Ondrofenitori

Wi ben abi wan switi èn koloku libi fu di wi ben de klariklari fu gi wisrefi

SOLEKI FA MARIAN NANGA ROSA SZUMIGA FRUTERI

’Mi de klariklari fu tyari srakti-ofrandi gi yu’, na so Psalm 54:6 e taki. A prakseri disi na a moro prenspari sani na ini a libi fu Marian Szumiga nanga en wefi Rosa, di e libi na ini Fransikondre. No so langa pasa, den fruteri san ben de wan tu heimarki fu a langa èn bun libi fu den na ini Yehovah en diniwroko.

MARIAN: Mi papa nanga mama ben de Lomsusma fu Polen. Noiti mi papa kisi na okasi fu go na skoro. Ma na a ten fu a fosi grontapufeti, a leri leisi èn skrifi di a ben de leki srudati na ini den gotro di den ben diki na ini gron, pe den ben kibri. Mi papa ben de wan man di ben abi frede gi Gado, ma furu tron kerki ben meki a lasi-ati.

Wan spesrutu sani di ben pasa a no frigiti noiti. Wan dei na a ten fu na orloku, wan domri ben go na a presi pe mi papa nanga den tra srudati ben e tan. Di wan bom ben sutu krosibei fu den, dan a domri ben bruya, a ben dyompo na tapu en asi fu lowe gowe èn a naki na asi nanga wan kroisi fu meki na asi lon. Mi papa skreki srefisrefi fu si taki wan „sma di e teki presi” gi Gado gebroiki wan „santa” sani so taki a ben man lowe gowe moro esi. Aladi mi papa ondrofeni den sortu sani disi, èn aladi a si someni takru sani na ini na orloku, toku dati no meki a bribi di a ben abi na ini Gado kon swaki. Furu tron a ben taki dati na Gado ben meki a komoto na ini na orloku sondro taki wan sani pasa nanga en.

„Pikin Polen”

Na ini 1911, mi papa trow nanga wan meisje fu wan dorpu di ben de krosibei. A meisje disi ben nen Anna Cisowski. Na ini 1919, syatu baka na orloku, mi papa nanga mama froisi fu Polen go libi na Fransikondre èn drape mi papa ben feni wroko fu diki ston-krofaya. Mi gebore na ini maart 1926 na ini Cagnac-les-Mines, na a zuid-westsei fu Fransikondre. Bakaten, mi papa nanga mama go libi na Loos-en-Gohelle pe furu Polsusma ben e libi; a presi de krosibei fu Lens na a noordsei fu Fransikondre. Ala sma drape ben de Polsusma; a bakriman ben de wan Pôlsusma, a sraktiman ben de wan Pôlsusma, èn a priester ben de wan Pôlsusma. A no de fu fruwondru taki sma ben kari a presi disi Pikin Polen. Mi papa nanga mama ben du furu sani na ini a libimakandra. Furu tron mi papa ben orga komediprei, a ben orga sani tu pe sma ben e prei poku èn ben e singi. A ben abi takimakandra doronomo sosrefi nanga a priester, ma a no ben lobi te a priester ben e piki en ibri tron baka taki: „Furu kibritori de.”

Wan dei na ini 1930, tu uma naki na wi doro. Den uma disi ben de Bijbel Ondrosukuman, soleki fa sma ben sabi Yehovah Kotoigi na a ten dati. Mi papa kisi wan Bijbel fu den, wan buku di a ben wani leisi o langa kaba. Boiti dati, mi papa nanga mama ben e leisi den Bijbel publikâsi fayafaya di den uma ben libi na baka. Den sani di mi papa nanga mama ben leisi na ini den publikâsi disi ben naki den ati trutru. Aladi mi papa nanga mama ben abi furu fu du, toku den bigin go na den konmakandra di den Bijbel Ondrosukuman ben orga. Na ini den takimakandra di mi papa ben abi nanga a priester, den ben e haritaki moro nanga moro. Disi go so doro teleki wan dei a priester warskow mi papa nanga mama taki efu den tan abi demakandra nanga den Bijbel Ondrosukuman, dan a ben o seni mi sisa Stéphanie gowe fu kaktisasi (a leri di sma e kisi bifo den e tron wan memre fu a kerki). „No broko yu ede nanga dati”, mi papa taigi en. „Bigin fu tide, mi umapikin nanga den tra pikin sa kon nanga wi na den konmakandra fu den Bijbel Ondrosukuman.” Mi papa hari ensrefi puru fu a kerki èn na a bigin fu a yari 1932 mi papa nanga mama teki dopu. Na a ten dati, sowan 800 Kownukondre preikiman ben de nomo na ini Fransikondre.

