„Ala di oenoe no si en noiti, tokoe oenoe lobi en”
„Ala di oenoe no si en noiti, tokoe oenoe lobi en. Ala di oenoe no e si en nownowde, tokoe oenoe e sori bribi na ini en èn oenoe e prisiri troetroe.” — 1 PETRUS 1:8.
1. Fa son kerkisma e meki moeiti foe sori taki den e gi densrefi na ini a dini foe Jesus, ala di no wan sma na grontapoe si en?
NO WAN sma di e libi na grontapoe na ini a ten disi oiti si Jesus Krestes. Tokoe miljoenmiljoen sma e taki dati den lobi en. Ibri jari tapoe 9 januari, na Manila, Filippijnen, den e hari wan boen bigi popki foe Jesus Krestes di e tjari wan kroisi, pasa na ini den strati na ini san sma kari a moro bigi, a moro kefalek fasi foe sori fasi foe anbegi di pôpi na ini a kondre dati. Den ipi sma di e prisiri pasa marki e poesoepoesoe èn e skoifi trawan; sma e kren srefi na tapoe makandra èn leki lawman den e meki moeiti foe fasi a popki. Foeroe sma di de drape foe loekoe a sani disi, e kon drape nomo foe di den wani si a prisiri groepoe sma. Ma tokoe, tweifri no de taki son wan foe den na sma di troetroe e firi wan sani gi Jesus. Foe boeweisi dati, den kan weri wan kroisi noso kande den e go na kerki doronomo. Ma wi kan si na anbegi dati di sma e anbegi kroektoe gado, leki a troe anbegi?
2, 3. (a) Soema foe Jesus en bakaman troetroe ben si èn ben jere en? (b) Soema moro na ini a fosi jarihondro ben lobi Jesus èn ben poti bribi na ini en, ala di densrefi noiti no ben si en?
2 Na ini a fosi jarihondro, foeroe doesoendoesoen sma ben de na ini den Romeini distrikt Judea, Samaria, Perea, nanga Galilea di densrefi troetroe ben si èn jere Jesus Krestes. Den ben arki di a ben tjari den prisiri waarheid foe a Kownoekondre foe Gado kon na krin. Nanga den eigi ai den ben si den wondroe di a ben doe. Son wan foe den ben tron fajafaja disipel foe en, foe di den ben abi na overtoigi taki a ben de „Krestes, a Manpikin foe a libi Gado” (Mateus 16:16). Ma den sma gi soema na apostel Petrus ben skrifi en fosi brifi na ondro a krakti foe santa jeje, no ben de na mindri den sma disi.
3 Den sma di Petrus ben taki nanga den ben de na ini den Romeini distrikt Pontus, Galasia, Kapadosia, Asia, nanga Bitania — den alamala ben de na ini a kontren foe a disiten Torkoekondre. Petrus ben skrifi den: „Ala di oenoe no si en noiti, tokoe oenoe lobi en. Ala di oenoe no e si en nownowde, tokoe oenoe e sori bribi na ini en èn oenoe e prisiri troetroe nanga boen foeroe prisiri di abi bigi glori” (1 Petrus 1:1, 8). Fa den ben kon sabi Jesus Krestes foe kan lobi en èn sori bribi na ini en?
4, 5. Fa den sma di noiti no ben si Jesus, ben leri nofo foe en foe lobi en èn foe poti bribi na ini en?
4 Soleki fa a sori, dan son wan ben de na Jerusalem di na apostel Petrus ben gi kotoigi na a ipi sma di ben de na a Pinksterfesa foe 33 G.T. Baka a fesa, foeroe disipel ben tan na Jerusalem foe kisi moro leri foe den apostel. (Tori foe den Apostel 2:9, 41, 42; teki gersi 1 Petrus 1:1.) Na tapoe difrenti zending waka na apostel Paulus ben wroko fajafaja na ini a diniwroko di a ben doe na den sma toe di ben libi na ini a kontren pe Petrus baka ten ben seni a fosi brifi foe bijbel go di ben tjari a nen foe en. — Tori foe den Apostel 18:23; 19:10; Galasiasma 1:1, 2.
