Ondrofenitori
Fu dungru strafu-oso ondro gron, te na den moi Alpenbergi fu Switserland
SOLEKI FA LOTHAR WALTHER FRUTERI
Baka di mi ben koti strafu dri yari langa na ini den dungru ondrogron strafu-oso fu den Komunist fu Owstu Doisrikondre, dan mi no ben man wakti fu de fri baka èn fu nyan bun fu a demakandra nanga mi osofamiri.
MA MI no ben fruwakti kwetikweti taki Johannes, mi boi fu siksi yari, ben o luku mi leki mi na wan freimde sma. Afu fu en libi, a no ben si en papa. Gi en mi ben de wan freimde sma trutru.
Tra fasi leki a boi fu mi, mi gro kon bigi nanga wan papa èn nanga wan mama di ben lobi mi trutru. Wi ben de wan koloku osofamiri di ben e tan na ini a foto Chemnitz, na Doisrikondre, pe mi gebore na ini 1928. Mi papa no ben lobi kerki srefisrefi èn a ben e sori dati tu. A ben memre fa den sokari „Kresten” srudati di ben e feti teige makandra na ini a Fosi Grontapufeti, ben e winsi makandra wan switi Kresneti tapu 25 december, èn fa den bigin kiri makandra baka, a tra dei. Gi mi papa, kerki ben de a moro ogri fasi fa sma kan hoigri.
Bribi e kon na presi fu bruya
Koloku taki mi no ben ondrofeni den sortu sani disi di ben meki mi papa lasi-ati. A di fu Tu Grontapufeti ben kon kaba di mi ben abi 17 yari, sobun a feti kaba wán yari bifo den ben o teki mi fu tron srudati. Toku, mi ben e broko mi ede nanga aksi soleki, ’Fu san ede sma e kiri makandra so furu? Suma mi kan frutrow? Fa mi kan abi a dyaranti taki mi o abi wan bun libi?’ Owstu Doisrikondre, pe wi ben e libi, ben kon de ondro a makti fu a Sofyet Unie. Den Komunist ben kon nanga wan lo nyun fasi fu krutu sani, den ben e taki dati ala sma abi den srefi reti, taki wánfasi musu de na ini a kondre, èn taki ala sma musu libi na ini vrede nanga makandra. Den sortu fasi fu denki disi ben e hari den sma di ben kon weri fu ala den takru bakapisi fu na orloku. Ma a no ben o teki langa bifo den opregti sma disi, ben o kon si taki sma ben kori den trutru; disi leisi a no kerki ben kori den, ma den politiekman.
Mi ben e suku bun piki tapu den aksi fu mi, ne a bigi sisa fu mi mama di ben de wan Yehovah Kotoigi, taki nanga mi fu a bribi fu en. A ben gi mi wan buku di e fruteri fu Bijbel èn disi ben meki taki fu a fosi leisi na ini mi libi mi go leisi a heri kapitel 24 fu Mateyus. Mi ben fruwondru fu si fa a buku ben e fruteri sani na wan krin fasi fu overtoigi sma. A ben e sori krin taki wi e libi na ini a ten fu „a kaba fu a grontapu sistema”, èn a ben e sori san na a rutu fu den problema fu libisma.—Mateyus 24:3; Openbaring 12:9.
A no langa baka dati, mi kisi moro buku fu Yehovah Kotoigi, èn di mi bigin leisi den a wan baka a trawan, mi kon frustan taki disi na a waarheid di mi ben e suku so fayafaya. Mi ben prisiri fu kon sabi taki Yesus Krestes tron Kownu na hemel na ini 1914, èn taki heri esi a o puru ala ogridu so taki a kan tyari blesi kon gi den libisma di e gi yesi na Gado. Wan tra moi sani di mi ben kon frustan krin, na a seti fu a frulusu-ofrandi. Disi ben yepi mi fu begi Yehovah Gado fayafaya, fu aksi en pardon. Wan sani di ben naki mi ati trutru, na a moi kari di skrifi na ini Yakobus 4:8: „Kon krosibei na Gado, èn a sa kon krosibei na unu.”
