A froetrow foe mi na ini Jehovah, ben jepi mi
SOLEKI FA AGENOR DA PAIXÃO BEN FROETERI
A wan-enkri manpikin foe wi, Paul, ben dede foe bronchitis di a ben owroe 11 moen nomo. Dri moen na baka, na tapoe 15 augustus 1945, mi lobi wefi ben dede foe longontsteking. Mi ben abi 28 jari, èn den rampoe disi ben meki mi sari èn meki mi firi brokosaka. Ma froetrow na ini Jehovah èn na ini den pramisi foe en ben jepi mi. Meki mi froeteri fa mi doe kon abi a froetrow disi.
SENSI a ten foe a geborte foe mi na Salvador, a distrikt Bahia, Brasjonkondre, na tapoe 5 januari 1917, mi mama ben leri mi foe anbegi den „santawan” foe a Katolik Kerki. A ben wiki den brada foe mi nanga mi srefi froekoe mamanten so taki wi ben kan begi makandra. Ma mi papa nanga mama ben fisiti so srefi den programa foe candomblé, den Afrikan-Brasjon foedoe ceremonia. Mi ben lespeki den bribi disi, ma mi no ben abi nowan froetrow na ini den so-kari santawan foe a katolik bribi noso na ini candomblé. San ben meki mi firi sari spesroetoe, ben de a kroetoe di den relisi disi ben kroetoe tra ras.
Baka wan pisi ten, den toe moro owroe brada foe mi ben gowe foe oso foe go soekoe wroko. Baka ten mi papa ben gowe libi na osofamiri. So boen, di mi ben abi neigi jari, mi ben moesoe feni wroko foe jepi mi mama èn mi moro jongoe sisa. Pikinmoro 16 jari na baka, takimakandra di mi ben abi nanga wan kompe wrokoman, ben tjari wan prenspari kenki kon na ini mi libi.
Kisi froetrow na ini Jehovah
Mi ben miti Fernando Teles na ini 1942. Foeroe tron a ben taki dati a no ben boen foe anbegi „santawan” (1 Korentesma 10:14; 1 Johanes 5:21). Na ini a bigin mi no ben poti prakseri na en tapoe. Ma na opregtifasi foe en èn a belangstelling di a ben abi gi sma, awansi sortoe ras den ben abi, ben de wan sani di mi ben lobi, èn mi ben kon warderi a sabi di a abi foe bijbel, spesroetoe san a ben taki foe Gado Kownoekondre èn foe wan paradijs grontapoe. (Jesaja 9:6, 7; Danièl 2:44; Openbaring 21:3, 4). Di a ben si a belangstelling foe mi, a ben gi mi wan bijbel èn wan toe bijbel poeblikâsi.
Wan toe wiki na baka, mi ben teki a kari di mi ben kisi gi wan gemeente bijbelstudie. A groepoe ben e studeri a boekoe Religion (Relisi), di a Watch Tower Bible and Tract Society ben tjari kon na doro. Mi ben lobi a studie èn ben bigin fisiti ala den gemeente konmakandra foe Jehovah Kotoigi. San ben naki mi ati spesroetoe ben de a kroetoe di sma no ben kroetoe tra ras èn a fasi fa den ben teki mi wantewante na den mindri. Pikinmoro na a ten dati, mi ben bigin abi verkering nanga Lindaura. Di mi ben taki nanga en foe den sani di mi ben e leri, a ben bigin fisiti den konmakandra nanga mi.
Wan tra sani di ben naki mi ati na tapoe den konmakandra, ben de a spesroetoe prakseri di den ben poti na tapoe a preikiwroko (Mateus 24:14; Tori foe den Apostel 20:20). Foe di mi ben kisi deki-ati foe den pionier, soleki fa den e kari den foeroeten bedinari, mi ben bigin taki na wan informeel fasi nanga tra sma na ini a loko te mi e rèis go-kon na wroko. Te mi ben feni wan sma di ben abi belangstelling, dan mi ben e teki en adres èn ben e fisiti en foe proeberi kweki a belangstelling dati.