5 Foe san ede den sma disi, di no ben si Jesus noiti, ben abi so tranga firi gi en? Na ini a ten foe wi, foe san ede miljoenmiljoen sma moro na heri grontapoe lobi en someni?
Den sani di den ben jere
6. (a) San joe ben kan leri, efoe joe ben jere fa Petrus ben gi kotoigi foe Jesus na a Pinksterfesa foe 33 G.T? (b) Fa disi ben abi krakti na tapoe so wan 3000 sma di ben de drape?
6 Efoe joe ben de na Jerusalem di Petrus ben taki nanga a bigi ipi fesaman na ini 33 G.T., dan san joe ben sa kon sabi foe Jesus? Tweifri no de taki den wondroe di a ben doe, ben sori taki Gado ben seni en kon. Taki a no ben de na ini a grebi moro, ala di sondari ben kiri en, ma taki a ben opo baka èn ben opo go na hemel baka dati foe de na a reti-anoe foe Gado. Taki Jesus troetroe ben de Krestes, a Mesias di den profeiti ben skrifi foe en. Taki nanga jepi foe Jesus Krestes, santa jeje ben kanti kon na tapoe den bakaman foe en so taki wantronso den ben man gi kotoigi na sma foe foeroe nâsi foe den toemoesi moi sani di Gado ben doe nanga jepi foe en Manpikin. A troetroe ben boeweigi na ati foe foeroe sma di ben jere Petrus na a okasi dati, èn so wan 3000 sma ben teki dopoe leki kresten disipel (Tori foe den Apostel 2:14-42). Efoe joe ben de drape, dan joe ben sa teki so wan prenspari bosroiti?
7. (a) San joe ben sa kan leri efoe joe ben de na Antiòkia di na apostel Paulus ben preiki drape? (b) Foe san ede son sma foe na ipi ben tron bribisma èn ben prati a boen njoensoe nanga trawan?
7 Efoe joe ben de wan foe den sma di ben de drape di na apostel Paulus ben gi leri na Antiòkia na ini a Romeini distrikt Galasia, dan sortoe tra sani joe ben sa kisi foe leri foe Jesus? Joe ben sa jere fa Paulus tjari kon na krin taki den tiriman foe Jerusalem ben kroetoe Krestes foe den kiri en, soleki fa den profeiti ben taki foe dati na fesi. Joe ben sa jere toe foe boeweisi taki Jesus ben opo baka, foe di sma ben si dati nanga den eigi ai. Joe ati seiker ben sa naki joe te Paulus ben o tjari kon na krin taki nanga jepi foe na opo di Jehovah opo Jesus baka na dede, A ben sori taki a wan disi troetroe ben de a Manpikin foe Gado. Èn joe ati no ben sa prisiri te joe ben leri taki a kisi di sma e kisi pardon foe sondoe foe di den e bribi na ini Jesus, ben kan abi têgo libi leki bakapisi? (Tori foe den Apostel 13:16-41, 46, 47; Romesma 1:4) Foe di den ben erken o prenspari a de san den ben jere, meki son sma na Antiòkia ben tron disipel, di fajafaja ben prati a boen njoensoe nanga tra sma, srefi te dati ben sa wani taki dati den ben o kisi foe doe nanga hebi froefolgoe. — Tori foe den Apostel 13:42, 43, 48-52; 14:1-7, 21-23.