Aladi mi ben de fayafaya na ini a nyun bribi fu mi, toku mi papa, mi mama, nanga mi bigi sisa no ben wani bribi san mi ben e fruteri den biginbigin. Ma disi no ben puru a winsi di mi ben abi fu go na den Kresten konmakandra di wan pikin grupu fu Kotoigi ben e hori krosibei fu Chemnitz. Mi ben fruwondru srefisrefi di mi papa, mi mama, nanga mi bigi sisa kon nanga mi, a fosi leisi di mi go na wan konmakandra! Dati ben de na ini a winter fu 1945 go miti 1946. Bakaten wan bijbelstudie grupu ben seti na ini Harthau, a foto pe wi ben e tan. Sensi a ten dati, wi heri osofamiri bigin go na den konmakandra doronomo.
„Mi na wan boi ete”
Den prenspari tru tori fu Bijbel di mi ben e leri èn a demakandra di mi ben abi nanga a pipel fu Yehovah doronomo, ben meki taki mi gi mi libi abra na Yehovah, èn mi dopu tapu 25 mei 1946. Mi ben breiti srefisrefi fu si taki mi papa, mi mama, nanga mi sisa ben e go na fesi na yeye fasi tu, èn taki te fu kaba ala dri tron getrow Kotoigi. Mi sisa na wan fayafaya Kotoigi ete na ini wan fu den gemeente na ini Chemnitz. Mi mama nanga mi papa tan dini Yehovah getrow teleki den dede; mi mama dede na ini 1965, èn mi papa dede na ini 1986.
Siksi mun baka di mi dopu, mi bigin dini leki spesrutu pionier. Na so mi bigin nanga wan diniwroko di mi ben o du mi heri libi langa ’na ini bun ten, èn na ini muilek ten’ (2 Timoteyus 4:2). Heri esi mi kisi nyun okasi fu du diniwroko. Furuten preikiman ben de fanowdu na wan farawe presi, owstusei fu Doisrikondre. Mi nanga wan tra brada ben gi wi nen fu go na a presi dati, ma mi ben abi a firi taki mi no abi nofo ondrofeni èn mi no lepi nofo fu teki so wan frantwortu na mi tapu. Fu di mi ben abi 18 yari nomo, meki mi ben e firi neleki Yeremia di ben taki: „Ke, . . . Yehovah! Luku, mi no sabi kwetikweti fa mi musu taki, bika mi na wan boi ete” (Yeremia 1:6). Aladi mi ben firi leki mi no bun nofo, toku den brada di ben abi frantwortu ben bosroiti fu gi wi na okasi fu go. Na so fasi wi go na Belzig, wan pikin foto na ini a distrikt Brandenburg.
A ben muilek srefisrefi fu preiki na ini a kontren drape, ma na a fasi dati mi leri bun furu. Baka wan pisi ten, wan tu prenspari bisnis-uma teki a Kownukondre boskopu èn den tron Yehovah Kotoigi. Ma a bosroiti di den ben teki fu tron Kotoigi, ben de teige den gwenti fu den sma fu a foto, di no ben e frutrow trawan di ben e kon nanga nyun gwenti noso nyun bribi. Den Lomsu kerki fesiman nanga den Protestant kerki fesiman bigin gens wi èn den ben e fruteri ala sortu ogri-ati lei fu wi èn fu a preikiwroko di wi ben e du. Ma fu di wi ben sabi seiker taki Yehovah ben o tiri wi èn taki a ben o kibri wi, meki wi ben man yepi wan tu sma fu teki a waarheid.
Moro sma e bigin gens wi
A yari 1948 ben tyari blesi kon gi mi, ma mi ben kisi problema tu di mi no ben fruwakti. Na a fosi presi, mi kisi a kari fu go pionier na Rudolstadt, na ini Thuringen. Drape mi kon sabi furu getrow brada nanga sisa, èn mi ben prisiri fu de nanga den. Wan tra bigi blesi kon na ini yuli fu a yari dati. Mi trow nanga Erika Ullmann, wan getrow èn fayafaya yongu Kresten uma di mi ben sabi sensi a ten di mi ben bigin go na den konmakandra na ini Gemeente Chemnitz. Mi nanga en bigin pionier na ini Harthau, a foto pe mi gro kon bigi. Ma baka wan pisi ten Erika no ben man du furuten diniwroko moro fu di a ben kon siki èn fu di tra problema ben de tu.
