Mi ben leri bijbel waarheid na Roemeinia
SOLEKI FA GOLDIE ROMOCEAN BEN FROETERI
Na ini 1970 mi ben fisiti mi famiri na Roemeinia gi a fosi tron na ini pikinmoro 50 jari. Sma ben libi na ondro wan komunist rigeri di ben kwinsi den, èn doronomo sma ben taigi mi foe loekoe boen san mi ben taki. Dan, di mi ben tanapoe na ini a lanti kantoro na ini wi eigi dorpoe, a lantiman ben aksi mi nanga tranga foe gowe libi a kondre wantewante. Bifo mi e froeteri foe san ede a ben aksi mi nanga tranga foe gowe, meki mi froeteri fa mi ben leri bijbel waarheid na Roemeinia.
MI BEN gebore na tapoe 3 maart 1903, na ini a dorpoe Ortelec, na a noordwestsei foe Roemeinia, krosibei foe a foto Zalău. Wi ben libi na ini wan moi kontren. A watra èn a loktoe ben krin. Wi ben prani wi eigi njanjan èn wi no ben mankeri noti na materia sei. Na ini den jongoe jari foe mi, a kondre ben abi vrede.
Sma ben fromsoe srefisrefi. Foe taki en leti, wi famiri ben de foe dri difrenti relisi. Wán foe den granmama foe mi ben de Orthodòks Katolik, a trawan ben de Adventistsma, èn mi papa nanga mama ben de Baptistsma. Bika mi no ben agri nanga no wan foe den relisi foe den, mi famiri ben taki dati mi ben o tron wan atheistsma. ’Efoe wán Gado de’, na so mi ben prakseri, ’dan wán relisi ben moesoe de nomo — no dri na ini wán famiri.’
Den sani di mi ben si na ini relisi ben broeja mi. Foe eksempre, a priester ben fisiti den oso foe kisi a moni di sma moesoe pai a kerki. Te den sma no ben abi moni foe gi, dan a ben teki a moro boen wòl deken foe den na presi foe dati. Na ini a katolik kerki mi ben loekoe fa granmama ben kindi foe begi na fesi wan prenki foe Maria. ’Foe san ede a e begi na wan prenki?’ mi ben prakseri.
Wan ten di lai nanga problema
Mi papa ben go na Amerkankondre na ini 1912 foe wroko moni foe man pai wan paiman. No langa na baka, dan orlokoe ben bigin, èn den man foe wi dorpoe ben gowe foe go feti — soso oemasma, pikin-nengre, nanga owroe man ben tan na baka. A dorpoe foe wi ben kon de wan pisi ten na ondro a tiri foe Hongaria, ma ne den Roemeinia sroedati ben drai kon baka èn ben teki a dorpoe. Den ben gi wi a komando foe gowe wantewante. Ma foe di wi ben feti-feti èn ben broeja foe teki den sani foe wi poti makandra èn foe poti den pikin-nengre na tapoe wan boerikiwagi, den ben libi mi na baka. Joe moesoe sabi taki mi ben de a moro owroewan foe den feifi pikin.
Mi ben lon go na wan birman, wan owroe man di ben tan na baka, èn a ben taki: „Go na oso. Sroto den doro foe joe, èn no meki no wan sma kon na inisei.” Mi ben doe esi-esi san a ben taki. Na baka di mi ben njan pikinso fowroe soepoe nanga stofoe koro di den ben libi foe di den ben e feti-feti foe gowe, mi ben kindi na mi bedi èn ben begi. No langa na baka mi ben fadon dipi na sribi.
Di mi ben opo mi ai, a ben de deiten, èn mi ben taki: „Ke, grantangi Gado! Mi de na libi!” Den skotoe ben lai nanga gon olo, foe di den ben soetoe heri neti. Di mi mama ben kon si taki mi no ben de nanga den na ini a tra dorpoe, a ben seni wan jonkoeman, George Romocean, di ben feni mi èn ben tjari mi go na mi famiri. No langa na baka, wi ben kan go baka na wi eigi dorpoe èn ben e bigin libi drape baka.
