Gado e lespeki umasma èn a e gi den grani

DI YESUS ben de na grontapu, dan a fasi fa a ben tyari ensrefi èn fa a ben e du sani ben e sori taki a ben e du sani soifri leki en hemel Tata. A ben taki: „Mi no e du san misrefi wani, ma taki mi e taki den sani disi soleki fa a Tata leri mi. . . . Ala ten mi e du san e plisi en” (Yohanes 8:28, 29; Kolosesma 1:15). Te wi e luku a fasi fa Yesus ben e taki nanga umasma èn fa a ben e si den, dan dati e yepi wi fu frustan fa Gado e si umasma èn san a e fruwakti fu den.

Di wan grupu sabiman luku san skrifi na ini den Bijbel tori fu Yesus en libi, dan den agri taki a fasi fa Yesus ben denki fu umasma ben de heri tra fasi leki fa sma na ini a ten dati ben e denki. Fa so? Wan moro prenspari sani di sma kan aksi densrefi tu na efu den leri fu Yesus e gi umasma moro fri fu teki den eigi bosroiti.

Fa Yesus ben e si umasma

Yesus no ben e si den leki sma di bun soso gi seks. Son Dyu kerki fesiman ben feni taki te mansma ben o taki nanga umasma, dan dati ben o wiki sekslostu. Fu di den ben e si umasma leki wan tesi, meki den no ben e kisi primisi fu taki nanga mansma te den ben de nanga tra sma. Den no ben mag go na strati tu efu den no ben tapu den fesi nanga wan duku. Ma Yesus ben taigi mansma fu no meki sekslostu basi den èn fu abi lespeki gi umasma, na presi fu tapu den fu moksi nanga tra sma.​—Mateyus 5:28.

A ben taki tu: „Efu wan man broko trow nanga en wefi èn a trow nanga wan tra uma, dan a du sutadu èn a sondu teige a wefi” (Markus 10:11, 12). Sobun, a no ben e agri nanga den Dyu leriman fu a ten dati di ben e gi mansma primisi fu broko trow „fu ala sortu sani ede” (Mateyus 19:3, 9). Furu fu den Dyu no ben sabi taki efu wan man e du sutadu, dan a e sondu teige en wefi. Den Dyu leriman ben leri trawan taki noiti sma ben musu taki dati wan masra di du sutadu, sondu teige en wefi. Soso fu wan uma den ben kan taki dati a du sutadu. Wan buku di e fruklari sani fu Bijbel e taki: „Di Yesus taki dati a no soso a wefi musu libi wan krin libi, ma dati a masra musu du dati tu, dan a sori taki umasma musu kisi moro grani nanga lespeki.”

A krakti di den leri fu Yesus abi now: Na ini a Kresten gemeente fu Yehovah Kotoigi, umasma e moksi nanga mansma na den konmakandra. Ma den no abi fu frede taki mansma drape o luku den na wan fasi di no fiti noso taki den o de tumusi fri nanga den. Dati de so fu di Kresten man e sorgu taki den e gi ’den owru uma rai na wan lespeki fasi neleki na den eigi mama èn yongu uma neleki na den eigi sisa. Den e du dati nanga wan krin ati.’​—1 Timoteyus 5:2.

Yesus ben teki ten fu gi umasma leri. Na ini a ten dati, den Dyu leriman no ben e feni en fanowdu taki umasma kisi leri. Ma Yesus ben gi den leri èn a ben gi den deki-ati tu fu taki san den ben denki. A no ben wani meki Maria misi na okasi fu kisi leri èn na so a sori taki umasma no abi fu du osowroko nomo (Lukas 10:38-42). Marta, a sisa fu Maria, ben kisi wini tu fu a leri fu Yesus. Den bun piki di a gi na tapu den aksi di Yesus ben poti baka di Lasarus dede, e sori dati.​—Yohanes 11:21-27.

Yesus ben wani sabi fa umasma ben e denki fu sani. Na a ten dati, furu Dyu uma ben e bribi taki wan sma ben o de koloku soso te a ben abi wan bun manpikin èn efu a kan, wan manpikin di ben de wan profeiti. Di wan umasma bari: „Koloku fu na uma di ben tyari yu na ini en bere”, dan Yesus fruteri en wan moro bun sani (Lukas 11:27, 28). Yesus taki dati a moro prenspari sani ben de fu gi yesi na Gado èn taki wan moro bigi sani ben de leki san sma fu a ten dati ben fruwakti fu umasma.​—Yohanes 8:32.

A krakti di den leri fu Yesus abi now: Leriman na ini a Kresten gemeente feni en bun te umasma e gi piki na den gemeente konmakandra. Den e lespeki lepi umasma di e sori taki den na „sma di e leri trawan bun sani” te den de nanga tra sma, noso te dati no de so (Titus 2:3). Den breiti taki den umasma disi e fruteri trawan a bun nyunsu fu Gado Kownukondre.​—Psalm 68:11. Luku a faki di nen „Na apostel Paulus ben tapu umasma fu taki?”, na tapu bladzijde 9.

Yesus ben broko en ede nanga umasma. Na ini Bijbel ten sma ben feni manpikin moro prenspari leki umapikin. A Talmud e taki disi fu a tori: „Koloku fu a man di abi manpikin èn helu fu a man di abi soso umapikin.” Son papa nanga mama ben e si wan umapikin leki wan bigi hebi. Disi ben de so fu di den ben o abi fu feni wan patna gi en èn den ben o abi fu bai a gudu di na umapikin ben o gi en masra te a ben o trow. Boiti dati, den no ben o abi fu fruwakti taki a ben o sorgu den te den ben kon owru.