Rosa: Mi papa nanga mama ben de fu Hongaria, èn neleki fa a ben de nanga a famiri fu Marian, dan den ben go libi sosrefi na a noordsei fu Fransikondre fu go wroko leki sma di e diki ston-krofaya. Mi gebore na ini 1925. Na ini 1937, wan fu den Kotoigi fu Yehovah, Auguste Beugin, noso Papa Auguste soleki fa wi ben kari en, bigin fu tyari A Waktitoren na ini Hongariatongo gi mi papa nanga mama. Den ben lobi fu leisi den tijdschrift, ma nowan fu den ben tron wan Kotoigi fu Yehovah.

Aladi mi ben yongu ete, toku den sani di mi leisi na ini A Waktitoren ben naki mi ati. Suzanne Beugin, na uma di ben trow nanga a manpikin fu Papa Auguste, ben poti prakseri na mi. Mi papa nanga mama ben gi en pasi fu tyari mi go na den konmakandra. Bakaten, di mi bigin wroko, dan mi papa ati ben e bron te mi ben go na den konmakandra tapu sonde. Aladi mi papa ben de wan man nanga switifasi, toku a ben e kragi taki: „Yu no de dyaso a heri wiki, èn tapu sonde yu e go na den konmakandra fu yu!” Aladi a ben e kragi, toku mi ben e tan go. Sobun, wan dei mi papa taki: „Teki yu pototo dan yu gowe!” A ben de latilati neti kaba. Mi ben abi 17 yari nomo èn mi no ben sabi pe fu go. Te fu kaba mi doro na Suzanne en oso, pe mi krei langalanga watra-ai. Mi tan pikinmoro wan wiki na Suzanne teleki mi papa seni mi sisa fu kon teki mi tyari go na oso. Mi ben de wan syensyen sma, ma san skrifi na ini 1 Yohanes 4:18 yepi mi fu tanapu kánkan. A tekst dati e sori taki „volmaakti lobi e puru frede”. Na ini 1942, mi teki dopu.

Wan warti yeye gudu

Marian: Mi teki dopu na ini 1942, makandra nanga den sisa fu mi, Stéphanie nanga Mélanie èn mi brada Stéphane. A moro prenspari sani na ini a libi fu wi osofamiri ben de a Wortu fu Gado. Wi alamala ben e sidon lontu a tafra aladi mi papa ben e leisi Bijbel gi wi na ini Pôlsutongo. Na mofoneti wi ben gwenti fu arki wi papa nanga mama te den ben e fruteri den sani di den ondrofeni na ini a Kownukondre preikiwroko. Na den momenti disi pe wi ben e kisi deki-ati na yeye fasi, wi leri fu lobi Yehovah èn fu frutrow en moro nanga moro. Fu di mi papa ben kon siki meki a ben musu tapu nanga wroko, ma a ben tan sorgu gi wi na yeye fasi èn na skin sei.

Fu di mi papa ben abi moro ten now, meki wán leisi wan wiki a ben e hori wan bijbelstudie na ini Pôlsutongo nanga den yonguwan fu a gemeente. Drape mi leri leisi Pôlsutongo. Mi papa ben gi den yonguwan deki-ati na tra fasi tu. Wan leisi Brada Gustave Zopfer, di ben abi a frantwortu na a ten dati fu luku a wroko fu Yehovah Kotoigi na ini Fransikondre, kon fisiti wi gemeente. Di a brada disi kon, dan mi papa ben orga wan grupu singiman di ben e singi èn wan tu sma di ben e prei wan Bijbel drama fu a fesa fu Kownu Belsasar pe na anu ben skrifi na tapu a skotu (Danièl 5:1-31). Louis Piéchota ben e prei Danièl, èn bakaten a tanapu kánkan teige den Nazi.a Disi na den sani di ben pasa na wi lontu di wi ben e gro kon bigi. Wi ben si taki ala ten wi papa nanga mama ben du furu na yeye fasi. Tide na a dei mi e frustan taki dati na wan warti gudu di mi papa nanga mama libi gi wi na baka.