Na angri foe mi gi bijbel waarheid
Mi mama ben wani mi foe dopoe leki wan Baptistsma, ma mi no ben wani doe dati bika mi no ben man bribi taki wan lobi Gado ben sa bron sma foe têgo na ini hèl. Foe froeklari dati, mama ben taki: „We efoe den takroe so dan.” Ma mi ben piki: „Efoe den takroe, dan kiri den, ma no gi den skin-ati. Mi no ben sa gi wan dagoe noso wan poesipoesi skin-ati srefi.”
Mi e memre taki tapoe wan moi lente dei, di mi ben abi 14 jari, mama ben meki mi tjari den kaw foe go njan grasi. Di mi ben didon na tapoe a grasi na sei wan liba, nanga boesi na mi baka, mi ben loekoe go na loktoe èn ben taki: „Gado, mi sabi taki joe de drape; ma mi no lobi no wan foe den relisi disi. Joe moesoe abi wán boen relisi.”
Mi e bribi troetroe taki Gado ben jere a begi foe mi bika a zomer dati foe a jari 1917, toe Bijbel Studenti (soleki fa den ben kari Jehovah Kotoigi na a ten dati) ben kon na wi dorpoe. Den ben de kolporteur noso foeroeten bedinari, èn den ben kon na a Baptist kerki ala di kerki ben hori.
Bijbel waarheid e panja na Roemeinia
Wan toe jari na fesi, na ini 1911, Carol Szabo nanga Josif Kiss, di ben tron Bijbel Studenti na Amerkankondre, ben drai kon baka na Roemeinia foe bigin nanga bijbel waarheid drape. Den ben libi na Tîrgu-Mureş, pikinmoro 160 kilometer na a zuid-owstoesei foe wi dorpoe. Na ini wan toe jari, troetroe hondrohondro sma ben doe wan sani na tapoe a Kownoekondre boskopoe èn ben bigin nanga a kresten diniwroko. — Mateus 24:14.
We, di den toe jongoe Bijbel Studenti ben kon na a Baptist kerki na ini wi dorpoe Ortelec, dan George Romocean, ala di a ben abi 18 jari nomo, ben hori a kerki dienst èn ben proeberi foe froeklari san Romesma 12:1 wani taki. Te foe kaba, wan foe den jongoe kolporteur ben opo tanapoe èn ben taki: „Brada, mati, san na apostel Paulus e proeberi foe taigi wi na ini a tekst disi?”
Di mi ben jere en e taki, mi ben breiti srefisrefi! Mi ben prakseri: ’Den man disi moesoe sabi fa foe froeklari bijbel.’ Ma moro foeroe foe den sma di ben de drape ben bari: „Falsi profeiti! Wi sabi soema na joe!” Wan oproeroe ben bigin. Ma ne a papa foe George ben opo tanapoe èn ben taki: „Oen tapoe oen mofo! San na a jeje disi — foe a sopi batra? Efoe den man disi abi wan sani foe taigi wi èn oenoe no wani arki, dan mi e kari den kon na mi oso. Ibri sma di wani kon, kan kon.”
Nanga prisiri mi ben lon go na oso èn ben taigi mama san ben pasa. Mi ben de wan foe den sma di ben teki a kari foe go na a oso foe Romocean. A ben naki mi ati srefisrefi a neti dati, foe leri na ini bijbel taki wan faja hèl no de èn foe si na ini mi eigi Roemeinia bijbel a nen foe Gado, Jehovah! Den kolporteur ben seti sani so taki wan Bijbel Studenti ben kan kon ibri sonde na Romocean oso, foe leri wi. A zomer na baka, di mi ben abi 15 jari, mi ben teki dopoe leki simbôl foe a gi di mi ben gi misrefi abra na Jehovah.
