Wan Ondrofenitori

Memre Wi Kriaman fu Sensi a Ten fu Wi Yongu Yari

SOLEKI FA DAVID Z. HIBSHMAN BEN FRUTERI

„Efu mi kon na a kaba fu mi libi, dan trutru mi howpu taki mi ben de getrow na Yehovah. Mi e begi en fu luku David gi mi. Grantangi Yehovah, taki mi abi David, èn grantangi gi a trowlibi fu wi. ¡A bun sote, wi de so koloku!”

PRAKSERI fa mi ben firi di mi ben feni den lasti wortu disi na ini a deibuku fu mi wefi, baka di mi beri en na ini maart 1992, pe a ben skrifi sani na ini ibri dei. Soso feifi mun bifo, wi ben hori wan fesa, fu di Helen ben de na ini a furuten diniwroko 60 yari kaba.

Mi e memre krinkrin a dei na ini 1931 di Helen nanga mi ben sidon sei na sei na a kongres na Columbus, Ohio, Amerkankondre. Helen no ben owru 14 yari srefi, ma a ben sabi o prenspari na okasi dati ben de, moro leki fa mi ben warderi dati. Syatu baka dati Helen ben sori en faya gi a diniwroko, di en nanga en mama di ben de wan weduwe, ben tron pionier. Disi na fa den e kari Yehovah Kotoigi di e wroko leki furuten evangelie preikiman. Den ben libi a bunbun oso fu den fu go preiki na den boitipresi na a zuidsei fu Amerkankondre.

A Kresten Gudu fu Mi

Na ini 1910 mi papa nanga mama ben froisi nanga den tu nyofi pikin fu den fu na owstusei fu Pennsylvania go na Grove City, na a westsei pisi fu a kondre. Drape den ben pai wan pisi fu a moni di den ben musu pai gi wan pikin oso, èn den ben tron fayafaya memre fu a Gereformeerd Kerki. Syatu baka dati, William Evans, wan Bijbel Ondrosukuman, soleki fa den ben kari Yehovah Kotoigi na a ten dati, ben fisiti den. Papa, di na a ten dati ben abi pikinmoro 25 yari èn Mama di ben de feifi yari moro yongu leki en, ben arki a man disi di ben abi switifasi èn di ben kon fu Wales. Den ben aksi en fu nyan nanga den. Heri esi den ben teki den Bijbel waarheid di den ben leri.

Fu de moro krosibei fu a gemeente, dan Papa ben froisi na osofamiri 40 kilometer go na a foto Sharon. Wan tu mun baka dati, na ini 1911 noso na ini 1912, Papa nanga Mama ben dopu. Charles Taze Russell, a fosi presidenti fu a Waktitoren Genootschap, ben hori a dopu lezing. Mi ben gebore na tapu 4 december 1916, di mi papa nanga mama ben abi fo pikin kaba. Na a ten di mi ben gebore, den ben taki: „Wan tra brada di wi kan lobi.” Fu dati ede mi ben kisi a nen David, di wani taki „A Wan Di Den Lobi”.

Di mi ben owru fo wiki nomo, mi papa nanga mama ben tyari mi go na mi fosi kongres. Na ini a ten dati, mi papa nanga den moro owru brada fu mi ben waka furu kilometer fu go na den gemeente konmakandra, ala di Mama ben tyari mi sisa nanga mi nanga loko. Den konmakandra ben abi wan mamanten nanga wan bakadina programa. Te wi ben de na oso, dan furutron den takimakandra fu wi ben abi fu du nanga artikel di wi ben leisi na ini A Waktitoren nanga Het Gouden Tijdperk, soleki fa den ben kari Ontwaakt! fosi.

Kisi Winimarki fu den Bun Eksempre Di Sma Ben Gi

Furu pelgrim brada, soleki fa den ben kari takiman di ben e reis na a ten dati, ben fisiti a gemeente fu wi. Leki fa a gwenti fu den ben de, dan den ben tan na wi oso wán noso tu dei. Wan takiman di mi e memre bun na Walter J. Thorn di ben memre en Gran Kriaman na ini ’den dei fu en yongu yari’ (Preikiman 12:1). Di mi ben de wan boi, dan mi ben go makandra nanga Papa fu sori a „Photo-Drama der Schepping”, wan kino di ben sori a historia fu a libisma famiri. A ben de na ini fo pisi èn sma ben kan si èn yere en.

