori gemeente konmakandra na strafu-oso, ma sma di no ben de Kotoigi no ben mag teki prati. Toku wan tu fu den wrokoman fu a strafu-oso nanga tra strafuman so srefi, ben teki prati sondro taki den tiriman ben kon sabi, èn wan tu fu den teki waarheid srefi (Tori fu den Apostel 16:30-34). Wi trutru ben kisi trowstu fu den leisi di Brada A. H. Macmillan kon luku wi drape. Ala ten a ben gi wi a dyaranti taki a ten di wi ben de na strafu-oso no ben de lasi ten, fu di na ondrofeni disi ben sreka wi gi den diniwroko di wi ben o kisi fu du na ini a ten di ben de na wi fesi. A lobi owru brada dati naki mi ati èn a meki mi kisi wan moro fasti bosroiti fu waka na tapu a pasi fu Yehovah.
Mi E Feni wan Mati
A di fu Tu Grontapufeti ben kon na wan kaba, èn den lusu mi fu strafu-oso. Mi ben bigin baka nanga a pionierwroko, a furuten diniwroko. Ma na ini 1947, mi papa dede. Fu man sorgu na osofamiri, mi bigin du grontapuwroko èn mi leri fu wroko leki wan masseur fu hari a skin fu siki sma fu yepi den kon betre. A wroko dati ben o de wan yepi gi mi na ini a muilek ten di miti mi nanga mi wefi sowan 30 yari baka dati. Ma meki mi fruteri a tori bun. Na fosi presi, meki mi fruteri unu fu mi wefi.
Wan bakadina na ini 1949 di mi ben de na ini a Kownukondre zaal, mi yere a telefon e go. Di mi teki en, mi yere wan moi sten e taki: „Mi na Christine Genchur. Mi na wan Kotoigi fu Yehovah. Mi froisi kon na Cleveland fu feni wroko, èn mi wani go na wan gemeente.” A Kownukondre zaal fu wi ben de farawe fu a birti pe a ben tan, ma mi ben lobi a sten fu en. So bun, mi taigi en fa a ben kan feni a zaal èn mi gi en deki-ati fu kon a sonde dati. A ben de so taki a dei dati mi ben o hori a publikitaki. A sonde dati, mi ben de a fosi sma na ini a Kownukondre zaal, ma no wan enkri sisa ben kon di mi no ben sabi. Ala di mi ben e hori a taki, mi ben tan luku efu a ben e kon na inisei, ma mi no si en. A dei baka dati mi bel en, èn a taigi mi taki a no ben sabi so bun ete sortu bus a ben musu teki. Fu dati ede mi taigi en taki mi ben o miti nanga en fu fruteri en moro fu san a ben kan du.
Mi kon sabi taki en papa nanga en mama ben de sma di ben froisi komopo fu Tyekia kon na Amerkankondre, èn den ben bigin abi demakandra nanga den Bijbel Ondrosukuman baka di den ben leisi a pikin buku Waar zijn de Dooden? (Pe den Dedewan De?) En papa nanga en mama ben teki dopu na ini 1935. Na ini 1938, Christine en papa tron opziener fu a gemeente fu Yehovah Kotoigi na ini a foto Clymer, na ini a distrikt Pennsylvania na Amerkankondre. Christine teki dopu na ini 1947 di a ben abi 16 yari. Heri esi mi kon lobi a tumusi moi sisa disi di ben poti furu prakseri na yeye afersi. Wi trow tapu 24 yuni 1950, en sensi a dei dati Christine na mi getrow patna di de klariklari ala ten fu poti Kownukondre afersi na a fosi presi. Mi e taki Yehovah tangi taki a koni uma disi agri fu tron mi wefi.—Odo 31:10.
