Ondrofenitori

Wi kisi prisiri pasa marki!

SOLEKI FA REGINALD WALLWORK E FRUTERI

„Nowan sani na ini a grontapu disi e gi moro prisiri leki a prisiri di wi ben abi na ini a furuten zendeling diniwroko gi Yehovah!” Den wortu disi ben skrifi na tapu wan pisi papira di mi feni na mindri tra papira di mi wefi ben abi. Mi feni den papira disi syatu baka di a dede na ini mei 1994.

NANGA den wortu fu Irene na prakseri, mi e memre den 37 prisiri yari di wi ben e dini leki zendeling na ini Peru. Sensi wi ben trow na ini december 1942, wi nyan bun fu wan tumusi warti Kresten matifasi, èn dati meki mi o bigin fruteri unu fu sensi a pisi ten dati.

Irene gro kon bigi leki wan Kotoigi fu Yehovah na ini a foto Liverpool, na Ingrisikondre. En papa nanga mama ben kisi dri umapikin, èn na ini a Fosi Grontapufeti en papa lasi libi. Bakaten, en mama trow nanga Winton Fraser, èn den kisi wan manpikin, Sidney. Syatu fosi a di fu Tu Grontapufeti, na osofamiri froisi go na Bangor, wan foto na ini Noord Wales. Drape Irene ben dopu na ini 1939. Wán yari na fesi Sidney ben dopu, sobun en nanga Irene bigin dini makandra leki pionier, noso furuten preikiman, na a noordsei syoro fu Wales, fu Bangor go miti a foto Caernarvon, èn sosrefi na a èilanti Anglesey.

Na a ten dati, mi ben de na ini a Gemeente Runcorn, sowan 20 kilometer zuid-owstusei fu Liverpool. Mi ben e dini drape leki fesiman opziener, soleki fa wi e kari en now. Na wan kring konmakandra Irene kon na mi fu aksi wan pisi kontren ini a birti fu Runcorn pe a ben kan preiki, fu di a ben o go tan drape nanga en sisa Vera di ben trow. Na ini den tu wiki di a ben tan drape, Irene nanga mi tron bun mati, èn wan tu leisi baka dati mi ben go luku en na Bangor. Na a kaba fu wan wiki, mi ben breiti srefisrefi di Irene agri fu trow nanga mi!

A sonde di mi drai go na oso, wantewante mi bigin seti sani so taki wi ben kan trow, ma na a tudewroko mi kisi wan telegram. A ben taki so: „Mi sabi taki a boskopu fu a telegram disi sa meki yu firi sari ma mi no man yepi. Mi no sa man trow nanga yu now. Yu o kisi wan brifi ete.” Mi ben skreki srefisrefi. San ben pasa?

A tra dei mi kisi a brifi fu Irene. A skrifi mi taki a ben o go na Horsforth, wan presi na ini Yorkshire, fu pionier nanga Hilda Padgett.a A fruteri mi taki 12 mun na fesi a ben meki wan pramisi taki efu den brada ben o aksi en, dan a ben o go dini na wan tra presi pe yepi ben de fanowdu. A skrifi: „Gi mi, disi na wan pramisi di mi ben du na Yehovah, èn fu di mi pramisi en a sani disi fosi mi kon leri sabi yu, dan mi e firi taki disi na wan sani di mi musu du.” Aladi mi ben e sari, toku mi ben e lespeki a fasi fa a ben e hori en soifri retifasi èn mi seni en a telegram nanga a boskopu disi na tapu: „Go. Mi o wakti yu.”

Di Irene ben de na ini Yorkshire, den ben sroto en dri mun langa fu di a no ben wani hori baka gi a di fu Tu Grontapufeti. Ma 18 mun baka dati, na ini december 1942, mi nanga Irene trow.

Den yongu yari fu mi

Na ini 1919, mi mama ben bai wan tu fu den buku Studies in the Scriptures.b Ma aladi mi papa ben taki nanga leti taki noiti mi mama ben leisi wan buku, toku mi mama ben teki a bosroiti fu studeri den buku disi finifini makandra nanga en Bijbel. A du disi èn a dopu na ini 1920.

