„Oema di e wroko tranga gi Masra”
„Taigi Trifeina èn Trifosa odi, oema di e wroko tranga gi Masra.” — ROME SMA 16:12.
1. Fa Jesus diniwroko na grontapoe ben sori taki a de wan blesi gi oemasma?
JESUS diniwroko na grontapoe ben de troetroe wan blesi gi djoe oema. A wroko di a ben bigin nanga en, ben o tjari kowroe-ati, howpoe èn wan njoen wartifasi gi oemasma foe ala ras. A no ben poti prakseri tapoe den gwenti foe a djoe bribi di „ben meki a wortoe foe Gado lasi krakti” (Mateus 15:6). Foeroe foe den gwenti dati ben afrontoe den fondamenti reti di Gado ben gi den oemasma.
A fasi fa Jesus ben de nanga oemasma
2. Foe san-ede wi kan taki, dati a fasi fa Jesus ben de nanga oemasma ben de troetroe wan njoen sani gi a ten dati?
2 Fa wan bigi difrenti ben de foe si a mindri a fasi fa Jesus ben de nanga oemasma èn di foe den djoe kerki tiriman! So leki fa na Encyclopaedia Judaica e taki en, dan den lastiwan disi ben feni taki oemasma „gridi, e kibri e arki sani, lesi, èn djaroesoe.” Den no ben feni en boen te wan man ben abi wan takimakandra nanga wan oema, èn „a ben de wan sjensani gi wan koniman foe taki nanga wan oema na strati” (Jerusalem in the Time of Jesus, di Joachim Jeremias skrifi; teki gersi Johanes 4:27). Wi kan taki moro ete foe na fasi fa den tiriman foe a djoe bribi ben wisiwasi oemasma. Ma san skrifi na tapoesei sa de nofo foe sori taki a fasi fa Jesus ben de nanga oemasma ben de troetroe wan bigi kenki gi a ten dati.
3. Sortoe sani di ben pasa na a ten foe Jesus diniwroko e sori wi taki a ben de klariklari foe leri oemasma den dipi waarheid a jeje fasi?
3 Jesus e gi na volmaakti eksempel fa man kan abi wan waran èn tokoe krin matifasi nanga oemasma. No wawan a ben taki nanga den, ma a ben leri den den dipi waarheid na jeje fasi toe. Foe taki en leti, a fosi sma di Jesus ben meki kon sabi taki a de na Mesias sondro foe hori wan sani a baka, ben de wan oemasma, di ben de wan Samaria oema ete (Johanes 4:7, 25, 26). Boiti dati, dan san ben pasa nanga Marta èn Maria e sori krin, taki tra fasi leki den djoe kerki tiriman, Jesus no ben abi a prakseri taki wan oemasma no ben abi a reti foe libi en patoe nanga en pan foe wan pisiten, so taki a ben kan meki a sabi foe en na jeje fasi kon moro foeroe. Na a okasi dati, Maria ben „teki na boen pisi”, foe di a ben poti jeje sani na a fosi presi (Lukas 10:38-42). Ma wan toe moen a baka, baka di a brada foe den ben dede, a ben de Marta èn no Maria di ben sori wan moro bigi faja foe miti Masra. Fa a e seki wi so srefi na ini a ten disi, te wi e leisi na dipi takimakandra na jeje fasi a mindri Jesus nanga Marta foe a howpoe foe na opobaka! (Johanes 11:20-27) Fa dati ben de wan grani gi Marta!
Oemasma di ben dini Jesus
4, 5. Soema ben waka nanga Jesus na ini a ten foe en diniwroko na ini Galilea, boiti den apostel èn fa den ben dini en?
4 Jesus ben teki a jepi foe oemasma toe di a ben rèis ini a kondre. Na ini en Evangelium Markus e kari „oemasma . . . di ala ten ben waka nanga en [Jesus] èn ben dini en di a ben de ini Galilea” (Markus 15:40, 41). Soema ben de den oema disi èn fa den ben dini Jesus? Wi no sabi ala den nen, ma Lukas e meki wi kon sabi wan toe foe den èn e froeklari na sortoe fasi den ben dini Jesus.
5 Lukas e skrifi: „Sjatoe baka dati a ben go foto foe foto èn dorpoe foe dorpoe, ala di a ben e preiki èn a ben e meki a boen njoensoe foe Gado kownoekondre bekènti èn den twarfoe ben de nanga en, so srefi son oema di ben kon betre foe ogri jeje èn siki: „Maria, di den ben kari Magdalena, di seibi ogri jeje ben komoto na en tapoe, èn Johana, na wefi foe Chuzas, na man di ben teki presi gi Herodes, èn Susana èn foeroe tra oema, di ben dini den nanga den goedoe foe den” (Lukas 8:1-3). Jesus ben feni en boen, taki den oema disi ben waka na en baka èn ben gebroiki den goedoe foe den foe jepi nanga den fanowdoe foe en na skin fasi èn di foe den apostel foe en.