A ten dati ben de wan muilek ten gi a pipel fu Yehovah. A kantoro fu wroko-afersi na ini Chemnitz ben teki mi lantikarta di mi ben e gebroiki fu bai nyanyan bunkopu. Den ben wani dwengi mi fu tapu nanga a preikiwroko èn fu go wroko heri dei neleki ala tra sma. Den brada di ben abi frantwortu, ben si disi leki wan okasi fu bigin wan krutu afersi pe den ben aksi lanti fu gi Kotoigi primisi fu du a diniwroko fu den. Den krutuman no ben wani gi wi a reti dati, èn tapu 23 yuni 1950, den leisi strafu gi mi, taki mi ben o abi fu pai wan butu, noso mi ben o abi fu go na strafu-oso 30 dei langa. Wi tyari a tori disi go na fesi hei krutu, ma den no ben wani gi wi a reti tu fu preiki, ne den seni mi go na strafu-oso.
Dati ben de soso a bigin fu a gens nanga a frufolgu di ben o miti wi na ini a ten di ben o kon. A Komunist tirimakti bigin taki ala sortu lei fu wi èn na ini september 1950, pikinmoro wán mun baka di den sroto mi, den tapu a wroko fu Kotoigi. Fu di bun furu sma ben e tron Kotoigi na ini wan syatu pisi ten, èn fu di Kotoigi no e teki sei na ini feti, meki sma ben e si wi leki spion fu den kondre pe sma no de Komunist. Den ben e taki tu dati wi ben e gebroiki a bribi fu wi fu du ala sortu sani kibrikibri. Na a srefi dei di den tapu a wroko fu wi, mi wefi meki wi manpikin, Johannes. A boi gebore na oso, aladi mi ben de na strafu-oso. Aladi na uma di ben yepi mi wefi di Johannes ben gebore, ben e suku fu tapu den srudati, toku den broko kon na ini na oso fu wi fu kon suku buweisi gi den sani di den ben taki fu wi. A no de fu taki dati den no ben feni noti. Toku den ben man seti sani na wan kibri fasi fu seni wan sma kon na ini wi gemeente di ben kan fruteri den ala san wi ben e du. A bakapisi ben de taki skowtu kisi mi nanga den tra brada di ben abi frantwortu na ini a gemeente na ini oktober 1953.
Na ini den dungru strafu-oso ondro gron
Baka di wi alamala kisi krutu fu koti strafu sowan dri te siksi yari, dan den tyari wi go na den morsu strafu-oso ondro gron fu a palèisi fu Osterstein na ini Zwickau, pe wi ben miti wan tu tra brada. Aladi a situwâsi drape ben takru srefisrefi, toku a ben de wan prisiri sani fu abi demakandra nanga lepi brada. Den ben poti wi na strafu-oso, ma dati no ben wani taki dati wi ben e mankeri yeye nyanyan. Lanti ben taki dati wi no ben mag prati A Waktitoren fu di den no ben lobi en srefisrefi. Ma toku, na wan kibri fasi, wi ben man kisi A Waktitoren na ini strafu-oso; wi ben e kisi en te na ini a kamra srefi pe den ben sroto wi! Kande yu e aksi yusrefi fa dati kan.
We, wan tu brada ben musu wroko na den presi pe den ben e diki wan sortu ston di sma e gebroiki leki krofaya. Drape tra Kotoigi di no ben de na strafu-oso, ben e tyari tijdschrift gi den. Na wan kibri fasi den brada ben e tyari den tijdschrift kon na ini a strafu-oso èn na wan tumusi koni fasi den ben e prati a yeye nyanyan di wi ben abi so tranga fanowdu. Mi ben breiti srefisrefi fu si fa Yehovah sorgu wi èn tiri wi na a fasi disi!
Na a kaba fu 1954, den tyari wi go na a strafu-oso na ini Torgau; wan strafu-oso pe tumusi ogri sani ben e pasa. Den Kotoigi drape ben breiti fu si wi. Te na a ten dati, den ben tan tranga na yeye fasi fu di den ben e fruteri makandra ibri tron baka san den ben man memre fu den owru Waktitoren. Den ben e angri srefisrefi fu kisi nyun yeye nyanyan! Now wi fu wi sei ben e si en leki wi plekti fu prati den prenspari bijbeltori di wi ben studeri na ini Zwickau. Ma fa wi ben kan du dati aladi wi ben kisi a komando taki wi no ben mag taki nanga makandra kwetikweti te wi ben e waka lontu ibri dei? We, den brada ben sori wi wan tu moi fasi fa wi ben kan du dati, èn a makti anu fu Yehovah ben e kibri wi. Disi ben leri wi o prenspari a de fu studeri Bijbel fayafaya èn fu denki dipi fu san wi leri te wi de fri èn te wi abi na okasi fu du dati.