Mi papa no ben de wan muilek sma èn a no ben tapu mi mama fu du san a ben wani. A no ben tapu en sosrefi fu kweki den pikin fu den na ini a pasi fu waarheid. Mi papa nanga mi mama kisi fo pikin, namku den tu bigi sisa fu mi Gwen nanga Ivy, mi bigi brada Alec, nanga mi. Stanley Rogers nanga tra getrow Kotoigi na ini Liverpool ben e kon hori Bijbel lezing na ini Runcorn, èn na ini wan syatu pisi ten wan nyun gemeente ben seti drape. Makandra nanga a gemeente, na osofamiri fu wi ben tan gro na yeye fasi.

Gwen ben e teki Bijbel les na a Anglikan Kerki, ma di a bigin studeri Bijbel makandra nanga mi mama, dan a tapu fu teki den les dati. Di a priester ben kon fisiti wi fu luku fu san ede Gwen no ben e teki den Bijbel les moro, dan Gwen poti wan lo aksi gi en baka makandra, ma a priester no ben man piki nowan fu den aksi disi. Gwen aksi en san a Wi Tata Begi wani taki, ma te fu kaba Gwen srefi ben abi fu fruteri a priester san a begi disi ben wani taki! Na a kaba, Gwen leisi 1 Korentesma 10:21 fu sori en taki a no kan tan ’nyan na tu tafra’. Di a priester ben de fu gowe, dan a taigi Gwen taki a ben o begi gi en èn a ben o drai baka fu gi piki tapu den aksi fu en, ma noiti a no kon moro. Syatu baka di Gwen dopu, a tron wan furuten preikiman.

Na ini a gemeente pe wi ben e go, den ben poti furu prakseri na yonguwan tu. Mi e memre ete di wan owruman ben kon hori wan lezing na wi gemeente. Mi ben abi seibi yari na a ten dati. Bakaten na owruman disi kon taki nanga mi. Mi ben taigi en taki mi ben leisi a tori fu Abraham èn fa a ben o gi en manpikin Isak leki srakti-ofrandi. „Go na a uku fu a podium èn fruteri mi fu a tori disi”, na owruman taki. Mi ben prisiri srefisrefi fu tanapu drape èn fu gi wan sortu „publikitaki” a fosi tron na ini mi libi!

Mi dopu na ini 1931 di mi ben abi 15 yari. Na ini a srefi yari dati, mi mama dede èn mi gowe libi skoro fu leri fa fu wroko nanga stroom. Na ini 1936, Kotoigi ben e drai Bijbel lezing na tapu gramofoon so taki ala sma ben kan yere den. Wan owru sisa ben gi mi nanga mi brada a deki-ati fu teki en leki wroko fu prei den lezing disi tapu gramofoon. Sobun, Alec nanga mi go na Liverpool fu bai wan baisigri èn wi meki wan man meki wan sortu pikin wagi sei a baisigri, so taki wi ben kan poti a gramofoon na tapu. Wi meki a man fasi wan peipi fu 2 meter na bakasei fu a wagi èn a poti wan boksu na tapusei fu a peipi disi. Wi ben kan poti a boksu disi moro hei noso moro lagi. A man taigi wi taki noiti a ben meki so wan sani bifo, ma di a meki en, a ben wroko heri bun! Nanga faya wi wroko na a heri pisi kontren, aladi wi ben breiti taki wi teki a deki-ati fu na owru sisa disi. Wi ben kisi difrenti grani tu.

A di fu Tu Grontapufeti​—Wan ten fu tesi

Di a bigin gersi leki a di fu Tu Grontapufeti ben o kon trutru, dan Stanley Rogers nanga mi ben e meki bekènti taki a publikitaki „Ziet de feiten onder ogen” (Si sani leki fa den de trutru) ben o hori tapu 11 september 1938 na a Royal Albert Hall na ini a foto London. Bakaten a lezing disi ben skrifi poti na ini wan pikin buku, èn mi ben yepi fu prati a buku disi. Mi ben yepi fu prati sosrefi a buku Fascisme of vrijheid (Fascisme noso fu de fri) di ben kon na doro a yari baka dati. Ala den tu buku disi ben sori krin taki Hitler ben abi na prakseri fu tiri Doisrikondre na wan ogri-ati fasi. Na a ten disi furu sma ben sabi mi na ini Runcorn fu di mi ben e preiki èn den ben e lespeki mi fu san mi ben e du. Iya, fu di ala ten mi ben du a theokrasia wroko fayafaya, meki mi ben kisi yepi bakaten.