6. (a) Soema ben de nanga Jesus na en kriboi rèis foe go na Jerusalem? (b) Soema ben de nanga Jesus leti bifo a dede, èn fa sonwan foe den ben kisi pai foe disi? (c) San na wan moi sani foe si foe na tori na ini Johanes 20:11-18, te joe e loekoe en foe a sei foe den gwenti foe a djoe bribi?
6 Di den ben kiri Jesus, dan „foeroe oema, di ben waka nanga Jesus komoto foe Galilea foe dini en, ben de drape èn ben tanapoe foe fara e loekoe; a mindri den joe ben abi Maria Magdalena, so srefi Maria, a mama foe Jakobus nanga Joses” (Mateus 27:55, 56). So boen, foeroe getrow oema ben de nanga Jesus na a ten foe en dede. A de so srefi wan moi sani foe si, taki oemasma ben de den fosi kotoigi foe en opobaka (Mateus 28:1-10). Disi kaba ben de wan slag gi den djoe gwenti, bika na ini a djoe bribi den oemasma no ben de warti foe de kotoigi di a wet ben èrkèn. Nanga disi ini prakseri leisi Johanes 20:11-18 èn proeberi foe teki na dipi firi di Maria Magdalena ben moesoe abi di a Meester, di ben opobaka, ben sori ensrefi na en, ben kari en na en nen, èn ben gebroiki en leki en kotoigi foe froeteri den disipel foe en taki a ben de troetroe a libi!
Getrow kresten oema baka na Pinksterfesa
7, 8. (a) Fa wi doe sabi taki oemasma ben de drape di na jeje ben kanti kon a sma tapoe na a Pinksterfesa? (b) Fa kresten oema ben abi prati na ini a panja foe na krestendom?
7 Baka di Jesus ben opo go na hemel, dan oemasma di ben gi densrefi ini a dini foe Gado ben de nanga den getrow apostel na a tapoesodro na Jerusalem (Tori foe den Apostel 1:12-14). A de krin, taki oemasma ben de a mindri den sma di santa jeje ben kanti kon a den tapoe, na a Pinksterfesa. Foe san-ede? Bika, di Petrus ben tjari kon a krin san ben pasa, a ben teki Joèl 2:28-30 taki, pe e taki spesroetoe foe „oemapikin” èn oemafoetoeboi”, ofoe „oemasrafoe” (Tori foe den Apostel 2:1, 4, 14-18). So boen kresten oema di ben kon gebore nanga jeje èn di ben kisi salfoe, ben de wan pisi foe na kresten gemeente foe sensi a ben opo.
8 Oemasma ben prei wan prenspari ròl, ma no a moro bigi ròl ini a panja foe a krestendom. Maria na mama foe Markus, èn na tanta foe Barnabas ben gi, so leki fa a e sori, en bigi oso na a gemeente na ini Jerusalem, so taki den ben kan gebroiki en (Tori foe den Apostel 12:12). Èn a ben de klariklari foe doe disi na wan ten pe froefolgoe ben loesoe kon baka a tapoe den kresten (Tori foe den Apostel 12:1-5). Den fo oemapikin foe na evangelium preikiman Filipus ben abi na grani foe de kresten oema-profeiti. — Tori foe den Apostel 21:9: 1 Korente sma 12:4, 10.
A fasi fa Paulus ben de nanga oemasma
9. Sortoe rai, di ben abi foe doe nanga kresten oema, Paulus ben gi na ini en fosi brifi na den Korente sma, èn foe abi lespeki gi sortoe gronprakseri di ben kon foe Gado, a ben gi oemasma na deki-ati?
9 Sontron den e kragi na apostel Paulus foe misogini, dati wani taki a no ben kan si oemasma na ai èn a no ben froetrow den. A de troe, taki a ben de Paulus di ben gi tranga dati oema moesoe tan ini a reti presi foe den na ini a kresten gemeente. Te ala sani ben waka leki fa a ben moesoe go, dan oemasma no ben sa gi leri na den gemeente konmakandra (1 Korente sma 14:33-35). Efoe wan kresten oema ben hori wan taki na wan konmakandra, foe di no wan kresten man ben de drape ofoe foe di a ben taki profeititori na ondro krakti foe santa jeje, dan a ben moesoe weri wan sani foe tapoe en ede. Disi, ben de „wan marki foe makti”, wan boeweisi di sma ben si, taki na oema ben èrkèn na seti foe Gado foe a makti foe wan edeman. — 1 Korente sma 11:3-6, 10.