Baka wan pisi ten, pikinmoro a heri famiri Prodan nanga a famiri Romocean ben teki bijbel waarheid èn ben gi densrefi abra na Jehovah. Foeroe tra sma foe wi dorpoe ben doe dati toe, so srefi a jongoe trowpaar di ben meki sma gebroiki na oso foe den leki a Baptist kerki fosi. Baka dati, den kenki en tron wan presi pe den Bijbel Studenti kan kon makandra foe studeri. A waarheid foe bijbel ben panja heri esi na ini den krosibei dorpoe, èn na ini a jari 1920 pikinmoro 1800 Kownoekondre preikiman ben de na Roemeinia!
Na Amerkankondre
Wi ben de fajafaja foe prati den sani di wi ben leri, nanga mi papa, Peter Prodan. Ma, a ben de wan froewondroe sani taki, bifo wi ben kan skrifi, wi ben kisi wan brifi foe en di e taki dati a ben tron wan dopoe foetoeboi foe Jehovah. A ben studeri nanga den Bijbel Studenti na Akron, Ohio, èn a ben wani meki wi alamala kon na en na Amerkankondre. Ma, mama ben weigri foe gowe libi Roemeinia. So boen, na ini 1921, nanga a moni di papa ben seni kon gi mi, mi ben go na en na Akron. George Romocean nanga en bigi brada ben froisi go kaba na Amerkankondre a jari bifo.
Di mi ben doro nanga boto na Ellis Èilanti, New York, dan na immigratie lantiman no ben sabi fa foe poti mi nen, Aurelia, na ini Ingrisitongo, èn dati meki a ben taki: „Joe nen na Goldie.” Foe sensi a ten dati, dati ben de mi nen. Sjatoe na baka dati, na tapoe 1 mei 1921, George Romocean nanga mi ben trow. Pikinmoro wan jari na baka, papa ben drai go baka na Roemeinia èn na ini 1925 a ben tjari mi jongoe sisa, Mary, kon na Akron baka. Baka dati, papa ben drai go baka na Roemeinia foe de nanga mama nanga den trawan foe a famiri.
Wi fosi diniwroko na Amerkankondre
George ben de wan troetroe loyaal foetoeboi foe Jehovah di ben gi ensrefi na a dini foe En. Na mindri 1922 nanga 1932 wi ben blesi nanga fo moi oemapikin — Ester, Anna, Goldie Elisabet, nanga Irene. Wan gemeente na ini Roemeiniatongo ben bigin na Akron, èn na ini a bigin den konmakandra ben hori na ini wi oso. Te foe kaba, ibri siksi moen wan sma foe na edekantoro foe den Bijbel Studenti gi heri grontapoe, na Brooklyn, New York, ben fisiti wi gemeente èn ben tan nanga wi.
Wi ben gebroiki foeroe foe den sonde foe doe a preikiwroko a heri dei. Wi ben span den boekoetas foe wi èn ben teki njanjan, ben poti den oemapikin na ini na owroe wagi Model T Ford foe wi, èn ben gebroiki a heri dei foe preiki na ini den boitipresi. Baka dati, te neti, wi ben go na a Waktitoren-studie. Den oemapikin foe wi ben kon lobi a preikiwroko. Na ini 1931, mi ben de na Columbus, Ohio, di den Bijbel Studenti ben teki den aparti nen, Jehovah Kotoigi.
Piri-ai di mi ben abi fanowdoe
Wan toe jari na baka, mi ati ben kon bron nanga Joseph F. Rutherford, di ben de presidenti foe a Watch Tower Bible and Tract Society na a ten dati. Wan njoen Kotoigi ben feni taki brada Rutherford no ben handri boen nanga en, foe di a no ben arki boen di a ben taki foe a problema di a abi. Mi ben feni taki brada Rutherford ben fowtoe. We, wan sonde mi sisa Mary nanga en masra, Dan Pestrui, ben kon fisiti wi. Na baka di wi ben njan, Dan ben taki: „Kon meki wi sreka wisrefi foe go na a konmakandra.”
„Wi no e go na den konmakandra moro”, mi ben taki. „Wi ati e bron nanga brada Rutherford.”
Dan ben naki en anoe poti na en baka èn ben waka go waka kon, èn dan a ben taki: „Joe ben sabi brada Rutherford di joe ben teki dopoe?”