Na a presi pe mi ben e wroko, wi ben kisi a wroko fu poti stroom na wan nyun fabriek, leti dorosei fu a foto pe mi ben e tan. Di mi kon sabi dati a nyun wrokope disi ben de fu meki fetisani gi na orloku, dan mi taigi den wrokobasi fu mi taki mi no ben o man wroko drape. Den no ben lobi a tori disi, ma a fesiman fu mi ben opo taki gi mi, èn mi ben kisi wan tra wroko fu du. Bakaten mi yere taki wan tanta fu a fesiman disi, ben de wan Kotoigi fu Yehovah tu.

Wan fu den tra wrokoman ben gi mi deki-ati di a taki: „Reg, wi ben sabi taki yu ben o du so wan sani fu di yu e du Bijbel wroko so langa kaba.” Ma toku, mi ben abi fu luku bun bika furu fu den tra wrokoman ben e suku problema gi mi.

Mi ben aksi na lanti fu poti mi nen leki wan sma di no e teki prati na a orloku fu di mi konsensi no ben e gi en pasi fu du disi. Mi ben abi fu go na fesi krutu èn na ini yuni 1940 a krutubangi na ini Liverpool agri nanga san mi ben aksi, ma dan mi ben abi fu tan du a wroko di mi ben e du na a ten dati. A no de fu taki dati disi ben meki taki mi ben man tan du a Kresten diniwroko fu mi.

Na ini a furuten diniwroko

Syatu fosi a di fu Tu Grontapufeti kon na wan kaba, mi teki a bosroiti fu libi a wroko fu mi èn mi go nanga Irene na ini a furuten diniwroko. Na ini 1946, mi bow wan wagi fu 5 meter na so wan fasi taki a ben tron wi oso. A yari baka dati, wi kisi a kari fu go na Alveston, wan dorpu na ini Gloucestershire. Baka dati, wi du pionierwroko na ini na owruten foto Cirencester èn sosrefi a foto Bath. Na ini 1951, mi kisi a kari fu go leki opziener di e reis na den gemeente na a zuidsei fu Wales. Ma pikinmoro tu yari na baka, wi go na a Waktitoren Bijbelskoro Gilead fu teki leri fu man dini leki zendeling.

A di fu 21 klas fu a Gileadskoro ben hori na South Lansing di de na a zuidsei fu New York. Wi kaba a skoro na ini 1953 na a New World Society Assembly di ben hori na ini New York City. Te na a dei dati, Irene nanga mi no ben sabi pe den ben o seni wi go. Wi ben breiti fu yere taki wi ben o go na Peru. Yu sabi fu san ede? Fu di na a ten dati, Sidney, a brada fu Irene, nanga en wefi Margaret, ben e dini na a bijkantoro na ini a foto Lima. Den ben kon drape wán yari na fesi, baka di den ben kaba a di fu 19 klas fu a Gileadskoro!

Wi ben wroko na Brooklyn Bethel fu wan syatu pisi ten fu di wi ben abi fu wakti te ala papira ben seti fu wi ben kan gowe. Ma a no teki langa fosi wi ben abi fu go na Lima. Tin presi den seni wi fu go wroko leki zendeling èn a fosiwan ben de Callao, wan foto di de na a lanpe fu Peru, westsei fu Lima. Na a ten dati, Irene nanga mi ben leri wan tu sani na ini Spanyorotongo, ma nowan fu wi ben man abi wan takimakandra na ini a tongo dati. Fa wi ben o du a wroko fu wi dan?

Den problema nanga den blesi fu a preikiwroko

Na a Gileadskoro wi leri taki wan mama no e leri en pikin fa fu taki wan tongo. Na presi fu dati, a pikin e leri a tongo te en mama e taki nanga en. Sobun, a rai di wi ben kisi ben de: „Go na ini a preikiwroko wantewante, leri a tongo fu den sma di e arki yu. Den o yepi unu.” Ma aladi mi ben e meki muiti fu leri taki a nyun tongo disi, dan tu wiki baka di wi doro, mi kisi a wroko fu fesiman opziener na ini a Gemeente Callao. Prakseri fa mi ben e firi! Mi go suku yepi na Sidney Fraser, ma a gi mi a srefi rai di mi ben kisi na a Gileadskoro, namku fu abi demakandra nanga den sma na ini a gemeente èn nanga den sma fu a pisi kontren dati. Mi bosroiti fu teki a rai.