Na ini a pisi ten dati, a froetrow foe mi na ini Jehovah èn na ini na organisâsi di a e gebroiki ben e tan gro. Èn na so fasi, na baka di mi ben arki wan bijbel-lezing foe a dopoe foe kresten, mi ben teki dopoe na ini na Atlantis Se, na tapoe 19 april 1943. Na tapoe a srefi dei dati, mi ben teki prati na ini a oso-foe-oso diniwroko gi a fosi leisi.
Toe wiki na baka, na tapoe 5 mei, Lindaura nanga mi ben trow. Baka dati, na ini augustus 1943, a ben teki dopoe na a fosi bigi konmakandra di Jehovah Kotoigi ben hori na ini a foto Salvador. A 1974 Jaarboek van Jehovah’s Getuigen (Jariboekoe foe Jehovah Kotoigi) ben taki foe a kongres dati: „Den sani di den kerki tiriman ben doe ben man stop a poebliki lezing na Salvador, ma no bifo wan bigi pisi foe boen preiki . . . ben feni presi.” A boeweisi foe a tiri di Jehovah e gi ala di serjoesoe froefolgoe ben de, ben tranga a froetrow foe mi na ini en.
Soleki fa mi ben froeteri na ini a bigin, toe jari nomo na baka a dopoe foe Lindaura — èn dri moen na baka a dede foe wi manpikin — mi lobi wefi dede. A ben abi 22 jari nomo. Ma froetrow di mi ben abi na ini Jehovah, ben jepi mi na ini den moeilek moen dati.
Aktiviteit na jejefasi ben tranga mi
Na ini 1946, wán jari na baka di mi lasi mi wefi èn mi manpikin, mi ben poti na wroko leki bijbelstudie dinari na ini a wan-enkri gemeente di ben de na Salvador na a ten dati. A srefi jari dati a theokrasia diniwroko-skoro ben bigin na ini den gemeente na Brasjonkondre, èn mi ben tron a fosi leriman foe a skoro na ini a distrikt Bahia. Baka dati, na ini oktober 1946, a „Prisiri nâsi” Theokrasia Kongres ben hori na ini a foto São Paulo. A wrokobasi foe mi, pe mi ben wroko tin jari kaba, ben taki dati a abi mi fanowdoe èn a ben poti druk na mi tapoe foe no go. Ma baka di mi ben tjari kon na krin gi en o prenspari a konmakandra ben sa de gi mi, a ben gi mi wan moi moni èn ben winsi taki sani waka boen gi mi.
Den kongres programa na ini a Municipal Theater foe São Paulo ben hori na ini Potogisi — a tongo foe Brasjonkondre — èn so srefi na ini Doisritongo, Ingrisitongo, Hongariatongo, Pôlsoe, nanga Rosiatongo. Na a kongres dati a Ontwaakt! ben tjari kon na doro na ini Potogisi. A konmakandra ben naki mi ati na so wan fasi — pikinmoro 1700 sma ben fisiti a poeblikitaki — taki mi ben skrifi wan aksi-formulier foe bigin pionier na tapoe 1 november 1946.
Na a ten dati wi ben gebroiki a fonograaf foeroe na ini a pionierwroko foe wi. A lezing „Bescherming” (Kibri) ben de wan lezing di wi ben e drai foeroe tron gi den ososma. Baka te wi ben drai a lezing, wi ben e taki: „Foe man kibri wisrefi gi wan feanti di sma no man si, wi moesoe tan hori na wan mati di sma no man si toe. Jehovah na wi moro bigi mati èn a makti moro foeroe leki wi feanti, Satan. Foe dati ede wi moesoe tan krosibei na Jehovah foe kibri wisrefi gi en.” Dan wi ben e pristeri a brochure Bescherming, di ben e gi moro bodoi.
Mi ben pionier pikinmoro wan jari di mi ben kisi wan kari foe dini leki spesroetoe pionier na ini a gemeente Carioca na ini Rio de Janeiro. Drape wi ben kisi tranga gens son tron. Wan leisi, wan ososma ben feti troetroe nanga mi patna, Ivan Brenner. Den birti ben kari skowtoe, èn den ben tjari wi alamala go na a skowtoe-oso.