Wan Sani Di Mi No Ben Fruwakti
Na ini november fu a yari 1951, mi nanga mi wefi bigin du pionierwroko. Tu yari baka dati, wi ben de na wan kongres na ini a foto Toledo, na ini a distrikt Ohio. Na a kongres disi, den Brada Hugo Riemer nanga Albert Schroeder taki nanga wan grupu fu pionier di ben wani du zendelingwroko. Wi ben de na mindri den pionier disi. Wi kisi deki-ati fu tan pionier na ini Cleveland, ma wán mun nomo baka dati, wan sani pasa di wi no ben fruwakti. Wi kisi wan kari fu go na a di fu 23 klas fu a Waktitoren Bijbelskoro Gilead, di ben o bigin na ini februari 1954!
Ala di wi ben e rèi go na Gileadskoro, di ben de na ini South Lansing, New York na a ten dati, Christine ben senwe sote taki a ben e taigi mi nomo, „No rèi so tranga”! Mi taki, „Christine, efu mi no musu rèi so tranga, dan a oto o stop”. Ma baka di wi doro pe a Gileadskoro ben de, wi ben firi moro bun heri esi. Brada Nathan Knorr ben gi a grupu fu studenti wan switikon èn a teki wan waka nanga wi fu sori wi a presi. A taigi wi tu fa fu gebroiki a watra nanga a faya na so wan fasi taki wi no ben frumorsu den, èn a poti krakti na tapu taki a bun fu no frumorsu sani te a abi fu du nanga Kownukondre afersi. Wi no frigiti a rai dati. Te nanga a dei fu tide wi e libi akruderi dati.
Wi E Frei Go na Rio De Janeiro
Heri esi wi klari a Gileadskoro nanga bun bakapisi, èn tapu 10 december 1954, wi teki wan opolani na ini New York City pe a ben kowru na a ten dati. Wi ben breiti te wi ben prakseri taki wi ben e frei go na a toewijzing fu wi na ini a foto Rio de Janeiro na Brasyonkondre, pe son e skèin krinkrin. Peter nanga Billie Carrbello, tu tra zendeling, ben reis go makandra nanga wi. Wi ben o frei 24 yuru langa, èn wi ben o stop na Puerto Rico, na Venezuela, èn so srefi na a foto Belem di de na a noordsei fu Brasyonkondre. Ma fu di a masyin fu na opolani ben kisi problema, meki a ben teki 36 yuru bifo wi ben man si Rio de Janeiro komoto fu na opolani di wi ben de na ini. Dati ben de wan heri moi presi di wi ben si! Den leti fu a foto ben brenki neleki diamanti na tapu wan blaka matamata, èn a leti fu a mun di ben de leki solfru, ben skèin na tapu a watra fu a Guanabara Baai, wan pisi fu a sei di e koti go na ini a kondre.
Wan tu memre fu a Bethelfamiri ben de na a opolanigron e wakti wi. Baka di den gi wi wan switikon, dan wi rèi go nanga den na a bijkantoro, èn pikinmoro dri yuru mamanten, wi go sribi. Wan tu yuru baka dati, a bel di ben wiki a Bethelfamiri, meki wi kon frustan taki a fosi dei fu wi leki zendeling ben bigin!
Wan Sani Di Wi Leri Frukufruku
Wi leri wan prenspari sani heri esi. Wan neti wi ben de na wan osofamiri di ben de Kotoigi. Di wi ben wani waka go baka na a bijkantoro, na edeman fu na osofamiri ben wani tapu wi fu du dati. A ben taki: „Nôno, yu no kan gowe; alen e fadon”, èn a du muiti fu hori wi drape te mamanten fu a tra dei. „Alen e fadon tu na ini a kondre pe wi komoto”, mi taigi en, èn mi lafu fu di mi no ben teki san a ben taki leki wan seryusu sani. Èn wi gowe fu drape sondro fu taki moro fara fu a sani.