„Nôno”, mi ben piki. „Joe sabi taki mi ben teki dopoe na Roemeinia.”
„Foe san ede joe ben teki dopoe?” a ben aksi.
„Bika mi ben leri taki Jehovah na a troe Gado, èn mi ben wani gi mi libi abra na en, foe dini en”, mi ben piki.
„Noiti no frigiti dati!” a ben piki. „San joe ben sa doe te brada Rutherford ben sa gowe libi a waarheid, joe ben sa gowe libi waarheid?”
„Noiti, noiti!” mi ben taki. Dati ben meki mi kisi misrefi baka, èn mi ben taki: „Meki wi alamala sreka wisrefi gi a konmakandra.” Èn foe sensi a ten dati, noiti wi ben tapoe. Mi ben de Jehovah tangi srefisrefi gi mi swagri di ben piri-ai gi mi na wan lobi fasi!
Go doro na ini moeilek ekonomia ten
Na ini a moeilek ekonomia ten na ini den jari na mindri 1930 nanga 1940, a ben de wan moeilek pisi ten. Wan dei George ben doro na oso komoto na wroko èn a ben brokosaka srefisrefi, èn a ben taigi mi taki a ben lasi en wroko na a balata fabriki. „No broko joe ede”, mi ben taki, „wi abi wan goedoe Papa na hemel, èn a no sa gowe libi wi.”
A srefi dei dati, George ben miti wan mati di ben abi wan bigi baskita nanga todoprasoro. Di George ben kon sabi pe en mati ben teki den, a ben kon na oso nanga boen foeroe todoprasoro. Dan a ben gebroiki den lasti dri dala foe wi foe bai pikin baskita foe poti den todoprasoro na ini. „Fa joe ben kan gebroiki a moni na a fasi dati”, mi ben aksi, „ala di wi abi den pikin oemapikin di abi merki fanowdoe?”
„No broko joe ede”, a ben piki, „doe nomo san mi e taigi joe.” Na ini den wiki na baka, wi ben abi wan pikin fabriki na wi oso, e krin èn e poti todoprasoro na ini baskita. Wi ben seri den gi den moro sjiek restaurant èn wi ben meki 30 te go miti 40 Amerkan dala na ini wán dei, dati ben de kefalek foeroe moni gi wi na ini a ten dati. A boeroe di ben gi wi primisi foe piki den todoprasoro foe en wei ben taki dati a ben libi drape 25 jari kaba èn noiti a ben si so foeroe todoprasoro. No langa na baka, a balata fabriki ben kari George kon baka foe wroko.
Tan hori wi bribi
Na ini 1943 wi ben froisi go na Los Angeles, California, èn fo jari na baka, wi ben go tan na Elsinore. Wi ben opo wan wenkri drape, èn wi heri famiri ben wroko na ini, a wan baka a trawan. Na a ten dati Elsinore ben de wan pikin foto foe pikinmoro 2000 sma nomo, èn wi ben moesoe rèis 30 kilometer go na wan tra foto gi den kresten konmakandra foe wi. Mi ben breiti srefisrefi foe si taki wan pikin gemeente ben seti na Elsinore na ini 1950! Now 13 gemeente de na ini a srefi kontren.
Na ini 1950 wi oemapikin Goldie Elisabet (di foeroe sma sabi now leki Bet) ben kaba studeri na a Waktitoren Bijbelskoro Gilead na South Lansing, New York, èn ben kisi a toewijzing leki zendeling na Venezuela. Na ini 1955 wi moro jongoe oemapikin, Irene, ben breiti taki en masra ben kisi a kari foe dini leki wan bedinari di e rèis na ini a kringwroko. Dan na ini 1961, na baka di den ala toe ben fisiti a Kownoekondre Diniwroko-Skoro na South Lansing, New York, den ben seni den go na Thailand. Son tron mi ben misi den oemapikin foe mi so foeroe taki mi ben krei, ma dan mi ben prakseri: ’Na dati mi ben wani den foe doe.’ So boen, mi ben graboe mi boekoetas èn ben go na a preikiwroko. Ala ten mi ben drai kon nanga prisiri na oso.