Na ini 1939, a di fu Tu Grontapufeti bigin. Na a ten dati a preikiwroko fu Yehovah Kotoigi ben tapu na ini Fransikondre. Wan leisi, srudati ben kon ondrosuku sani na ini a dorpu fu wi. Doisri srudati ben lontu ala den oso. Mi papa ben poti ete wan planga na a ondrosei pisi fu wan krosikasi, èn drape wi ben kibri difrenti Bijbel publikâsi. Ma wan tu fu den buku di ben nen Fascisme of vrijheid (A tiri fu wan diktator, noso fu de fri) ben de na ini a la fu wan tafra. Esi-esi mi papa kibri den buku na ini wan saka fu wan dyakti di ben anga na ini a gadri. Tu srudati nanga wan Fransi skowtu ben kon ondrosuku na oso fu wi. Wi ben de na ini a span fu san ben o pasa. Wan fu den srudati bigin lukuluku na ini den krosi di ben anga na ini a gadri, èn syatu baka dati a kon na ini a kukru pe wi ben de, nanga den buku na ini en anu. A tanapu luku wi, a poti den buku na tapu a tafra èn a go doro fu suku sani na tra presi. Esi-esi mi teki den buku èn poti den na ini wan la pe den srudati ben luku kaba. Noiti a srudati ben aksi fu den buku, a ben de leki a frigiti den buku krinkrin!

Mi e go na ini a furuten diniwroko

Na ini 1948, mi bosroiti fu gi misrefi fu dini Yehovah furuten na ini a pionierwroko. Baka wan tu dei, mi kisi wan brifi fu a bijkantoro fu Yehovah Kotoigi na ini Fransikondre. Na ini a brifi ben skrifi taki mi kisi a wroko fu dini leki wan pionier na ini a gemeente Sedan, krosibei fu Belgia. Mi papa nanga mama ben prisiri fu si taki mi teki a bosroiti fu dini Yehovah na a fasi dati. Ma toku mi papa ben sori mi taki a pionierwroko no ben o de sondro broko-ede. Mi ben o abi fu wroko tranga. Ma a taigi mi taki iniwan ten mi kan kon baka na oso èn taki mi kan de seiker dati a o yepi mi efu mi abi problema. Aladi mi papa nanga mama no ben abi furu moni, toku den bai wan nyun baisigri gi mi. Te now ete mi abi a papira di e sori taki den bai a baisigri èn te mi e luku a papira, dan mi ai e furu nanga watra. Mi papa nanga mama dede na ini 1961, ma den koni wortu fu mi papa de na mi prakseri ete; den wortu dati gi mi deki-ati èn den trowstu mi na ini ala den yari di mi du a diniwroko.

Wan tra sma di gi mi deki-ati na wan Kresten sisa di ben abi 75 yari na ini a gemeente Sedan. A sisa disi nen Elise Motte. Na ini a zomer mi ben e rèi mi baisigri go na den farawe dorpu fu preiki èn Elise ben kon nanga loko fu wroko makandra nanga mi. Ma wan dei den man di ben e tyari den loko, ben tapu nanga a wroko fu di den opo densrefi teige den wrokobasi èn Elise no ben man go na oso. A wan-enkri lusu fu san mi ben prakseri ben de fu tyari en tapu baka fu mi baisigri èn tyari en go na oso; a no ben de wan switi sani fu sidon na baka fu a baisigri. Na a tra mamanten, mi tyari wan kunsu èn mi go teki Elise na en oso. A no ben e go moro nanga loko, èn nanga a moni di a ben pai gi a loko a ben man bai wan waran sani gi wi fu dringi na brekten. Noiti mi ben prakseri taki mi ben o gebroiki mi baisigri fu tyari sma go na presi.

