Ondrofenitori
Mi De Nanga Prisiri èn Nanga Tangi na Ati ala di a Dede fu Mi Masra gi Mi Bigi Sari
SOLEKI FA NANCY E. PORTER FRUTERI
A ben de 5 yuni 1947, wan waran mofoneti na ini den Bahamas, den èilanti komoto na a zuid-owstusei fu Amerkankondre. Sondro taki mi nanga mi masra George ben fruwakti dati, wan ambtenari kon na wi. A ben abi a wroko fu luku efu sma fu tra kondre ben abi primisi fu de na ini a kondre. A gi wi wan brifi di ben skrifi taki wi ben musu gowe libi den èilanti èn taki wi ben „musu gowe libi a koloni (wan kondre di de na ondro a tirimakti fu wan tra kondre) wantewante”!
MI NANGA George ben de den fosi zendeling fu Yehovah Kotoigi di kon na Nassau, a moro bigi foto na ini den Bahamas. Wi ben musu kon du zendelingwroko dyaso baka di wi klari a di fu aiti klas fu Gilead, wan zendelingskoro na a noordsei fu New York, nanga bun bakapisi. San wi ben du di sma ben wani taki wi ben musu gowe baka, ala di wi ben de drape dri mun nomo? Èn fa a du kon taki 50 yari na baka mi de dyaso ete?
Mi E Kisi Leri Fa fu Du Preikiwroko
Mi papa, Harry Kilner, ben abi bigi krakti tapu a fasi fa mi libi waka. A gi mi wan heri bun eksempre, èn a no ben abi trobi fu lasi furu sani soso fu tron wan Kotoigi fu Yehovah. Ala di a no ben abi wan tumusi bun gosontu, toku a ben go preiki pikinmoro ala satra nanga sonde, ala di a ben du ala muiti fu gi Kownukondre afersi a fosi presi na ini en libi (Mateus 6:33). Wi ben abi pikinso moni nomo, ma na ini den yari di ben de na mindri 1930 nanga 1940, a susu wenkri fu en na ini a foto Lethbridge di de na ini a distrikt Alberta na Kanada, ben de wan presi pe furu yeye wroko ben du. Den fosi sani di mi e memre, na den dinari na ini a furuten diniwroko fu Yehovah Kotoigi, di wi sabi so srefi leki pionier. Den ben kon na wi oso èn ben fruteri wi ondrofenitori.
Na ini 1943, mi bigin dini leki pionier krosibei fu den foto Fort Macleod nanga Claresholm, di de na ini a distrikt Alberta. Na a ten dati a preikiwroko fu wi ben tapu na ini Kanada fu di gensman ben taigi trawan falsi sani fu wi na a pisi ten fu a di fu Tu Grontapufeti. A gebied fu wi ben bradi 50 kilometer fu a wán sei go na a trawan, ma fu di wi ben yongu èn wi ben krakti ete, dan wi no ben abi trobi fu rei baisigri noso fu waka go na den pikin libimakandra nanga burugron na ini a kontren. Na a ten disi, mi ben abi na okasi fu taki nanga wan tu fu den sma di ben klari Gilead nanga bun bakapisi, èn den ondrofenitori fu den meki taki mi kisi a tranga winsi fu tron wan zendeling.
Na ini 1945, mi trow nanga George Porter, di ben de fu a distrikt Saskatchewan na ini Kanada. En papa nanga mama ben de fayafaya Kotoigi sensi 1916, èn ensrefi ben tron wan dinari na ini a furuten diniwroko. A fosi presi pe wi ben musu go wroko ben de a moi birti Lynn Valley di de na ini a distrikt North Vancouver na Kanada. A no ben de langa baka dati di wi kisi kari fu go na Gilead.
Na ini den yari di pasa mi taki nanga sma di ben klari hei kerkiskoro nanga bun bakapisi èn mi si fa a leri di den kisi na den skoro disi safrisafri pori a bribi di den ben abi na ini Gado èn na ini en Wortu, Bijbel. Kontrari fu dati, den sani di wi leri na Gilead gi wi moro koni fu denki èn san de moro prenspari, a tranga a bribi di wi abi na ini Yehovah Gado nanga en Wortu. Tra sma fu wi klas ben musu go na China, Singapore, India, kondre na ini Afrika, Zuid-Amerika, èn tra kondre. Mi kan memre ete fa wi ben breiti di wi yere taki wi ben musu go wroko na den waran Bahamas èilanti.