10. Foe san wan toe sma ben kragi Paulus, ma san e sori taki a kragi disi falsi?
10 So leki fa a e sori, dan Paulus ben feni en fanowdoe foe memre den fositen kresten na den theokrasia gronprakseri disi, so taki ’ala sani ben sa go leki fa a fiti’ na den gemeente konmakandra (1 Korente sma 14:40). Ma disi wani taki, dati Paulus ben de teige oemasma, so leki fa son sma e taki? Nôno, dati no de so. A no ben de Paulus di, ini a lasti kapitel foe en brifi gi den Rome sma, ben seni waran odi gi neigi kresten oema? A no de so, taki a ben sori dipi warderi gi Feibe, Priska (Priskila), Trifeina èn Trifosa, ala di a ben kari den lasti toe disi „oemasma di e wroko tranga ini Masra”? (Rome sma 16:1-4, 6, 12, 13, 15). Èn a ben de Paulus di ben skrifi ondro krakti foe santa jeje: „Bikasi oen alamala di ben teki dopoe ini Krestes, ben weri Krestes. Joe no abi djoe, noso Griki, joe no abi srafoe, noso friman, joe no abi man, noso wan oema, bikasi oen alamala de wán sma na ini wánfasi nanga Krestes” (Galasia sma 3:27, 28). A de krin, taki Paulus ben lobi èn ben warderi den kresten sisa foe en, di a mindri den joe ben abi Lidia, di ben gi wan moi eksempel foe a lobi di a ben lobi teki sma na en oso na ini wan ten foe tesi. — Tori foe den Apostel 16:12-15, 40; Filipi sma 4:2, 3.
Oemasma di e wroko tranga na ini a ten disi
11, 12. (a) Fa Psalm 68:11 e kon troe letterlijk na ini a ten disi? (b) Na ini sortoe situwâsi foeroe foe wi sisa de, èn foe san-ede den abi wi lobi èn wi begi fanowdoe?
11 Na ini a kresten gemeente na ini a ten disi, joe abi foeroe kresten oema di e „wroko tranga ini Masra”. Foe taki en leti, den nomroe e sori taki „den oema di e froeteri a boen njoensoe de wan bigi legre”, èn den de a moro bigi pisi foe na legre foe Kotoigi di Jehovah e gebroiki na ini a ten disi foe na kaba (Psalm 68:11). Den kresten oema disi di e wroko tranga, ben kisi wan boen nen gi densrefi, foe di den doe moeti foe doe a ròl foe den leki wefi, mama, misi foe oso, sma di e wroko moni, èn so srefi kresten bedinari.
12 Wan lo foe den toemoesi boen sisa disi abi masra di no de na bribi. Den moesoe tanapoe a fesi a situwâsi disi 24 joeroe wan dei. Sonwan doe moeiti jari langa kaba foe de boen wefi, ala di den doro den marki foe de loyaal foetoeboi foe Jehovah. A no ben de makriki, ma den horidoro, ala di den e howpoe ala ten taki den ben „kan wini den [den masra] sondro wan wortoe” nanga jepi foe a boen kresten waka nanga libi foe den. Èn fa a de wan prisiri gi na heri osofamiri te so wan masra e teki san e doe gi en na wan boen fasi! (1 Petrus 3:1, 2) Na a srefi ten, den getrow sisa disi foe troe abi brada lobi èn den begi foe den tra memre foe na gemeente fanowdoe. Neleki fa „na tiri èn safri-ati jeje” di den e proeberi foe sori, de „foe bigi waarde ini Gado ai”, na so a stanfaste soifri retifasi foe den abi foeroe waarde ini wi ai. — 1 Petrus 3:3-6.
13. Foe san-ede wi kan taki, dati den sisa foe wi di e pionier de „oema di e wroko tranga ini Masra”, èn fa sma moesoe si den ini den difrenti gemeente foe den?
13 Sondro degedege sma kan taki foe den sisa di e dini leki pionier, taki den e „wroko tranga ini Masra”. Foeroe foe den abi wan oso, wan masra èn pikin di den moesoe sorgoe gi a sei a preikiwroko foe den. Wan toe foe den e doe pisiten (noso afoedei) wroko, so taki den kan sorgoe gi den fanowdoe foe den na skin fasi. Ala den sani disi e aksi wan boen orga foe sani, wan fasti bosroiti, horidoro èn foeroe tranga wroko. Den kresten oema disi moesoe firi a lobi èn a jepi foe den wan di a situwâsi foe den no e gi den pasi foe gi pionierjoeroe na a kotoigiwroko.
