Den wan di kaba a Gileadskoro e go doro leki fayafaya wrokoman di e du a kotiwroko!

„A kotiwroko bigi, ma furu wrokoman no de. Fu dati ede, begi a Masra fu a kotiwroko fu seni wrokoman go na ini a kotiwroko fu en” (Mateyus 9:37, 38). Den wortu dati ben wani taki wan spesrutu sani gi den studenti fu a di fu 116 klas fu a Waktitoren Bijbelskoro Gilead, di den ben e sreka densrefi fu go dini na ini den kondre pe den ben musu dini leki zendeling.

Tapu satra 13 maart 2004, dan ala nanga ala sowan 6684 sma ben kon makandra na a Waktitoren Skoro Centrum na ini Patterson, New York, èn na tra Bethel-oso pe den sma ben kan luku a programa na tapu telefisi. Na a programa disi a klas ben kisi den lasti rai nanga deki-ati fosi den gowe. Wi alamala kan kisi wini fu den rai di den ben kisi, aladi wi e go doro leki fayafaya wrokoman di e du a kotiwroko na yeye fasi.

Theodore Jaracz, wan memre fu a Tiri Skin di ben de wan studenti na ini a di fu seibi klas fu a Gileadskoro, ben taki wan tu wortu na a bigin. A ben poti krakti tapu den wortu disi di Yesus taki: „Go na sma fu ala kondre èn meki den tron disipel” (Mateyus 28:19, 20). Den wortu disi fiti srefisrefi, bika den studenti di kaba a skoro, e go dini na ini 20 difrenti kondre! Brada Jaracz ben memre den studenti taki den leri fu Gado Wortu ben sreka den dorodoro fu de fayafaya wrokoman di e du a tumusi prenspari kotiwroko na yeye fasi.—Mateyus 5:16.

Fa fu abi bun bakapisi leki wrokoman di e du a kotiwroko

A fosi takiman fu a programa ben de Robert Wallen, di ben abi furu fu du nanga a Gileadskoro someni yari kaba. Na ini a lezing fu en di ben nen „Switifasi, wan tumusi moi fasi”, a taigi den studenti: „Switifasi de leki wan tongo di srefi dofusma kan yere èn di brenisma kan si.” Yesus ben sabi heri bun sortu nowtu tra sma ben abi èn a ben e suku fasi fu puru den nowtu dati (Mateyus 9:36). Den studenti sa kisi furu okasi fu du a srefi sani tu na ini a preikiwroko, na ini a gemeente, na ini den zendeling-oso, èn na ini den eigi trowlibi. A takiman ben gi den studenti a deki-ati disi: „Meki a tumusi moi fasi disi, namku switifasi, de fu si na ini yu libi aladi yu e dini trawan. Soso te yu e du ala muiti fu libi na wan fasi di fiti, dan yu o man libi na ini wan zendeling-oso. Fu dati ede, abi a fasti bosroiti fu abi switifasi èn fu sori dati dorodoro na ini ala san yu e du.”—Kolosesma 3:12.

Baka dati, Gerrit Lösch, wan memre fu a Tiri Skin di ben de wan studenti na ini a di fu 41 klas fu a Gileadskoro, ben hori a lezing di nen „Preikiman fu frulusu” (Yesaya 52:7). Efu sma wani kisi frulusu te a disiten sistema o kisi pori, dan den musu teki sabi fu Gado Wortu; den musu meki a bribi fu den bekènti na publiki, èn den musu teki dopu (Romesma 10:10; 2 Timoteyus 3:15; 1 Petrus 3:21). Ma a moro prenspari reide fu preiki fu a frulusu di sma kan kisi, a no fu frulusu den sma, ma na fu gi Gado glori. Fu dati ede, Brada Lösch ben gi den nyun zendeling a rai disi: „Tyari a Kownukondre boskopu go na den moro farawe presi fu grontapu, èn de fayafaya preikiman fu frulusu; du ala den sani disi fu gi Yehovah glori.”—Romesma 10:18.

„O furu leti yu e skèin?” ben de wan aksi di Lawrence Bowen, wan leriman na a Gileadskoro, ben poti. A ben sori go na den wortu fu Yesus di skrifi na ini Mateyus 6:22 èn a ben gi den studenti di kaba a skoro, a deki-ati fu tan abi wan „krin” ai so taki ’den kan skèin a faya fu den na yeye fasi, fu di na so fasi Yehovah e kisi glori èn tra sma e kisi wini fu dati’. Sensi na a bigin fu en diniwroko, Yesus gi wan tumusi bun eksempre ini a tori disi, fu di a ben tan poti ala en prakseri fu du a wani fu Gado. Fu di Yesus ben e denki dipi fu den tumusi moi sani di en Tata leri en di a ben de na hemel, meki dati yepi en fu horidoro di Satan ben tesi en na ini a gran sabana (Mateyus 3:16; 4:1-11). Yesus ben sori taki a ben frutrow tapu Yehovah dorodoro aladi a ben e du a wroko di Gado ben gi en fu du. Na so a de tu taki efu den zendeling wani horidoro te problema miti den na ini a ten di e kon, dan den musu tan abi a bun gwenti fu studeri Bijbel èn den musu tan frutrow tapu Yehovah dorodoro.

