Aksi fu leisiman
Baka a Frudu, dan Noa seni wan doifi komoto fu na ark di ben drai kon baka nanga „wan olèifwiwiri”. Pe a doifi ben feni na olèifwiwiri?
Bijbel e fruteri wi taki „a watra ben tapu grontapu srefisrefi, taki te fu kaba ala den hei bergi di ben de na ondro a hemel ben tapu nanga watra” (Genesis 7:19). Di a watra fu a frudu ben bigin saka, dan wán leisi na ini wán wiki Noa ben seni wan doifi gowe fu na ark, èn a ben du dati dri wiki langa. Na a di fu tu leisi, a doifi drai kon baka nanga wan „yongu olèifwiwiri na ini en mofo, èn Noa ben kon sabi taki a watra na grontapu ben bigin saka”.—Genesis 8:8-11.
A no de fu taki, dati na ini a ten disi wi no man sabi o langa wan spesrutu pisi fu grontapu ben de na ondro watra, fu di a Frudu ben kenki a fasi fa grontapu ben de. Awansi fa no fa, toku wi sabi taki furu presi ben tapu nanga watra langa nofo, taki furu fu den bon ben pori. Ma soleki fa a sori, dan son wan fu den bon ben tan na libi, so taki yongu sproiti ben kan gro baka di a watra ben saka.
The New Bible Dictionary e taki fu na olèifbon: „Efu yu ben o koti en trowe, dan yongu sproiti e gro komoto fu den rutu, so taki moro leki feifi nyun tompu e opo kon. Nofo tron den olèifbon di de fu dede, e gro na a fasi disi sosrefi”. The New Schaff-Herzog Encyclopedia of Religious Knowledge e taki: „A gersi taki noti no man tapu en fu tan gro”. Nowan sma na ini a ten disi sabi finifini o sowtu, o kowru noso o waran a watra ben de. Fu dati ede, wi no sabi seiker sortu krakti den watra ben kan abi tapu den olèifbon, èn tapu tra sortu bon.
Ma a busi-olèifbon no man gro na kowru presi, soleki fa a de na den moro hei bergi. Furu tron a e gro na presi di lagi moro leki 1000 meter, èn moro furu pe a waran moro leki 10 graden Celsius. „Sobun, di Noa si a yongu wiwiri, dan a ben kon sabi taki a watra na den lagipresi ben e bigin drei gowe”, na so a buku The Flood Reconsidered e taki. Di Noa ben lusu a doifi wan wiki baka dati, dan a no drai kon baka. Disi ben e sori taki tra bon ben bigin gro, èn taki a doifi ben abi tra presi pe a ben kan rostu.—Genesis 8:12.