San Meki Taki Wi Ben Man Tan
Efu wi e luku o fara den tra brada nanga sisa fu a klas fu wi ben musu reis fu go na den toewijzing, dan a reis di wi meki fu go na den Bahamas no ben langa. Fosi yu denki wi ben e nyan bun fu a waran weer, a blaw hemel, a blaw-grun watra, den oso di ben abi difrenti lekti kloru, èn den so furu baisigri. San mi e memre nanga furu warderi fu a bigin di wi kon dyaso, na a pikin grupu fu feifi Kotoigi di ben wakti wi di a boto fu wi doro. Heri esi wi leri taki a kulturu dyaso ben difrenti furu fu san wi ben gwenti. Fu gi wan eksempre, sma ben aksi mi masra fu no kari mi gudu na ini publiki, fu di sma ben gebroiki a wortu dati gi den waka-uma fu den.
A no ben teki langa di den kerki tiriman taigi sma taki wi ben de Komunist. A ben krin fu si taki den no ben feni en bun taki wi ben abi demakandra nanga sma. Leki bakapisi fu dati, wi ben kisi komando fu gowe libi a kondre. Na ini a ten dati, den Kotoigi tapu den èilanti no ben doro 20 sma ete. Ma toku den feni dusundusun sma wantewante di poti den nen na tapu wan dokumenti di ben de fu aksi lanti fu no seni wi gowe fu den èilanti. Na so a kon taki wi ben kan tan.
Wi E Go na wan Nyun Kontren
Bijbel waarheid heri esi ben teki rutu na ini den ati fu den sma di lobi Gado, fu dati ede a genootschap seni moro Gilead zendeling fu kon wroko na den Bahamas. Baka dati, na ini 1950, a genootschap bow wan bijkantoro drape. Tin yari baka dati, Milton Henschel, wán fu den brada di e wroko na a edekantoro na ini Brooklyn, New York, kon na den Bahamas èn a aksi den zendeling efu iniwan fu wi ben wani go bigin a preikiwroko na wan tra Bahamas èilanti. Mi nanga George ben de klariklari fu du a wroko disi èn na so wi tan 11 yari langa na tapu Long Island, te fu kaba.
Na èilanti disi na wan fu den Bahamas èilanti, a langa 140 kilometer, èn a bradi 6 kilometer. Na a ten dati na èilanti no ben abi foto soleki fa wi sabi den now. Sowan 50 oso ben de na ini a mamafoto Clarence Town. Sma ben pôti — faya no ben de, waterleiding no ben de, èn sma ben e bori sani èn wasi so srefi na dorosei. Fu dati ede wi ben musu fiti wisrefi fu libi na a farawe èilanti disi. Tapu na èilanti disi sma ben lobi taki fu a gosontu fu den. Wi leri fu no taki sma odi nanga a aksi, „Fa yu de tide?” bika furutron den ben o fruteri wi wan heri langabere tori fu ala siki di den ben abi fosi èn di den abi now.
Moro furu wi ben preiki fu a wán kukru go na a trawan bika sma ben gwenti fu de na ini a kukru fu den di ben de na dorosei, èn a kukru ben abi wan daki fu drei grasi èn den ben e bron udu so srefi na ini a brantimiri. Den sma na ini den libimakandra moro furu ben de pôti gronman noso fisiman, ma den sma disi ben abi switifasi srefisrefi. Boiti taki furu fu den ben e bribi na ini Gado, den ben abi kruktu bribi so srefi. Te wan freimde sani ben pasa, dan den ben e si a sani dati leki wan marki taki wan tra sani ben o pasa.
Den kerkiman no ben abi bisi fu waka go na ini sma oso sondro taki den ben kisi wan kari èn den ben e priti den Bijbel publikâsi di wi ben gi den sma dati. Na so den ben e frede den sma di ben fruleigi, ma a no ala sma ben e beifi gi den. Fu gi wan eksempre, wan kaksi owru uma di ben abi 70 yari no ben wani taki den ben prei basi gi en. A ben wani frustan a Bijbel gi en ensrefi, èn te fu kaba a tron wan Kotoigi makandra nanga wan tu trawan. Fu di moro sma ben wani sabi a waarheid, dan son sonde George ben musu rei 300 kilometer fu yepi den sma disi fu kon na den konmakandra fu wi.