Ala di Brada Evans nanga en wefi Miriam no ben abi pikin, toku den ben tron papa nanga mama èn granpapa nanga granmama na yeye fasi gi a famiri fu wi. Ala leisi William ben kari Papa, „Manpikin”, èn en nanga Miriam ben poti a yeye fu du na evangeliewroko, dipi na ini wi ati. Na a bigin fu a di fu 20 yarihondro, Brada Evans ben reis go baka na Wales fu leri sma Bijbel waarheid na ini a birti fu Swansea. Drape sma ben sabi en leki a preikiman fu Amerikankondre.

Na ini 1928, Brada Evans ben stop nanga en grontapu wroko èn a ben bigin preiki na ini den pikin bergi fu West-Virginia. Den tu moro owru brada fu mi, Clarence, di ben abi 21 yari, nanga Carl, di ben abi 19 yari, ben go makandra nanga en. Den fo fu wi di ben de boi, ben de furu yari makandra nanga en na ini a furuten diniwroko. Fu taki en leti, wi alamala ben dini na ini wi yongu yari leki opziener fu Yehovah Kotoigi di e reis. No so langa pasa, Mama en moro yongu sisa, Mary, di abi so wan 90 yari now, ben skrifi mi: „¡Wi alamala de nanga tangi srefisrefi taki Brada Evans ben abi so wan faya gi a diniwroko èn taki a ben fisiti Grove City!” Tanta Mary na ete wan sma di memre a Kriaman fu en sensi a ten fu en yongu yari.

A Go Di Wi Ben Go na den Kongres

Soso Papa nanga Clarence ben man go na a kongres na Cedar Point, Ohio, na ini 1922. A kongres disi ben de trutru prenspari gi a historia. Ma na ini 1924 wi ben abi wan wagi, èn wi heri osofamiri ben go na a kongres na Columbus, Ohio. Papa nanga mama ben fruwakti fu wi leki pikin taki wi ben o gebroiki wi eigi moni di wi ben poti na wan sei, fu pai gi a nyanyan fu wi na a kongres di ben hori aiti dei langa. Mi papa nanga mama ben feni taki ibri memre fu na osofamiri ben musu leri fu sorgu gi ensrefi. So bun, wi ben kweki fowru nanga konikoni èn wi ben sorgu gi oni-godo èn ibriwan fu wi leki boi ben tyari koranti go na sma oso fu kisi moni.

Di a ten ben doro fu a kongres na Toronto, Kanada, na ini 1927, dan wi ben abi wan brada Paul, di ben de wan nyunyun pikin fu siksi mun. Mi ben kisi a wroko fu tan na oso fu luku Paul, makandra nanga wan tanta di ben trow èn di ben musu yepi mi, ala di mi papa nanga mama ben go na Toronto nanga den tra pikin. A pai di mi ben kisi ben de tin Amerkan dala, di mi ben gebroiki fu bai wan nyun paki gi misrefi. Ala leisi wi ben leri fu weri bun krosi gi den konmakandra èn fu sorgu den krosi fu wi bun.

Na a ten fu a kongres ini 1931 di wi ben memre so bun, na Columbus, Ohio, Clarence nanga Carl ben trow èn den ben du a pionierwroko makandra nanga den wefi fu den. Den ala tu ben libi na ini wan oso di den ben meki densrefi èn di den ben kan tyari fu wan presi go na wan trawan. Carl ben trow nanga Claire Houston fu Wheeling, West-Virginia, èn fu dati ede mi ben sidon sei Helen, a moro yongu sisa fu Claire, na a kongres na Columbus.

A Furuten Diniwroko

Mi ben kaba nanga middelbaar skoro na ini 1932, di mi ben abi 15 yari, èn a yari baka dati mi brada Clarence, di ben du a pionierwroko na South Carolina, ben kisi wan wagi di no ben de so nyun moro. Mi ben gi mi nen gi a pionier wroko èn mi ben bigin wroko makandra nanga Clarence nanga en wefi. Na a ten dati, Helen ben pionier na Hopkinsville, Kentucky, èn mi ben skrifi en gi a fosi leisi. Di a ben piki mi baka, dan a ben aksi: „¿Yu na wan pionier?”