Na ini 1966 mi lobi masra, George, ben kisi wan beroertoe. Bet, di ben kon baka foe Venezuela bika a ben abi problema nanga en gosontoe, ben jepi foe sorgoe gi en. George dede a jari na baka, èn a tan di a ben tan getrow na Jehovah ben de wan trowstoe gi mi èn taki a ben kisi en pai na hemel. Na baka dati, Bet ben go na Spanjorokondre foe dini pe Kownoekondre preikiman ben de moro fanowdoe. Mi moro owroe oemapikin, Ester, ben kon siki foe kanker èn dede na ini 1977, èn na ini 1984 Anna dede foe leukemie. Ibriwan foe den ben de wan getrow foetoeboi foe Jehovah den heri libi langa.
Na a ten di Anna dede, Bet nanga Irene ben drai kon baka foe a preikiwroko foe den na dorosei kondre. Den ben jepi foe sorgoe gi den sisa foe den, èn wi alamala ben sari srefisrefi. Baka wan pisi ten mi ben taigi den oemapikin foe mi: „OK, a sari! Wi trowstoe tra sma nanga den warti pramisi foe bijbel. Now wi moesoe meki wisrefi kisi trowstoe. Satan wani poeroe a prisiri di wi abi foe dini Jehovah, ma wi no kan meki a doe dati.”
Wi getrow famiri na Roemeinia
Mi nanga mi sisa, Mary, ben teki waka go na wi famiri na Roemeinia na ini 1970, wan sani di wi lobi foe memre. Wan foe den sisa foe wi ben dede, ma wi ben man fisiti wi brada John nanga wi sisa Lodovica, di ben libi ete na ini a dorpoe Ortelec. Na a ten foe wi fisiti, papa nanga mama ben dede kaba, èn den ben tan getrow na Jehovah. Foeroe sma ben taigi wi taki papa ben de wan stonfoetoe na ini a gemeente. Srefi wan toe foe den gran-granpikin foe en na Roemeinia de Kotoigi now. Wi ben fisiti so srefi foeroe famiri foe mi masra sei di ben tan kánkan na ini bijbel waarheid.
Na ini 1970, Roemeinia ben de na ondro na ogri-ati komunistis tiri foe Nicolae Ceauşescu, èn Jehovah Kotoigi ben e kisi ogri-ati froefolgoe. Flore, a manpikin foe mi brada John, èn so srefi tra famiri foe mi, ben tan foeroe jari na ini strafoeman kampoe bika foe a kresten bribi foe den, èn na so a ben de toe nanga Gabor Romocean, a manpikin foe mi masra omoe foe en papa sei. A no de foe froewondroe foe dati ede, taki di wi ben kisi a frantiwortoe foe tjari boskopoe go na den edekantoro foe Jehovah Kotoigi na New York, taki den Roemeinia Kotoigi foe wi ben taki dati den no ben sa firi korostoe te leki den ben jere taki wi ben man gowe foe a kondre na wan boen fasi!
Di wi ben kon froestan taki den visum foe wi ben pasa a ten kaba, wi ben go na a lanti kantoro na Ortelec. A ben de wan freida bakadina, èn wán lantiman nomo ben de na wroko. Di a ben kon sabi soema wi ben fisiti èn taki Flore ben de na ini strafoeman kampoe, a ben taki: „Dame, oenoe moesoe gowe wantewante!”
„Ma no wan loko e gowe tide”, mi sisa ben piki.
„A no abi trobi”, a man ben taki gawgaw. „Teki wan bus. Teki wan loko. Teki wan taxi. Waka. Gowe foe djaso so esi leki oenoe kan!”
Di wi ben e bigin gowe, a ben kari wi baka èn wi ben kon sabi taki wan sroedati loko di no ben de tapoe a schema, ben e pasa djaso na siksi joeroe bakadina. Dati ben de wan kolokoe! Na ini wan gewoon loko, den ben sa ondrosoekoe den papira foe wi foeroe tron, ma foe di a tren disi ben tjari sroedati èn wi ben de den wan-enkri toe borgoe na ini a loko, meki no wan sma ben aksi foe si den paspoort foe wi. Den prakseri kande taki wi ben de den granmama foe wan toe foe den ofsiri.