Na ini den fosi mun di tra Kotoigi no ben de na tapu na èilanti ete, mi nanga George tan hori wi yeye fasi fu di wi ben hori ala den Kresten konmakandra doronomo. Boiti dati, ala munde neti wi ben e teki ten fu studeri wan les na ini a Waktitoren tijdschrift èn wi ben e leisi Bijbel so srefi. Wi ben e leisi so srefi ala den uitgave fu A Waktitoren nanga Ontwaakt! so esi leki wi ben kisi den.
Mi papa dede na a ten di wi ben de na tapu Long Island. A zomer baka dati, na ini 1963, wi seti sani taki mi mama ben kan kon libi krosibei fu wi. Ala di a ben owru kaba, toku a fiti ensrefi bun na a libi na tapu Long Island èn a tan drape te leki a dede na ini 1971. Na ini a ten disi, Long Island abi wan gemeente nanga wan nyun Kownukondre zaal.
Wan Tyalensi Di Gi Mi Furu Sari
Na ini 1980, George kon si taki a gosontu fu en ben bigin go na baka. Na so mi bigin ondrofeni wan sani di gi mi furu sari. Mi ben musu luku fa a siki di nen Alzheimer ben swaki mi lobi masra di ben de so srefi mi patna, nanga mi mati. A kon tron wan heri tra sma. A lasti èn so srefi a moro takru pisi ten fu a siki teki pikinmoro fo yari bifo a dede na ini 1987. So langa leki a ben man, a ben go nanga mi na ini a preikiwroko èn na den konmakandra, ala di furu leisi mi ai ben lon watra te mi ben si omeni muiti a ben meki. Wi feni trowstu trutru, fu di den Kresten brada nanga sisa fu wi gi wi so furu lobi, ma mi e firi en mankeri ete fu tru.
Wán fu den moro warti sani na ini a trowlibi fu mi nanga George ben de den switi takimakandra di wi ben gwenti fu abi. Now di George no de moro, mi de nanga moro tangi na ati leki oiti bifo taki Yehovah e gi den futuboi fu en a deki-ati fu „begi doronomo” èn fu gebroiki „ibri fasi fu begi” (1 Tesalonikasma 5:17; Romesma 12:12; Efeisesma 6:18). Mi e kisi furu trowstu fu di mi sabi taki Yehovah e broko en ede nanga wi. Mi e firi trutru neleki a psalm skrifiman di ben singi: „Blesi fu Yehovah, di e tyari a lai gi wi ala dei” (Psalm 68:19). Mi e si trutru, taki, neleki fa Yesus ben gi wi leki rai, a moro bun fasi fu libi na fu teki en safrisafri, fu frustan taki mi no man du ala sani, èn fu de nanga tangi na ati fu den blesi di ibri dei e tyari kon.—Mateus 6:34.
Den Bun Bakapisi fu a Diniwroko E Gi Mi Prisiri
Fu di mi e tan wroko fayafaya na ini a Kresten diniwroko, dan dati yepi mi fu no tan prakseri tumusi furu fu a ten di pasa. Na so fasi mi man kakafutu gi den sortu firi di kan meki taki mi e brokosaka. Mi kisi spesrutu prisiri fu di mi e leri trawan Bijbel waarheid. A e meki taki mi orga yeye afersi na wan bun fasi èn dati e meki taki mi libi seti èn taki mi no e bruya.—Filipisma 3:16.
Wan leisi wan uma bel mi. Mi ben prati a Kownukondre boskopu na a uma disi sowan 47 yari bifo. A ben de na umapikin fu wán fu den fosi bijbelstudie di wi ben abi na a ten di wi ben doro na den Bahamas na ini 1947. En mama, en papa, nanga ala den brada nanga sisa fu en tron Yehovah Kotoigi, èn furu fu den pikin nanga den granpikin fu den tron Yehovah Kotoigi tu. Fu taki en leti, moro leki 60 famiriman fu na uma disi na Kotoigi. Ma ensrefi noiti ben teki Bijbel waarheid. Ma now a ben de klariklari fu tron wan futuboi fu Yehovah Gado te fu kaba. A ben de wan prisiri trutru fu si taki a pikin grupu fu Kotoigi di ben de na den Bahamas di George nanga mi ben doro drape, gro kon teki moro leki 1400 sma!