Mi e kisi moro frantwortu

Na ini 1950, den brada aksi mi fu dini leki kringopziener na a heri noordsei pisi fu Fransikondre. Fu di mi ben abi 23 yari nomo, meki mi ben frede di mi yere disi. Mi ben prakseri taki a bijkantoro meki wan fowtu! Ala sortu aksi ben de na mi ede, soleki: ’Mi bun nofo na yeye fasi èn na skin sei fu du a wroko disi? Fa mi o man fiti misrefi te mi o de na wan tra presi ibri wiki?’ Boiti dati, sensi di mi ben abi siksi yari, mi kisi wan siki na mi ai di meki taki mi abi sker-ai. Ala ten mi ben syen srefisrefi fu a sani disi, fu di mi ben broko mi ede fa trawan ben o denki fu mi. Mi ben breiti taki mi kisi yepi fu Stefan Behunick, wan brada di ben klari a Gilead zendelingskoro. Baka di sma ben seni Brada Behunick gowe fu Polen fu di a ben e preiki drape, dan a kisi a frantwortu fu wroko na ini Fransikondre. A deki-ati di a ben abi, naki mi ati trutru. A ben abi dipi lespeki gi Yehovah èn gi a waarheid. Son sma ben feni taki a ben plèi basi gi mi, ma mi leri so furu sani fu en. Di mi si fa a ben du sani sondro frede, dan dati yepi mi fu no frede moro.

A kringwroko meki taki mi ondrofeni wan tu moi sani na ini a preikiwroko. Na ini 1953, den brada aksi mi fu go na wan man di nen Masra Paoli; a ben libi na a zuidsei fu Parijs èn a ben aksi fu kisi A Waktitoren doronomo. Mi miti nanga a man disi èn mi kon sabi taki a ben de nanga pensyun fu a legre. Boiti dati, a ben feni taki den Waktitoren na tumusi moi tijdschrift. A ben fruteri mi taki, baka di a leisi wan artikel fu a Memrefesa fu a dede fu Krestes na ini wan fu den nyun tijdschrift, dan en wawan ben hori a Memrefesa èn a heri neti dati a leisi den Psalm. Wi ben taki-go-taki-kon te latilati bakadina. Fosi mi gowe, dan wi ben taki sosrefi syatu fu dopu. Bakaten mi gi en wan kari fu kon na a kring konmakandra fu wi di ben o hori na a bigin fu a yari 1954. A ben kon, èn Brada Paoli ben de na mindri den 26 sma di teki dopu na a konmakandra dati. Den sortu ondrofenitori disi e gi mi prisiri te now ete.

Rosa: Na ini oktober 1948, mi bigin dini leki wan pionier. Baka di mi dini na ini a foto Anor, krosibei fu Belgia, dan mi kisi a wroko fu go na Parijs, makandra nanga wan tra pionier Irène Kolanski (now a nen Leroy). Wi ben tan na ini wan pikin kamra na ini a birti Saint-Germain-des-Près di ben de mindrisei fu a foto. Fu di mi ben gro kon bigi na wan boitipresi, meki mi ben fruwondru fu si o kefalek den sma fu Parijs de. Mi ben prakseri taki ala sma drape ben sabi furu èn taki den ben koni srefisrefi. Ma di mi ben e preiki gi den, dan heri esi mi kon frustan taki den de a srefi leki tra sma. Furu tron den waktiman na den doro ben yagi wi gowe, èn a ben muilek fu bigin oso-bijbelstudie. Aladi dati ben de so, toku wan tu sma ben teki a boskopu fu wi.

Na wan kring konmakandra na ini 1951, wan brada ben interview mi nanga Irène fu a pionierwroko fu wi. Yu sabi suma na a brada di ben interview wi? Wan yongu kringopziener di nen Marian Szumiga. Mi ben miti en wan leisi kaba, ma baka a kring konmakandra dati wi bigin skrifi brifi gi makandra. Mi nanga Marian ben du sani pikinmoro na a srefi ten; wi ben dopu na ini a srefi yari èn wi ben tron pionier na ini a srefi yari. Ma san ben de moro prenspari na taki wi alatu ben wani tan na ini a furuten diniwroko. Sobun, baka di wi poti a tori disi na ini begi, wi trow na tapu 31 yuli 1956. Fu di mi ben trow now, meki mi heri libi ben kenki; mi ben abi fu libi na wan heri tra fasi now. Boiti taki mi ben musu gwenti dati mi ben de wan wefi now, dan mi ben musu go nanga Marian na ini a kringwroko tu; disi ben wani taki dati ibri wiki wi ben o tan na wan tra oso. Na a bigin a no ben makriki srefisrefi, ma furu prisiri sani ben o miti wi bakaten.