8. San joe ben kan leri, efoe joe ben de na a konmakandra foe a gemeente na Efeise di a brifi foe Paulus ben kon na den?
8 San efoe joe ben kon makandra nanga a kresten gemeente na Efeise, na ini a Romeini distrikt Asia, di den ben kisi a brifi di Gado ben meki Paulus skrifi dati gi den disipel drape? San dati ben kan leri joe foe a ròl di Jesus e plèi na ini den sani di Gado abi na prakseri? Na ini a brifi dati Paulus ben tjari kon na krin taki nanga jepi foe Krestes ala sani na hemel èn na grontapoe ben sa tjari kon baka na ini wánfasi nanga Gado, taki a presenti di Gado gi nanga jepi foe Krestes ben gi na sma foe ala nâsi, taki sma di ben dede na ini Gado ai foe den sondoe ede ben kon na libi baka foe di den ben abi bribi na ini Krestes, èn taki leki wan bakapisi foe a seti disi, agen a kan taki libisma e tron lobi manpikin foe Gado. — Efeisesma 1:1, 5-10; 2:4, 5, 11-13.
9. (a) San kan jepi joe foe man si krin efoe joesrefi froestan san den sani di Paulus ben skrifi den Efeisesma, wani taki? (b) Fa den sani di den brada foe den Romeini distrikt di Petrus ben kari, ben leri foe Jesus, ben abi krakti na den tapoe?
9 A warderi gi ala den sani disi ben sa meki a lobi di joe abi gi a Manpikin foe Gado kon moro tranga? A lobi dati ben sa abi krakti na tapoe na aladei libi foe joe, soleki fa na apostel Paulus ben gi deki-ati na ini kapitel 4 te nanga 6 foe Efeisesma? A warderi dati ben sa meki joe ondrosoekoe finifini den sani di joe e poti na a fosi presi na ini joe libi? Foe di joe lobi Gado èn joe de nanga tangi gi san a Manpikin foe en doe, dan joe ben sa tjari den kenki kon di de fanowdoe so taki a doe di joe e doe a wani foe Gado troetroe ben de a moro prenspari sani na ini joe libi? (Efeisesma 5:15-17) Na apostel Petrus ben skrifi foe a fasi fa a sani di kresten na Asia, Galasia, nanga tra Romeini distrikt ben leri, ben abi krakti na den tapoe: „Ala di oenoe no ben si [Jesus Krestes] noiti, tokoe oenoe lobi en. . . . Oenoe e sori bribi na ini en èn oenoe e prisiri troetroe nanga boen foeroe prisiri di abi bigi glori.” — 1 Petrus 1:8.
10. (a) San sondro misi, ben meki a lobi di den fositen kresten ben abi gi Jesus, kon moro bigi? (b) Fa wi kan abi wini toe?
10 Wan tra sani ben de di sondro tweifri ben meki a lobi gro di den fositen kresten dati ben firi gi a Manpikin foe Gado èn foe soema Petrus ben taki. San dati ben de? Na a ten di Petrus ben skrifi en fosi brifi, dan seiker toe foe den Evangelie — Mateus nanga Lukas — ben seni go lontoe kaba. Den fosi jarihondro kresten di noiti no ben si Jesus ben kan leisi den Evangelie tori disi. Wi kan doe dati toe. Den Evangelie tori no de tori di sma meki; den abi ala sani na ini di de fanowdoe gi a moro froetrow historia. Na ini den tori disi di Gado meki sma skrifi den, wi e feni foeroe sani di e meki a lobi di wi abi gi Gado en Manpikin, kon moro bigi.
Den eigifasi di a ben sori
11, 12. Sortoe sani foe den eigifasi di Jesus ben sori tra sma, e meki taki joe lobi en?
11 Drape na ini den tori di skrifi foe a libi foe Jesus, wi e leri fa a ben handri nanga tra libisma. Den eigifasi di a ben sori, e naki na ati foe sma srefi now, moro leki 1960 jari baka di a dede. Den bakapisi foe sondoe de leki wan hebi na tapoe ala sma di de na libi. Foeroe miljoenmiljoen sma na sma di kisi foe doe nanga onregtfardikifasi, den e feti nanga siki, noso foe tra reide ede a firi foe lasi-ati de troetroe hebi na den tapoe. Ala den sortoe sma dati Jesus e taigi: „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati. Teki mi tjatjari na oenoe tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti.” — Mateus 11:28-30.