Wan satra mamanten, mi miti wan temreman na en wrokope. „Mi abi fu go doro nanga mi wroko”, a taki, „ma grantangi sidon dan yu taki nanga mi.” Mi taigi en taki mi ben o du dati soso efu a ben o du wan sani gi mi: „Te mi taki wan fowtu sani, dan yu musu taigi mi fa fu taki en bun. Mi no abi trobi efu yu o du disi.” A temreman lafu èn a taki dati a ben o yepi mi. Tu leisi wan wiki mi ben e go na en èn mi kon si taki disi ben de wan heri bun fasi fa mi ben kan leri a nyun tongo fu mi; sobun a rai di mi ben kisi, ben e wroko trutru.

A di fu tu presi pe wi ben go leki zendeling ben de a foto Ica. A kon pasa so, taki na ini a foto dati mi miti wan tra temreman èn mi fruteri en sortu mofo mi ben meki nanga a temreman na ini Callao. A taki dati a ben o yepi mi tu, èn na so wan fasi safrisafri mi bigin taki a Spanyorotongo. Ma a ben teki dri yari fosi mi ben man taki a tongo bun. Ala ten a temreman disi ben abi furu fu du, ma toku mi ben man hori wan bijbelstudie nanga en fu di mi ben e leisi den Buku fu Bijbel gi en èn baka dati mi ben e fruteri en san den ben wani taki. Wan fu den wiki di mi go luku a temreman, dan a wroko basi fu en taigi mi taki a ben feni wan nyun wroko na ini a foto Lima. Baka wan pisi ten di mi nanga Irene ben go na Lima na wan kongres, dan mi miti a temreman disi baka. Mi prisiri di mi yere taki a ben suku den Kotoigi fu Lima so taki wan fu den ben kan studeri Bijbel nanga en èn bakaten, en nanga en osofamiri tron futuboi di gi densrefi abra na Yehovah!

Na ini wan gemeente, wi ben kon si taki wan yongu man nanga wan yongu uma ben dopu na kerki, aladi den ben libi nanga makandra sondro fu trow. Wi sori den san Bijbel e taki fu a tori disi èn baka dati den teki a bosroiti fu poti den nen na lanti fu trow fu di na so wan fasi den ben o man tron Kotoigi di dopu. Sobun, mi seti sani fu tyari den go na a lanti kantoro pe den ben o poti den nen fu trow. Ma wan problema miti den. Lanti wet taki dati den nen fu den pikin musu skrifi na lanti buku. Den sma disi ben abi fo pikin èn nowan nen fu den pikin ben skrifi na lanti buku. A no de fu taki dati wi ben aksi wisrefi san a komsarsi ben o du. A taki: „Fu di den bun sma disi, den mati fu yu di de Yehovah Kotoigi, sorgu taki unu e trow na lanti, meki mi no o meki unu go na fesi krutu gi ibriwan fu den pikin fu unu. Unu kan meki den nen fu den skrifi na lanti sondro fu pai.” Wi ben de nanga furu tangi na ati fu di den sma disi ben pôti èn iniwan butu di den ben o abi fu pai, ben o de wan trutru hebi gi den!

Bakaten Albert D. Schroeder fu na edekantoro fu Yehovah Kotoigi na Brooklyn kon luku wi. A ben taki dati a ben de fanowdu fu seti wan nyun zendeling-oso na ini wan tra pisi fu Lima. Sobun, Irene nanga mi, makandra nanga tu sisa fu Amerkankondre, Frances nanga Elizabeth Good, sosrefi wan trowpaar fu Kanada, wi alamala froisi go na a distrikt San Borja. Na ini tu noso dri yari wan tra gemeente ben seti drape di tan gro.

Wi ben dini sosrefi na ini Huanayo, wan presi di hei sowan 3000 meter èn a de na mindrisei fu a bergi kontren fu a kondre èn wi ben wroko makandra nanga den 80 Kotoigi fu a gemeente dati. Drape mi ben yepi fu bow a di fu tu Kownukondre zaal di ben bow na ini a kondre. Mi ben kisi a wroko leki wan sortu afkati fu Yehovah Kotoigi, fu di wi ben abi fu go na fesi krutu dri leisi, fosi wi ben kisi papira fu a gron di wi ben bai. Den sani disi di wi ben du, sosrefi a preiki di furu getrow zendeling ben e preiki na furu presi na ini Peru, ben meki taki a nomru fu Kotoigi drape ben gro fu 283 na ini 1953, kon tron 83.000 tide na dei.