Wan switi libi

Marian: Na ini den yari di wi du diniwroko, wi kisi a grani fu yepi sreka sani gi wan tu kongres. Mi man memre spesrutu den prisiri sani fu wan kongres di ben hori na ini 1966 na Bordeaux. Na a ten dati, a wroko fu Yehovah Kotoigi ben tapu na ini Potogisikondre. Sobun, a kongres ben hori sosrefi na ini Potogisitongo gi den Kotoigi di ben man teki waka kon na Fransikondre. Hondrohondro fu wi Kresten brada nanga sisa fu Potogisikondre ben doro drape, ma a ben de wan problema fu feni wan presi gi den fu tan. Fu di den Kotoigi na ini Bordeaux no ben abi nofo presi na den oso, meki wi ben yuru wan leigi kino-oso di wi ben gebroiki leki sribi presi. Wi ben puru ala den sturu, èn wi gebroiki wan garden fu a podium fu prati a zaal na tu pisi, namku wan pisi gi den brada èn a tra pisi gi den sisa. Wi ben meki sosrefi wan tu presi pe den ben kan wasi èn wi ben poti beki pe den ben kan wasi tra sani. Boiti dati, wi ben poti drei grasi na tapu a gron, èn wi ben tapu dati nanga wan sortu tapu-oli di meki fu krosi. Ala sma ben prisiri nanga a seti disi.

Baka a kongres programa wi ben go na wi brada nanga sisa na a sribi presi. A ben de wan switi sani fa ala sma ben de makandra. Wi ben kisi trutru deki-ati fu den ondrofenitori di den ben abi, aladi den kisi frufolgu furu yari langa! Di den ben gowe na a kaba fu a kongres, wi alamala krei.

Tu yari bifo dati, na ini 1964, mi kisi wan tra grani di den brada aksi mi fu dini leki distriktopziener. Agen mi aksi misrefi efu mi o man du a wroko disi. Ma mi prakseri taki efu den wan di abi frantwortu aksi mi fu teki a wroko disi na mi tapu, dan a de krin taki den e prakseri dati mi man du a wroko disi bun. Mi ondrofeni furu bun sani di mi ben wroko so krosibei makandra nanga den tra kringopziener. Mi leri bun furu fu den. Furu fu den na bun eksempre fu sma di sori pasensi èn di sori fu tanapu kánkan. Den sortu fasi disi de tumusi prenspari na ini Yehovah ai. Mi kon frustan taki efu wi e leri fu abi pasensi, dan Yehovah sabi pe fu feni wi.

Na ini 1982, a bijkantoro aksi wi sosrefi fu sorgu gi wan pikin grupu fu 12 Pôlsu preikiman na ini Boulogne-Billancourt, wan boitipresi fu Parijs. Wi no ben fruwakti dati srefisrefi. Mi ben sabi fa fu taki den theokrasia wortu na ini Pôlsutongo, ma a ben muilek gi mi fu taki a tongo bun. Ma a fasi fa den brada sori mi switifasi èn fa den ben wani wroko makandra nanga mi, ben yepi mi furu. Tide na a dei, sowan 170 preikiman de na ini a gemeente dati, èn sosrefi sowan 60 pionier. Bakaten, mi nanga Rosa go sosrefi na Pôlsu grupu nanga gemeente na ini Oostenrijk, Deinsikondre, nanga Doisrikondre.

A situwâsi fu wi e kenki

Wi heri libi langa wi fisiti den difrenti gemeente, ma fu di a gosontu fu mi go na baka meki wi ben abi fu tapu na ini 2001 nanga a diniwroko fu wi pe wi ben go fu a wan presi na a trawan. Wi ben feni wan oso na ini a foto Pithiviers pe mi sisa Ruth e libi. A bijkantoro sori switifasi gi wi; den poti wi leki spesrutu pionier èn wi no ben abi fu wroko ala den yuru moro, ma wi ben kan du someni leki wi ben man.