Na ini mi brifi — Helen ben kibri en te a dede pikinmoro 60 yari baka dati — mi ben piki: „Mi na wan pionier, èn mi howpu taki mi kan de wan fu ala ten.” Na ini a brifi dati, mi ben fruteri Helen fu a prati di mi ben prati a pikin buku Het Koninkrijk, De Hoop der Wereld (A Kownukondre, a Howpu gi Grontapu) na kerki tiriman nanga krutubakra na a presi pe mi ben du a preikiwroko.

Na ini 1933, Papa ben meki wan tenti gi mi di ben tanapu na tapu wiel — wan pikin wagi di ben de wan tanpresi tu, di ben langa 2,4 meter èn a ben bradi 2 meter, a ben abi skotu di ben meki fu wan tranga krosi di ben fasi na fini postu, èn a ben abi wan fensre na fesisei èn wan na bakasei. Dati ben de a pikin presi pe mi ben tan na ini den fo yari baka dati di mi ben du a pionierwroko.

Na ini maart 1934, Clarence nanga Carl, den wefi fu den, Helen nanga en mama, a sisa fu a wefi fu Clarence, nanga mi — wi nanga wi aiti — ben go na westsei fu go na a kongres na Los Angeles, California. Wan tu fu den ben rèi na ini a pikin wagi fu mi di ben de wan tanpresi tu èn den ben sribi na ini en tu. Mi ben sribi na ini na oto, ala di den trawan ben go yuru wan kamra fu tan. Fu di wi ben abi problema nanga na oto, meki wi ben doro na Los Angeles na a di fu tu dei fu a kongres, di ben o hori siksi dei langa. Drape, na tapu 26 maart, Helen nanga mi ben kan sori sma te fu kaba taki wi ben gi wisrefi abra na Yehovah fu di wi ben dopu na ini watra.

Na a kongres, dan Joseph F. Rutherford, di na a ten dati ben de presidenti fu a Waktitoren Genootschap, ensrefi ben miti nanga ala den pionier. A ben gi wi tranga fu di a ben taki dati wi ben de deki-ati fetiman gi Bijbel waarheid. Na a okasi dati, sani ben seti fu gi pionier wan pikin moni fu yepi den so taki den ben kan go doro na ini a diniwroko fu den.

Kisi Leri Di Ben De gi Mi Heri Libi

Di wi drai kon baka fu a kongres na ini Los Angeles, dan wi alamala ben prati a Kownukondre boskopu nanga sma na ini ala den distrikt fu Zuid-Carolina, Virginia, West-Virginia, nanga Kentucky. Yari baka dati Helen ben skrifi fu a ten dati: „No wan gemeente ben de fu horibaka gi wi, noso mati no ben de fu yepi wi, fu di wi ben de freimdesma trutru na ini wan tra kondre. Ma mi sabi now taki mi ben kisi leri. Mi ben e kon gudu.”

A ben aksi: „San wan yongu umapikin e du nanga a ten fu en te a no de nanga den mati fu en èn te a no de na en eigi oso? We, a no ben de so wan takru sani. Mi no man memre taki oiti mi ben fruferi. Mi ben leisi furu. Ala ten wi ben leisi den Bijbel publikâsi fu wi èn wi ben studeri. Mi ben tan krosibei fu mi mama, èn mi ben e leri fa fu wroko nanga a moni di wi ben abi, fa fu bai sani na wenkri, fa fu puru boro banti na wagi èn poti nyunwan baka, fa fu bori, nai krosi, èn preiki. Mi no e firi sari, èn nanga prisiri mi ben sa wani du disi ete wan tron.”

Na ini den yari dati, Helen nanga en mama ben de tevrede fu libi na ini wan pikin wagi di ben de wan tanpresi tu, ala di en mama ben abi wan moi oso fu ensrefi. Baka a kongres fu Columbus, Ohio, na ini 1937, a gosontu fu a mama fu Helen ben go na baka, èn a ben musu go na ati-oso. A dede na ini a toewijzing fu en na Philippi, West-Virginia, na ini november 1937.