12 Jesus ben sori opregti belangstelling gi den pôtisma, den sma nanga angribere, nanga den sma di ben sari. Te a ben de fanowdoe, dan a ben gi bigi ipi sma njanjan srefi na wan wondroe fasi (Lukas 9:12-17). A ben fri den foe gwenti di ben hori den na ini katibo. A ben bow a bribi foe den toe na ini a seti foe Gado foe tjari wan kaba kon na kwinsi na politiek èn na ekonomia sei. Jesus no ben masi a jeje foe den sma di ben kisi kwinsi kaba. Nanga safoe firi èn nanga lobi, a ben abi a koni foe meki a jeje situwâsi foe den safri-atisma kon moro betre. A ben gi kowroe-ati na den sma di ben de leki ken di ben broko na toe èn na den sma di ben de leki a pikin faja foe kokolampoe di e soekoe foe dede. Sensi a ten dati te nanga now, a nen foe en e gi sma howpoe, srefi na ini den ati foe den sma di no si en noiti. — Mateus 12:15-21; 15:3-10.
13. Foe san ede a fasi fa Jesus ben handri nanga sondari e hari sma?
13 Jesus no ben feni takroedoe boen, ma tokoe a ben froestan sma di ben meki fowtoe na ini a libi ma di ben sori berow èn ben soekoe jepi na en (Lukas 7:36-50). A ben o sidon èn njan nanga sma di a libimakandra ben wisiwasi, efoe a ben denki taki disi ben sa de wan okasi foe jepi den na jejefasi (Mateus 9:9-13). A bakapisi foe den eigifasi di a ben sori, de taki na ati foe miljoenmiljoen sma di de ini den srefi sortoe situwâsi èn di noiti no si Jesus, boeweigi den foe kon sabi en èn foe poti bribi na ini en.
14. San e hari joe foe a fasi fa Jesus ben jepi sma di ben siki, malengri, noso ben lasi wan lobiwan foe den na dede?
14 A fasi fa Jesus ben handri nanga sma di ben siki noso di ben malengri de wan boeweisi foe a waran firi nanga sari-ati di a ben abi èn a man di a man gi den froelekti. So boen, di wan siki man di ben lai nanga gwasi ben kon na Jesus èn ben begi en foe jepi en, dan Jesus no ben skreki foe san a ben si. Èn a no ben taigi a man, ala di a ben sari a man, taki a gwasi ben de toemoesi fara kaba èn taki noti moro ben kan doe foe jepi en. A man ben begi: „Masra, efoe joe wani nomo, joe kan meki mi kon krin.” Sondro draidrai, Jesus ben langa en anoe èn ben fasi a gwasiman, taki: „Mi wani so. Kon krin” (Mateus 8:2, 3). Na wan tra okasi wan oema ben soekoe foe kon betre èn kibrikibri a ben fasi den franja foe en krosi. Jesus ben handri nanga en na wan switi fasi èn ben kowroe en ati (Lukas 8:43-48). Èn di Jesus ben si wan beri, dan a ben sari nanga a weduwe di ben sari èn di a wan-enkri manpikin foe en ben dede. Ala di Jesus ben weigri foe gebroiki a wondroe krakti di Gado ben gi en foe sorgoe gi njanjan gi ensrefi, tokoe a ben gebroiki disi na wan fri fasi foe opo a dede man dati baka èn gi en baka na en mama. — Lukas 4:2-4; 7:11-16.
15. Sortoe krakti a abi na joe tapoe foe leisi den tori foe Jesus èn prakseri dipi foe disi?
15 Te wi e leisi den tori disi èn e prakseri dipi foe a eigifasi di Jesus ben sori, dan a lobi foe wi e kon moro tranga gi a sma disi di ben gi en libisma libi so taki wi ben sa kan libi foe têgo. Srefi ala di wi no si en noiti, tokoe wi e firi wan sani gi en, èn wi wani waka na ini en foetoestap. — 1 Petrus 2:21.
