„Kon krosibei na Gado, èn a sa kon krosibei na unu”

Fa mi libi ben de fosi èn fa a kenki baka di mi studeri Bijbel—Gado Wortu e kenki a libi fu sma

EFU yu ben miti Tony, di a ben de wan tini ete, dan yu ben o si wan boi di grofu, di ben lobi fu feti èn di ben lobi fu go na den ogri birti fu a foto Sydney na ini Australia. A ben abi mati di ben de ogriman. Furu tron den mati disi ben e fufuru, den ben e feti nanga makandra èn den ben e feti na strati nanga gon.

Tony bigin smoko di a ben abi neigi yari. Di a ben abi 14 yari, a ben e smoko marwana doronomo èn a ben e libi wan yayo libi. Di a ben abi 16 yari, a no ben man tan sondro heroine, èn disi ben meki taki a go gebroiki tra sortu drugs soleki côca nanga LSD. „Fu taki en leti, mi ben e gebroiki iniwan sani di ben kan meki mi firi hei”, na so Tony e taki. Bakaten a ben wroko makandra nanga tu grupu fu sma di ben e seri drugs. Sma ben sabi den tu grupu disi leki bigi ogriman. Syatu baka dati, sma fu na a owstu sei syoro fu Australia ben kon sabi Tony leki wan drugs seriman di ben e hori ensrefi na a mofo di a ben meki.

A gwenti di Tony ben abi fu gebroiki heroine nanga marwana, ben e kostu en sowan 160 euro te go miti 330 euro ibri dei. Ma na osofamiri fu en ben pina na furu tra fasi tu. „Na furu okasi mi nanga mi wefi ben kisi fu du nanga ogriman di ben hori gon nanga nefi gi unu fu di den ben e suku a drugs nanga a moni di wi ben abi”, na so Tony e taki. Baka di Tony ben go dri tron na dungru-oso, dan a go prakseri sortu bakapisi a fasi fa a ben e libi ben o abi.

Aladi Tony ben e go na kerki wan pisi ten, toku a no ben abi wan banti nanga Gado, di soleki fa sma e taki, e bron sondari fu têgo na ini hel fu strafu den. Ma di tu Kotoigi fu Yehovah ben kon na en, a ben fruwondru fu leri taki Gado no ben de so. Tony ben prisiri tu taki a ben man poti en libi kon reti trutru èn kisi blesi fu Gado. Tony en ati ben naki en trutru di a kon sabi san Yesus Krestes ben taki: „Gado kan du ala sani” (Markus 10:27). Den wortu di ben naki Tony en ati srefisrefi èn di ben gi en deki-ati, ben de: „Kon krosibei na Gado, èn a sa kon krosibei na unu.”—Yakobus 4:8.

Dan, Tony kisi fu du nanga a tyalensi fu libi akruderi Bijbel markitiki. A e taki: „A fosi sani di mi ben du na fu tapu nanga smoko. Fositen mi ben pruberi fu du disi furu tron, ma mi no ben man tapu nanga smoko. Nanga a krakti fu Yehovah mi ben man tapu fu gebroiki heroine nanga marwana. A takru gwenti disi ben basi mi libi 15 yari kaba. Noiti mi ben denki taki mi ben o man tapu nanga den takru gwenti disi.”

Na presi fu frede wan Gado di e meki sma kisi skin-ati fu têgo na ini hel, wan leri di no de fu feni na nowan presi na ini Bijbel, dan Tony nanga en wefi ben kisi a howpu fu libi fu têgo na ini wan paradijs na grontapu (Psalm 37:10, 11; Odo 2:21). „A ben teki furu ten nanga tranga muiti fu seti mi libi akruderi den markitiki fu Gado”, na so Tony e taki, „ma nanga yepi fu Yehovah mi ben man doro den markitiki disi.”

Iya, a man disi di fosi no ben man tapu nanga a gebroiki fu drugs, tron wan Kresten. Now en nanga en wefi de klariklari fu gi den ten nanga ala den sani di den abi na ini a preikiwroko. Den e gebroiki dusundusun yuru fu leri sma san de na ini Bijbel. Den e du furu tu fu kweki den tu pikin fu den fu abi frede gi Gado. A bigi kenki disi kon fu di Gado Wortu, Bijbel, ben abi krakti na den tapu. Fu tru, soleki fa na apostel Paulus taki, dan „a wortu fu Gado de libilibi èn a abi krakti”.—Hebrewsma 4:12.

Aladi den bun eksempre disi de, toku son sma, e krutu Yehovah Kotoigi fu a leri di den e gi sma nanga yepi fu Bijbel. Den e fruklari sondro taki den abi buweisi, taki a wroko di Yehovah Kotoigi e du, e pori osofamiri èn taki te fu kaba a e pori den bun gwenti noso maniri di yongusma abi. A kefal fu Tony e sori krin taki a sani disi no de tru.

Neleki Tony, na so furu trawan ben kon si taki den kan tapu nanga takru gwenti, di kan abi dede leki bakapisi. Fa so? Den ben man du disi, fu di den ben bribi na ini Gado, den ben frutrow tapu En nanga a Wortu fu en, èn fu di den ben kisi yepi fu lobi-ati Kresten kompe di ben e broko den ede trutru nanga den. Nanga prisiri Tony e taki te fu kaba: „Mi si fa den markitiki fu Bijbel de wan kibri gi den pikin fu mi. Den leri fu Bijbel ben kibri a trowlibi fu mi. Èn now den birti fu mi no e firi taki den libi de na ini kefar fu di mi no de wan kefar gi den moro.”

[Prenspari pisi na tapu bladzijde 9]

’Nanga a krakti fu Yehovah, mi ben man tapu nanga a takru gwenti fu gebroiki drugs, wan sani di ben basi mi libi 15 yari langa’

[Faki na tapu bladzijde 9]

Bijbel gronprakseri e kenki a libi fu sma

Difrenti Bijbel gronprakseri yepi furu sma fu tapu nanga a takru gwenti fu gebroiki drugs. Wan tu fu den gronprakseri e kon now:

„Meki wi krin wisrefi fu ibri doti fu a skin èn fu a yeye, èn meki wi suku fu kon santa dorodoro, fu di wi abi frede gi Gado” (2 Korentesma 7:1). A gebroiki fu drugs de teige a wet fu Gado.

„A frede gi Yehovah na a bigin fu koni, èn a sabi fu a Moro Santawan, na dati na frustan” (Odo 9:10). Na anbegi fu Gado di abi en gron tapu a soifri sabi fu En nanga den pasi fu En, yepi furu sma fu kon fri fu a krakti di drugs ben abi na den tapu.

„Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti” (Odo 3:5, 6). Sma kan tapu nanga den takru gwenti disi te den e frutrow nanga den heri ati tapu Gado.