Fu di bergi e lontu Rio de Janeiro, meki a watra fu na alen heri esi e kon makandra èn a e lon kon na ini a foto, wan sani di furutron e tyari frudu kon. Heri esi wi ben e du muiti fu waka na ini watra di ben doro te na wi kindi. Krosibei fu a bijkantoro, den strati ben kenki kon tron liba nanga krasi watra di ben doro te na wi borsu. Di wi ben doro Bethel te fu kaba, wi ben nati dorodoro. A dei baka dati Christine ben kon siki èn a kisi tyfus, san swaki en wan heri pisi ten. A no de fanowdu fu taki, dati leki nyun zendeling, wi ben musu teki a rai fu den Kotoigi fu a presi drape, fu di den ben abi ondrofeni.
Wi E Bigin Nanga a Zendelingwroko èn a Kringwroko fu Wi
Baka di wi no ben abi den problema moro di wi ben kisi na ini a bigin, wi bigin preiki fayafaya. Mi nanga mi wefi ben leisi wan pristeri na ini Potigisi gi iniwan sma di wi ben miti, èn a ben sori taki wi ala tu ben go na fesi na ini a fasi fa wi ben taki a tongo. Wan ososma ben taigi Christine: „Mi e frustan san yu e taki, ma mi no man frustan san en e taki”, èn a ben sori kon na mi tapu. Wan tra ososma ben taigi mi, „Mi e frustan san yu e taki, ma mi no e frustan san en e taki”. Awansi fa a no fa, wi ben breiti fu kisi moro leki 100 Waktitoren abonement na ini den fosi wiki. Fu taki en leti, wan tu fu den bijbelstudenti fu wi ben teki dopu na ini a fosi yari di wi ben de na Brasyonkondre èn a sani dati ben de leki wan buweisi gi wi taki a zendelingwroko disi ben o tyari bun bakapisi kon.
Na ini den yari 1954-1956, kringopziener no ben go doronomo na furu fu den gemeente na ini Brasyonkondre, fu di wan tu brada nomo ben de di ben man du a wroko. Fu dati ede, na ini 1956, mi ben musu go du kringwroko na ini a foto Sao Paulo, ala di mi no ben sabi a tongo so bun ete èn mi no ben hori wan publiki taki srefi ete na ini Potogisi.
Fu di tu yari ben pasa sensi wan kringopziener ben go na a fosi gemeente di wi ben fisiti, ala sma ben fruwakti fu yere wan moi publikitaki. Di mi ben e sreka misrefi gi a taki dati, mi koti pisi puru fu den Waktitoren-artikel na ini Potogisi èn mi plak den pisi disi na tapu papira. A sonde dati, a Kownukondre zaal ben lai nanga sma. Sma ben e sidon tapu a podium srefi èn den alamala ben e wakti a publikitaki. A publikitaki, noso fu taki en moro bun, a leisi di mi ben o leisi gi den, ben bigin. Wanwan leisi mi ben opo mi ede luku den sma, èn mi no ben man bribi fu si taki ala sma ben sidon pî, srefi den pikin-nengre. Den alamala ben piri den ai e luku mi. Mi ben prakseri: „A no spotu, Valentino, yu trutru e taki Potogisi moro bun now! Den sma disi e arki yu’. Furu yari baka dati, di mi go baka na a srefi gemeente, wan brada di ben yere a fosi publikitaki fu mi drape, taigi mi: „Yu e memre a fosi publikitaki di yu hori dyaso? Wi no ben frustan no wan wortu fu en.” Mi taigi en trutru taki misrefi no ben frustan furu fu a taki dati tu.
A fosi yari fu mi na ini a kringwroko, mi ben gwenti leisi Sakarias 4:6. Den wortu, ’No nanga krakti, ma nanga yepi fu mi yeye’, ben memre mi taki soso a wroko di a yeye fu Yehovah e du, e meki taki a Kownukondre wroko ben go na fesi. Èn a go na fesi trutru ala di wi no ben man du ala sani di wi ben wani du.