Trow èn a Go Di Mi Go Doro Nanga a Diniwroko

Na tapu 10 yuni 1938, Helen nanga mi ben trow. Wi no ben abi wan bigi seremonia èn a ben hori na ini na oso pe Helen ben gebore na ini Elm Groove, krosibei fu Wheeling, West-Virginia. Brada Evans di wi ben lobi sote èn di ben meki mi famiri kon sabi waarheid furu yari bifo mi ben gebore, ben hori a trow lezing. Baka a trow, Helen nanga mi ben sreka wisrefi fu go du a pionierwroko baka na owstusei fu Kentucky, ma wi ben fruwondru srefisrefi di wi ben kisi wan kari fu du zone-wroko. A wroko disi ben wani taki dati wi ben sa musu fisiti grupu fu Kotoigi fu Yehovah na a westsei fu Kentucky èn na pisi fu Tennessee fu yepi den na ini a diniwroko fu den. Na a ten dati, soso 75 fu den Kownukondre preikiman disi ben de na ini ala den presi di wi ben fisiti.

Na a ten dati, a tranga lobi di sma ben lobi den kondre ben bigin drai a denki fu furu sma, èn mi ben fruwakti taki heri esi den ben o sroto mi fu di mi ben tan neutraal leki Kresten (Yesaya 2:4). Ma fu di sma ben sabi taki mi ben du a preikiwroko, dan den wan di musu luku suma musu du fruplekti srudatiwroko, ben gi mi primisi fu go doro nanga a furuten diniwroko.

Di wi bigin nanga a diniwroko pe wi ben e reis, dan pikinmoro ala sma ben taki wan sani fu a yongu di wi ben yongu so. Na ini Hopkinsville, Kentucky, wan Kresten sisa ben gi Helen odi nanga wan bigi brasa, èn a ben aksi: „¿Yu sabi mi ete?” Na ini 1933 Helen ben gi en kotoigi na wan wenkri di ben de fu en masra. A sisa ben de wan sondeskoro yufrow, ma baka di a ben leisi a buku di Helen ben libi na baka gi en, a ben opo tanapu na fesi a klas fu en èn ben aksi den pikin pardon taki a ben leri den sani di no ben de na ini Bijbel. Baka di a ben gowe libi a kerki, dan a ben bigin preiki Bijbel waarheid gi den sma fu en birti. Helen nanga mi ben dini na a westsei fu Kentucky dri yari langa, èn furutron wi ben tan na a oso fu a sisa dati nanga a masra fu en.

Na ini a ten dati wi ben hori pikin kongres, èn A. H. Macmillan ben kon dini na wan fu den kongres disi. Di Helen ben de wan pikin ete, dan brada Macmillan ben tan na a oso fu a papa nanga mama fu Helen, so bun, di a kongres ben hori, dan a ben bosroiti fu tan nanga wi na ini wi oso di ben langa 5 meter, èn di wi ben kan tyari fu wan presi go na wan trawan. Wi ben abi ete wan bedi na ini na oso. Ensrefi ben memre en Gran Kriaman na ini en yongu yari, ala di a ben gi ensrefi abra na Yehovah na ini 1900, di a ben abi 23 yari.

Na ini november 1941, a wroko fu den brada di ben e reis ben stop wan pisi ten, èn mi ben kisi a toewijzing fu go wroko leki wan pionier na ini Hazard, Kentucky. Ete wan leisi wi ben go wroko nanga mi brada Carl nanga en wefi, Claire. Drape a neef fu Helen, Joseph Houston, ben kon wroko makandra nanga wi èn a ben bigin pionier. A ben tan du a furuten diniwroko pikinmoro 50 yari, èn a dede wantronso fu wan hartaanval na ini 1992 di a ben dini getrow na a edekantoro fu Yehovah Kotoigi na Brooklyn, New York.