Wan ten fu teki prenspari bosroiti
Nanga a yepi fu Yehovah, wi ben man tan tanapu steifi. Wi ben fruwondru srefisrefi fu si taki wan tu fu wi ben kon fri moro esi, na a kaba fu 1956. Mi no man fruteri fa wi ben breiti di sma opo den strafu-oso doro gi wi! Na a ten dati, a boi fu mi ben abi siksi yari, èn mi ben de nanga bigi prisiri fu de baka nanga mi wefi èn fu man yepi kweki a pikin fu wi. Fu wan pisi ten, Johannes ben e si mi leki wan freimde sma, ma heri esi wi kon kisi wan krosibei banti nanga makandra.
Yehovah Kotoigi na ini Owstu Doisrikondre ben abi wan tumusi muilek ten. Fu di moro nanga moro sma ben kon de teige a Kresten diniwroko fu wi èn teige a bosroiti fu wi fu no teki sei na ini feti, meki iniwan momenti sma ben kan du wi ogri; a heri libi fu wi lai problema nanga broko-ede èn ala ten wi ben weri. Dati meki mi nanga Erika go sidon luku a situwâsi fu wi èn wi begi Yehovah fu tiri wi. Wi ben firi leki a ben de fanowdu fu froisi go na wan presi pe a situwâsi ben de moro bun, na presi taki broko-ede pori wi libi. Wi ben wani fu de fri fu anbegi Yehovah èn fu doro den marki di wi ben poti gi wisrefi na yeye fasi.
Na ini a lente fu 1957, wi ben kisi na okasi fu go dini na Stuttgart, na ini West Doisrikondre. Lanti no ben tapu a preikiwroko drape, èn wi ben de fri fu abi demakandra nanga wi brada nanga sisa. Den ben yepi wi na wan tumusi lobi-ati fasi. Seibi yari langa wi ben de na ini a gemeente na Hedelfingen. Na ini den yari dati, a manpikin fu wi bigin go na skoro èn a ben e go na fesi na ini a waarheid tu. Na ini september 1962, mi kisi a grani fu go na a Kownukondre Diniwroko-skoro na ini Wiesbaden. Drape den brada gi mi deki-ati fu froisi nanga mi osofamiri, fu go dini pe Bijbel leriman ben de fanowdu di e taki Doisritongo. Dati wani taki dati wi ben o go na difrenti kontren na ini Doisrikondre èn na ini Switserland.
Na tapu den Alpenbergi fu Switserland
Na so wi froisi go na Switserland na ini 1963. Den brada fruteri wi taki wi ben o wroko makandra nanga wan pikin gemeente na ini Brunnen di ben de na a Meer van Luzern, wan moi pisi watra mindrisei fu den Alpenbergi fu Switserland. A presi disi ben de leki wan paradijs gi wi. Wi ben abi fu kon gwenti a fasi fa den sma drape ben e taki a Doisritongo, a fasi fa den sma ben e libi, èn a fasi fa den ben e denki. Toku wi ben lobi fu preiki gi den sma disi di ben abi switifasi trutru èn wi ben lobi fu wroko na den mindri. Wi tan na ini Brunnen 14 yari langa. Drape wi manpikin gro kon bigi.
Na ini 1977, di mi ben abi pikinmoro 50 yari, wi kisi a kari fu go dini na a Bethel fu Switserland di de na ini a foto Thun. Wi ben si disi leki wan spesrutu grani èn wi teki a kari nanga furu warderi. Mi nanga mi wefi du Bethel diniwroko neigi yari langa, èn te now ete wi e si dati leki wan tumusi prenspari sani na ini wi Kresten libi èn na ini a fasi fa wi ben go na fesi na yeye fasi. Wi ben e prisiri tu fu wroko makandra nanga den preikiman fu Thun èn fu den presi na ini a birti drape. Ala ten wi ben man si den „tumusi moi wroko” fu Yehovah, namku den bun bigi Berner Alpenbergi nanga snew na den tapu.—Psalm 9:1.