Mark Noumair, wan leriman na a Gileadskoro di ben de wan studenti na ini a di fu 77 klas fu a Gileadskoro, ben hori a lastiwan fu den lezing disi. A lezing fu en ben nen: „Dyaso wi de, na ini yu anu” (Yosua 9:25). A ben gi den studenti deki-ati fu abi a srefi denki leki den Gibeonsma fu owruten. Aladi Gibeon ben de ’wan bigi foto, . . . èn ala den man drape ben de tranga man’, toku den Gibeonsma no ben e feti fu de prenspari sma èn den no ben e fruwakti taki sma ben musu du ala san den wani (Yosua 10:2). Den ben de klariklari fu wroko leki „sma di e tyari udu kon na wán èn sma di e kisi watra” ondro a tiri fu den Leifisma. Na so wan fasi den ben e horibaka gi na anbegi fu Yehovah (Yosua 9:27). Te yu e luku en bun, dan den studenti fu a klas disi di kaba a Gileadskoro, taigi Yesus Krestes, a Moro Bigi Yosua: „Dyaso wi de, na ini yu anu.” Now te den go du a wroko di den kisi fu du na tra kondre, den musu du iniwan wroko di a Moro Bigi Yosua gi den fu du.

Ondrofenitori nanga interview

„Meki den frustan den Buku fu Bijbel finifini”, ben de wan takimakandra di Wallace Liverance, wan leriman fu den di ben de wan studenti na ini a di fu 61 klas fu a Gileadskoro, ben hori nanga wan grupu studenti. Den ben fruteri san den ben ondrofeni na ini a preikiwroko na ini a pisi ten di den ben de na a skoro èn den ben gi wan tu demonstrâsi fu den ondrofenitori tu. A ben de krin fu si taki a finifini studie fu den Buku fu Bijbel na ini den feifi mun di ben pasa, ben naki na ati fu den studenti èn a ben gi den deki-ati fu prati nanga trawan san den ben leri (Lukas 24:32). Na ini den feifi mun di wan fu den studenti ben de na a skoro, a ben fruteri en brada san a ben e leri. Disi ben gi en brada deki-ati fu go suku wan gemeente na ini a birti fu en èn fu bigin nanga wan bijbelstudie. Now a brada tron wan preikiman di no dopu ete.

Baka den ondrofenitori disi, Richard Ashe nanga John Gibbard ben interview wan tu sma di e du diniwroko gi Yehovah furu yari kaba. Ini a grupu fu sma disi yu ben abi sosrefi wan tu opziener di e go na den difrenti gemeente. Den ben kisi spesrutu leri na a Waktitoren Skoro Centrum èn den ben de studenti na ini difrenti klas fu a Gileadskoro sosrefi. Wan fu den brada disi ben memre san Brada Knorr ben taki na ini wan fu den klas: „Na a Gileadskoro yu o studeri furu. Ma efu a skoro disi meki taki yu tron wan sma di abi heimemre, dan wi no du wi wroko bun. Wi wani yu fu kaba a skoro nanga wan ati di furu nanga lobi èn wan ati di lobi fu gi.” Den brada di e go na den difrenti gemeente, ben gi den studenti fu a klas disi a rai fu poti prakseri na sma èn na sani di den abi fanowdu, so taki den man handri nanga trawan neleki fa Krestes ben du dati, èn fu abi a sakafasi fu du iniwan wroko di den kisi fu du. A no de fu taki dati a rai disi sa yepi den nyun zendeling fu abi furu bun bakapisi na den kondre pe den e go.

Go doro leki fayafaya wrokoman di e du a kotiwroko!

Den sma ben abi na okasi fu arki Stephen Lett, wan tra memre fu a Tiri Skin. A ben hori a moro prenspari lezing fu a programa, namku „Go doro leki fayafaya wrokoman di e du a kotiwroko!” (Mateyus 9:38) Nofo tron a de so taki a ten fu koti a nyanyan na den gron, na wan syatu pisi ten nomo. Den wrokoman abi fu wroko tranga. Disi de moro prenspari now na ini a ten fu a kaba fu a sistema disi! Na ini a pisi ten disi, pe wan bigi kotiwroko e du na yeye fasi, sma kan lasi den libi! (Mateyus 13:39) Brada Lett ben gi den studenti a deki-ati fu no ’lesi fu du a wroko fu den’, ma fu de „fayafaya na ini yeye” èn fu „dini Yehovah leki srafu” na ini a kotiwroko disi di no o du noiti moro (Romesma 12:11). A takiman ben taki san Yesus taki: „Opo un ai èn luku den gron, taki den weti kaba fu go koti den” (Yohanes 4:35). Dan a gi den studenti a deki-ati fu du a kotiwroko fayafaya, fu di den o du ala muiti fu preiki gi sma ala ten èn na ala sei pe den de fu feni, èn fu di den o gebroiki ala okasi fu gi kotoigi na sma. Te den e suku ibri okasi fu gi kotoigi, dan den sa abi furu bun bakapisi. Yehovah na wan Gado di de fayafaya, èn a e fruwakti taki wi alamala de leki en fu di wi e wroko tranga na ini a kotiwroko disi na yeye fasi.—2 Kownu 19:31; Yohanes 5:17.

Na a kaba fu a programa, a fesiman, Brada Jaracz, ben leisi den odi di furu bijkantoro ben seni èn a ben gi den studenti den diploma fu den. Wan fu den studenti ben leisi wan brifi fu a klas, pe skrifi taki den studenti abi furu warderi gi a leri di den kisi. A de krin fu si taki a programa na a kaba fu a di fu 116 klas, ben gi ala sma di ben de drape a deki-ati fu go doro leki fayafaya wrokoman di e du a kotiwroko.

[Faki na tapu bladzijde 25]

WAN TU SANI FU A KLAS

A nomru fu kondre di ben de drape: 6

A nomru fu kondre pe den e go: 20

A nomru fu studenti: 46

Gemiddeld yari di den abi: 34,2

Gemiddeld yari di den de na ini a waarheid: 17,2

Gemiddeld yari di den e du furuten diniwroko: 13,9

[Prenki na tapu bladzijde 26]

A di fu 116 klas fu a Waktitoren Bijbelskoro Gilead di klari a skoro nanga bun bakapisi

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.