Wi e taki adyosi nanga sari na ini wi ati

Na ini ala den zendeling-oso wi ben abi wan bun matifasi nanga den tra zendeling èn furu tron mi ben abi a grani leki opziener fu luku efu ala sani na ini a zendeling-oso ben e waka bun. Ibri munde mamanten wi ben e kon makandra fu taki san wi ben o du na ini a wiki di ben de fu kon èn sosrefi fu taki sortu oso wroko ibriwan fu wi ben o du. Wi alamala ben e frustan taki a moro prenspari sani na a preikiwroko èn nanga disi na prakseri wi ben e wroko makandra na ini wánfasi. Mi e prisiri fu fruteri taki noiti wi ben meki bigi trobi nanga makandra na ini wan fu den zendeling-oso pe wi ben de.

A lasti presi pe wi ben go ben de Breña, wan tra presi leti na a lanki fu Lima. Seibitenti Kotoigi di abi switifasi ben de na a gemeente drape èn heri esi a nomru fu den gro kon tron moro leki 100, aladi wan tra gemeente ben seti na Palominia. Na a ten dati, Irene kon siki. Fosi, mi ben si taki son tron a no ben man memre san a ben taki, èn ten na ten a no ben sabi fa fu kon na oso. Aladi a ben kisi bun datra yepi, toku safrisafri a situwâsi fu en ben e kon takru moro nanga moro.

Nanga sari mi ben abi fu seti sani na ini 1990 so taki wi ben kan drai go baka na Ingrisikondre pe mi sisa Ivy ben teki wi na ini en oso na wan switifasi. Fo yari na baka, di a ben abi 81 yari, Irene dede. Mi tan du a furuten diniwroko leki owruman na ini wan fu den dri gemeente na ini a foto pe mi gro kon bigi. Ten na ten, mi e go na Manchester tu fu gi deki-ati na a Spanyoro grupu di de drape.

No so langa pasa mi ben abi wan tumusi moi ondrofeni di ben bigin furu yari na fesi di mi ben e prei lezing fu feifi miniti na tapu mi gramofoon gi den ososma. Mi kan memre heri bun fa wan skoromeisje ben e kibri baka en mama na a doro, aladi den ben e arki a boskopu fu mi.

Baka wan pisi ten a meisje disi froisi go na Kanada, èn wan mati fu en, di e libi na ini Runcorn ete, de wan Kotoigi. Den tu disi tan skrifi brifi gi makandra fu hori a matifasi fu den. No so langa pasa a di fu Kanada skrifi taki tu Kotoigi ben kon na en oso èn den ben e taki fu sani di a ben man memre fu a lezing di mi ben drai gi en leki pikin-nengre. A ben kon si taki disi na a waarheid, èn now a de wan futuboi fu Yehovah di gi ensrefi abra. A aksi en mati na ini Runcorn fu taki a yonguman tangi di ben kon na en mama oso moro leki 60 yari pasa! Fu tru, noiti wi kan sabi pe den siri fu waarheid sa fadon èn pe den sa gro.​—Preikiman 11:6.

Iya, mi de nanga furu tangi na ati taki mi gi mi heri libi fu du diniwroko gi Yehovah. Sensi mi dopu na ini 1931, noiti mi no misi wan konmakandra fu a pipel fu Yehovah. Aladi Irene nanga mi noiti no kisi pikin, toku mi breiti fu abi moro leki 150 manpikin nanga umapikin na yeye fasi di e dini wi hemel Tata, Yehovah. Soleki fa a lobi wefi fu mi ben taki, dan den grani di wi ben kisi ben gi wi prisiri pasa marki.

[Futuwortu]

[Prenki na tapu bladzijde 24]

Mi mama na a bigin fu a di fu 20 yarihondro

[Prenki na tapu bladzijde 24, 25]

Na leti-anusei: Hilda Padgett, mi, Irene, nanga Joyce Rowley na ini a foto Leeds na Ingrisikondre na ini a yari 1940

[Prenki na tapu bladzijde 25]

Na tapusei: Irene nanga mi na fesi a wagi di ben de wi oso

[Prenki na tapu bladzijde 27]

Mi e meki a nen fu a publikitaki bekènti na Cardiff, wan presi na ini Wales na ini a yari 1952