Na ini 1943, wi ben kisi a toewijzing fu go na Rockville, Connecticut. Yu ben kan taki, dati disi ben de wan heri tra situwâsi gi Helen nanga mi, fu di wi ben gwenti fu wroko na a zuidsei fu Amerkankondre. Na Rockville, Helen ben hori moro leki 20 fasti oso-bijbelstudie ibri wiki. Te fu kaba, wi ben yuru wan pikin kamra di wi ben gebroiki leki wan Kownukondre zaal, èn disi ben de a bigin fu wan pikin gemeente.

Di wi ben e dini na Rockville, wi ben kisi a kari fu kon na a di fu feifi klas fu a Waktitoren Bijbelskoro Gilead na South Lansing, New York. Wi ben breiti srefisrefi di wi ben si taki Aubrey nanga Bertha Bivens, mati di wi ben sabi fu a ten di wi ben pionier na Kentucky, ben o de na ini a srefi klas leki wi.

Skoro èn a Nyun Toewijzing fu Wi

Ala di wi ben de yongu srefisrefi ete, toku furu fu den sma di ben de na ini a srefi klas leki wi, ben moro yongu srefi. Iya, den ben memre a Gran Kriaman fu den na ini den yongu yari. Wi ben klari a skoro nanga bun bakapisi na ini yuli 1945, na a momenti di a di fu Tu Grontapufeti ben e suku fu kon na wan kaba. Ala di wi ben e wakti fu kisi a toewijzing fu wi, wi ben wroko makandra nanga a Flatbush Gemeente na Brooklyn, New York. Te fu kaba, na tapu 21 oktober 1946, makandra nanga siksi tra sma di ben de na ini a srefi klas leki wi, èn so srefi den Bivens, wi ben frei go na a nyun tanpe fu wi na ini a foto Guatemala, na Guatemala. Na a ten dati, yu no ben abi 50 Kotoigi fu Yehovah ete na ini a heri kondre dati fu Centraal-Amerika.

Na ini april 1949, wan tu fu wi leki zendeling, ben musu froisi go na Quetzaltenango, a foto di, boiti a mamafoto, ben de a moro bigi wan èn a moro prenspari wan na ini a kondre. A foto disi hei 2300 meter moro leki se, èn a loktu na ini den bergi kontren de krin èn a soifri. Helen ben skrifi syatu fu a wroko di wi ben du dya: „A ben de wan grani gi wi fu preiki na ini furu foto nanga dorpu. Wi ben gwenti fu opo fo yuru mamanten èn teki wan bus (di furutron ben abi wan steifi sortu krosi leki fensre) go na wan farawe foto. Drape wi ben e preiki pikinmoro aiti yuru langa bifo wi ben go baka na oso na mofoneti.” Nownow, gemeente de na ini furu fu den presi disi, so srefi siksi gemeente na ini Quetzaltenango.

Baka wan syatu pisi ten den ben abi zendeling fanowdu na Puerto Barrios na a syoro fu a Kribisi Se, a foto, di boiti a mamafoto nanga Quetzaltenango, ben de a moro bigi foto na Guatemala. Den mati fu wi di wi ben lobi sote, den Bivens, èn nanga suma wi ben dini feifi yari na Guatemala, ben de na mindri den wan di ben go na a nyun toewijzing disi. A gowe di den ben gowe ben hati wi trutru, èn wi ben firi sari srefisrefi. Fu di Helen nanga mi wawan ben tan na baka na ini a zendeling oso, meki wi ben froisi go na wan pikin oso. Na ini 1955, Helen nanga mi ben teki wan nyun toewijzing fu go na a foto Mazatenango, di ben de moro waran. Paul, a moro yongu brada fu mi, nanga en wefi Dolores, di ben klari a skoro fu Gilead nanga bun bakapisi na ini 1953, ben dini drape syatu bifo wi ben doro drape.

Na ini 1958 wi ben abi moro leki 700 Kotoigi, 20 gemeente, nanga dri kring na ini Guatemala. Agen Helen nanga mi ben go du a wroko fu reis, èn wi ben fisiti pikin grupu fu Kotoigi èn difrenti gemeente, so srefi a wan na Quetzaltenango. Baka dati, na ini augustus 1959, wi ben kisi wan kari fu go baka na a foto Guatemala, pe wi ben tan na a bijkantoro. Mi ben kisi a toewijzing fu wroko na a bijkantoro, ala di Helen ben go doro nanga a zendingwroko ete 16 yari. Baka dati en srefi ben bigin wroko tu na a bijkantoro.

