San wan lafu kan du

TU YONGU uma na ini den Filippijnen ben e waka na ini wan bisnis kontren na ini a foto Baguio pe den si wan bukuwagi. Di den waka pasa, Helen, a sisa di ben e tanapu na a bukuwagi, lafu switi nanga den. Den yongu uma disi waka go doro, ma den no frigiti fa Helen ben lafu nanga den.

Bakaten di den uma disi ben de na ini wan bus fu go na oso, den si wan bigi bord tapu wan Kownukondre zaal pe jw.org ben skrifi. Wantewante den memre taki den ben si den letter disi tapu a bukuwagi. Ne den ala tu saka komoto na ini a bus, dan den go na a Kownukondre zaal fu luku san na den yuru nanga den dei fu den konmakandra.

Syatu baka dati den tu yongu uma disi go na wan fu den konmakandra. Èn di den waka go na ini a zaal, suma den si drape? Helen, a frow di ben lafu so switi nanga den. Helen e taki: „Di den waka kon miti mi, mi bigin senwe pikinso, bika mi ben aksi misrefi efu na wan sani mi ben du.”

Den yongu uma ben lobi a konmakandra èn den ben lobi de makandra nanga den brada nanga sisa. Di den si wan tu sma e krin a zaal baka a konmakandra, dan den ben wani yepi tu. Bakaten, wan fu den froisi go tan na wan tra kondre. Ma a trawan bigin go na den konmakandra èn a bigin studeri Bijbel. A sani disi pasa soso fu di wan sisa ben lafu nanga den.