14. (a) Sortoe moi eksempel foe horidoro e kari dja? (b) Sortoe tra kresten oema moesoe kisi prèise, èn foe san-ede? Kari wan toe eksempel foe na presi pe joe e libi.
14 Son kresten oema sori wan aparti horidoro ini a pionierwroko. Na ini Canada, sisa Grace Lounsbury ben tesi foe na fosi leisi na ini 1914 na pionierwroko. Den ben moesoe poeroe en foe na pionierlijst na ini 1918, foe di a ben kon siki, ma na ini 1924 a ben kon baka ini a foeroeten-wroko. Na a ten di wi e skrifi a tori disi, a ben de ete na tapoe a pionierlijst ala di a de 104 jari! Foeroe zendeling sisa di ben kisi leri ini den jari 1940 ini den fosi klas foe na Waktitoren Bijbelskoro Gilead, e dini te now ete, efoe a de now ini a zendingwroko ofoe leki memre foe na Bethelfamiri na ini Brooklyn ofoe na wan foe den bijkantoro foe na Wachttorengenootschap. Ala den kresten oema disi èn so srefi ala den sisa di e gi densrefi ini a Betheldienst, e sori wan jeje foe òfer densrefi èn den de wan boen eksempel. Wi e meki den sabi ini sortoe ten toe taki wi e warderi den?
Wefi foe den opziener di e rèis
15, 16. Sortoe groepoe foe kresten oema spesroetoe e froedini foe wi prèise den èn foe san-ede?
15 Den wefi foe den opziener di e rèis, de wan tra groepoe foe kresten sisa di e froedini waran prèise èn deki-ati. Den lobi sisa disi de klariklari foe go nanga a masra foe den te a e go gemeente foe gemeente, ofoe kring foe kring, so taki den kan bow den brada foe den na jeje fasi. A moro bigi pisi foe den ben libi a switi libi foe wan eigi oso a baka; ibri wiki den e sribi na ini wan tra bedi, èn a no ala ten a de wan boen bedi. Ma den de kolokoe foe teki ala sani di den brada man foe gi den. Den de wan boen eksempel gi den sisa foe den na jeje fasi.
16 Den kresten oema disi de wan boen bigi jepi toe gi a masra foe den, neleki den oemasma di ben dini Gado èn di ben go nanga Jesus „foe waka nanga en èn dini en” (Markus 15:41). Den no man de foeroe nanga a masra foe den, di ala ten „abi foeroe foe doe ini a wroko foe Masra’ (1 Korente sma 15:58). Son wan foe den, so leki Rosa Szumiga na ini Fransikondre, di ben go ini a foeroeten-wroko na ini 1948, ben pak kofroe gi den masra foe den èn den ben rèis nanga den 30 ofoe 40 jari. Den de klariklari foe òfer densrefi gi Jehovah èn gi den brada èn sisa foe den. Den e froedini a warderi, lobi èn begi foe wi.
Wefi foe owroeman
17, 18. (a) Sortoe eigifasi den wefi foe brada di den poti ini dienstposisi moesoe abi? (b) Sortoe ofrandi den wefi foe owroeman e agri foe tjari gi Jehovah èn gi den brada foe den, èn fa tra wefi kan jepi a masra foe den?
17 Di na apostel Paulus ben e kari den eigifasi foe brada di den ben kan poti leki owroeman èn dinari ini a diniwroko, a ben taki foe den oema toe te a e skrifi: „Oemasma moesoe de so srefi serjoesoe, no sma di e taki lei foe trawan, no e doe sani pasa marki ini den gwenti foe den, getrow ini ala sani” (1 Timoteus 3:11). A de troe taki na algemeen rai disi fiti gi ala kresten oema. Ma te wi e loekoe a kontekst, a de krin, taki den wefi foe brada di den poti ini dienstposisi moesoe waka na wan joisti fasi baka na rai.
18 Kolokoe taki disi de so nanga foeroe doesoendoesoen wefi foe kresten opziener. Den no e doe sani pasa marki ini den gwenti èn krosi foe den, den de serjoesoe ini a kresten libi, den e loekoe boen nanga san den e taki, èn na wan opregtifasi den e doe moeiti foe de getrow ini ala sani. Den e agri so srefi foe òfer densrefi èn e feni en boen, taki a masra foe den e gi ten na gemeente afersi, ten di na a tra sei a masra ben sa de nanga den. Den getrow kresten oema disi e froedini wi waran lobi èn deki-ati. Kande moro brada ben sa kan soekoe foe kisi grani na ini den foeroe gemeente foe wi, efoe den wefi foe den nanga sakafasi ben sa de klari foe tjari den sortoe ofrandi disi foe na boen foe ala sma.
