Kresten musu teki sei na ini politiek fu man sori lobi gi trawan?

FU DE wan Kresten wani taki moro leki fu leisi Bijbel, fu begi, èn fu singi kerkisingi tapu sonde. A wani taki dati wan sma musu du sani gi Gado èn gi libisma. Bijbel e taki: „Meki wi lobi makandra, no nanga wortu nomo noso nanga san wi e taki, ma nanga san wi e du èn nanga a waarheid” (1 Yohanes 3:18). Yesus ben broko en ede trutru nanga trawan, èn Kresten wani teki na eksempre fu en. Na apostel Paulus ben gi den brada nanga sisa fu en a deki-ati taki ala ten den musu abi „furu fu du na ini a wroko fu Masra” (1 Korentesma 15:58). Ma san na a wroko fu Masra? A wani taki dati Kresten musu pruberi fu kenki a fasi fa tirimakti e tiri, so taki den kan tyari wini kon gi den pôtiwan èn gi den wan di e kisi kwinsi? Na dati Yesus ben du?

Aladi sma ben wani Yesus fu bemui na ini politiek afersi èn fu teki sei na ini politiek, toku a ben weigri fu du dati. Di Satan ben wani gi en a makti fu ala den kownukondre na grontapu, dan a weigri dati, a weigri sosrefi fu haritaki nanga sma di ben wani sabi efu den ben musu pai belasting moni, èn a hari ensrefi puru di wan grupu sma pruberi fu meki a tron kownu (Mateyus 4:8-10; 22:17-21; Yohanes 6:15). Ma aladi a no ben e teki sei na ini politiek, toku a ben man du sani gi a bun fu trawan.

Yesus ben poti prakseri na den sani di ben o tyari têgo wini gi trawan. Aladi a ben gi feifi dusun sma nyanyan èn a ben dresi den sikiwan, toku den sani disi ben yepi wan tu sma fu wan syatu pisi ten nomo. Ma den sani di a ben e leri sma, meki taki a heri libisma famiri kan kisi blesi fu têgo. Sma no ben sabi Yesus leki wan sma di ben orga sani fu yepi trawan, ma sma ben sabi en leki „a Leriman” (Mateyus 26:18; Markus 5:35; Yohanes 11:28). A ben taki: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid.”—Yohanes 18:37.

A ben e preiki fu wan sani di bun moro politiek

A waarheid di Yesus ben leri sma no ben abi noti fu du nanga politiek. Na presi fu dati, a waarheid disi ben abi moro furu fu du nanga a Kownukondre pe ensrefi ben o de Kownu (Lukas 4:43). A Kownukondre disi na wan hemel tirimakti di sa kon na ini a presi fu ala libisma tiri èn di sa tyari vrede kon fu ala ten gi a libisma famiri (Yesaya 9:6, 7; 11:9; Danièl 2:44). Fu dati ede a Kownukondre disi na a wan-enkri howpu gi libisma. A no de fu taki, dati wan sma e sori moro lobi te a e meki a trutru howpu disi bekènti di o kon tru na ini a ten di e kon, na presi fu gi trawan deki-ati fu frutrow tapu libisma fu tyari wan moro bun ten kon. Bijbel e taki: „No poti yu frutrow tapu heiheisma, noso tapu a manpikin fu libisma na grontapu, di frulusu no de na en. En yeye e komoto gowe, a e go baka na en gron; Na a dei dati den prakseri fu en e lasi gowe. Koloku fu a sma di abi a Gado fu Yakob leki yepi, di e howpu tapu Yehovah, en Gado” (Psalm 146:3-5). Fu dati ede, Yesus no ben seni den disipel fu en fu preiki fu wan moro bun fasi fa fu seti tirimakti, ma na presi fu dati, a leri den fu preiki a ’bun nyunsu fu a kownukondre’.—Mateyus 10:6, 7; 24:14.

We, disi na „a wroko fu Masra” di Kresten preikiman kisi leki komando fu du. Fu di den sma di o libi ondro a tiri fu Gado Kownukondre musu abi lobi gi makandra, meki a Kownukondre sa man tyari wan krinkrin kaba kon na pôtifasi fu di a sa gi a libisma famiri soifri san den abi fanowdu (Psalm 72:8, 12, 13). Disi na bun nyunsu di musu preiki seiker.

Na ini a ten disi, Yehovah Kotoigi orga fu du a ’wroko disi fu Masra’ na ini 235 kondre. Den e lespeki ala tirimakti, soleki fa Yesus ben taigi den fu du (Mateyus 22:21). Ma den e gi yesi sosrefi na den wortu disi di Yesus ben taigi den bakaman fu en: „Unu no de wan pisi fu grontapu, ma mi teki unu puru na grontapu.”—Yohanes 15:19.