A froetrow di a ben froetrow tapoe Gado na wan sakafasi
16. Na tapoe soema Jesus ben poti en prakseri ini a fosi presi, èn san a ben gi wi a deki-ati foe doe?
16 Ma san de moro prenspari, Jesus ben poti en prakseri èn di foe wi na tapoe en hemel Tata, Jehovah Gado. A ben meki sma kon sabi a moro bigi komando na ini a Wet, di a ben taki: „Joe moesoe lobi Jehovah, joe Gado, nanga joe heri ati èn nanga joe heri sili èn nanga joe heri froestan” (Mateus 22:36, 37). A ben froemane den disipel foe en: „Bribi na ini Gado” (Markus 11:22). Te den ben kisi foe doe nanga wan serjoesoe tesi na tapoe a bribi foe den, dan a ben gi den tranga: „Begi doronomo.” — Mateus 26:41.
17, 18. (a) Fa Jesus ben sori taki a ben froetrow na wan sakafasi tapoe en Tata? (b) Foe san ede a sani di a ben doe, de so prenspari gi wi?
17 Jesus srefi ben gi na eksempre. A begi ben de wan prenspari pisi foe en libi (Mateus 14:23; Lukas 9:28; 18:1). Di a ten ben kon gi en foe teki den apostel foe en poeroe, dan Jesus no ben froetrow tapoe en eigi denki nomo, ala di fosi ala den engel na hemel ben de na en ondro. Na wan sakafasi a ben gebroiki wan heri neti foe begi na en Tata (Lukas 6:12, 13). Di den ben o teki Jesus foe go sroto èn a ben o dede nanga foeroe pen, dan a ben soekoe jepi baka na en Tata, foe di a ben begi opregti. A no ben abi a prakseri taki a ben sabi Satan boen èn makriki a ben kan handri nanga iniwan sani di a godelowsoewan ben sa kan abi na prakseri. Jesus ben sabi o prenspari a ben de taki a no ben moesoe meki fowtoe. Fa dati ben sa de wan sjen sani gi en Tata! Èn fa dati ben o de wan lasi gi a libisma famiri, di a libi foe den ben anga foe na ofrandi di Jesus ben de foe tjari!
18 Ibri tron baka Jesus ben begi — di a ben de nanga den apostel foe en na ini wan sodrokamra na Jerusalem èn nanga moro faja srefi di a ben de na ini a djari foe Getsemane (Mateus 26:36-44; Johanes 17:1-26; Hebrewsma 5:7). Di a ben pina na a pina-oedoe, dan a no ben skempi den sma baka di ben spotoe nanga en. Na presi foe dati, a ben begi foe a boen foe den sma dati di ben handri so, foe di den no ben sabi: „Tata, gi den pardon, bika den no sabi san den e doe” (Lukas 23:34). A ben tan poti en prakseri na tapoe en Tata, èn „ben tan kon saka ensrefi na ondro a wan di e kroetoe sma nanga wan regtfardiki fasi”. Den lasti wortoe di a ben taki di a ben de na a pina-oedoe ben de wan begi na en Tata (1 Petrus 2:23; Lukas 23:46). Fa wi de nanga tangi taki, foe di Jesus ben froetrow tapoe Jehovah dorodoro, meki na wan getrow fasi a ben kaba a wroko di en Tata ben gi en foe doe! Ala di wi no si Jesus Krestes noiti, tokoe wi troetroe lobi en tranga foe san a ben doe!