Wi e froisi ete wan leisi
Na a bigin fu a yari 1986, wi froisi ete wan leisi. Den brada aksi wi fu go dini leki spesrutu pionier na ini wan bigi kontren na a owstusei pisi fu Switserland pe a Gemeente Buchs ben e wroko. Ete wan leisi, wi ben abi fu kon gwenti wan tra fasi fu libi. Ma fu di wi ben wani dini Yehovah na iniwan presi pe wi ben de fanowdu, meki wi bigin nanga a wroko drape, èn Yehovah blesi wi. Son tron, mi ben e teki presi gi opziener di ben e go na den difrenti gemeente fu gi den deki-ati. Now, tina-aiti yari pasa, èn wi ondrofeni furu sani di gi wi prisiri di wi ben e preiki na ini a kontren disi. A gemeente na ini Buchs kon moro bigi, èn wi e prisiri fu kon makandra na ini wan moi Kownukondre zaal di gi abra na Yehovah feifi yari pasa.
Yehovah sorgu wi na wan tumusi bun fasi. A moro bigi pisi fu wi libi, wi ben de na ini a furuten diniwroko, toku noiti wi mankeri wan sani. Wi breiti fu si taki wi manpikin, en wefi nanga den pikin fu den, èn sosrefi den osofamiri fu den granpikin fu wi, e waka a pasi fu Yehovah na wan getrow fasi.
Te mi e luku a libi fu wi, dan mi e si trutru taki wi dini Yehovah ’na ini bun ten, èn na ini muilek ten’. A Kresten diniwroko di mi pruberi fu du ala ten, tyari mi fu den dungru ondrogron strafu-oso fu den Komunist, go na den tumusi moi Alpenbergi fu Switserland. Nowan momenti a hati mi nanga mi osofamiri taki wi libi na so wan fasi.
[Faki na tapu bladzijde 28]
„Sma di kisi krutu tu tron fu a srefi sani” ben tan getrow di den kisi frufolgu
Ondro a tirimakti fu a Doisri Demokrasia Republiek (DDR), noso Owstu Doisrikondre soleki fa son sma sabi en, Yehovah Kotoigi kisi frufolgu na wan tumusi ogri-ati fasi. Ondrosuku e sori taki sma ben seni moro leki 5000 Kotoigi go na strafuman-kampu èn na strafu-oso, fu di den ben e du a Kresten diniwroko èn fu di den no ben e teki sei na ini feti.—Yesaya 2:4.
Sma ben kari sonwan fu den Kotoigi disi, „sma di kisi krutu tu tron fu a srefi sani”. Sowan 325 fu den ben koti strafu na ini den Nazi strafuman-kampu nanga strafu-oso. Ne, na ini 1950, a Stasi, wan spesrutu grupu fu skowtu di ben e wroko gi a DDR, bigin frufolgu den Kotoigi baka fu poti den na ini strafu-oso. Sonwan fu den strafu-oso ben de presi di ala tu grupu ben gebroiki: fosi, den ben de Nazi strafu-oso èn baka dati den ben de Stasi strafu-oso.
Na ini den fosi tin yari di den kisi hebi frufolgu, dati wani taki fu 1950 te go miti 1961, dan 60 Kotoigi, mansma nanga umasma, lasi libi na ini den strafu-oso dati fu di sma du ogri-ati sani nanga den. Trawan dede fu di den no ben e kisi bun nyanyan, fu di den ben e siki, èn fu di den ben kon owru. Twarfu Kotoigi ben kisi krutu fu koti strafu den heri libi langa, ma bakaten sma kenki a krutu dati kon tron wan strafu fu 15 yari.
Nownow, efu yu o go na ini a foto Berlijn pe na edekantoro fu den Stasi ben de fosi, dan yu o si wan tu ondrofenitori di skrifi na tapu papira nanga wan tu fowtow di e sori fa lanti ben frufolgu Yehovah Kotoigi 40 yari langa na ini Owstu Doisrikondre. Den fowtow nanga ondrofenitori di de fu si drape, e sori a deki-ati nanga a tranga yeyefasi fu den Kotoigi disi di tan getrow na ini ten fu frufolgu.
[Karta na tapu bladzijde 24, 25]
(Efu yu wani si pe den sani disi skrifi, luku a tijdschrift)
OWSTU DOISRIKONDRE
Rudolstadt
Belzig
Torgau
Chemnitz
Zwickau
[Prenki na tapu bladzijde 25]
A palèisi fu Osterstein, na ini Zwickau
[Sma di abi a reti fu a prenki]
Fotosammlung des Stadtarchiv Zwickau, Deutschland
[Prenki na tapu bladzijde 26]
Mi nanga mi wefi, Erika