Son sma di ben gwenti fu abi wan prati na politiek, tapu nanga a sani dati baka di den studeri Bijbel finifini. Wan politiekman fu Italiakondre ben de wan memre fu a Lomsu Aktie, wan organisâsi di kerki ben e tiri. A man disi ben taki: „Mi ben go na ini politiek, fu di mi ben feni taki wan sma musu teki prati na politiek èn na tra sani fu a libimakandra, so taki sani kan waka moro bun na ini a libimakandra.” Baka di a ben tapu nanga a wroko fu en leki komsarsi fu wan foto, dan a go preiki Gado Kownukondre leki wan fu den Kotoigi fu Yehovah. A fruteri fa a du kon taki sma di e meki muiti fu seti politiek na wan moro bun fasi, no man du dati. „Wan tu bun sma du muiti trutru fu meki a grontapu kon moro bun, ma fu di so furu sma e du ogri, meki den wan di wani tyari wan kenki kon no abi bun bakapisi.”

Aladi tru Kresten e preiki a wan-enkri howpu gi libisma, na presi fu teki prati na politiek, toku den man du bun sani gi trawan. Den sma di den e yepi fu tron futuboi fu Gado Kownukondre e leri fu tapu nanga den takru gwenti fu den, den e leri fu lespeki tirimakti, den e leri fu abi wan moro bun osofamiri libi, èn den e leri fu no feti nomo fu kon gudu. Ma san de moro prenspari, na taki Yehovah Kotoigi e yepi sma fu kon kisi wan bun banti nanga Gado.

Den sma di e preiki fu Gado Kownukondre e du bun gi a libimakandra pe den de. Ma boiti dati den e yepi sma fu poti frutrow tapu wan tirimakti di de trutru èn di sa tyari têgo vrede kon gi ala sma di lobi Gado. Fu di den Kresten disi no e teki sei na ini politiek afersi, meki den man tan gi sma a moro bun yepi di de fu kisi na ini a ten disi.

[Faki/​Prenki na tapu bladzijde 7]

Mi tapu nanga politiek fu man preiki Gado Kownukondre

Átila ben de wan boi ete di den priester fu a kontren pe a ben e libi, namku Belém, na ini Brasyonkondre, leri en taki libisma srefi ben o tyari frulusu kon. A ben lobi fu yere taki a libisma famiri sa kon fri fu kwinsi te fu kaba, èn a go na ini wan grupu di ben e pruberi fu seti sani moro bun na ini a libimakandra. Drape a kon leri sabi fa fu seti sani, so taki sma ben kan waka na ini grupu na strati fu sori taki den no e agri nanga a tirimakti. A ben kon leri sabi sosrefi fa fu seti sani so taki den borgu ben kan opo densrefi teige a tirimakti.

Ma Átila ben lobi fu gi leri sosrefi na den pikin na ini a grupu, nanga yepi fu a buku Naar de Grote Onderwijzer luisteren, di a ben kisi fu wan sma.a A buku ben e leri taki wan sma musu tyari ensrefi na wan bun fasi èn taki a musu gi yesi na tirimakti. A sani disi meki taki Átila aksi ensrefi fu san ede den sma di e bribi taki libisma srefi o tyari frulusu kon, no e tyari densrefi akruderi den hei markitiki fu Yesus. A ben aksi ensrefi tu fu san ede son sma di e kisi makti no e poti prakseri moro na den wan di e pina. A gowe libi a grupu disi. Bakaten, Yehovah Kotoigi naki na en doro èn den taki nanga en fu Gado Kownukondre. Syatu baka dati a bigin studeri Bijbel èn a kon leri sabi san na a trutru lusu gi a pina di libisma e pina.

Na a ten di Átila ben e studeri Bijbel, dan a go na wan konmakandra fu a Lomsu Kerki, di ben abi fu du nanga bribi èn nanga politiek. Den man di ben e gi leri drape ben taki: „Bribi nanga politiek na tu difrenti fasi fa yu kan si a srefi tori.” Átila ben go sosrefi na wan konmakandra na a Kownukondre zaal. Disi ben de wan bigi difrenti trutru! Dati na fu di sma no ben e smoko, den no ben e dringi sopi, èn den no ben e fruteri doti lafutori. A teki a bosroiti fu go nanga Yehovah Kotoigi na ini a preikiwroko fu den, èn syatu baka dati a teki dopu. Now a kan si fu san ede a leri di e taki dati libisma srefi man tyari wan lusu kon na den problema fu den pôtiwan, no de tru kwetikweti.

[Futuwortu]

[Prenki na tapu bladzijde 6]

Aladi Kresten dinari no e teki sei na ini politiek afersi, toku den man yepi trawan