Yesus ben sori taki a libi fu wan pikin meisje ben de prenspari leki a libi fu wan boi. A ben gi Yairus umapikin wan opobaka en a du a srefi sani nanga a manpikin fu wan uma fu Nain di masra ben dede kaba (Markus 5:35, 41, 42; Lukas 7:11-15). Yesus dresi wan uma di ben abi wan ogri yeye di ben e siki en tina-aiti yari. Baka dati a kari na uma „wan bakapikin [noso umapikin] fu Abraham”. Na ini furu Dyu buku den wortu ’umapikin fu Abraham’ no de fu feni (Lukas 13:10-16). Fu di Yesus ben taki na so wan lespeki èn switi fasi nanga na uma, meki a no si en nomo leki wan trutru memre fu a Dyu libimakandra, ma a ben si tu taki a ben abi wan tranga bribi.​—Lukas 19:9; Galasiasma 3:7.

A krakti di den leri fu Yesus abi now: Wan odo fu Asia e taki: „Te yu e kweki wan umapikin, dan a de neleki yu e trowe watra gi den bromki fu den birtisma.” Lobi-ati Kresten papa no e meki a denki disi abi krakti na den tapu, ma den e sorgu bun gi ala den pikin fu den, awinsi den na manpikin noso umapikin. Kresten papa nanga mama e sorgu taki ala den pikin fu den e kisi bun skoroleri nanga datrayepi.

Yesus ben frutrow umasma. Sma ben feni taki te wan uma ben kon na fesi a Dyu krutubangi fu gi kotoigi, dan dati ben de a srefi leki te wan srafu ben o gi kotoigi. A historia skrifiman Josephus fu a fosi yarihondro ben gi leki rai: „No bribi den buweisi fu umasma, fu di yu no kan frutrow den èn den abi a gwenti fu du sani di den no mag du.”

Ma Yesus ben du sani tra fasi. A meki umasma fruteri trawan taki a kisi wan opobaka (Mateyus 28:1, 8-10). Aladi den reti-ati uma disi ben e si nanga den eigi ai fa sma kiri a Masra fu den èn fa a beri, toku den apostel no ben wani bribi san den umasma disi fruteri den (Mateyus 27:55, 56, 61; Lukas 24:10, 11). Ma di Krestes kisi wan opobaka, a sori ensrefi na umasma fosi. Na so a sori taki a ben e si den leki sma di ben kan gi kotoigi neleki den tra disipel fu en.​—Tori fu den apostel 1:8, 14.

A krakti di den leri fu Yesus abi now: Na ini den gemeente fu Yehovah Kotoigi, mansma di abi frantwortu e sori taki den e hori umasma na prakseri fu di den e arki den te den abi wan sani fu taki. Kresten masra e ’gi grani’ na den wefi fu di den e arki den bun.​—1 Petrus 3:7; Genesis 21:12.

Bijbel kan meki umasma koloku

Mansma di e teki na eksempre fu Krestes, e lespeki umasma èn den e gi den a fri fu teki den eigi bosroiti leki fa Gado ben abi na prakseri biginbigin (Genesis 1:27, 28). Kresten masra no e feni taki mansma bun moro umasma, ma den e gi yesi na Bijbel di e meki taki a trowpatna fu den kan de koloku.​—Efeisesma 5:28, 29.

Di Yelena bigin studeri Bijbel, a no taigi sma taki en masra no ben libi bun nanga en. A masra ben kweki na ini wan kontren pe sma ben gwenti fu du ogri, fu teki trowmisi tyari gowe nanga tranga èn fu fon sma. Yelena e taki: „San mi leri fu Bijbel, gi mi krakti. Mi ben frustan taki wan sma ben de di lobi mi trutru, di ben lespeki mi èn di ben broko en ede nanga mi. Mi ben frustan tu taki efu mi masra ben o studeri Bijbel, dan a ben o kenki a fasi fa a ben e libi nanga mi.” Na so a pasa tu di en masra agri fu studeri Bijbel te fu kaba èn a teki dopu leki wan Kotoigi fu Yehovah. Yelena e taki: „A tron wan bun eksempre fu di a ben man dwengi ensrefi. Wi leri fu gi makandra pardon nanga wi heri ati.” San Yelena kon si? „Bijbel yepi mi trutru. Mi abi a firi taki mi masra abi mi fanowdu èn taki a e gi mi kibri.”​—Kolosesma 3:13, 18, 19.

A no Yelena wawan kon si disi. Milyunmilyun Kresten uma de koloku fu di den nanga den masra e du muiti fu fiti Bijbel na ini den trowlibi. Te den de nanga tra Kresten, den e kisi lespeki nanga trowstu èn den kan teki den eigi bosroiti.​—Yohanes 13:34, 35.

Kresten man nanga uma e agri taki den na „soso sani” èn fu dati ede den no man fri densrefi fu sondu èn den no man du sani bun dorodoro. Ma te den kon krosibei na den lobi-ati Gado èn Tata Yehovah, dan den abi a howpu fu „kon fri fu wan skin di e dede” èn „den o kon fri na wan tumusi moi fasi leki pikin fu Gado”. Disi na wan moi howpu gi man nanga uma di Gado lobi.​—Romesma 8:20, 21.