Problema Nanga Blesi Di Wi Kisi
Fu man du a kringwroko wi ben abi fu go na ala presi fu a kondre, ala di wi ben tyari bagasi soleki wan skrifimasyin, dosu nanga publikâsi, kofru, nanga tas. Christine ben du wan koni sani fu di a ben nomru ala wi bagasi, so taki wi no ben frigiti no wan sani te wi ben musu saka fu a wán bus fu lon go teki wan trawan. Wi ben gwenti fu rèi 15 yuru langa na ini wan bus na tapu santi pasi, fu doro a presi pe wi ben musu go. Son leisi senwe trutru ben naki wi, èn dati ben de so spesrutu te tu bus ben musu pasa makandra tapu wan swaki broki. Den bus ben rèi so krosibei fu makandra taki yu no ben man poti wan pisi papiri na den mindri. Wi ben go so srefi nanga loko, nanga sipi, èn na tapu asi.
Na ini 1961, wi bigin dini na ini a distriktwroko èn wi ben reis fu wán kring go na a trawan na presi fu go fu a wán gemeente go na wan trawan. Wan tu neti na ini wan wiki, wi ben drai felem di na organisâsi fu Yehovah ben meki. Ibri leisi wi ben drai den felem disi na wan tra presi. Furutron wi ben musu handri esi, so taki den kerki tiriman fu a birti no ben man tapu wi fu drai den felem. Na ini wan foto, a priester ben dwengi na eiginari fu wan zaal fu broko a kontrakti di a ben abi nanga wi. Baka di wi suku wan tu dei langa, wi feni wan tra presi èn ala di wi taigi no wan sma fu a presi disi, wi go doro fu kari ala sma kon na a fosi presi pe wi ben o drai a felem. Bifo a programa ben bigin, Christine go na a zaal dati, èn sondro fu meki furu opo-opo, a taigi den sma di ben wani si a felem, pe a tra presi ben de. A neti dati, 150 sma si a felem èn a felem disi ben abi a yoisti nen fu De Nieuwe-Wereldmaatschappij in actie (Wan felem di e sori fa sani ben orga fosi na ini Yehovah en organisâsi).
A ben de wan tyalensi son ten fu du a kringwroko na ini farawe presi. Ma den brada di ben abi sakafasi èn di libi drape, ben abi so furu warderi taki wi ben kon na den, taki den ben de klariklari srefisrefi fu gi wi tanpresi na ini den pikin oso fu den. Fu dati ede, wi taki Yehovah tangi ala ten taki wi ben kan de makandra nanga den. Wi kisi blesi di naki wi ati srefisrefi, fu di wi ben tron mati fu den (Odo 19:17; Hagai 2:7). Fu dati ede wi ben sari trutru taki baka di wi ben dini 21 yari na ini Brasyonkondre, taki wi ben musu tapu nanga wi zendelingwroko!
Yehovah Sori Wi a Pasi na a Ten Di Wi Ben De na ini wan Muilek Situwâsi
Na ini 1975, Christine du wan oparâsi. Wi go baka na ini a kringwroko, ma a gosontu fu Christine ben e go na baka moro nanga moro. A ben sori taki a moro bun sani fu du, ben de fu drai go baka na Amerkankondre, so taki a ben kan kisi datra yepi. Na ini april fu a yari 1976, wi doro na ini a foto Long Beach na California, èn wi tan nanga mi mama. Fu di wi ben libi na ini wan dorosei kondre 20 yari langa, meki wi no ben sabi fa fu handri na ini a situwâsi disi. Mi bigin wroko leki masseur fu hari sma skin, èn a moni di mi ben meki fu a wroko dati ben yepi wi. Mi ben kisi primisi fu lanti na California fu poti Christine na ini wan ati-oso, ma drape a ben kon firi moro swaki ibri dei, fu di den datra no ben wani yepi en sondro brudu. Fu di wi ben brokosaka, meki wi tan begi Yehovah nomonomo fu sori wi a pasi.
