Tapu a Se fu Galilea
WAN pisi tori di skrifi na Markus 4:35-41, e fruteri taki Yesus nanga den disipel fu en go na ini wan boto fu abra a Se fu Galilea. Wi e leisi: „Ne wán kefalek bigi winti bigin wai, èn den skwala ben naki kon na ini a boto, so taki a boto ben e kon furu nanga watra. Ma [Yesus] ben de na bakasei fu a boto, èn a ben didon sribi nanga en ede na tapu [a] kunsu.”
Disi na a wan-enkri presi pe a Griki wortu di wani taki „kunsu”, de fu feni na ini Bijbel. Fu dati ede sabiman no sabi soifri san a wortu disi wani taki, soleki fa a gebroiki dyaso. Furu Bijbel e vertaal a wortu leki „kunsu”. Ma san ben de a sani dati? Fu di Markus e taki „a” kunsu, meki dati wani taki dati a kunsu ben de wan fu den wrokosani na ini a boto. Di sma feni wan boto krosibei fu a Se fu Galilea na ini 1986, dan dati tyari kon na krin san a wortu di Markus gebroiki na ini a buku fu en, ben wani taki kande.
Ondrosuku e sori taki a boto di ben langa aiti meter, ben e waka nanga yepi fu seiri nanga pari. A boto dati ben de wan fisiboto èn na tapusei fu a bakasei pisi fu a boto wan bigi fisinèt ben de di ben hebi srefisrefi. A boto di sma ben feni ben de fu den yari na mindri 100 b.G.T. nanga 70 G.T., èn a kan taki Yesus nanga den disipel fu en ben gebroiki a srefi sortu boto dati. Shelly Wachsmann, wan sabiman di ben wroko makandra nanga a grupu fu sma di ben diki a boto puru na ini a gron, skrifi a buku The Sea of Galilee Boat—An Extraordinary 2000 Year Old Discovery. A man disi taki dati a „kunsu” di Yesus ben sribi na tapu ben de wan saka santi di sma ben poti na ini a boto fu hori a boto na ini balansi. Wan fisiman fu a foto Jaffa, di sabi fa fu fisi nanga a fisinèt di sma ben gwenti gebroiki na ini a ten fu Yesus, ben taki: „Di mi ben yongu, dan den boto di mi ben e wroko na tapu na ini a Mindrikondre Se, ala ten ben abi wán noso tu saka nanga santi na ini. . . Den saka dati ben de na ini a boto fu meki taki a boto no sekiseki tumusi. Ma te wi no ben e gebroiki den saka, dan wi ben e poti den na ondrosei fu a bakasei pisi fu a boto. Te wan sma ben weri, dan a ben gwenti fu kroipi go na ondrosei fu a bakasei pisi fu a boto, èn a ben e gebroiki a saka santi leki wan kunsu fu sribi na tapu.”
Furu sabiman e bribi taki a sani di Markus ben skrifi ben wani taki dati Yesus ben sribi na tapu wan saka nanga santi na ondrosei fu a bakasei pisi fu a boto. Te wan ogri winti ben e wai, dan dati ben de a moro bun presi pe wan sma ben kan go kibri. Awansi fa a kunsu dati ben de, san moro prenspari, na a sani di pasa baka dati. Nanga yepi fu a krakti fu Gado, Yesus meki a krasi se kon tiri baka. Srefi den disipel ben aksi: „Suma na a sma disi, taki srefi a winti nanga a se e du san a e taki?”