Son leisi sma e aksi mi efu mi no e sari taki mi no kisi pikin. A tru taki, a kan de wan blesi te yu abi pikin. Ma a lobi di mi kisi doronomo fu den yeye pikin fu mi, den yeye granpikin, nanga den pikin fu den granpikin dati, no de wan sani kande di ala trutru papa nanga mama e ondrofeni. Fu tru, den sma di e „du bun” èn di „de gudu ini bun wroko” na den moro koloku sma (1 Timoteus 6:18). Fu dati ede, mi e tan wroko fayafaya na ini a diniwroko so langa leki mi gosontu e gi mi okasi fu du dati.
Wan leisi di mi ben de na a tifidatra, wan yongu uma kon na mi èn a taki: „Yu no sabi mi, ma mi sabi yu, èn mi wani nomo fu yu kon sabi taki mi lobi yu.” Baka dati a go doro fu fruteri mi fa a ben kon sabi a Bijbel waarheid èn fa a ben de nanga tangi na ati taki wi ben kon na den Bahamas leki zendeling.
Wan tra leisi di mi ben drai kon baka fu fakansi, mi feni wan rowsu na fesi a doro fu a kamra pe mi e tan now na a bijkantoro fu Yehovah Kotoigi na ini Nassau. A rowsu ben abi wan brifi di ben taki „Wi breiti taki yu doro baka na oso.” Mi de nanga furu tangi na ati, èn mi e kisi furu lobi gi Yehovah te mi e si fa en Wortu, en organisâsi, èn a yeye fu en kenki sma! Fu tru, Yehovah furutron e horibaka gi wi nanga yepi fu den sma na wi lontu.
Mi De Nanga Furu Tangi na Ati
Mi libi no waka makriki ala ten, èn wan tu problema de ete. Ma mi abi so furu sani di mi kan warderi — a prisiri di mi e kisi na ini a diniwroko, a lobi fu so furu Kresten brada nanga sisa, a lobi-ati fasi fa Yehovah en organisâsi e sorgu mi, den moi tru tori fu Bijbel, a howpu di mi abi fu de makandra nanga den lobiwan fu mi te den kisi wan opobaka, èn den sani di mi e memre fu den 42 yari di mi ben trow nanga wan getrow futuboi fu Yehovah. Bifo wi ben trow, mi ben begi taki mi ben man de wan yepi ala ten gi mi masra so taki wi ben kan tan du a furuten diniwroko di a ben lobi sote. Yehovah piki den begi fu mi na wan moi fasi. Fu dati ede mi wani sori Yehovah taki mi de nanga tangi na ati, fu di mi e tan getrow na en ala ten.
Den Bahamas na wan pôpi presi gi sma di e go nanga fakansi, èn den e pai dusundusun Amerkan dala fu kon dyaso èn fu nyan bun fu a prisiri di a waran presi disi e gi den. Fu di mi teki a bosroiti fu dini Yehovah na ala presi pe na organisâsi fu en e seni mi go, dan mi kisi prisiri fu di mi ben man reis fu a wan sei fu den èilanti disi go na a trawan, ala di mi ben e meki bekènti a bun nyunsu fu Gado en Kownukondre. Ma a moro prenspari sani na taki, mi kon sabi èn kon warderi a lobi fu den tumusi bun sma di e libi na den Bahamas.
Mi abi bigi warderi gi den sma di tyari a waarheid go na mi papa nanga mama, di fu den sei poti na ini mi yongu frustan nanga ati a krakti wani fu suku fosi a Kownukondre fu Gado. Yongu futuboi fu Yehovah na ini a ten disi, na a srefi fasi kan kisi furu blesi efu den e go na ini a „bigi doro” di sa meki taki moro okasi sa de gi den fu du moro na ini a diniwroko (1 Korentesma 16:9). Yu tu sa de nanga furu tangi na ati efu yu e gebroiki yu libi fu gi grani na „ A Gado fu den gado”, Yehovah.—Deuteronomium 10:17; Danièl 2:47.
[Prenki na tapu bladzijde 24]
Mi e preiki na strati na ini Victoria, Kanada, na ini 1944
[Prenki na tapu bladzijde 24]
Mi nanga George go na a Gileadskoro na ini 1946
[Prenki na tapu bladzijde 25]
Mi nanga George fesisei fu a zendeling-oso na ini Nassau, na den Bahamas, na ini 1955
[Prenki na tapu bladzijde 26]
A zendeling-oso na ini a presi Deadman’s Cay, pe wi dini fu 1961 te go miti 1972