Na a ten di den ben poti aksi, na ososma di ben atibron srefisrefi ben kroetoe wi taki wi ben e hendri a rust. A skowtoe-basi ben komanderi en foe tan tiri. Ne a skowtoe-basi ben drai loekoe wi èn ben taki nanga wan safri sten taki wi ben de fri foe go. A ben hori a man di ben kroetoe wi èn ben kroetoe en taki a ben wani doe wi ogri. Den sortoe situwâsi dati ben meki a froetrow di mi abi na ini Jehovah kon moro tranga.
Moro foeroeten diniwroko
Na tapoe 1 juli 1949, mi ben breiti srefisrefi foe kisi wan kari foe dini na tapoe Bethel, soleki fa den e kari den bijkantoro foe Jehovah Kotoigi na ini wan kondre. A Bethel na Brasjonkondre ben de na 330 Licínio Cardoso Street na Rio de Janeiro. Na a ten dati 17 sma nomo ben de na ini a heri Bethel famiri. Wan pisiten mi ben fisiti a birti gemeente Engenho de Dentro, ma baka ten mi ben kisi a toewijzing leki a fesiman opziener na ini a wan-enkri gemeente na ini Belford Roxo, wan foto di de wan toe kilometer moro fara foe Rio de Janeiro.
A ben druk srefisrefi na a kaba foe den wiki. Na tapoe den satra mi ben e rèis go na Belford Roxo nanga loko, ben e teki prati na a velddienst na bakadina, èn dan mi ben e go na a theokrasia diniwroko-skoro èn a diniwroko konmakandra teneti. Mi ben e tan sribi teneti na den oso foe Kotoigi èn ben teki prati na ini a velddienst a tra mamanten. A bakadina dati mi ben e go na a poebliki bijbel-lezing èn a Waktitoren-studie èn dan mi ben e drai go baka na Bethel na wan ten foe afoe-tin teneti. Now 18 gemeente de na ini Belford Roxo.
Na ini 1954, na baka dri nanga afoe jari nanga a schema dati, mi ben kisi wan toewijzing foe go baka na Rio de Janeiro leki fesiman opziener na ini gemeente São Cristóvão. Den tin jari di kon baka dati, mi ben dini na ini a gemeente dati.
Den toewijzing foe mi na Bethel
Mi fosi toewijzing na Bethel ben de taki mi ben moesoe bow wan garage gi a wan-enkri wagi foe a Genootschap, wan Dodge foe a jari 1949, di wi ben gi a dreigi nen Sjokolade bika a abi wan bruin kloroe. Di a garage ben kaba bow, mi ben kisi a toewijzing foe wroko na ini a koekroe, pe mi ben wroko dri jari langa. Baka dati, den ben poti mi na a Huisdrukkerij, pe mi de now pasa 40 jari kaba.
Foeroe foe den wrokosani di wi ben abi foe druk sani, ben de sani di ben gebroiki kaba. Foe eksempre, foeroe jari langa wi ben abi wan owroe plata drukpers di wi ben kari Sara na wan lobi fasi, a nen foe Abraham wefi. Foeroe jari langa a ben gebroiki na ini a drukkerij na den edekantoro foe a Waktitoren Genootschap na Brooklyn, New York. Na ini den jari 1950, den ben seni en nanga boto kon na Brasjonkondre. Djaso, neleki a wefi foe Abraham, ala di a owroe, a ben meki froktoe — so leki A Waktitoren nanga Ontwaakt!
Mi e tan froewondroe foe a gro ini a nomroe foe poeblikâsi di e meki na ini den drukkerij gebow na ini Brasjonkondre. Na ini a heri jari 1953, wi ben druk 324.400 tijdschrift, ma now wi e meki moro leki dri miljoen tijdschrift ibri moen!
Den Bethel gebow foe wi
A ben span foe si na ini den jari fa den Bethel gebow foe wi ben kon moro foeroe na ini Brasjonkondre. Na ini 1952 wi ben bow wan drukkerij di hei toe verdieping, na bakasei foe a Bethel-oso foe wi na Rio de Janeiro. Baka dati, na ini 1968, Bethel ben froisi go na wan njoen gebow na ini a foto São Paulo. Di wi ben froisi go na ini, ala sani ben sori so bigi èn a ben gersi taki foeroe presi ben de gi a Bethelfamiri foe wi di ben abi 42 memre. Wi ben prakseri troetroe taki a gebow disi ben sa dini gi ala a gro di wi ben sa kisi na ini a ten di e kon. Ma na ini 1971 wi ben bow toe gebow ete di abi feifi verdieping, èn wi ben bai ete wan drukkerij di ben de na en sei, èn wi ben meki en tra fasi, èn ben miti en na den gebow disi. Ma na ini wan toe jari nomo, a doronomo gro na ini Kownoekondre preikiman — wi ben pasa a marki foe 100.000 na ini 1975 — ben aksi taki moro presi ben de fanowdoe.