Sori a lobi di wi abi gi en
19. Sortoe sani wi no moesoe doe foe di den no e fiti srefisrefi, efoe wi wani sori wi lobi gi Jesus?
19 Fa wi kan boeweisi taki a lobi di wi taki dati wi abi, de moro leki wortoe nomo? Foe di en Tata, di Jesus ben lobi, no ben gi pasi taki sma meki popki èn dan handri nanga den leki sani di den e dini, dan a de seiker taki wi no ben o gi Jesus grani te wi e weri den sortoe popki dati na wan keti na wi neki noso te wi e tjari so wan popki pasa na ini den strati (Exodus 20:4, 5; Johanes 4:24). A no ben sa gi Jesus grani te wi ben sa go na relisi konmakandra, èn srefi doe dati difrenti leisi wan wiki, efoe wi no ben libi akroederi den leri foe en a tra pisi foe a wiki. Jesus ben taki: „A sma di abi den komando foe mi èn e hori den, en na a sma di lobi mi. Èn a sma di lobi mi, a Tata foe mi sa lobi en.” — Johanes 14:21, 23; 15:10.
20. San na wan toe sani di sa sori efoe wi troetroe lobi Jesus?
20 Sortoe komando a ben gi wi? Na a fosi presi, taki wi moesoe anbegi a troe Gado, Jehovah, èn en wawan (Mateus 4:10; Johanes 17:3). Foe di Jesus e plèi wan ròl na ini den sani di Gado abi na prakseri, meki en so srefi ben leri wi taki wi moesoe sori bribi na ini en leki a Manpikin foe Gado èn taki wi moesoe sori disi foe di wi e tan fara foe godelowsoe wroko èn foe di wi e waka na ini a leti (Johanes 3:16-21). A ben gi wi a rai foe soekoe Gado Kownoekondre nanga en regtfardikifasi fosi, èn foe si disi moro prenspari leki a broko di wi e broko wi ede nanga sani di wi abi fanowdoe (Mateus 6:31-33). A ben komanderi wi taki wi moesoe lobi makandra soleki fa en lobi wi (Johanes 13:34; 1 Petrus 1:22). Èn a ben gi wi a wroko foe de kotoigi foe san Gado abi na prakseri foe doe, neleki fa en ben de wan kotoigi foe dati (Mateus 24:14; 28:19, 20; Openbaring 3:14). Ala di den no si Jesus noiti, tokoe troetroe lobi gi en e boeweigi na ati foe so wan feifi miljoen Kotoigi foe Jehovah na ini a ten disi foe den hori den komando dati. Ala di densrefi no si Jesus, tokoe dati kwetikweti no e swaki a bosroiti di den teki foe tan gi jesi. Den e memre san a Masra foe den ben taigi na apostel Tomas: „Foe di joe si mi, meki joe e bribi? Kolokoe foe den sma di no e si èn tokoe e bribi.” — Johanes 20:29.
21. Fa wi e kisi winimarki te wi e go na a Memrefesa foe Krestes dede, di den sa hori a jari disi tapoe sonde 23 maart?
21 Wi e howpoe taki joe sa de na ondro den sma di sa kon makandra na heri grontapoe na den Kownoekondre zaal foe Jehovah Kotoigi baka te son dongo, sonde 23 maart 1997, foe memre a moro bigi fasi fa Gado ben sori lobi gi a libisma famiri èn foe memre a dede foe en loyaal Manpikin, Jesus Krestes. San e taki èn e doe na a okasi dati moesoe tranga a lobi di wi abi gi Jehovah nanga en Manpikin èn na so fasi e meki a wani foe wi kon moro tranga foe hori den komando foe Gado. — 1 Johanes 5:3.
San joe ben sa piki?
◻ Fa den sma na soema a fosi boekoe foe Petrus ben skrifi go, ben kon sabi èn lobi Jesus?
◻ San na wan toe sani di den fositen kresten ben jere di e naki joe ati?
◻ Sortoe sani foe den eigifasi di Jesus ben sori, e meki a lobi di joe abi gi en kon moro tranga?
◻ Foe san ede a froetrow di Jesus ben froetrow tapoe Gado nanga sakafasi de so prenspari gi wi?
◻ Fa wi kan sori a lobi di wi abi gi Jesus Krestes?
[Prenki na tapoe bladzijde 16, 17]
Wi lobi Jesus troetroe foe den eigifasi ede di a ben sori