„Wan fu den moro bun dei fu mi libi”
„FURU yonguwan abi wan problema di de kande a moro prenspari problema di den abi na frustan sei. Den e firi brokosaka”, na so Beyondblue e taki, wan organisâsi na ini Australia di e kisi moni fu lanti. Ondrosuku e sori taki pikinmoro 100.000 yongusma fu Australia e firi brokosaka ibri yari.
Srefi Kresten yonguwan kan firi brokosaka. Ma a frutrow di furu fu den abi na ini Yehovah, yepi den fu no firi brokosaka moro, èn den ben man pasa den yongu yari fu den nanga bun bakapisi. Fu di den e du dati, meki trawan e kisi wan bun denki fu den. Fa so?
Luku na ondrofenitori fu Claire di abi 18 yari. En nanga en mama na memre fu wan gemeente fu Yehovah Kotoigi na ini a foto Melbourne. Di Claire en papa gowe libi den, dan Claire bigin firi brokosaka. Ma a bribi di a abi na ini en hemel Tata, Yehovah, no kon swaki. Wan dei, Lydia, a datra pe a famiri ben gwenti go, kon luku Claire en mama di ben e siki, fu si fa a ben e go nanga en. Bakaten, a aksi Claire na wan switi fasi efu a ben wani taki a rèi en go na a presi pe wan lo wenkri de. Di den ben de na pasi, dan a aksi Claire efu a ben e hori nanga wan boi. Claire taigi en taki a no ben abi a gwenti fu hori nanga boi, fu di en na wan Kotoigi fu Yehovah. A sani disi fruwondru a datra. Ne Claire taigi en fa Bijbel ben yepi en fu teki koni bosroiti na ini en libi. Te fu kaba Claire aksi a datra efu a ben kan tyari a Bijbel publikâsi kon gi en di ben de wan bigi yepi gi en. A buku dati nen Wat jonge mensen vragen — Praktische antwoorden.
Dri dei baka di Lydia kisi a buku, dan a bel Claire en mama fu taigi en fa a ben prisiri fu leisi a buku. Ne a aksi fu kisi ete siksi fu den buku fu di a ben o gi den na sma fu en wrokope. Di Claire tyari den buku go gi a datra, dan a datra taigi Claire fa a bribi fu en ben naki en ati. Claire aksi a datra efu a ben wani wan bijbelstudie, èn a datra ben feni en bun.
Wan tu mun langa, Claire hori a studie nanga a datra, na a pisi ten te a datra ben e teki pauze fu nyan wan sani. Ne Lydia aksi Claire efu a ben wani taki fu a brokosaka di yonguwan e firi brokosaka, na wan konmakandra di ben o hori. Aladi Claire ben e tweifri fosi, toku a bosroiti fu du dati. Moro leki 60 sma ben de na a konmakandra dati. Fo sabiman tapu a kontren fu a gosontu na frustan sei taki nanga den sma drape. Ala den fo sabiman disi ben de bigisma. Baka dati na Claire ben musu taki. A sori krin o prenspari a de taki yonguwan abi wan banti nanga Gado. A fruklari taki Gado trutru e broko en ede nanga yongusma, èn taki a e yepi ala den sma di e suku yepi nanga trowstu na en. Boiti dati, a taki fu a tranga overtoigi di a abi taki heri esi Yehovah o tyari wan kaba kon na ala sortu siki, efu na siki na skin sei, noso na frustan sei (Yesaya 33:24). San ben de a bakapisi fu a moi kotoigi di Claire ben gi?
„Baka a konmakandra, furu sma kon taigi mi fa a ben naki den ati fu yere fa wan yonguwan e taki fu Gado”, na so Claire ben taki. „Mi prati 23 Jonge mensen vragen-buku. Dri meisje di ben de na a seminari gi mi a telefon-nomru fu den. Wan fu den meisje disi e studeri Bijbel now. Dati ben de wan fu den moro bun dei fu mi libi.”