Rosa: Na ini a fosi yari di wi tapu nanga a kringwroko, dan disi ben de wan muilek sani gi mi. So wan bigi kenki kon na ini mi libi taki mi ben firi leki mi no warti. Ma dan mi memre misrefi: ’Te now ete mi kan gebroiki mi ten nanga a krakti di mi abi na wan bun fasi fu dini leki wan pionier.’ Tide na a dei mi e prisiri fu wroko makandra nanga den tra pionier na ini wi gemeente.

Ala ten Yehovah sorgu gi wi

Marian: Mi de Yehovah tangi taki Rosa ben de mi patna na ini den 48 yari di pasa. Na ini ala den yari di wi du a kringwroko, a ben de wan bigi yepi gi mi. Noiti a ben taigi mi: ’Mi e winsi taki wi kan tapu nanga a wroko disi èn abi wi eigi oso pe wi kan tan na wán presi.’

Rosa: Son leisi sma ben taigi mi: „Yu no e libi soleki fa ala sma e libi. Ala ten yu e tan nanga tra sma.” Ma san a wani taki trutru fu „libi soleki fa ala tra sma e libi”? Furu tron wi e poti so furu sani na wi tapu di kan hori wi na baka te wi e meki muiti fu du sani na yeye fasi. San wi abi trutru fanowdu na wan bun bedi fu sribi, wan tafra, nanga wan tu tra prenspari sani. Leki pionier wi ben abi wan tu gudu nomo, ma toku wi ben abi ala sani di wi abi fanowdu fu du a wani fu Yehovah. Son tron sma ben aksi mi: „San yu sa du te yu kon owru èn yu no abi yu eigi oso noso wan pensyun fu san yu kan libi?” Dan mi ben taigi den sma den wortu di skrifi na ini Psalm 34:10: „Den wan di e suku Yehovah, nowan bun sani no sa mankeri den.” Ala ten Yehovah sorgu gi wi.

Marian: Iya, dati de so trutru! Fu taki en leti, dan Yehovah gi wi moro leki san de fanowdu. Fu eksempre na ini 1958, den brada ben teki mi fu go na wan internationaal kongres na ini New York, leki a sma di teki presi gi a kring fu wi. Ma wi no ben abi nofo moni fu bai wan ticket gi Rosa. Ne na wan mofoneti wan brada gi wi wan envelop pe „New York” ben skrifi na tapu. A kado di wi ben kisi meki taki Rosa ben kan kon nanga mi!

Mi nanga Rosa no e sari srefisrefi taki wi du Yehovah en diniwroko na ini ala den yari. Wi no lasi noti, ma wi kisi ala sani; wi ben abi wan switi èn koloku libi na ini a furuten diniwroko. Yehovah na wan tumusi bun Gado. Wi kon leri fu frutrow tapu en dorodoro, èn a lobi di wi abi gi en kon moro tranga sosrefi. Son wan fu den Kresten brada nanga sisa fu wi ben abi fu gi den libi, sobun den dede fu di den ben tan getrow. Ma mi e bribi taki ibri dei wan sma kan gi en libi pikinso-pikinso tu te a e gi ensrefi na ini a diniwroko fu Yehovah. Dati na san mi nanga Rosa pruberi fu du te nanga now, èn wi abi a fasti bosroiti fu tan du dati na ini a ten di e kon.

[Futuwortu]

[Prenki na tapu bladzijde 20]

François èn Anna Szumiga nanga den pikin fu den, Stéphanie, Stéphane, Mélanie, nanga Marian na wan pisi ten fu 1930. Marian e tanapu na tapu a sturu

[Prenki na tapu bladzijde 22]

Na tapusei: Mi e pristeri Bijbel publikâsi na wan wowoyo ini Armentières, noordsei fu Fransikondre na ini 1950

[Prenki na tapu bladzijde 22]

Na a kruktu-anusei: Stefan Behunick nanga Marian na ini 1950

[Prenki na tapu bladzijde 23]

Rosa (a lastiwan na a kruktu-anusei) nanga en pionier patna Irène (a di fu fo sma fu a kruktu-anusei), na ini 1951 pe den e meki bekènti taki wan konmakandra sa hori

[Prenki na tapu bladzijde 23]

Marian nanga Rosa tapu a dei bifo den trow

[Prenki na tapu bladzijde 23]

Furu tron wi ben go nanga baisigri na ini a kringwroko