Wan bakadina di mi ben e du preikiwroko, mi si wan datrakantoro, èn wantronso, mi teki a bosroiti fu go na inisei. Ala di a datra ben de klariklari fu go na oso, a kari mi kon na ini en kantoro, èn wi taki tu yuru langa. Dan a taigi mi: „Mi e warderi a wroko di unu leki zendeling e du, èn mi sa yepi yu wefi sondro taki yu abi fu pai mi èn mi no sa gi en wan brudutransfusie.” Mi no ben man bribi san mi ben yere.
Baka ten mi kon sabi taki a bun datra disi ben de wan sabiman tapu a kontren fu a siki di mi wefi ben abi. A datra disi seni poti Christine na ini wan tra ati-oso pe ensrefi ben wroko, èn Christine kon betre heri esi baka fu di a datra disi ben sorgu en. Wi trutru ben de nanga tangi fu di Yehovah sori wi a pasi na ini a muilek pisi ten dati!
Tra Diniwroko
Ala di Christine ben e kisi ensrefi baka, wi ben dini leki pionier èn wi ben prisiri fu yepi wan tu sma fu a foto Long Beach fu tron anbegiman fu Yehovah. Na ini 1982 a genootschap aksi wi fu du kringwroko na ini Amerkankondre. Wi taki Yehovah tangi ibri dei fu di a ben wani gebroiki wi baka na ini a kringwroko, bika dati ben de wan diniwroko di wi ben lobi. Wi dini na ini California èn baka dati na ini New England, pe a kring ben abi so srefi wan tu Potogisi gemeente. Baka ten na èilanti Bermuda tron wan pisi fu a kring tu.
Baka di wi dini nanga prisiri fo yari langa na ini a kringwroko, dan wi kisi wan tra wroko. Wi kisi kari fu dini leki spesrutu pionier na awansi sortu presi wi ben sa wani. Ala di wi ben sari fu libi a kringwroko, toku wi ben abi a fasti bosroiti fu go doro nanga a nyun diniwroko di wi ben kisi. Ma pe wi ben kan go wroko? Na a ten di wi ben e du kringwroko, mi ben si taki a Potogisi gemeente na ini a foto New Bedford, na ini Massachusetts ben abi yepi fanowdu. Fu dati ede wi ben go na a foto New Bedford.
Di wi doro drape, a gemeente hori wan bigi fesa fu gi wi wan switikon. A sani dati trutru gi wi a firi taki den ben breiti taki wi ben kon drape! Wi ai ben lon watra. Wi ben kisi tanpresi fu di wan yongu trowpaar di ben abi tu pikin meisje ben ontfanga wi na wan switi fasi, èn wi ben kan tan na a oso fu den te leki wi ben feni wi eigi tanpresi. Wi no ben fruwakti taki Yehovah ben o blesi a spesrutu pionierwroko fu wi so. Sensi 1986 wi yepi sowan 40 difrenti sma na ini a foto disi fu tron Kotoigi. Den na wi famiri na yeye fasi. Boiti dati, mi prisiri fu si taki feifi brada fu a foto disi gro kon tron skapuman di e sorgu heri bun gi den sma di de leki skapu na ini a gemeente. A de neleki wi e du zendelingwroko di e tyari bun bakapisi kon.
Te wi e prakseri a ten di pasa, dan wi e prisiri taki wi dini Yehovah fu sensi wi ben de yongu sma èn taki wi tyari wi libi akruderi waarheid. A tru taki owruyari nanga siki e dangra wi now, ma wi e kisi krakti ete fu di wi e go doro na tapu a pasi fu Yehovah èn dati e gi wi prisiri tu.
[Prenki na tapu bladzijde 26]
A ten di wi doro na ini Rio de Janeiro
[Prenki na tapu bladzijde 28]
Wi famiri na yeye fasi — a Potogisi gemeente na ini a foto New Bedford, na ini Massachusetts