Moro Blesi

Wan tu yari pasa, a ben gersi leki ala ten mi ben de a moro yonguwan fu den wan di ben dini Yehovah. Now furutron mi na a moro owruwan, soleki di mi ben go na a bijkantoro skoro na Patterson, New York, na ini 1996. Neleki fa mi ben kisi so furu yepi na ini mi yongu yari fu den moro owru wan, na so a ben de wan grani gi mi na ini den someni tenti yari di no pasa so langa ete, fu yepi furu yonguwan di wani memre a Gran Kriaman fu den na ini den yongu yari.

Yehovah e tan blesi en pipel dyaso na ini Guatemala. Na ini 1999, moro leki 60 gemeente ben de na ini a foto Guatemala. Èn na noordsei, zuidsei, owstusei nanga westsei, furu gemeente de ete nanga dusundusun sma di e preiki a bun nyunsu fu Gado Kownukondre. ¡Den moro mendri leki 50 Kownukondre preikiman di ben de di wi ben doro dyaso 53 yari pasa, gro kon tron moro leki 19.000!

Wi Abi Furu Reide fu De Nanga Tangi

No wan sma e libi sondro problema, ma ala ten wi kan trowe wi „hebi na tapu Yehovah srefi” (Psalm 55:22). Furutron a e gi wi krakti nanga yepi fu kompe di lobi wi èn di e horibaka gi wi. Fu eksempre, wan tu yari bifo Helen dede, a ben gi mi wan pikin plakati di ben poti na ini wan lijst èn pe a Bijbel tekst na Hebrewsma 6:10 ben skrifi na tapu: „Gado no de onregtfardiki so taki a no sa memre a wroko fu unu èn a lobi di unu sori gi En, fu di unu ben dini a pipel fu En èn unu e dini den ete.”—Weymouth.

Wan pisi fu a brifi di a ben gi mi makandra nanga a plakati ben taki: „Mi lobi wan, mi no man gi yu furu sani, ma mi kan gi yu ALA MI LOBI . . . A tekst disi e fiti srefisrefi gi yu, èn mi e aksi yu fu poti en na tapu yu tafra, no fu di mi gi en na yu, ma fu di a abi fu du nanga yu na ini ala den yari di yu du getrow diniwroko.” Te na a dei fu tide, a plakati disi de na tapu mi skrifitafra na ini mi kantoro na a bijkantoro fu Guatemala.

Mi dini Yehovah sensi a ten fu mi yongu yari, èn now di mi kon moro owru, mi e taigi Yehovah tangi gi a bun gosontu di mi abi, so taki mi kan du den wroko di mi kisi fu du. Te mi e hori misrefi na a fasti gwenti fu leisi Bijbel, dan furutron mi e si tekst di mi denki taki Helen, di mi ben lobi sote, ben sa poti wan strepi na ondro na ini en Bijbel. Disi ben pasa di mi ben leisi Psalm 48:14 ete wan leisi: „Gado . . . na wi Gado te ten di no skotu, iya fu têgo. Ensrefi sa tiri wi te leki wi dede.”

Mi breiti taki mi kan fruteri trawan a howpu di wi e howpu fu a dei fu na opobaka te sma fu ala den presi di ben de nâsi fosi, sa gi den lobiwan fu den di opo baka na dede, wan switikon na ini wan nyun grontapu. ¡Fa dati de wan moi sani fu howpu na tapu! Furu sma sa abi watra ai fu di den e prisiri èn e memre, taki fu tru Yehovah na a Gado „di e trowstu den wan di brokoskin”.​—2 Korentesma 7:6.

[Prenki na tapu bladzijde 25]

Fu bigin na a kruktu-anusei saka go na ondro na a reti-anusei: Mâ, Pâ, Tanta Eva, nanga mi brada Carl nanga Clarence, na ini 1910

[Prenki na tapu bladzijde 26]

Mi nanga Helen, na ini 1947 èn na ini 1992