A tra mamanten wi ben doro na Timisoara, èn nanga a jepi foe wan mati foe wan famiri, wi ben man kisi wi visum. A tra dei wi no ben de na ini a kondre moro. Wi ben tjari foeroe moi sani di wi ben memre èn di wi no sa frigiti foe wi getrow kresten brada nanga sisa na Roemeinia, go na oso.
Na ini den jari na baka di wi ben fisiti Roemeinia, wi ben jere pikinso tori nomo foe a preikiwroko di e feni presi na baka na IJzeren Gordijn (Isri Garden). Tokoe wi ben abi a froetrow taki wi kresten brada nanga sisa ben sa tan getrow na wi Gado — awansi fa a situwâsi de. Èn dati den ben doe foe troe! A ben de wan prisiri srefisrefi foe jere taki den ben erken Jehovah Kotoigi na wet leki wan relisi organisâsi na Roemeinia, na ini april 1990! A zomer na baka, wi ben prisiri nanga den verslag foe den kongres di ben hori na Roemeinia. Ija, moro leki 34.000 sma ben fisiti den na ini aiti foto, èn 2260 sma ben teki dopoe! Now moro leki 35.000 sma e teki prati na ini a preikiwroko na Roemeinia, èn a jari di pasa, 86.034 sma ben fisiti a Memrefesa foe a dede foe Krestes.
A waarheid na wan warti sani gi mi ete
Gi wan toe jari mi ben stòp foe njan èn dringi foe den simbôl na a Memrefesa. Mi ben loekoe den kefalek bekwaam brada di no ben njan èn dringi foe den, èn mi ben prakseri na misrefi: ’Foe san ede Jehovah ben sa gi mi a grani foe de wan kompe erfgenaam foe en Manpikin na hemel, te trawan man taki so grati?’ Ma te mi no ben njan foe den, dan mi ben firi froeferi srefisrefi. A ben de leki mi ben weigri foe teki wan sani. Baka di mi studeri foeroe èn ben begi tranga, mi ben bigin njan foe den baka. Mi vrede nanga prisiri ben kon baka, èn noiti den gowe libi mi.
Ala di mi no man si nofo foe leisi, mi e arki ala dei na den cassette-lolo foe bijbel èn foe den Waktitoren nanga Ontwaakt! tijdschrift. Mi e teki prati na a preikiwroko ete. Moro foeroe mi e prati 60 te go miti 100 tijdschrift ibri moen, ma di wi ben abi wi spesroetoe kotoigiwroko nanga na Ontwaakt! na ini april di pasa, mi ben prati 323 tijdschrift. Nanga a jepi foe den oemapikin foe mi, mi man so srefi foe abi wan prati na a theokrasia diniwroko-skoro. Mi breiti taki mi kan go doro foe gi tra sma deki-ati. Pikinmoro ibri sma na ini a Kownoekondre zaal e kari mi Granmama.
Te mi e prakseri baka foe den pikinmoro 79 jari foe a gi di mi gi misrefi na a dini foe Jehovah, mi e taigi en tangi ibri dei taki a gi mi primisi foe kon sabi en warti waarheid èn foe gebroiki mi libi na ini en diniwroko. Mi de tangi srefisrefi taki mi de na libi foe si a kontroe foe kefalek moi bijbel profeititori di ben taki na fesi taki den sma di wi kan teki gersi nanga skapoe, ben sa tjari kon na wán na ini den lasti dei disi. — Jesaja 60:22; Sakaria 8:23.
[Prenki na tapoe bladzijde 23]
Mi sisa Mary nanga mi papa e tanapoe, nanga mi, George, nanga den oemapikin foe wi, Ester nanga Anna
[Prenki na tapoe bladzijde 24]
Nanga den oemapikin foe mi, Bet nanga Irene nanga a masra foe Irene nanga den toe manpikin foe den, alamala e dini Jehovah getrow