Foe dati ede, wan njoen groepoe gebow ben bow pikinmoro 140 kilometer fara foe São Paulo, krosibei foe a pikin foto Cesário Lange. Na ini 1980 a Bethelfamiri foe wi di ben abi 170 memre ben froisi go na den njoen gebow disi. Sensi a ten dati a Kownoekondre wroko ben gro kefalek. Now wi abi moro leki 410.000 sma di abi prati doronomo na ini a preikiwroko na Brasjonkondre! Foe sorgoe gi den sani di ala den Kownoekondre preikiman disi abi fanowdoe na jejefasi, wi ben abi foe tan bow njoen drukkerij foe druk bijbel poeblikâsi èn njoen Bethelkamra foe sorgoe gi den Bethel friwani wrokoman. Nownow wi abi wan sani foe 1100 memre foe a Bethelfamiri!
Grani di mi e warderi
Mi e si Bethelwroko leki wan warti grani. So boen, ala di mi ben prakseri na ini den fosi jari foe trow baka, mi ben teki a bosroiti foe poti ala mi prakseri na tapoe den grani foe mi na tapoe Bethel èn na ini a preikiwroko. Djaso mi ben abi a prisiri foe dini makandra nanga foeroe jongoe sma na ini a drukkerij èn foe gi den leri na ini den toewijzing foe den. Mi ben proeberi foe handri nanga den neleki den ben de mi eigi manpikin. A faja di den abi èn a prakseri di den no e prakseri densrefi nomo, ben de wan fonten foe foeroe deki-ati gi mi.
Wan tra grani ben de taki mi ben njanboen foe a demakandra foe boen kompe di ben tan nanga mi ini wan a kamra, foeroe jari langa. A troe, difrenti na ini persoonlijkheid ben de wan tjalensi son tron. Ma mi ben leri foe no froewakti volmaaktifasi foe tra sma. Mi proeberi foe no meki bigi sani foe pikinpikin sani, noso foe tan si misrefi toemoesi prenspari. A lafoe di mi ben lafoe foe den eigi fowtoe foe mi, jepi mi foe man froedrage den di foe tra sma.
Wan tra warti grani di mi ben abi ben de a man di mi ben man fisiti bigi internationaal kongres na ini Amerkankondre. Wan foe den disi ben de a „Têgo boen njoensoe”-kongres, di ben hori na a Yankee Stadion, na ini New York na ini 1963, èn a trawan ben de a „Vrede na grontapoe” internationaal kongres di ben hori na a srefi presi na ini 1969. Di mi ben de drape, mi ben abi a prisiri foe fisiti den krosibei edekantoro foe Jehovah Kotoigi na heri grontapoe, di de na ini Brooklyn, New York!
Tin jari a ben de mi grani toe foe abi wan prati — na ini beurt — foe teki fesi na den mamanten anbegi foe a Bethelfamiri. Ma tokoe a moro bigi grani, di gi mi foeroe prisiri èn deki-ati, ben de a tjari di mi kan tjari a Kownoekondre boskopoe gi opregtisma, soleki fa wi Masra, Jesus Krestes, ben doe.
Na ini den jari di pasa no so langa, mi miti a tjalensi foe libi nanga a siki foe Parkinson. A sorgoe di den brada nanga sisa e sorgoe mi na wan lobi fasi na ini a presi foe Bethel pe den e sorgoe swaki sma, ben de wan fonten foe doronomo jepi èn trowstoe gi mi. Nanga ala froetrow, mi e begi taki Jehovah kan gi mi a krakti foe tan go doro foe doe ala san mi man gi a boen foe a troe anbegi foe en.
[Prenki na tapoe bladzijde 23]
A bijkantoro foe Brasjonkondre pe mi e tan now
[Prenki na tapoe bladzijde 23]
Nanga mi wefi di dede na ini 1945