„Owroe oema” di de getrow
19. Foe san-ede den e warderi foeroe foe den getrow „owroe oema” srefisrefi ini den gemeente foe den, èn sortoe firi wi moesoe abi gi den?
19 A loekoe di wi ben loekoe den oemasma di den e kari na ini bijbel, meki wi si taki jari no e hori getrow oema foe dini Jehovah. A kefal foe Sara, Elisabèt èn Ana ben de wan boen eksempel foe a tori disi. Ini a ten disi, foeroe kresten oema di de na tapoe den jari kaba de toemoesi boen eksempel foe getrowfasi èn horidoro. Boiti dati, den kan horibaka gi den owroeman na wan sakafasi nanga a jepi di den e jepi den moro jongoe sisa. Foe di den abi foeroe ondrofeni, meki den kan gi koni rai na moro jongoe oema, neleki fa Boekoe gi den a makti foe doe so (Titus 2:3-5). A kan de so, taki wawantron wan owroe sisa abi rai fanowdoe. Efoe dati de so, dan a owroeman di e gi en a rai moesoe ’handri nanga en leki wan mama.’ Owroeman moesoe „gi grani na weduwe” èn efoe a de fanowdoe, den moesoe seti sani foe jepi den oema disi nanga sani na skin fasi (1 Timoteus 5:1-3, 5, 9, 10). Den lobi owroe sisa foe wi moesoe firi foe troe taki wi lobi den èn e warderi den.
Tiriman nanga Krestes
20. Sortoe toemoesi bigi grani foeroe kresten oema ben kisi, èn foe san-ede den tra skapoe kan breiti foe disi?
20 Bijbel e sori krin srefisrefi taki „Gado no e teki sma partèi” ini a tori foe ras noso efoe joe de man noso oema (Rome sma 2:10, 11; Galasia sma 3:28). Èn disi de so toe ini a fasi fa Jehovah e piki sma poeroe di sa demakandra nanga en Manpikin ini a Kownoekondre tiri (Johanes 6:44). Fa a bigi ipi tra skapoe kan de grantangi taki getrow oema, so leki Maria a mama foe Jesus, Maria Magdalena, Priskila, Trifeina, Trifosa èn wan heri ipi tra sma ini na fositen kresten gemeente, abi prati now ini a Kownoekondre tiri, èn kan gi jepi na a tiri dati moro boen nanga a boen froestan di den abi foe den firi èn ondrofeni foe oemasma! Fa disi e sori wan lobifasi foe si sani a fesi èn koni foe a sei foe Jehovah. — Rome sma 11:33-36.
21. San de den firi foe wi ini a ten disi gi „oema di e wroko tranga ini Masra”?
21 Wi ini a ten disi kan teki prati ini den firi foe na apostel Paulus di a ben taki nanga lobi èn nanga warderi foe „den oema disi di ben strei sei na sei nanga mi gi na boen njoensoe” (Filipi sma 4:3). Ala Kotoigi foe Jehovah, man nanga oema, feni en wan prisiri èn wan grani foe wroko sei na sei nanga na ’bigi legre foe oema di e froeteri a boen njoensoe’, ija, „ oema di e wroko tranga ini Masra.” — Psalm 68:11; Rome sma 16:12.
Overzicht aksi
◻ Fa Jesus ben sori taki a no ben teki prati ini a kroetoe di den djoe priester ben kroetoe tori a fesi foe den oemasma?
◻ Fa oemasma di ben frede Gado ben dini Jesus, èn sortoe bigi grani wan toe foe den ben kisi?
◻ Sortoe rai Paulus ben gi di ben abi foe doe nanga den oemasma na den gemeente konmakandra?
◻ Sortoe groepoe foe sisa e froedini wi spesroetoe lobi èn wi jepi, èn foe san-ede?
◻ San wi moesoe firi gi ala den wan ini a ten disi di de „oema di e wroko tranga ini Masra”?
[Prenki na tapoe bladzijde 16, 17]
Oemasma ben dini Jesus nanga den apostel foe en
[Prenki na tapoe bladzijde 18]
Wefi foe den opziener di e rèis èn foe tra owroeman, de wefi di e òfer densrefi èn di e gi warti bijdrage na a wroko foe Gado