Yu poti wan spesrutu ten fu studeri Bijbel?

A YARI di pasa, a Tiri Skin meki bekènti taki a schema fu a gemeente konmakandra kenki, so taki wi abi moro ten fu studeri Bijbel nanga wi osofamiri. Efu yu na wan osofamiri-edeman, dan a bun fu studeri Bijbel doronomo nanga yu wefi èn nanga yu pikin. Boiti dati, pruberi fu fiti na osofamiri studie na sani di na osofamiri abi fanowdu. A ben o bun tu te trowpaar di no abi pikin, e gebroiki a ten disi fu studeri Bijbel nanga makandra. Brada nanga sisa di no trow èn di no abi wan osofamiri fu sorgu, sa man gebroiki a ten disi fu studeri Bijbel.

Furu sma ben sori taki den de nanga tangi gi a nyun seti di e gi den okasi fu hori na Osofamiri Anbegi. Fu eksempre, Kevin,a wan owruman ben skrifi: „A wortu ’grantangi’ no sari fu sori fa a heri gemeente breiti. Leki owruman, wi ben taki fa wi e gebroiki a neti disi fu du soifri san a Tiri Skin aksi wi fu du, namku fu studeri nanga wi osofamiri.”

Jenny en masra na wan owruman. A ben skrifi: „Wi abi dri umapikin, wán fu 15 yari, wán fu 11 yari, èn wán fu 2 yari. No so langa pasa, wi froisi go na wan dofusma-tongo gemeente. A e teki furu ten nanga muiti fu sreka gi ala den konmakandra. Ma nanga a seti disi, wi abi wan neti di e gi wi okasi fu studeri nanga wi osofamiri!”

John nanga JoAnn, wan trowpaar di e dini leki gewoon pionier, ben skrifi: „Wi no ben man studeri Bijbel so bun leki osofamiri, fu di wi ben abi furu sani fu du na ini a gemeente. A nyun seti disi na wan presenti fu Yehovah èn a e yepi wi fu kon abi wan moro tranga bribi. Ma dati na soso te wi e gebroiki a ten soleki fa wi musu gebroiki en.”

Tony, wan brada di no trow èn di abi sowan 25 yari, e studeri Bijbel tapu tudewroko mofoneti. A e gebroiki den tra dei fu a wiki fu sreka ensrefi gi den gemeente konmakandra. Ma Tony e taki: „Mi no man wakti teleki tudewroko doro.” Fu san ede? „Fu di a neti dati na mi spesrutu ten nanga Yehovah.” Tony e taki: „Sowan tu yuru langa mi e studeri tori di e yepi mi fu kon abi wan moro bun matifasi nanga Yehovah. Fu di mi abi moro ten fu studeri, meki mi man denki dipi fu den Bijbeltekst di mi e leisi.” San na a bakapisi? „A rai fu Yehovah abi moro krakti tapu mi ati, leki fosi.” Tony kan gi wan eksempre fu disi? A e taki: „Na ini na Inzicht buku, mi leisi taki David nanga Yonatan ben de bun mati. Mi leri taki Yonatan ben de klariklari fu yepi sma. Na eksempre fu en yepi mi fu frustan moro krin san a wani taki fu de wan trutru mati. Mi e angri fu kon leri sabi furu tra warti tori na tapu tudewroko neti!”

A no de fu taki, dati ala den futuboi fu Yehovah sa kisi furu wini te den e gebroiki a ten di den abi now fu studeri Bijbel bun èn fu hori na Osofamiri Anbegi.

[Futuwortu]